Hikandi bandarísk afsökunarbeiðni

Það er ánægjulegt að bandaríska heimavarnarráðuneytið hafi sent út yfirlýsingu þar sem meðferðin á Erlu Ósk Arnardóttur er hörmuð. Þó er ekki hægt að segja annað en að afsökunarbeiðnin sé nokkuð hikandi. Orðalagið að harma hlutina er ekki eins afgerandi og t.d. að segjast biðjast afsökunar á því. Þannig að þetta verður öllu bragðlausari afsökunarbeiðni en ella hefði getað orðið, þar sem greinilega er reynt að halda andlitinu diplómatískt.

Þetta er auðvitað vandræðalegt mál fyrir bandarísk yfirvöld og til skammar að íslenskur ríkisborgari fái slíka meðferð. Öðru hefði gilt ef Erlu hefði einfaldlega verið vísað úr landi og ekkert meira hefði gerst. Vissulega hafði Erla Ósk brotið af sér skv. bandarískum lögum en meðferðin sem hún sætti í flugstöðinni er af slíkum toga að til skammar telst. Það að leiða fólk, sem hefur ekki meira af sér gert en þetta, í gegnum flugstöðina hlekkjað á höndum og fótum er til skammar af landi sem vill vera í fylkingarbrjósti í heiminum.

Það væri auðvitað eðlilegast að Erla Ósk fari í mál við bandarísk yfirvöld vegna þessa, telji hún það rétt. Sá á einhverri vefsíðunni að hún hugleiðir málaferli. Væntanlega geta það verið einu eðlilegu endalokin á þetta mál, en ekki þessi hikandi afsökunarbeiðni.

Harma meðferðina á Erlu Ósk

Athugasemdir

[Jón Ingi Cæsarsson, 19.12.2007 kl. 16:12]

Það er engin afsökunarbeiðni í þessari yfirlýsingu...því miður...innatómt kjaftæði og orðagjalfur hjá Kananum enda ekki við öðru að búast.

[Sigurjón, 19.12.2007 kl. 16:14]

Ég verð að vera sammála síðasta ræðumanni.

[Stefán Friðrik Stefánsson, 19.12.2007 kl. 16:17]

Þeir vissulega ganga skrefið smáleið með því að segjast harma meðferðina. Þetta er svona i am sorry but this is just how it goes afsökun. Hikandi og marklaus í sjálfu sér, diplómatísk tilraun til yfirklórs. Alþekkt. Held að skrif mín um þetta mál hafi verið gagnrýni á vinnubrögðin í Bandaríkjunum, ekki hef ég varið svona verklag allavega. Erla Ósk á bara að höfða mál og sækja sinn rétt. Það er eina leiðin fyrir hana tel ég. Hvað ætli að Ingibjörg Sólrún geri í málinu? Ætlar hún að koðna niður bara til að hafa bandaríkjamenn góða vegna þessa ruglmáls sem öryggisráðsumsóknin er?

[Ásdís Sigurðardóttir, 19.12.2007 kl. 16:41]

Harma og harma, veit ekki??  kemur í ljós.  Kær kveðja norður.

[Högni haraldsson (IP-tala skráð) 19.12.2007 kl. 17:33]

Er það bara til skammar ef íslenskur ríkisborgari fái svona meðferð?