Sögulegar kosningar - hver verður framtíðin?

Flest bendir til þess að þáttaskil verði í íslenskum stjórnmálum í dag. Kannanir gera ráð fyrir harðri vinstrikeyrslu eftir kosningar, þeirri mestu í lýðveldissögunni. Mjög mikilvægt er að kjósendur hugleiði valkostina í þessum kosningum áður en þeir greiða atkvæði. Framtíðin skiptir mestu máli nú, mun frekar en fortíðin. Hugleiða þarf hvernig samfélag við viljum og hvaða tækifæri séu mikilvægust í nýju samfélagi.

Ég ætla að kjósa Sjálfstæðisflokkinn og hvet alla lesendur vefsins til að gera slíkt hið sama. Vissulega var ég óánægður með hvernig staðið var að málum og hef tjáð þá óánægju mjög vel í skrifum hér og gert upp við fortíðina. En Sjálfstæðisflokkurinn hefur tekið til, gert upp fortíðina og horft til framtíðar með nýrri flokksforystu og því að gera í ítarlegri stefnuvinnu upp við liðna tíma með gagnrýnum hætti.

Mikilvægt er að þeir sem óánægðir eru kjósi Sjálfstæðisflokkinn en horfi gagnrýnið og ákveðið á framboðslistana á kjörseðlinum og geri þær breytingar sem þeir telja mikilvægt að verði. Mikilvægt er að strika yfir þá forystumenn sem fólk er óánægt með og sendi þeim skýr skilaboð með því. Kjósandinn hefur tækifæri til að breyta listanum sem hann kýs - það er réttur sem skiptir miklu máli.

Lykilstaðreyndin í þeirri vinstrisveiflu sem blasir við er sú að Sjálfstæðisflokkurinn er eini flokkurinn sem berst fyrir einstaklingsfrelsi og hóflegum sköttum á almenning. Ef það er eitthvað sem við þurfum ekki núna, eru það auknar álögur á heimilin í landinu.

Við verðum að senda út þau skilaboð að frelsið sé leiðandi. Þó svo geti farið að vinstriflokkar fái afgerandi umboð og traust kjósenda, sem þeir verðskulda þó ekki þar sem þeir hafa neitað að tala beint til fólks og fara yfir stöðuna, þarf að standa vörð um frelsið.

Munum eitt; auður seðill er rauður. Tökum afstöðu í dag! Kosningarétturinn er okkar lýðræðislegi réttur til að taka afstöðu og okkar öflugasta val þegar mestu skiptir. Segjum ekki barnabörnum okkar að við höfum ekki tekið afstöðu örlagadaginn 25. apríl 2009!

Bjarni Ben kaus fyrstur

Evrópumálin úr sögunni í vinstrasamstarfi

Stóru tíðindin eftir umræðuþátt flokksleiðtoganna í kvöld er að Steingrímur J. Sigfússon afskrifaði algjörlega aðildarviðræður við Evrópusambandið á þessu ári og mun ekki semja um nein slík skref í stjórnarmyndun að þessu sinni og mun ekki ganga að afarkostum Samfylkingarinnar.

Af mörgum afdráttarlausum yfirlýsingum gegn ESB úr herbúðum er þessi frá formanninum sjálfum mest afgerandi og setur í raun vinstristjórnarvalkostinn í uppnám, muni Samfylkingin standa við hótanir sínar.

Augljóst er að það stefnir í líflegar og jafnvel langvinnar stjórnarmyndunarviðræður, enda hefur VG sagt hreint út að þeir muni ekki stökkva á Evrópuhraðlestina með Samfylkingunni.

Slík tíðindi skipta miklu máli kvöldið fyrir kjördag, því er ekki hægt að neita.

Áherslan á ESB lýsir taugaveiklun

Þöggun vinstriflokkanna mikið áhyggjuefni

Niðurstöður síðustu kannana fyrir kosningarnar á morgun færa okkur þær skelfilegu vísbendingar beint í æð að vinstriflokkarnir, sem sitja á mikilvægri skýrslu um efnahagslífið og reyna að afvegaleiða almenning, muni í fyrsta skipti í lýðveldissögunni geta myndað einir meirihlutastjórn, jafnvel undir forsæti öfgavinstriflokks með forræðishyggju og ríkisyfirtöku fyrirtækja að leiðarljósi í pólitískri baráttu sinni.

