Lýst eftir ungu fólki

Eins og ég hef áður bent á hér finnst mér það eiginlega orðið sláandi hversu algengt er orðið um að auglýst sé eftir ungu fólki, flestu á aldrinum 13-17 ára. Nú er lýst eftir stelpu sem fór frá Dalvík og virðist vera á suðurleið. Nokkrar umræður urðu um hvarf ungmenna á vefnum fyrr í vikunni, en ég skrifaði um það eftir að stelpa, jafngömul þeirri sem lýst er eftir nú, hafði ekki skilað sér heim en hún kom svo í leitirnar eftir nokkra daga.

Um er að ræða ólögráða ungmenni og eðlilegt er að spurningar vakni. Svörin við aðstæðum þeirra sem hverfa með þessum hætti eru mörg og ólík, en stundum þó með svipaða forsögu. Oft er um að ræða ungmenni sem eru í neyslu af einhverju tagi eða sinnast á við foreldra sína. Á okkar tímum er mikill vandi víða og þar geta ungmennin farið út af sporinu og eiga erfitt með að rata á beinu brautina aftur.

Fékk ég mörg ágætis komment á umræðuna fyrr í vikunni. Var áhugavert að heyra skoðanir annarra. Er vissulega rétt að lýsa eftir þeim unglingum sem ekki skila sér heim, í þeim efnum er biðin ekki góð. Sé eitthvað óvenjulegt eða þau koma ekki heim á eðlilegum tíma ber að lýsa eftir þeim. En þetta er orðið mjög algengt, allt að því sláandi og eðlilegt að spurningar vakni.

Lýst eftir 14 ára gamalli stúlku

Dapurlegt

Það er dapurlegt að heyra fregnir af því ekkert sjáist til flugvélarinnar á leitarsvæðinu. Aðstæður á svæðinu eru mjög erfiðar og geta varla verið verri, enda bæði mikil ölduhæð og knappur vindur, sem gerir allt mun erfiðara og vonina um að maðurinn sem var í vélinni geti lifað af slysið enn veikari. Það var viss vonarneisti í því að merki barst frá neyðarsendinum, það er alltaf góðs viti, en það er um leið ljóst að aðstæður á slysstaðnum eru eins erfiðar og geta orðið.

Það hefur verið áhugavert að fylgjast með fréttum af þessu slysi. Erfiðast hefur verið að bíða eftir alvöru fregnum af slysstað, enda er leiðin löng og erfitt að eiga við slys af þessu tagi út á rúmsjó. Vonandi tekst að bjarga þessum flugmanni, þó vonin sé veik vissulega.

Ekkert sést til flugvélarinnar

Hræðileg frétt

Það er alltaf sorglegt að heyra fréttir af því að flugvél missi vélarafl og fari í sjóinn. Það er vonandi að Landhelgisgæslan nái að gera eitthvað í þessari erfiðu stöðu. Það eru aðeins tíu dagar liðnir frá því að flugvél fór síðast í sjóinn, en þá fórst tveggja hreyfla Cessna-flugvél og einn maður með henni.

Enn verra er að veðrið er vont á þessum slóðum og gerir það allar aðstæður enn verri. Vonandi mun Gæslunni takast að bjarga manninum um borð.

Eins hreyfils flugvél í sjóinn

Gott framtak hjá Bubba og Geir

Mér finnst það glæsilegt framtak hjá Bubba Morthens að boða til tónleika sem mæla á móti fordómum gegn útlendingum, sem hafa grasserað að undanförnu og sést t.d. á vefsíðum. Það styrkir baráttuna að Geir H. Haarde, forsætisráðherra, skuli veita stuðning sinn með því að taka lagið á tónleikunum.

Það er full þörf á að ræða málefni innflytjenda, en það verður þó að gerast án fordóma og kuldalegra orða í garð eins tiltekins hóps, eins og sést hefur í garð Pólverja að undanförnu. Það er ekki þörf á fordómafullri umræðu og eðlilegt að tala gegn henni. Forsætisráðherrann á hrós skilið fyrir framlag sitt.

Sungið gegn fordómum

Hvað vakir fyrir Össuri með skrifunum um Gísla?

Össur Skarphéðinsson, iðnaðarráðherra, varð sér til skammar með lágkúrulegum og nauðaómerkilegum næturskrifum um Gísla Martein Baldursson, borgarfulltrúa, á bloggsíðu sína. Það er ekki nema von að spurt sé hvað vaki fyrir Össuri með þessum skrifum. Þau ganga lengra en allt sem eðlilegt telst og lágmark að hann skýri þau.

