Siðleysi Sigurjóns - loftfimleikar og kúlulán

Fáránleikinn tekur enn á sig nýja mynd þegar 40 milljóna kúlulánið, sem Sigurjón Þ. Árnason veitti sjálfum sér, verður opinbert. Þeir sem véluðu með útrásarvíkingunum og unnu á þeirra vakt voru snillingar í að setja á svið sjónhverfingar og láta ótrúlegustu hluti virka sem tæra snilld í ótrúlega langan tíma. Núna ofbýður þjóðinni sukkið og svínaríið. Hugsa sér að einhverjir hafi borið virðingu fyrir þessum mönnum hér áður fyrr.

Ekki er nóg með að Sigurjón hafi fengið lán hjá sjálfum sér heldur var það langt undir markaðsvöxtum. Þessi absúrd veruleiki sem við lifðum hér á Íslandi verður enn fáránlegri og undarlegri eftir því sem meira af vinnubrögðum þessara manna verða opinbert. Allri þjóðinni ofbýður vinnulagið og krafan er einföld: þetta verði gert upp heiðarlega og rétt. Reikningsskilin verða að eiga sér stað!

Hugsa sér svo að Landsbankinn undir stjórn þessa manns fékk viðurkenningu fyrir bestu ársskýrsluna. Það var í september 2008! Nokkrum vikum fyrir hrunið. Sjáið myndina. Þarna er viðskiptaráðherra Samfylkingarinnar, viðskiptaráðherrann sem svaf á vaktinni, með bankastjóranum - auðvitað brosir hann eins og einfeldningur.

Sigurjón lánaði sjálfum sér fé

Athugasemdir

[Anna Benkovic Mikaelsdóttir, 13.6.2009 kl. 23:45]

...ekki gleyma Icesave!

[Anna Benkovic Mikaelsdóttir, 14.6.2009 kl. 00:18]

Stefán, vil þakka þér að birta öll mín "komment" !! Þú ert mörgum skrefum framar en sumir flokksmenn þínir, en átt knús skilið!

Kær kveðja,

[Einhver Ágúst, 14.6.2009 kl. 14:30]

Ég veit þú ert hægri sinnaður Stefán en þú sneiðir snyrtilega framhjá tengingum þíns ástkæra flokks við Landsbankann, bæði eigendur sem voru FLokknum þóknanlegir, Formaður Bankaráðs og framkvæmdastjóri FLokksins eru á tímabili einn maður svo ekki sé minnst á styrkina góðu.

En já Sigurjón er ein hryllilegasta birtingarmynd þessara hörmunga sem yfir okkur hafa dunið, og það staðfestist alltaf þegar Sigurður G mætir skömmu síðar og ver menn.

Mikið vildi ég fá óvægna gagnrýni frá  Sigurði G  einn daginn, það er örugglega besta hrós sem í boði er á Íslandi.

[kela (IP-tala skráð) 14.6.2009 kl. 15:16]

Voðalega eru flestir blindir af heift eða sofandi.  Fyrir mér eru aðrir en Sigurjón, skúrkarnir í hruninu.  Auðvitað er þetta lýsandi dæmi um að Sigurjón er maður sem kann, skilur og þorir - maður sem gæti leyst efnahagsvandann.    Ekki lítur út fyrir að valdhafarnir séu að bæta okkar hag.