Femínistar landsins skjálfa vegna klámþings

Um fátt er nú meira rætt en klámþing sem halda á hérlendis eftir nokkrar vikur. Femínistar landsins skjálfa vegna þessara tíðinda og láta í sér heyra á fullum krafti, hneykslaðar á því að slíkt gerist hér. Það er nú víst einu sinni svo að við lifum ekki í vernduðu umhverfi. Það þarf varla að taka það fram að klám er orðið lítið feimnismál - nægir þar að líta á netið og fleiri þætti samfélagsins.

Ég get ekki séð hvað er að því að þetta þing fari fram hér. Tek ég eiginlega undir orð Hrannar Greipsdóttur, hótelstjóra á Hótel Sögu í fréttum í gær er hún var spurð út í þetta. Þar munu þinggestir víst gista. Það er svosem varla við því að búast að allir verði hoppandi sælir með þetta þinghald og fagni því. Ég er þannig gerður að ég skipti mér ekki af fundahaldi annars fólks svo framarlega að þar fari allt vel fram, engin læti og vesen.

Búast má við ef marka má viðbrögð femínista að þau mótmæli með einhverjum hætti þinghaldinu. Femínistar gera að sjálfsögðu það sem þeir vilja og eru auðvitað í fullum rétti að hafa á þessu skoðanir. Ég verð þó að taka af skarið í hina áttina, enda get ég ekki séð að þetta þinghald sé rangt.

Klámþing verður haldið hér á landi í næsta mánuði

Athugasemdir

[Hólmgeir Guðmundsson (IP-tala skráð) 16.2.2007 kl. 09:22]

Áttu ekki við að feministar skjálfi ? Bjóst við að lesa hér um fyrirhugaðar terroraðgerðir aðgerðahóps feminista en greip í tómt.

[Guðfinnur Sveinsson, 16.2.2007 kl. 10:10]

Til að byrja með vil ég benda á að það eru þau femínistar ekki þær femínistar. Við karlmenn erum líka femínistar upp til hópa :)

Að klámþinginu vil ég vitna í orð Bryndísar Ísfold þar sem hún vitnar í hegningarlög íslands. Sjá færsluna hér.

210. gr. Ef klám birtist á prenti, skal sá, sem ábyrgð ber á birtingu þess eftir prentlögum, sæta sektum ...1) eða fangelsi allt að 6 mánuðum.
Sömu refsingu varðar það að búa til eða flytja inn í útbreiðsluskyni, selja, útbýta eða dreifa á annan hátt út klámritum, klámmyndum eða öðrum slíkum hlutum, eða hafa þá opinberlega til sýnis, svo og að efna til opinbers fyrirlestrar, eða leiks, sem er ósiðlegur á sama hátt.

Við getum örugglega verið sammála um það að Klámþing fyrir íslenska netmiðla flokkist undir opinberan fyrirlestur og hvað þá að flyjta inn klám í útbreiðsluskyni.

[Stefán Friðrik Stefánsson, 16.2.2007 kl. 10:31]

Takk fyrir kommentið Guffi.

Jú að sjálfsögðu eru það þau og ég hef leiðrétt þetta. Var fyrst eiginlega að benda á skrif þeirra forystukvenna femínista sem hafa skrifað um þetta og vék að þeim en það er rangt að tala um þær í þessu samhengi. Takk fyrir þessa góðu ábendingu. Sjálfur er ég alinn upp af sterkum konum allt í kringum mig og helstu fyrirmyndir ævi minnar voru ömmur mínar, móðir og systur, allt kjarnakonur, svo að ég hef alltaf litið á mig sem talsmann kvenréttinda. Það er alltaf mikilvægt að standa vörð um þau. Mér finnst sjálfsagt að það fari fram þessi umræða, þetta er eitthvað sem maður eiginlega beið eftir að gerðist enda er klámheimurinn alltaf að stækka. Það verður fróðlegt að sjá hversu víðtæk mótmæli verða við þessu.

mbk.

[Steini Briem (IP-tala skráð) 16.2.2007 kl. 10:52]

Þetta þinghald er greinilega kolólöglegt og því fær Ísberg dómari væntanlega enn meira að gera á næstunni. Hann neyðist til að horfa á endalausar klámmyndir ofan í Baugsmálið og vonandi ríður það honum ekki að fullu. En það verður sjálfsagt allt vitlaust ef hann skipar saksóknaranum að stoppa sýningu í miðri mynd.

[halkatla, 16.2.2007 kl. 11:44]

ég hef ekki orðið vör við skjálfta í femínistum, en það er annað hægt að segja um þá sem eru á gagnstæðri skoðun, það fólk virðist vera að ganga af göflunum yfir því að öllum öðrum finnist ekki klám og viðbjóður jafn skemmtilegt og þeim finnst 

[Ragnar Ólason, 16.2.2007 kl. 11:58]

Er feministi ekki karlkynsorð og því á að segja þeir feministarnir

[Steini Briem (IP-tala skráð) 16.2.2007 kl. 12:27]

Rétt er það, þeir eru farnir femínistarnir, kommúnistarnir og fasistarnir.