Össur vildi ekki kommenta á þessi næturskrif í kvöldfréttum Sjónvarps, en hann sást þó í sama fréttatíma borðandi góðgæti við setningu Food and fun-hátíðarinnar, þó mjög þungt hugsi. Málið var rætt á þingflokksfundi Sjálfstæðisflokksins. Árás með þessu tagi á kjörinn fulltrúa Sjálfstæðisflokksins frá ráðherra samstarfsflokks hans er eðlilega metin alvarlega og eðlilegt að ráðherrann svari fyrir sig.

Mér finnst þessi skrif ekki lyfta stjórnmálabaráttunni upp á hærra plan og vona að það sé ekki það sem koma skuli að ráðist sé svo ómálefnalega að fólki. Það er eitt að vera ósammála einhverjum um eitthvað en þessi skrif Össurar lykta af einhverju öðru. Það verður hann að skýra út ítarlega, svona ómerkileg skrif og hnífakast undir rósrauðri kratarós er Össuri og Samfylkingunni til skammar.

Pistill Össurar ræddur á þingflokksfundi

Pókerfés Birkis Jóns - hlægileg sinnaskipti

Það er vandræðalegt fyrir Birki Jón Jónsson, alþingismann, að það hafi komist upp um að hann hafi spilað póker ólöglega. Enn vandræðalegra er þó að hann breytist allt í einu í opinberan talsmann lögleiðingar pókerspils þegar að hann er böstaður, tekinn all illilega eins og raun ber vitni.

Efast mjög verulega um að Birkir Jón hefði lagt í að stíga fram með þennan boðskap nema vegna þess að hann er með buxurnar á hælunum eftir að hafa verið nappaður. Er að reyna að redda sér úr klúðrinu. Það hefði verið þægilegt að heyra hann tala frelsismáli áður en hann var nappaður allavega.

Þessi sinnaskipti hljóma fjarri því trúverðug og missa marks. Þrátt fyrir að Birkir Jón setji nú upp pókerfésið til að halda andlitinu stendur eftir að hann braut lög og verður að bera byrðar þess klúðurs síns sem kjörinn fulltrúi almennings.

Tvískinnungur að aðrar reglur gildi um póker

Algjört klúður lögreglunnar í flóttamáli Annþórs

Flótti Annþórs Karlssonar var vandræðalegt klúður fyrir lögregluna. Það þarf enga sérfræðinga til að segja sér að verklagsreglur voru brotnar og mjög illa staðið að málum á meðan að hann var í varðhaldi á Hverfisgötu og á þeim bænum verður að fara í væna naflaskoðun og læra á mistökunum. Flótti Annþórs verður þó vonandi lexía fyrir lögguna er yfir lýkur.

Það sem vekur mesta athygli er hvernig það gat gerst að margdæmdur ofbeldismaður, grunaður um alvarleg afbrot og átti að sæta einangrun, gat leikið lausum hala á lögreglustöðinni, komist í síma, fundið reipi og síðast en ekki síst stokkið út um glugga án þess að nokkur tæki eftir því. Það er ljóst að það liðu að minnsta kosti tveir tímar frá flóttanum þar til löggan áttaði sig loks á honum.

Mér finnst lágmark að lögreglan taki á sínum málum þegar að fangi, sem átti að vera í einangrun og mátti ekki tala við neinn nema lögmann sinn, getur hringt símtöl úr fangelsinu og undirbúið flótta sinn svo vel að ekki verður neinn við það var.

Þetta er megaklúður af verstu sort sem lögreglan þarf að þarf að fara yfir og læra af. Fara verður yfir yfir verkferla í varðhaldi svo að ekki geti annað eins gerst aftur.

Úttekt á starfsemi fangamóttöku flýtt

Samið um hið fullkomna óréttlæti í Gettu betur

Það er gott að það hefur verið samið í deilunni um dómaraskandalinn í Gettu betur. Það er þó samið þar um hálfgert óréttlæti. Mér finnst frekar aum rökin sem eru færð fyrir því að hafa sigur af Kvennaskólanum gegn MH, allt á grundvelli einhverrar undarlegrar hefðar um að ekki sé hægt að breyta orðnum hlut í keppninni.

Vegna þess að dómarinn gerði mistök og gaf rangt fyrir rétt svar fór keppnin í bráðabana og þar hafði hitt liðið sigur. Þetta hlýtur að teljast nokkuð óréttlæti og til skammar fyrir þá sem halda utan um keppnina. Það er þó fyrir mestu að aðilar málsins hafa viðurkennt mistökin, en þau voru samt nokkuð augljós og þetta er bæði pínleg og skaðandi villa fyrir dómara í keppninni - eykur ekki orðstír hans á þeim vettvangi hið minnsta.