Mikið áhyggjuefni er fyrst og fremst að þjóðin fái ekki beint aðgang að mikilvægri skýrslu sem kortleggur stöðu efnahagskerfisins degi fyrir kosningar. Hvað er að fela? Hvers vegna þessi leyndarhyggja og þöggun í nafni vinstriflokkanna? Eru þetta ekki sömu flokkar sem töluðu um gegnsæ og traust vinnubrögð fyrir nokkrum mánuðum og töluðu gegn leyndarhjúp á mikilvægum staðreyndum?

Hvernig geta svo kjósendur hér í Norðausturkjördæmi kosið flokka sem leggjast gegn álveri á Bakka og olíuborun, mikilvæg atriði í framtíðarsýn í uppbyggingu samfélagsins. Munum ummæli ráðherranna Össurar og Kolbrúnar og hugleiðum hvort flokkar þeirra verðskuldi traust.

Eftir alla þöggunina, leyndarhjúpinn á lykilmálum og atlögu að mikilvægri atvinnuuppbyggingu verðskuldar vinstrið ekki traust. Hugleiðum fyrst og fremst eitt, hversvegna fær þjóðin ekki að vita hver staðan er í aðdraganda kosninga? Hvað eru vinstriflokkarnir að fela?

Samfylkingin enn stærst

Vinstri grænir kasta grjóti úr glerhúsi

Ekki finnst mér það merkilegt hjá Steingrími J. Sigfússyni að hindra almenn skoðanaskipti með því að kæra auglýsingu VefÞjóðviljans og sjálfstæðismanna í Norðvestri. Vinstri grænir kasta grjóti úr glerhúsi með þessu, enda hafa ungir vinstri grænir verið að dreifa kosningaáróðri með mynd af Bjarna Benediktssyni, formanni Sjálfstæðisflokksins, og ekki haft í heiðri sjálfir þau vinnubrögð sem þau telja brotin.

Steingrímur J. þoldi ekki grínauglýsingar Framsóknarflokksins, einkum ungliðanna, í sinn garð árið 2007 og frægt var þegar hann nöldraði yfir því í kosningaþætti þá við Jón Sigurðsson, þáverandi formann Framsóknarflokksins. Á meðan hans flokkur dreifir áróðri með myndum af Bjarna Ben er þetta blaður Steingríms honum mest til skammar.

Segja VG hindra skoðanaskipti

Svipta þarf hulunni af Icesave-leyndarmálum

Mér finnst mjög mikilvægt að leyndarhjúpnum verði svipt af Icesave-málinu. Tímabært er að þjóðin fái að vita sannleikann og allir þættir málsins verði gerðir opinberir. Mér finnst það ekki smekklegt að stjórnarflokkarnir sem talað hafa um opin og gegnsæ vinnubrögð haldi þessum upplýsingum frá þjóðinni, þetta á að gera opinbert og opna fyrir fólkinu í landinu.

Traust er mikils virði í stjórnmálum. Nú reynir á hvort stjórnvöld vilji opin og gegnsæ vinnubrögð eða standa vörð um leyndarhjúp. Icesave-málið er stórt og umfangsmikið í sagnfræði bankahrunsins, nú sem í sögubókum framtíðar. Burt með leyndina!

Siv segir atburði ævintýralega

Fegurð eða ljótleiki?

Mjög misjafnt hvernig fegurð er mæld. Hver hefur sína skoðun á því. Fegurð getur þó snúist upp í ljótleika á augabragði. Mér finnst fátt fagurt við horrenglur eða þá sem eru svo horaðir að sést í beinabygginguna á þeim. Sumir reyna svo mikið á sig fyrir fegurðina að þeir gleyma að fegurð getur verið margskonar fyrirbæri, ekki aðeins útlitslega. Innri fegurð er miklu mikilvægari þáttur persónuleikans.

Þessi ástralska fegurðardís, sem hefur greinilega tekið fegurð sína of alvarlega og fórnað henni fyrir vannæringu og markmiðið að vinna keppnina, minnir frekar á fanga í seinni heimsstyrjöldinni en táknmynd sem ungt fólk eigi að líta upp til eða taka sér fyrirmyndar. Ágætt er að fólk staldri við og hugleiði hugtakið fegurð og hvort hægt sé að svelta sig til að öðlast hana.

Horuð eða falleg?

Er upplýsingum haldið leyndum fyrir kjósendum?

