Eigum við að leggja niður áramótaskaupið?

Ég hugsaði upphátt um Áramótaskaupið í gær og sagði mínar skoðanir á því og spurði hreinlega hvort ætti að leggja það niður. Ekki stóð á viðbrögðum og ég fékk yfir 20 komment þar sem fólk sagði sitt mat á öllum hliðum mála. Fleiri voru sammála mér en ósammála, sem er gott mál. Á nýársdag ár hvert er um fátt meira rætt en Skaupið, kosti þess og galla. Þetta er frægt álitaefni. Þakka öllum þeim sem létu í sér heyra hérna á síðunni. 

Fyrst og fremst mátti ég til með að segja upphátt það sem ég var að pæla og líka opna á að heyra í öðrum. Það er nú einu sinni svo að Áramótaskaupið er þess eðlis að það er sumum að skapi og öðrum ekki. Það er vonlaust að allir verði sammála um það. Mér finnst þó mjög margir hafa orðið fyrir miklum vonbrigðum með það. Eftir stendur hiklaust þær pælingar hvort það sé orðið réttlætanlegt að halda úti dagskrárlið með þessum hætti áfram sem veldur vonbrigðum ár eftir ár. Það er greinilegt að sitt sýnist hverjum.

Persónulega fannst mér Skaupið átakanlega slappt í ár. Það er bara þannig. Eflaust er ekki hægt annað en vonast eftir að það verði betra að ári, en ég get samt ekki sagt annað en það sem ég sagði í gær í þessari stöðu. Kannski tek ég þó bara undir með Sigurlín Margréti og bið um Óskar Jónasson bara aftur og eða bara tek undir með öðrum sem skrifaði um að Stelpurnar eigi að fá að gera skaupið. Þær hafa verið að standa sig vel. Margar pælingar í þessu. Vonlaust að allir verði sammála.

En takk enn og aftur fyrir öll kommentin.

Athugasemdir

[Júlíus Valsson, 2.1.2007 kl. 14:53]

Ef við leggjum niður Skaupið þá veit enginn lengur hvernig húmorinn á að vera á Íslandi.  Það þarf að marka ákveðna stefnu í þessum  málum  sem  öðrum svo einkaaðilar séu ekki með einhvern einkahúmor úti í bæ!

[Hlynur Hallsson, 2.1.2007 kl. 15:05]

Fínt að skifta um höfunda annað slagið en Hugleikur og Þorsteinn ásamt öllum hinum gerðu flott skaup. Til hamingju með það!

[Heimir Lárusson Fjeldsted, 2.1.2007 kl. 15:21]

Tek undir með Júlíusi Valssyni um að við megum engan veginn við því að fara á mis við opinbert spaugsforræði.

[Jónas Björgvin Antonsson, 2.1.2007 kl. 15:28]

Furðuleg yfirlýsing frá hægri manni. Full mikil forsjárhyggja fólgin í því að vilja sjá skaupið lagt niður vegna þess að þér líkaði eitthvað illa við það...

"Ólívur Ragnar Grímsson?" - Kommon! Þetta er fyndið :)

Ég er að minnsta kosti á þeirri skoðun að þetta skaup hafi verið frábært. Mér fannst það mjög fyndið - mein fyndið á köflum. Að sjálfsögðu var svo ekki verið að gera grín að þeim sem minna mega sín. Þetta var ádeila. Á okkur hin. Og hversu grunnt er á alls konar fordómum og ómannsæmandi meðferð á meðbræðrum okkar - bæði íslenskum og erlendum. Svo stynjum við, bendum á hina og segjum "Huh! Íslendingar sko...".

J#

[Stefán Friðrik Stefánsson, 2.1.2007 kl. 18:05]

Ég er að segja mínar skoðanir. Það er engin forsjárhyggja að hafa skoðun á einhverjum dagskrárlið og láta í ljósi óánægju með hann ef hún sé til staðar. Vil annars benda á að enginn dagskrárliður er heilagur.

Það er verið að slá af dagskrárliði á hverju misseri, annað hvort vegna þess að hann floppar eða þykir vera orðinn úreltur. Útvarpsstjóri sló af ræðu á gamlárskvöld þó hún hafi yfir sjötíu ára sögu á bakvið sig.

Það er ekkert heilagt og það er ekkert að því að gagnrýna sé maður ósáttur og það geri ég hér ef mér finnst það rétt.

[Alvy Singer, 3.1.2007 kl. 02:35]

Af hverju að leggja niður dagskrálið sem 80-90 % af landanum horfir á? 

Það geta ekki allir verið sammála um hvað sé fyndið eður ei, það eru þó allir sammála um eitt, það vilja allir horfa á Skaupið ár hvert. 

Mér fannst skaupið mjög fyndið. Af hverju? því það var gert grín af okkur, fólkinu í landinu og hvernig við erum! Neysluvísitalan (þykjumst öll vita hvað það er þegar við heyrum um hana, sama með stýrivextina), hvernig við komum fram við gamla fólkið og útlendinga, mótmælendur, unga fólkinu (hvernig það talar), val okkar á sjónvarpsefni, RÚV, NFS, Baugi, hvað þjóðinn er shallow, fræga fólkinu en mest megnis var gert grín af landanum sjálfum, kannski vill landinn ekki láta gera grín af sér? 

Eitt er þó víst, það verður gert skaup að ári og þá verður það sama uppá teningnum, allir talandi og skrifandi um skaupið.