Það er eðlilegt að tekist sé á um stöðu þessarar keppni. Þetta á ekki að vera í lagi og eðlilegasta næsta skref væri að taka á reglum keppninnar og reyna að koma í veg fyrir að svona dómaraskandall geti gerst aftur í Gettu betur. Þau rök að vegna þess að ekkert fordæmi sé fyrir aðgerðum sé í lagi að leyfa tapliði að breytast í sigurlið eru aum og léleg. Það á ekki að vera eðlilegt að sætta sig við svona. Finnst þau í Kvennó samt sýna reisn og styrk með því að gera ekki mál úr þessu en ég skil sársauka þeirra. Það er aldrei gott að tapa vitandi að sigur náðist faktískt.

Ranglætið er aldrei gott, hvorki í þessu tilfelli né öðrum. Þetta er mál sem þarf að taka á. Staða dómarans er ekki beint beysin, hann gerði skelfilega skyssu og hefur reyndar gert þær margar á þessu misseri. Það er ekki undrunarefni að það sé ólga vegna hans, þar sem mörg mistök voru gerð í útvarpshlutanum, sem hafa því miður fylgt yfir í sjónvarpið og ráðið þar hvort lið sigrar eða tapar. Það er ekki hægt að sætta sig við þannig klúður.

MH og Kvennaskólinn senda frá sér yfirlýsingu

Össur slær skjaldborg um stjórnendur OR

Mér finnst Össur Skarphéðinsson, iðnaðarráðherra, fara yfir strikið í skítkasti sínu á Gísla Martein Baldursson, borgarfulltrúa, í næturpistli. Orðaflaumurinn og persónulegt hatur fer yfir öll mörk. Það er þó sérstaklega athyglisvert hversu mjög Össur nennir að slá skjaldborg um stjórnendur Orkuveitu Reykjavíkur á þessum síðustu og verstu tímum þeirra, en margir hafa krafist þess að þeir taki pokann sinn vegna REI-klúðursins.

Hef enga séð nenna að leggja sömu lykkju á leið sína og verja þessa menn með sömu áfergju og Össur reynir að gera með frekar hlægilegum hætti. Það leynir sér ekki að Össur er enn mjög sorrí yfir því hvernig fór með REI og virðist frekar en gagnrýna allt klúðrið reyna að kóa það. Í þeim efnum ræðst hann persónulega að Gísla Marteini, sem mér finnst eiginlega einum of mikill barnaskapur. Hann má ekki gleyma því að almenningur hefur fengið nóg af skítabissnessnum sem einkenndi REI.

Það má vel vera að Össur og Gísli Marteinn eigi eitthvað persónulegt óuppgert. Hef ekki hugmynd um það. Þessi skrif eru þó þess eðlis að þar talar frústreraður maður vegna þess að skýjaborgir hans verða ekki að veruleika.

Sterk staða Hönnu Birnu - Vilhjálmur rúinn trausti

Það kemur mér ekki að óvörum að Hanna Birna Kristjánsdóttir njóti afgerandi stuðnings sem næsti borgarstjóri í Reykjavík. Sterk staða hennar er augljós. Um leið er ljóst að Vilhjálmur Þ. Vilhjálmsson, fyrrverandi borgarstjóri, er rúinn trausti og hefur ekki styrk eða stuðning flokksmanna og borgarbúa til að taka aftur við embætti borgarstjóra. Það er alveg greinilegt að hann hefur misst stuðning þeirra sem völdu hann til forystu.

Veik staða Sjálfstæðisflokksins í Reykjavík í könnun Gallups er mikið áhyggjuefni og áfall fyrir forystu Sjálfstæðisflokksins sem hefur ekki enn tekið af skarið varðandi veika stöðu leiðtogans, sem hefur misst allan þann stuðning sem hann hafði eftir prófkjör og kosningar þar sem hann var valinn til forystu af hálfu flokksins. Hann hefur misst umboð sitt og á því verður að taka. Það er kominn tími til að Vilhjálmur Þ. horfist í augu við þessa veiku stöðu og axli ábyrgð með því að segja af sér leiðtogastöðunni. Það hefur verið beðið of lengi!

Það er kominn tími til að forysta Sjálfstæðisflokksins í höfuðvígi hans horfist í augu við þá stöðu sem uppi er. Leiðtoginn er rúinn trausti og verður úr þessu aðeins þung byrði fyrir Sjálfstæðisflokkinn. Það skiptir engu máli hversu traustur hann hefur verið fyrir vissa aðila í flokknum og unnið lengi á vettvangi borgarmála og flokksins. Með mistökum sínum hefur hann skaðað stöðu Sjálfstæðisflokksins svo eftir er tekið og hann verður að taka á sig þessa veiku stöðu sem blasir við.