Það er mjög alvarlegt mál ef rétt reynist að stjórnvöld hafi stungið undir stól skýrslu sem leiði í ljós að framundan sé algjört hrun íslensks efnahagskerfis að óbreyttu. Sigmundur Davíð Gunnlaugsson, formaður Framsóknarflokksins, gerir hið eina rétta og vekur athygli á vinnubrögðunum, þó hann beri reyndar mikla ábyrgð á vinnubrögðunum. Stjórnin situr í hans umboði.

Séu þetta opnu og gegnsæju vinnubrögðin sem vinstriflokkarnir lofuðu okkur við myndun þessarar gagnslausu ríkisstjórnar er ekki von á góðu og vonandi að kjósendur hugsi sinn gang áður en kosið verður um helgina. Vinnubrögðin eru skólabókardæmi um að logið hafi verið að þjóðinni.

Sigmundur Davíð ber alla ábyrgð þó á því að hafa leitt þetta fólk til valda sem virðist hafa brugðist algjörlega, einkum ef rétt reynist að verið sé að afvegaleiða þjóðina til að kjósa yfir sig vinstristjórn um helgina án þess að heildarmyndin liggi ljós fyrir.

Hann hefur skapað þetta skrímsli sem er á vaktinni, úrræðalausa ríkisstjórn sem reynir að forðast að segja fólkinu í landinu sannleikann um stöðuna og fer marga hringi í þeim hráskinnaleik.

Sigmundur Davíð spáir öðru hruni

Aftur til fortíðar - Steingrímur J. í klóm drekans

Mér finnst það mjög óábyrgt hjá Steingrími J. Sigfússyni að bjóða kjósendum upp á fortíðarhyggju af því tagi sem felst í ummælum hans um Icelandair á fundi austur á Egilsstöðum. Enn undarlegra er að neita þeim orðum, sem hafa farið um allt og eru algjörlega skýr. Ekki þýðir að fara í feluleik með þá afstöðu og þau óábyrgu ummæli sem hann lét falla. Slíkt talar sínu máli mjög vel.

Enn undarlegra var að hlusta á útúrsnúninga Steingríms J. um Drekasvæðið í kvöldfréttum Stöðvar 2 þar sem spyrja þurfti hann fimm eða sex sinnum út í afstöðu vinstri grænna til olíuborana án þess að nokkru sinni fengist eitthvað svar. Aumt var það. Er ekki Steingrímur J. í klóm drekans?

Tilhæfulaust að ríkið taki Icelandair yfir

Sumarkveðja

Ég vil óska lesendum vefsins gleðilegs sumars og þakka fyrir góð samskipti á liðnum vetri. Þetta hefur verið sviptingasamur vetur, sviptingar í veðri, pólitík og ýmsu mannlegu svosem. Þetta hefur líka verið mjög skemmtilegur vetur í skrifum hér.

Dagurinn var notalegur og góður hér á Akureyri. Ég fór í vöfflukaffi með sjálfstæðismönnum á Kaffi Akureyri og fór svo á tónleika hjá kór eldri borgara í Akureyrarkirkju kl. 17:00. Amma mín, Hanna Stefánsdóttir, hefur verið í kórnum frá stofnun og mjög virk í starfi hans alla tíð. Yndislegir tónleikar - flott lagaval og góð stemmning.

Vonandi verður sumarið okkur öllum svo gjöfult og gott.

Össur veit ekkert í sinn haus með Bakka

Össur Skarphéðinsson, iðnaðarráðherra, kom vægast sagt skelfilega út úr borgarafundi Sjónvarpsins í gærkvöldi. Maðurinn vissi ekkert í sinn haus og hljómaði eins og hann væri algjörlega tómur. Svör hans um Bakka voru sérstaklega áhugaverð, en hann vildi greinilega allt gera og rann svo á rassinn með það og sagðist ekkert vilja gera. Þvílík þöngulhausataktík!

Útgáfa á ævistarfi nóbelskáldsins tryggð

Ég fagna því að útgáfa á hinu merka ævistarfi Nóbelsskáldsins Halldórs Kiljans Laxness sé tryggð og samið hafi verið um hana. Ekki er um það deilt að Halldór er sannkallað þjóðarskáld, einn merkasti Íslendingur og rithöfundur 20. aldarinnar. Hef jafnan borið mikla virðingu fyrir bókum hans og þeirri ritsnilld sem einkennir þær. Halldór sjálfur var auðvitað um margt stórmerkilegur maður og áhugavert að lesa bækur um ævi hans og verk.

