Umdeild verðlaun fyrir íþróttamann ársins

Það er greinilegt að verðlaunagripur íþróttamanns ársins sem afhentur var í fyrsta skipti fyrir ári eru mjög umdeild. Mér finnst hann forljótur og fannst ekki annað við hæfi en að fjalla um það hér. Flestir sem kommentuðu tóku undir það og hef ég heyrt í mörgum öðrum sem eru sama sinnis. Þeir eru fáir sem skrifa beinlínis til að vekja athygli á þessum verðlaunagrip með því að reyna að benda á fegurðina í honum, enda mjög erfitt. Það er varla við því að búast að aðrir en íþróttafréttamenn eða sá sem hannaði þessi ósköp reyni að gera það.

Það er með ólíkindum að samtök íþróttafréttamanna hafi ekki staðið betur að vali á verðlaunagrip í staðinn fyrir þann gamla góða sem þjónaði sínu hlutverki í hálfa öld og var stórglæsilegur í alla staði. Hann var sómi fyrir hvern sem hann vann. Þeir voru stoltir með fagran bikar í höndunum og brostu breitt. Aðeins hafa tveir íþróttamenn hampað þessum nýja bikar; Guðjón Valur Sigurðsson og Margrét Lára Viðarsdóttir. Bæði verðskulduðu titilinn mjög og voru vel að honum komin. Hinsvegar fann ég svolítið til með þeim að þurfa eiginlega að fara heim með þetta ferlíki.

Ég veit ekki hvað sá var að hugsa sem hannaði þessi ósköp og eins þeir sem samþykktu að þetta yrði með þessum hætti. Þetta er forljótur verðlaunagripur og samtök íþróttafréttamanna á að sjá sóma sinn í að láta þennan hverfa fljótlega og finna annan sem er betur við hæfi.

Athugasemdir

[Óttarr Makuch, 30.12.2007 kl. 01:11]

Láttu nú ekki svona Stefán, hann gæti alveg sómað sér vel sem blómaundirstaða þegar búið væri að hylja hann með ljósum eða dökkum dúk.

Þessi gripur er arfa ljótur svo ekki sé nú meira sagt og hann er eiginlega eins mikið stofuópríði og postulíns diskarnir sem félög og stofnanir hafa stundum gefið á merkis afmælum.

Tek heilshugar undir það hjá þér að þessum grip ætti að skipta út hið snarasta.  En ekki má gleyma að setja bæði nöfnin á sem hafa unnið þann mikla heiður þ.e íþróttamann ársins, á nýja gripinn.

[Sigurður Viktor Úlfarsson, 30.12.2007 kl. 03:18]

Ósammála.  Þetta er glæsilegur verðlaunagripur og Margrét Lára svo sannarlega vel að honum komin.

[Jónína Dúadóttir, 30.12.2007 kl. 07:54]

Mér finnst hann í sjálfu sér ekkert svo ljótur, hann er bara allt of hrikalega stór. Skil ekki tilganginn með því....

[Kristján Pétursson, 30.12.2007 kl. 21:55]

Mér finnst þessi verðlaunagripur frekar ósmekklegur.Sá gamli var ágætur