Sjálfstæðiskonur álykta gegn Árna Johnsen

Ég vil lýsa yfir fullum stuðningi mínum við ályktun stjórnar Landssambands sjálfstæðiskvenna um Árna Johnsen, sem send var til forystu Sjálfstæðisflokksins nú síðdegis. Það er hið eina rétta að flokksmenn tali hreint út um afleita endurkomu Árna í stjórnmálin í ljósi alls sem gerst hefur. Ég persónulega sé mér ekki fært að tala máli þessa manns sem fulltrúa Sjálfstæðisflokksins í þingframboði eftir afleitt klúður hans í orðavali í síðustu viku.

Það er mitt mat að Árni Johnsen hafi orðið sjálfum sér til skammar með þeim ummælum sínum um að afbrot hans á árinu 2001 hefði verið tæknileg mistök. Þar klúðraði Árni hinu gullna tækifæri til að sýna marktæka iðrun á afbrotum sínum og sýna að hann hefði bætt rétt í hugsun, sem og gjörðum. Greinilegt var að Árni sér ekki eftir því sem hann gerði. Það er engin iðrun að mínu mati að kalla fjárdrátt og tengd brot tæknileg mistök. Aumingjalegt yfirklór Árna í Fréttablaðinu í dag er máttlaust og breytir engu. Það er greinilegt að Árni getur ekki beðið flokksmenn afsökunar á klúðri sínu.

Það er alveg greinilegt að þetta klúður í Árna Johnsen er ekki gott fyrir Sjálfstæðisflokkinn og innkoma hans aftur í stjórnmálin mun ekki efla flokkinn. Í síðustu viku ályktaði SUS með afgerandi hætti um málefni Árna Johnsen eftir þessi heimskulegu ummæli sem hann lét falla. Það var nauðsynlegt að senda þá ályktun frá sér og hún hefði orðið harðari hefði ég einn samið hana. Mér fannst Árni gjörsamlega klúðra góðu tækifæri til að endurheimta virðingu flokksmanna og stuðning þeirra eftir þetta prófkjör.

Það er greinilega engin iðrun frá syndaranum í þessu máli og það er engin eftirsjá eða neitt sem þar stendur eftir. Það er ekki bara óheppilegt fyrir Árna Johnsen heldur líka Sjálfstæðisflokkinn, sem þarf að sætta sig við endurkomu Árna eftir að sunnlenskir sjálfstæðismenn kusu hann þar aftur inn. Nú er orðið ljóst að borið hefur á úrsögnum úr flokknum vegna kosningar Árna í annað sætið í Suðurkjördæmi. Þetta hefur Geir H. Haarde, forsætisráðherra og formaður Sjálfstæðisflokksins, staðfest í viðtali við Morgunblaðið fyrir nokkrum dögum.

Það var kannski varla við öðru að búast en að almennum flokksmönnum myndi blöskra framganga Árna Johnsen og sérstaklega hin dæmalausu ummæli hans, sem voru algjörlega afleit og ekki viðunandi. Þau ein og sér gera manninn ekki tækan fyrir Sjálfstæðisflokkinn til framboðs. Ég styð því ályktun sjálfstæðiskvenna heilshugar og vonast til þess að yfirstjórn Sjálfstæðisflokksins grípi til sinna ráða við að koma í veg fyrir að Árni verði í framboði fyrir flokkinn að vori. Ég tel framboð hans afleitt fyrir flokkinn úr því sem komið er.

Óttast að framboð Árna dragi úr fylgi Sjálfstæðisflokks

Athugasemdir

[Jón Agnar Ólason, 24.11.2006 kl. 21:08]

Kvitta 110% undir þetta allt saman. Sem frjálshyggjumaður finnst mér alltof lítið hafa borið á því að skoðanabræður mínir hafi vogað sér að gagnrýna Árna Johnsen. Þeir sem segja skoðun sína umbúðalaust, eins og færsluhöfundur hér að ofan. Hann er fyrir bragðið maður að meiri, sem og SUS og Landssamband sjálfstæðiskvenna. Það er visst áhyggjuefni að síðastur til að tjá sig um hið augljósa ... er forysta flokksins sjálfs.

[Sigrún Sæmundsdóttir, 24.11.2006 kl. 22:48]

Ég tek undir þau skrif Jóns Agnars hér að ofan. Þú hefur sagt þína skoðun umbúðarlaust sem og SUS og svo nú Landssamband  sjálfstæðiskvenna, og þú hefur aldrei vikið frá þeirri skoðun þinni hér á blogginu.

Ég var ósátt við þetta framboð Árna J frá upphafi  og hef haldið því fram að kjósendur væru ósáttir við framboð Árna M  í þessu kjördæmi, þess vegna fékk tækni-Árni svona gott gengi, en sárt  er til þess að vita að þetta var svo allt á kostnað Drífu. Hef líka sagt að hann ætti að sjá sóma sinn í að víkja eða fara aftar á lista, því að ég er alltaf að heyra og sjá meira á bloggi að fólk ætli ekki að kjósa sjálfstæðisflokkinn í vor, hvar sem fólk býr á landinu, því að með því væri það að stiðja Árna J.

[Guðrún María Óskarsdóttir., 25.11.2006 kl. 01:26]

Sæll Stebbi.

Augnablik er ekki hálf hjákátlegt að hluti flokksmaskínu skuli taka við sér eftir á varðandi einstakling sem þá og þegar hefur hlotið kosningu í prófkjöri ?

Hvað með kjósendur í prófkjörinu ? Er flokkurinn að lýsa vantrausti á þá ?

Þó nokkrar spurningar sem vakna í þessu sambandi, að mér finnst.

kv.

gmaria. 

[Stefán Friðrik Stefánsson, 27.11.2006 kl. 17:42]

Takk kærlega fyrir þessi komment. Það voru miklar annir hjá mér um helgina, svo að ég er fyrst að fara yfir þetta allt núna. Er ánægjulegt að sjá skoðanir annarra á þessu. Þakka Jóni Agnari fyrir góð orð, bendi gmariu á að kjördæmisráð Sjálfstæðisflokksins þarf að samþykkja listann - þeirra er ákvörðunin nú, og Elli minn við þurfum að ræða þetta þegar að við hittumst næst vel, er samt á því að Árni sé það mikið liability fyrir okkur nú að við séum betur sett með hann utan í sérframboði en innan okkar raða.

mbk.