Borgarfulltrúar sættast - farsæl niðurstaða

Það er ánægjulegt að borgarfulltrúar Sjálfstæðisflokksins hafi náð sáttum í REI-málinu. Er ekki hægt að sjá annað en að Vilhjálmur Þ. Vilhjálmsson, borgarstjóri, hafi gengið að meginkröfum annarra borgarfulltrúa Sjálfstæðisflokksins. Hann hefur fórnað Hauki Leóssyni sem stjórnarformanni Orkuveitunnar. Eins og komið er málum var varla annað við hæfi en að borgarfulltrúi leiði þessa valdamiklu stjórn og haldið verði betur á málum en gert var áður.

Það er auðvitað sérstaklega gott mál að borgin muni selja hlut sinn í REI. Þetta er sterk vísbending í þá átt að svona verklag eins og stefndi í með REI sé ekki liðið innan Sjálfstæðisflokksins og greinilegt að borgarfulltrúarnir hafi náð sínu fram um að svona verði ekki staðið að verkum. Það var nógu ömurlegt að fylgjast með verklaginu í stjórn Orkuveitu Reykjavíkur í valdatíð Alfreðs Þorsteinssonar þó að sjálfstæðismenn fari ekki að apa þá vitleysu eftir alveg hráa. Þetta var mikilvægasti þáttur málsins. Í gær kallaði ég eftir sölu og ég fann ekki betur en að fjölmargir sjálfstæðismenn um allt land væru sama sinnis.

Það voru efasemdir um það í dag hvort að borgarstjórinn myndi fórna Hauki Leóssyni sem stjórnarformanni. Hann stóð varla frammi fyrir öðrum kosti betri en að gera það tel ég. Þetta er farsæl lending og það er auðvitað eðlilegt að snúið verði af leið þess sem gert hefur verið í Orkuveitunni og vonandi verður þetta fyrsta skrefið á þeirri leið. Mikil ólga var á bakvið tjöldin innan Sjálfstæðisflokksins í upphafi kjörtímabilsins við val á stjórnarmönnum í OR. Þorbjörg Helga Vigfúsdóttir var sett úr stjórnarsæti eins og flestir muna og í staðinn settir tveir menn til formennsku sem voru utan borgarstjórnar. Það er gott að tekið verði á því.

Vilhjálmur Þ. Vilhjálmsson, borgarstjóri, hefur brugðist við þeim vanda sem uppi var. Vonandi hefur hann lært eitthvað á þessu klúðri sínu síðustu dagana og vonandi geta sjálfstæðismenn í Reykjavík horft framhjá þessum átökum og leiðindum og haldið áfram sínum verkum. Það má þó búast við að sá orðrómur verði lífseigur úr þessu að borgarstjórinn sé orðinn einangraður. Þetta mál hefur verið vont fyrir Sjálfstæðisflokkinn. Mestu skiptir þó að því sé lokið með farsælum hætti. Framhald mála verður svo að ráðast í kjölfarið.

Stefnt að því að selja hlut Orkuveitunnar í REI

Athugasemdir

[Óðinn Þórisson, 8.10.2007 kl. 16:29]

Stefán það kann að vera að það sé rétt hjá þér að þetta sé farsæl lausn - einhvernvegin finnst mér það ekki.
Mín skoðun hefur ekkert breyst Villi vinstri hefði átt að segja af sér og axla ábyrgð á þessu en því miður gerði hann það ekki.
Framhald mála segir þú ætli það verði ekki að reyna byggja upp traust almennings í garð Villa ef það er þá hægt.
Það að henda Hauki út er algjört aukaatriði.

Með bestu kveðju úr Kópavoginum.
Óðinn Þórisson

[Stefán Friðrik Stefánsson, 8.10.2007 kl. 16:35]

Sæll Óðinn

Takk fyrir kommentið. Þegar að ég tala um farsæla niðurstöðu er ég að tala um söluna á hlut borgarinnar í REI. Hvað varðar Vilhjálm er það sú staða sem ég meinti að yrði að ráðast. Hann verður að vinna við það að endurvinna sér traust sem hann hefur misst. Þetta er að stóru leyti undir honum komið. En hans staða er mjög slæm. Það blasir vel við. Bendi á fyrri færslur mínar um Vilhjálm. Ég hef í engu skipt um skoðun. Ég tel að hann eigi ekki að leiða flokkinn í kosningum aftur.

mbk.

[Sigurjón Þórðarson, 8.10.2007 kl. 16:40]

Það kemur nokkuð á óvart að þú sért viss um niðurstaðan sé farsæl en ég var einmitt að leggja á sjálfstæðismann sem það bókstaflega sauð á vegna yfirlýsingar borgarstjórnarflokksins um þessa svokölluðu sátt.

Það er greinilega mikil tortryggni enn í gangi um hvaða eignir Orkuveitu Reykjavíkur fyljga inn í REI og síðan brot á jafnræði borgaranna við kaup á eigum og gæðum hins opinbera.

Hann orðaði það mjög svo kröftuglega "Má maður virkilega búa við það ráðhúsið verði selt til fjárglæframanna eina nóttina á einhverjum sérkjörum af Villa og Binga og síðan á að verða einhver sátt um það?"

[Stefán Friðrik Stefánsson, 8.10.2007 kl. 16:45]

Ég held að enginn sé sáttur, Sigurjón, yfir þessu máli öllu. Hef ég sjálfur enga tæpitungu talað hér um stöðu Vilhjálms. En það er undir honum sjálfum komið hvort hann getur endurvinnt sér traust til starfa. Þetta veltur allt á því hvort hópurinn geti unnið saman með þeim hætti sem var fyrir þetta mál.

Hvað mig varðar var þetta spurning um hugmyndafræði. Var á móti því að borgin tæki þátt í þessu fyrirtæki. Reiði mín snerist að því verklagi borgarstjórans og nánustu hjarðar hans. Kaupréttarsamningarnir eru vissulega vont mál, en það er framhald enn verra máls að mínu mati.

mbk.

[Hanna, 8.10.2007 kl. 20:28]

Mér finnst þetta..... ég veit ekki enn hvort ég á að segja grátlegt eða hlægilegt, "Borgarfulltrúar sættast - farsæl niðurstaða".  Mér finnst svipurinn á drengnum lengst til vinstri á myndinni að ofan segja allt sem segja þarf.  Hann skammast sín og það gera örugglega fleiri.  Þetta er ekki farsæl niðurstaða á klúðri - þetta er annað hvort hlægilegt eða grátlegt.

[Stefán Friðrik Stefánsson, 8.10.2007 kl. 20:36]

Mér finnst þetta aðallega glott á andliti Gísla Marteins. Óánægjuöflin innan Sjálfstæðisflokksins höfðu jú sigur í málinu. Hluturinn í REI verður seldur og borgarfulltrúi verður stjórnarformaður OR. Það voru stærstu ólgumálin finnst mér. En þetta mál er sannarlega allt vont. Fátt gott við það. Sjálfur hef ég skrifað talsvert um málið og ég held að allir geti lesið þær skoðanir. Ég hef aldrei í málinu varið neitt í því, en hugmyndafræðilega var ég andvígur því að borgin færi í þennan rekstur og fagna því auðvitað að hún dragi sig því úr honum. Að stóru leyti var þetta hugmyndafræðilegur ágreiningur.

mbk.