Vilhjálmur ætti að vera búinn að sjá það fyrir löngu að hann hefur skemmt mjög fyrir Sjálfstæðisflokknum með því að taka ekki af skarið og segjast hið minnsta ekki taka að sér embætti borgarstjóra að nýju. Ég treysti því að sjálfstæðismenn í borginni fari að ná áttum í þessari stöðu og horfast í augu við það óhjákvæmilega í stöðunni.

Hvað varðar þessa könnun finnst mér hún svo afgerandi traustsyfirlýsing við Hönnu Birnu Kristjánsdóttur að það eigi ekki að leika neinn vafi á því að hún eigi að taka við forystu flokksins í borginni sem allra fyrst, og um leið við embætti borgarstjóra í Reykjavík þann 22. mars 2009.

Flestir vilja Hönnu Birnu sem borgarstjóra

Hálfrar aldar valdaferli Fidel Castro lokið

Það eru stórmerkileg pólitísk tíðindi að Fidel Castro hafi ákveðið að segja af sér öllum pólitískum embættum sínum og láta Raúl bróður sínum eftir völdin, þó það þurfi ekki að koma að óvörum. Að baki er litríkur valdaferill og hann hefur setið af sér níu forseta í Bandaríkjunum, en hann hefur tekist á við þá allt frá upphafi valdaferilsins árið 1959, sem náði hámarki með Kúbudeilunni árið 1962.

Kúbudeilan er reyndar einn merkilegasti sögulegi atburður síðustu áratuga. Á þrettán sögulegum dögum í októbermánuði 1962 var heimurinn á barmi kjarnorkustyrjaldar. Bæði Bandaríkin og Sovétríkin höfðu þá vígbúist af kappi og reyndu ákaft að fylgjast með öllu því sem hinn aðilinn gerði. Njósnir urðu sífellt mikilvægari þáttur í starfsemi ríkjanna og þegar bandarískur kafbátur tók myndir af sovéskum kjarnorkueldflaugum á Kúbu ætlaði allt um koll að keyra því þeim var jú beint að Bandaríkjunum, vöggu kapitalismans í heiminum.

Kennedy Bandaríkjaforseti fékk eldskírn sína í embætti, á stuttum valdaferli, á þessum októberdögum. Hann var á báðum áttum um hvað átti að gera. Hershöfðingarnir vildu að forsetinn heimilaði að ráðist yrði tafarlaust inn í Kúbu og eyjan hertekin með valdi, en það þýddi um leið hörð viðbrögð Sovétmanna og væntanlega kjarnorkustyrjöld stórveldanna og stór hluti þjóðarinnar yrði jafnvel þurrkaður út á einu augnabliki. Þessu máli eru gerð ítarleg og góð skil í vönduðum þáttum CNN um kalda stríðið, sem gerðir voru í lok aldarinnar. Þrátt fyrir ólgu og viðskiptabann sat Castro af sér fjölmarga forseta og varð þaulsetnari en margir töldu í upphafi.

Hef misst tölu á hversu oft hefur verið reynt að drepa þennan umdeilda leiðtoga, sem hefur stuðað fólk um allan heim og líka heillað suma á alþjóðavettvangi. Castro er í senn einn umdeildasti þjóðarleiðtogi tuttugustu aldarinnar og sá litríkasti, leiftrandi persónuleiki sem stýrði veldi sínu með persónulegum styrk og krafti. Castro hefur verið leiðtogi krafts og hefur verið svolítið merkilegt að sjá þennan leiftrandi leiðtoga á sjúkrabeði. Hann hefur barist við erfið veikindi að undanförnu og ekki undarlegt að hann fari á meðan að hann hefur enn ráð og rænu.

Það að vera ráðandi í stjórnmálum snýst að mörgu leyti um það að koma vel fram. Betur en margir aðrir veit Fidel Castro þetta. Hann hefur stjórnað með sýnilegu valdi á Kúbu í tæpa hálfa öld, þar sem stormandi boðskapur hans hefur skipt sköpum fyrir hann að halda völdum og geta ríkt þar þetta lengi. Að því kemur á ævi hans sem og allra annarra að halla tekur undan fæti. Það er óhjákvæmilegt, sama hver um er að ræða. Framkoma í stjórnmálum á okkar fjölmiðlatímum snýst oftast nær um það hvernig fólk kemur fram. Komi það ekki fram eða er fjarverandi hlýtur kastljósið að beinast að fjarverunni.

