Teitur Þórðarson rekinn frá KR

Það kemur engum að óvörum að Teitur Þórðarson sé rekinn frá KR eftir það gengi sem blasir við þessu forna stórveldi í Vesturbænum. Eftir ellefu umferðir hefur KR enda aðeins sjö stig og situr á botninum og hefur gert vikum saman - liðið hefur unnið aðeins einn leik í sumar, gert fjögur jafntefli og lotið í gras sex sinnum, meira að segja fyrir nýliðum HK, sem var sennilega hámark skelfingarinnar í sumar í Vesturbænum.

Þetta er skelfileg staða fyrir lið og stuðningsmenn með sjálfstraust, sem eru vanir öllu öðru en botnstöðu vikum og mánuðum saman yfir sumarið. Með þann mannskap sem KR hefur yfir að ráða var gert ráð fyrir toppbaráttu og alvöru krafti sem gerði það að verkum að liðið væri meistaraefni. Það hefur aldrei í sumar sýnt slíka snilldartakta og lengst af hefur allt farið úrskeiðis sem getur farið úrskeiðis. Þessi niðurstaða ættu því varla að teljast stórtíðindi í sjálfu sér þó þau veki auðvitað athygli.

Ósigurinn í Kópavogi var eins og ég sagði hér áður eflaust botnpunktur KR í sumar. Þá skrifaði ég þessa færslu um þann sögulega ósigur. Held að margir í Vesturbænum hafi gefist upp á leiðsögn Teits þá þegar en honum voru gefnir fleiri sénsar. Það var augljóslega eitthvað stórlega að klikka. Nú á Logi Ólafsson, fyrrum þjálfari karlalandsliðsins, að taka við. Það verður fróðlegt að sjá hvort honum takist að bjarga Vesturbæjarveldinu frá falli.

Teitur rekinn - Logi stjórnar KR út leiktíðina

Athugasemdir

[Ágúst Ásgeirsson, 30.7.2007 kl. 19:15]

Þetta finnast mér slæm tíðindi, þjáflari liðs sem ekkert getur er látinn taka pokann. Þetta er að verða gömul lumma hjá KR, stutt síðan þeir létu Magga Gylfa fara, fínan þjálfara. Teitur er fagmaður og hefur sannað sig víða um heim, en það er eins og máltækið segir; enginn verður spámaður í sínu eigin landi.

Ég hef lengi verið þeirrar skoðunar að það sé vitlaus ráðstöfun að reka þjálfarann. Hefur sú ráðstöfun yfirleitt nokkru skilað? Hafa menn orðið eitthvað bættari?

Nei, miklu frekar er að reka leikmennina. Skipta um liðið inni á vellinum því það er ekki að standa sig. Já, og skipta um stjórn félags, eða hvað ætli núverandi stjórn KR-deildarinnar hafi oft rekið þjálfara á undanförnum 10 árum eða svo?

Þegar ég keppti í íþróttum hvarflaði það aldrei að mér eða félögum mínum í ÍR að kenna þjálfaranum ef ekki gekk nógu vel. Það var okkur sjálfum að kenna, engum öðrum og skýringin annað hvort æfingaleysi eða eigin taktísk mistök. En það er nú önnur saga og ekki laust við að gömul ÍR-hjörtu finni til með vinum sínum í KR með stolt sitt á botninum.