Ekki aðeins opinberu ævisögurnar heldur, og ekki síður, ævisögu Halldórs eftir Hannes Hólmstein Gissurarson, sem var vel gerð og unnin, einkum annað bindið sem er stórfenglegt. Þó fyrsta bindið sé umdeilt og mikil læti hafi verið vegna þess er heildarverkið mjög vel gert, sérstaklega annað bindið, sem er með betri ævisögum sem ritaðar hafa verið síðustu ár að mínu mati, þar sem umdeildum kafla á ævi Halldórs er lýst opinskátt.

Einn og hálfur áratugur er liðinn síðan að ég keypti allar bestu bækurnar hans Halldórs. Verk hans höfðuðu mjög til mín og ég las þær upp til agna. Var á þeim aldri að það mótaði mig talsvert og ég held að öllum unglingum sé hollt að lesa verkin hans Halldórs. Allavega gaf það mér mikið.

Ólafur heitinn Ragnarsson vann gott verk við að gefa út bækurnar aftur og gera þær vinsælar að nýju, kynna yngri kynslóðum þetta heildarsafn. Og fáir rituðu skemmtilegar og einlægar um Halldór en einmitt Ólafur.

Framtíð Laxness tryggð

Kolbrún reynir að bæta fyrir klúðrið sitt

Kolbrún Halldórsdóttir, umhverfisráðherra, reynir að bæta fyrir pólitískt sjálfsmark sitt með vandræðalegri yfirlýsingu þar sem gerð er tilraun til að draga í land með ummæli sem koma sér mjög illa fyrir vinstri græna og gera þá mjög óábyrga, svo vægt sé til orða komið. Skoðun Kolbrúnar var þó algjörlega skýr, hún situr sem umhverfisráðherra í skjóli síns flokks og Samfylkingarinnar og átti að gera sér grein fyrir að orð hennar sem ráðherra umhverfismála myndi vekja athygli og merkja afstöðu flokksins hennar.

Kannski hefur Kolbrún ekki áttað sig á því að hún sem ráðherra er ekki bara að tala fyrir prívatskoðunum sínum heldur verða ummæli hennar merkt þeim flokki sem hún er í fararbroddi fyrir. Þetta vandræðalega sjálfsmark hennar verður því um leið sjálfsmark flokksins. Ég efa ekki að vinstri grænir hafi fengið hörð viðbrögð í kvöld eftir heimskulega yfirlýsingu Kolbrúnar, sérstaklega hér í Norðausturkjördæmi þar sem formaðurinn eygir von á að fá mest fylgi um helgina.

En oft talar innsta eðlið þegar fólk talar og ég held að sú sé raunin með Kolbrúnu í því sem hún sagði. Þetta er innsta eðlið hjá VG sem talar þarna.

Kolbrún segir þingflokk VG ekki hafa lagst gegn olíuleit

Ótrúlegt sjálfsmark hjá vinstri grænum

Ég man í seinni tíð ekki eftir öðru eins sjálfsmarki hjá nokkrum stjórnmálaflokki í aðdraganda kosninga eins og því þegar Kolbrún Halldórsdóttir, umhverfisráðherra vinstri grænna, lagðist gegn olíuleit á Drekasvæðinu í kvöldfréttum Stöðvar 2 í nafni flokksins. Þeir verða lengi að bíta úr nálinni með þetta heimskupar og eðlilegt að leitað sé viðbragða Steingríms J. og annarra forystumanna um hvort þetta sé virkilega skoðun VG.

Ekki er það björgulegt ef þessi flokkur fær forystusess hér í Norðausturkjördæmi eða á landsvísu með þessa skoðun sem kemur sér illa, einkum fyrir þá á Vopnafirði. Enn fjölgar málum sem skilur að vinstriflokkanna og vandséð hvernig slík stjórn getur verið trúverðug komist hún á lappirnar á næstu dögum án Framsóknar.

Ekki er auðvelt að sjá hvernig muni ganga að ná slíkri stjórn saman þegar hún talar sig í sundur í hverju lykilmálinu á eftir öðru.

VG gegn olíuleit á Drekasvæði

Skellur fyrir siðapostula í Samfylkingunni

Mér finnst það táknrænt að þeir þingmenn Samfylkingarinnar sem mest hafa talað um gegnsæi og heiðarleika séu nú staðnir að því að hafa fengið háa styrki frá Baugi og FL Group, án þess að hafa sjálf gefið það upp. Þau eru teymd á braut sannleikans af fjölmiðlum. Þetta lyktar því miður af mútum, enda upphæðirnar háar og tengslin vekja grunsemdir.