Í landi eins og Kúbu snýst allt um að sýna fram á vald sitt, sýna að ægivaldið mikla sé enn til staðar en hafi ekki veikst með veikum leiðtoga. Það hefur Castro gert og gerði margoft meðan að hann var veikur fyrir nokkrum árum er hann féll illa á opinberri samkomu og lærbrotnaði. Það vakti því athygli að það sem sást aðeins til Castro eftir margfrægt valdaafsal til Raúls sumarið 2006 vegna veikinda hafi verið myndir af honum alvarlegum á svip í adidas jogging-galla (talandi um sannkallaða kaldhæðni) og greinilega fölan á brá að reyna að staulast nokkur skref með dagblaði í hendi sem sýnir tímasetninguna.

Þetta var orðið eins og í gíslatöku þegar að gíslinn er sýndur með nýjasta dagblaðið í hendinni, til að sýna að hann sé örugglega enn þessa heims. Þetta hefur verið í senn bæði skondið og skemmtilega óraunverulegt í sinni fyndnustu merkingu. Það hefur mistekist að telja fólki trú um að Fidel sé enn við stjórnvölinn. Hann er aðeins gamall maður sem hefur hvorki heilsu né styrk lengur til að vera sá leiðtogi valdsins sem hann hefur verið í hálfa öld. Sá tími er liðinn - tími Fidels er liðinn um leið. Þetta er aðeins staðfesting endaloka sem hafa blasað við.

Það er mjög erfitt að vera yfirgnæfandi í lokuðu samfélagi eins og Kúbu, með einræði og engum alvöru kosningum, þar sem leiðtoginn er heilsuveill og sá sem með völdin á að fara á meðan sést varla heldur. Þetta er því eðlileg staða - að veik staða Fidels sé staðfest. Nú verður áhugavert að sjá hvað taki við í valdatóminu sem skapast við afsögn Fidels. Það er ósennilegt að staðan breytist að ráði meðan að hann er lifandi, en allt geti breyst þegar að hann hefur kvatt þennan heim og kúgaða þjóð einræðisins síns.

Að því kemur vonandi fyrr en síðar að breytt staða, án ægivalds byltingarhöfðingjans, veki kúbverja til meðvitundar í samfélagi sem hefur vanist einræði og einum leiðtoga, án kosninga, til áratuga - og þar verði haldið í lýðræðisátt.

Kastró segir af sér

Vandræðalegt klúður í Gettu betur

Nú sem fyrr er Gettu betur eitt vinsælasta sjónvarpsefnið. Það er alveg lágmark að ætlast til þess að spurningarnar í þættinum séu vandaðaðar og ekki síður að svörin stemmi við þær. Það virðist hafa vantað allverulega upp á það á þessu keppnismisseri. Það er fyrir neðan allar hellur að það illa sé staðið að keppninni að röng svör við spurningum ráði úrslitum í keppni, en það virðist þó hafa gerst nú.

Hef alltaf haft gaman af Gettu betur og fylgst vel með keppni í sjónvarpi og einnig útvarpinu. Ég tók eftir því fyrir nokkrum vikum að nokkuð var um röng svör og vandræðalegar klaufavillur í spurningunum þar, sem voru ekki til frægðarauka fyrir dómarann. Þó var vonast til að þetta væri bara klaufaleg byrjun nýs dómara og þetta myndi slípast til þegar að sjónvarpshlutanum kæmi.

Þetta er vandræðalegt mál fyrir Sjónvarpið. Svona hlutir eiga einfaldlega að vera í lagi. Það hlýtur að vera alveg lágmark að passa upp á að dómarinn standi sig og ráði við verkefnið, ella þarf að skipta honum út.

Mistök í Gettu betur

Lýst eftir ungu fólki

Mér finnst það eiginlega orðið sláandi hversu algengt er orðið að auglýst sé eftir ungu fólki, flestu á aldrinum 13-17 ára. Eftir nokkra klukkutíma eða einhverra daga leit finnast krakkarnir eða koma sjálf heim oftast nær. Eflaust eru margar langar sögur á bakvið hvert tilfelli. En það er ekki hægt annað en hugsa aðeins þegar að það gerist að jafnvel fjöldi ungmenna hverfi á skömmum tíma og spyrja sig að því hvað sé eiginlega að gerast í samfélaginu, hvort að þau séu í einhverri ógæfu eða vilji hreinlega fara að heiman vissan tíma.

