Afreksmaðurinn á hæsta tindinum fellur frá

Afreksmaðurinn mikli, Sir Edmund Hillary, er látinn, tæplega níræður. Það leikur enginn vafi á því að Hillary var einn helsti afreksmaður tuttugustu aldarinnar. Honum tókst það sem mörgum hafði dreymt um áður og reynt, að sigrast á hæsta tindi veraldar - klífa Everest-tind og standa þar sigursæll. Afrek hans og Tenzing Norgay verður lengi í minnum haft - um það hafa verið skrifaðar margar bækur og sagðar goðsagnakenndar sögur.

Litlu munaði þó að sá heiður yrði ekki þeirra, heldur myndu Tom Bourdillon og Charles Evans taka tindinn. Mögnuð atburðarás leiddi til þess að Hillary, sem þá var aðeins 33 ára að aldri, komst í sögubækurnar sem ofurhuginn mikli er náði takmarkinu eftirsótta. Hef alltaf haft mikinn áhuga á þessu afreki og lesið mikið um það og séð heimildarþætti um söguna á bakvið afrekið. Edmund Hillary var auðvitað frábær sagnamaður og enginn gat auðvitað betur sagt söguna á bakvið afrekið, bæði með ævintýralegum og sönnum blæ.

Það er rúmur áratugur síðan að fyrstu Íslendingarnir klifu Everest-tind. Hallgrímur Magnússon, Einar Stefánsson og Björn Ólafsson sáu heimsmyndina öðrum augum maímorgun einn árið 1997 á þessum hæsta tindi veraldar. Haraldur Örn Ólafsson, ævintýramaður og pólfari, náði tindinum ennfremur í upphafi nýrrar aldar. Held að ekki hafi fleiri Íslendingar reynt við tindinn. Sennilega erum við eina þjóðin, ein af fáum allavega, sem hefur náð þeim árangri að allir sem reyni við hann séu sigursælir.

Sir Edmund Hillary markaði söguleg skref á hæsta tindi veraldar - þau fyrnast ekki þó snærinn hafi fyrir margt löngu þurrkað út ummerki farar hans. Afrek hans er eitt hið mesta í manna minnum.

Edmund Hillary látinn

Athugasemdir

[Eiríkur S. (IP-tala skráð) 11.1.2008 kl. 09:01]

Það eru ekki allir landar vorir sigursælir í baráttu sinni við tindana í Himalaya. Held það séu ca. 15 ár síðan 2 Íslendingar týndust á Nanga Parbat í Kashmir og hafa ekki fundist enn.

 En Hillary var maðurinn. Það var reyndar hvorki sannað né afsannað að George Mallory hefði náð á tindinn 1924, þannig við leyfum honum kannski að njóta vafans?

En Hillary og Reinhold Messner eru sennilega mestu fjallamenn 20. aldarinnar.

Kveðja, Eiríkur S.