Mér finnst samt merkilegt að þessir þingmenn hafa gagnrýnt Sjálfstæðisflokkinn harðlega fyrir lokað bókhald og leynivinnubrögð. Þau fá heldur betur skellinn fyrir sitt lokaða bókhald.

Steinunn Valdís fékk fjórar milljónir

Fylgishrun Sjálfstæðisflokksins í RS

Staða Sjálfstæðisflokksins í einu helsta lykilvígi sínu, Reykjavík suður, undir forystu Guðlaugs Þórs er alveg skelfileg. Eðlilegt væri að þeir sem töldu í lagi að horfa fram hjá styrkjamálinu eins og ekkert hafi gerst og sætta sig við það sem þar kom fram og horfa fram á veginn sætti sig við að fólk skrifar ekki upp á þessi vinnubrögð. Ég skrifaði fjölda pistla um páskana þar sem ég sagði að mikilvægt væri að menn öxluðu ábyrgð, flokksins vegna.

Slíkt fylgishrun í því kjördæmi sem viðkomandi maður leiðir þarf því varla að koma að óvörum, enda flokkurinn að missa nærri helming fylgisins. Þessi niðurstaða hlýtur að vekja spurningar um hvað hefði verið réttast fyrir flokkinn í þessari stöðu. Vonlaust er að búast við að kjósendur skrifi upp á leiðtoga Sjálfstæðisflokksins í kjördæminu eftir það sem á undan er gengið.

Eðlilegt er því að velta fyrir sér hvort hann verði strikaður út og færður neðar á listann af kjósendum sjálfum.

Sjálfstæðisflokkur tapar miklu

Hulunni svipt af styrkjum - Jóhanna styrkt af Baugi

Ég fagna því að hulunni sé svipt af leyndardómnum um styrkina fyrst stjórnmálamenn vilja ekki ganga hreint til verks og upplýsa upphæðir og helstu staðreyndir málsins. Kom mér mest á óvart að Jóhanna Sigurðardóttir tók við styrki frá Baugi. Mér finnst nú heldur vera farið að slá á þá ímynd Jóhönnu að vera á móti spillingu og hún vilji allt upp á borðið. Af hverju sagði hún fólkinu í landinu ekki frá þessu sjálf í stað þess að vera teymd á braut sannleikans af fjölmiðlum?

Nú staðfestist endanlega að Guðlaugur Þór Þórðarson fékk mjög háa styrki frá stórfyrirtækjum sem kemur í viðbót við styrkjamálið í Sjálfstæðisflokknum um páskana. Enginn vafi leikur á því að staða Guðlaugs Þórs hefur veikst í þessu máli, enda vonlaust að telja fólki trú um að svo háar styrkjagreiðslur hafi ekki verið á vitorði innan framboðsins og frambjóðandinn hafi ekki vitað af þeim. Þetta lyktar því miður af því að menn hafi hreinlega verið keyptir.

Margar beinagrindur virðast vera í skápnum og æ augljósara að Samfylkingin mun eiga erfitt með að svara fyrir styrki til sinna frambjóðenda, enda heyrist lítið t.d. í þeim siðapostulum sem hæst hafa talað um siðferði en vilja ekki leggja spilin á borðið, t.d. heilagri Jóhönnu sem var styrkt af Baugi.

Guðlaugur fékk 4 milljónir í styrk

Getur Jóhanna ekki tjáð sig á ensku?

Ég er ekki undrandi á því að erlendir fjölmiðlar séu farnir að velta því fyrir sér hvers vegna Jóhanna Sigurðardóttir, forsætisráðherra, hafi ekki veitt erlendum fjölmiðlum viðtöl og hafi ekki haldið blaðamannafundi á ensku. Erlendir fjölmiðlar hafa enda engu minni áhuga á stöðu mála hér nú en í haust þegar erlenda pressan sat fyrir Geir Haarde og hann varð að tala jafnt til hennar og þeirrar íslensku. Á þeim tímum þegar pólitíska forystan á Íslandi þarf að tala og reyna að byggja upp traust og endurheimta styrk á alþjóðavettvangi dugar ekki að hún sitji þögul hjá.