Það eru svosem engar nýjar fréttir að fólk hverfi. Stundum hefur eitthvað gerst, slys eða aðrar aðstæður, sem valda því að ungt fólk kemur ekki heim. Þegar að óregla eða ógæfa dynur yfir hefur það gerst að ungt fólk er komið í svo mikið öngstræti að það stingur af, lætur sig hverfa. Það er ekki nema von að spurningar um hvert tilfelli vakni. En mér finnst þetta farið að gerast svo oft, jafnvel að leitað sé dögum saman að ungu fólki.

Vonandi mun ganga vel að finna þessa stelpu. Það hlýtur að vera skelfilegt að vera í þeirri stöðu að eiga ættingja sem finnst ekki og ekki er hægt að ná sambandi við. Gildir þá einu hverjar aðstæðurnar eru, enda er mjög óþægilegt og dapurlegt að eiga ástvin sem finnst ekki og það hlýtur að vera skelfilegt að horfast í augu við.

Lýst eftir stúlku

Bílslys og myndbirtingar

Það er dapurlegt að heyra af enn einu bílslysinu, nú á Akranesi. Það sem mér finnst jafnan einna sorglegast við fréttir af svo dapurlegum slysum er að sjá sjálfan vettvang slyssins í fjölmiðlum; myndir af bílflökum og aðrar þær sorglegu aðstæður sem þar jafnan birtast. Myndbirtingar af vettvangi umferðarslyss þjónar mjög litlum tilgangi, hef aldrei talið það skipta miklu máli að sýna bílflökin. Kannski er það ábending til annarra að svona geti farið í umferðinni, en fyrir þá sem tengjast þeim sem slasast eða láta lífið í umferðarslysi er þetta særandi myndræn umgjörð um mikinn harmleik.

Veit ekki hvort það er einhver algild regla hjá fjölmiðlum í þessum efnum. Sumir fjölmiðlar eru þó meira áberandi í þessu en aðrir eflaust. Hef séð hjá þeim sumum að þeir birta aðeins staðsetningu slyssins á korti. Það er ágætis nálgun á það finnst mér. Þar sem ég hef sjálfur lent í bílslysi finnst mér alltaf mjög stingandi að sjá aðstæður annarra slysa, enda getur aðkoma að svona slysum verið virkilega sjokkerandi og vandséð hvaða erindi þær fréttamyndir eigi í fjölmiðla.

Alvarlegt bílslys á Akranesi

Vissi Jón Ásgeir ekki alla söguna á bakvið FL?

Það var áhugavert að horfa á hádegisviðtalið við Jón Ásgeir. Það sem vakti mesta athygli mína er að þar gefur hann í skyn að hafa ekki vitað um hinn mikla rekstrarkostnað FL Group er Baugur bjargaði fyrirtækinu frá hruni undir lok síðasta árs. Væri gott að hann talaði enn betur um þennan veigamikla þátt málsins. Öllum er ljóst að FL Group hefði verið gert upp og fyrirtækið bútað niður og selt úr því hefði Baugur ekki leidd endurfjármögnun og uppbyggingu.

Það er reyndar ótrúleg saga á bakvið fall FL Group síðustu misserin og hefur ekki mikið farið fyrir Hannesi Smárasyni eftir þau endalok öll á skýjaverkefnum hans. Eðlilega hefur verið deilt á starfslokasamning hans, en hann er veglegur og óheyrilegur miðað við þann ávöxt sem hann skildi eftir sig af starfinu með hnignun fyrirtækisins sem var á leið til glötunar þegar að Baugur fór í björgunaraðgerðir til að reisa það við. Taprekstur fyrirtækisins á liðnu ári er enda Íslandsmet og væri saga frá að segja víðar.

Það er alveg ljóst að Jón Ásgeir ætlar að rífa FL Group upp. Hann gaf ungum manni góð tækifæri með því að gera hann að forstjóra og ætlar að setja mark sitt á endurreisnina. Greinilegt er að hann ætlar sér að skera enn meira niður í rekstrarkostnaðinum en Jón Sigurðsson hefur reyndar boðað og virðist varla vanþörf á. Enda ekki óeðlilegt að hann sendi skýr skilaboð um markvissa endurreisn en ekkert hálfkák. Þarna er margt undir.

Eftir stendur að gott væri að vita hvort veigamiklir þættir í skelfilegri stöðu FL Group undir lok forstjóraferils Hannesar Smárasonar hafi verið haldir leyndir fyrir Jóni Ásgeiri, manninum sem bjargaði fyrirtækinu frá grimmum örlögum. En það var þó gefið í skyn í dag.

Eignir FL Group á brunaútsölu ef ekki hefði verið gripið inn í

Samningar í höfn - farsæl niðurstaða

Það er jákvætt og gott að kjarasamningar hafi náðst með farsælum hætti. Það hefur verið góður tónn í viðræðum síðustu dagana og núningur og hvöss orð víðsfjarri, sem eru góðar fregnir. Umfram allt er um að ræða allt skynsamlega niðurstöðu til efnahagslegra aðstæðna. Fór enda vel á með mönnum í kvöld við lok viðræðna.

Framlag ríkisstjórnarinnar leikur lykilhlutverk í lausn mála eins og svo oft áður - þar er um að ræða mikilvægt framlag á flestum sviðum. Lækkun tekjuskattar og hækkun persónuafsláttar stendur þar upp úr og komið er til móts við ýmsa hópa samfélagsins, t.d. með hækkun barnabóta og húsaleigubóta.

Í fyrsta skipti koma forystumenn Samfylkingarinnar að lausn kjarasamninga sem afl í ríkisstjórn landsins frá stofnun flokksins. Tengsl ASÍ við flokkinn hafa verið mikil, eins og allir hafa séð, og sem dæmi má nefna að forseti ASÍ situr SAMAK-fundi norrænna jafnaðarmannaleiðtoga með kollegum sínum af öðrum norðurlöndum á hverju sumri. Bein tengsl flokka og verkalýðssamtaka eru reyndar óskiljanleg. ASÍ hefur alla tíð bundið miklar vonir við Samfylkinguna og eru vonandi sáttir með niðurstöðu samninganna.

Framan af mátti merkja gremju þar yfir að ríkisstjórn með aðild flokksins ætlaði ekki að hliðra nægilega til við gerð samninga, en flestum er í fersku minni stuðningur forystu ASÍ við Ingibjörgu Sólrúnu í formannskjöri fyrir þrem árum. Vonandi er sátt á þeim bænum með niðurstöðuna. Las þó í dag pistil Guðmundar Gunnarssonar, formanns Rafiðnaðarsambandsins, á Eyjunni þar sem greina mátti að ekki hefði verið nóg að gert. Eflaust má alltaf gott bæta.

Mest er um vert að tryggja undirstöðu að stöðugleika, sem vonandi tekst með þessu. Fróðlegt verður að sjá stöðu mála undir lok samningstímans, þegar að tveir áratugir verða liðnir frá hinum sögulegu þjóðarsáttasamningum, sem Ásmundur Stefánsson, núv. ríkissáttasemjari og þáv. forseti ASÍ, og Guðmundur Jaki, þáv. formaður VMSÍ, handsöluðu við Einar Odd Kristjánsson, þáv. formann VSÍ og síðar alþingismann.

Taxtar hækka um 18.000 krónur

Pólverjinn farinn úr landi

Það var varla við öðru að búast en að karlmaðurinn sem grunaður er um að hafa keyrt á fjögurra ára drenginn í Reykjanesbæ myndi fara úr landi um leið og farbannið rynni út. Annars finnst mér að veigamikil mistök hafi verið gerð í málinu þegar að hann var látinn laus úr haldi með úrskurði dómsyfirvalda og gat þar með samræmt framburð sinn við það sem önnur vitni tengd honum höfðu sagt meðan að hann var lokaður inni.

Þar með var skemmt fyrir rannsókn málsins að mínu mati og gert lögreglu enn erfiðara fyrir. Veigamikil sönnunargögn hafa tengt viðkomandi mann við slysstaðinn og eðlilegt að það sé spurt um það hvort það allt geti verið tilviljun. Maðurinn hefur aldrei játað en nokkrar vikur eru síðan að bifreiðin sem maðurinn keyrði var tengd við slysstaðinn með afgerandi sönnunargögnum.

Það er mikilvægt að hið sanna í málinu komi fram og það verði hægt að leysa þessa ráðgátu. Enn verra er ef maðurinn vill ekki játa á sig verknaðinn. Hið minnsta þarf að fá úr því skorið hvort mögulegt er að annar hafi keyrt þessum bíl á þeim tíma er keyrt var á strákinn.

Farinn úr landi

Repúblikanar bíða færis að méla Obama niður

Það er greinilegt að repúblikanar ætla sér að méla persónu Barack Obama niður muni hann ná útnefningu sem forsetaefni demókrata í kosningabaráttunni síðar á árinu. Las umfjöllun Sunday Times, en þar er dregin upp mynd af honum sem vinstrisinnaðasta frambjóðanda í forsetakjöri frá því George McGovern var og hét og hann sé á mála hjá spilltum auðmönnum.