Miklar kjaftasögur hafa gengið um að Jóhanna sé varla talandi á ensku, hafi viljað ávarpa leiðtogafund NATÓ fyrir nokkrum vikum á íslensku en verið hafnað og hafi við svo búið hrökklast frá því að fara á fundinn. Mikilvægt er að Jóhanna afsanni þessar sögur og sýni að hún ráði við verkefnið að tala til útlendinga engu síður en okkur Íslendinga. Reyndar má deila um hversu afdráttarlaust Jóhanna hefur talað við okkur hérna heima, en mér finnst það ekki gott veganesti að talað sé um að forsætisráðherra geti ekki haldið uppi samtali á ensku.

Þessi viðbrögð Jóhönnu hleypa aðeins lífi í kjaftasögurnar um að hún sé varla talandi á ensku. Mér finnst eðlilegt að við gerum þá sjálfsögðu kröfu til forystumanna á Íslandi að þeir geti talað á ensku við fjölmiðlamenn. Slíkt er lágmarkskrafa. Margir gerðu þá kröfu til Geirs í mestu krísunni að hann talaði við erlendu pressuna og algjör óþarfi að gera minni kröfur til eftirmanns hans.

Þögn Jóhönnu til umræðu í Færeyjum

Stjórnmálamenn verða að leggja allt á borðið

Frétt kvöldsins um að FL Group og Baugur hafi styrkt frambjóðendur í prófkjörum árið 2006 staðfestir illan grun um óeðlileg afskipti og stjórnmálamenn hafi hreinlega verið keyptir. Mikilvægt er að þessir stjórnmálamenn og allir aðrir sem voru í prófkjörsslag í aðdraganda þingkosninganna 2007 leggi allt bókhald sitt á borðið og opni upp á gátt. Fyrr verður ekki sátt í samfélaginu um þessi mál en allt hefur verið opinbert.

Þeim stjórnmálamönnum sem nefndir eru og öðrum í hörðum og dýrum prófkjörsslag ætti að vera greiði gerður að opna allt hafi þeir ekkert að fela. Siðferðisleg skylda þeirra er að tala hreint út til kjósenda og sýna okkur á bakvið tjöldin í prófkjörsbókhaldið. Ekkert annað boðlegt í þessari stöðu.

Ef þeir vilja ekki sýna okkur bókhaldið og sverja fyrir þessa styrki eiga þeir að hugsa sinn gang. Þessi frétt opnar allavega ljót baktjaldavinnubrögð og sýnir að það er fjarri því bara tengt Sjálfstæðisflokknum.

Háir styrkir frá Baugi og FL

Snillingurinn Arshavin - staða Man Utd styrkist

Rússneski knattspyrnumaðurinn Andrei Arshavin fór aldeilis á kostum á Anfield í kvöld og tók fernu með snilldartöktum og tryggði stöðu Manchester United í forystu deildarinnar með því að taka stig af Liverpool. Þvílíkur snillingur sem þessi strákur er, enginn vafi að þessi rússneski snillingur er einn öflugasti knattspyrnumaður samtímans og eitt mesta efnið í dag.

Þeir sem styðja Manchester United gleðjast í kvöld, segi ekki annað. Meistarataktar Arshavin gleður fleiri en Arsenal-stuðningsmenn. :)

Liverpool í toppsætið - Arshavin með fernu fyrir Arsenal

Óeðlileg íhlutun í íslenska kosningabaráttu

Ég er alveg sammála Bjarna Benediktssyni, formanni Sjálfstæðisflokksins, að íhlutun sendiherrans hjá ESB er óeðlileg íhlutun í íslenska kosningabaráttu. Við látum auðvitað ekki skriffinnskumenn hjá bákninu mikla stjórna okkar pólitík og hvernig við túlkum þau lykilatriði sem okkur mestu skipta eða stefnumótun flokkanna hér, hvort sem þeir eru hlynntir eða andvígir aðild. Við berum okkur sjálf eftir því að meta okkar stöðu og hvaða valkosti við höfum.

Er mjög ánægður með að formaður flokksins ætlar Tryggva Þór Herbertssyni stóran sess innan flokksins í efnahagsmálaumræðu komandi mánaða og ára. Sú ákvörðun að hafa hann með formanni og varaformanni flokksins á þessum blaðamannafundi sýnir styrkleika Tryggva og að hann muni hafa lykilhlutverk í þingflokknum á komandi árum. Er ég ekki undrandi á því enda Tryggvi í sérflokki.

ESB blandar sér í kosningabaráttu