Það er löngu orðið þekkt að áróðursvél repúblikana hlífir ekki andstæðingum og greinilegt að öllum steinum verður velt við muni Obama fara gegn John McCain í forsetakosningunum og reynt að draga upp ófagra mynd af honum. Reyndar er það nú svo að ótrúlega lítið er í raun vitað um Obama. Hann talar lítið um stefnumál, hefur ekki ljáð máls á kappræðum síðustu dagana og flytur innlifaðar ræður um breytingar án þess að gera vel grein fyrir stefnumálum sínum. Margir vita ekki hver þessi maður er og fyrir hvað hann stendur.

Það er kannski varla óeðlilegt sé það rétt að hann sé vinstrisinnaðasti maður í forsetakjöri frá því á áttunda áratugnum sem á raunhæfa möguleika á Hvíta húsinu. Ekki talar hann sem slíkur og virðist frekar vera að reyna að leyna bakgrunni sínum en tala hreint út um málefni. Mér finnst Obama allt að því magnaður predikari með sjarma en mér finnst vanta áþreifanlega að hann tali hreint um lausnir á málefnum, tali um hugsjónir sínar og það sem hann ætlar að gera nái hann völdum. Það vantar málefnapælingarnar í allar draumsýnirnar um breytingar.

Það er greinilegt að hann verður að tala mun skýrar þegar að hann mætir áróðursvél repúblikana. Hillary Rodham Clinton hefur verið hrædd við að impra á fortíð Obama og hjóla í persónu hans af ótta við að það springi framan í hana sjálfa. Svo virðist sem að repúblikanar ætli að taka það verkefni að sér án þess að hika. Tengsl Obama við peningamenn með miður gott orðspor í Chicago mun ekki styðja hann og greinilegt að repúblikanar ætla sér ekki að taka hann með silkihönskum verði hann keppinautur þeirra.

Ef marka má orðróminn mun fyrri harkaleg persónuleg átök síðustu forsetakosninga blikna í samanburði við það skítkast og árásir sem blasa við í kosningunum eftir tæpa níu mánuði.

Áróðursherferð gegn Obama í undirbúningi

Enn eitt vopnaða ránið í borginni

Það hefur ekki farið framhjá neinum að glæpaalda hefur gengið yfir borgina að undanförnu, þar sem vopnuð rán hafa verið áberandi í banka, verslunum og veitingastöðum. Oftar en ekki hafa þetta þó verið ungmenni sem eru lítið skipulögð og kemst upp um þá, sem betur fer segja flestir. En þetta er dapurleg þróun, ef við erum að feta sömu slóð og í fjölmennum löndum þar sem vopnuð rán eru nær daglegt brauð.

Sú var tíðin að vopnuð rán af þessu tagi voru mikil tíðindi og heyrði til undantekninga að reynt væri að ráðast að starfsfólki með vopnum og næla sér í pening. Oftar en ekki tekst ekki að ræna miklu, t.d. eins og í sólarhringsverslununum þar sem þetta var ekki mikið, enda er auðvitað orðið æ algengara að fólk noti kort en reiðufé.

Lögreglan hefur oftar en ekki leyst þessi mál fljótt og vel. Gott dæmi var bankaránið um daginn, þar sem brúnkuræningjanum tókst illa að fela slóð sína og var gripinn eftir brúnkumeðferðina í Garðabæ með ránsfenginn í höndunum. Það er gott að lögreglan getur tekið vel á þessum málum. En þetta er ekki góð þróun í samfélaginu.

Vopnað rán í miðbænum

Sætur sigur hjá Man Utd - skellur fyrir Liverpool

Það var sætt að sjá Manchester United taka Arsenal sannfærandi á Old Trafford. Glæsilegur sigur og leikurinn var sannarlega frábær. Á sama tíma fékk Liverpool einn sinn versta skell á síðustu árum þegar að þeir lágu fyrir Barnsley á Anfield. Held að þetta sé svartasti dagurinn á þeim slóðum mjög lengi.

Fróðlegt að sjá hvort að þetta hefur áhrif á stöðu Benitez. Óvænt úrslit og væntanlega verður Brian Howard ekki vinsælasti maðurinn á Liverpool-svæðinu á næstunni. Wayne Rooney var hinsvegar stjarnan á Old Trafford og stóð sig feiknavel.

Og já, Huddersfield steinlá fyrir Chelsea. Það verður fróðlegt að sjá hvort að "Gamli góði Villi" verði heppnari en þetta lið, sem öðlaðist frægð þegar að Davíð Oddsson líkti vondri stöðu þeirra saman í vikunni, á næstunni.

Man Utd tók Arsenal í kennslustund