Harðorð ályktun VG gegn klámráðstefnunni

Það er ekki hægt að segja annað en að landsfundur vinstri grænna hafi ályktað með krafti gegn allri klámvæðingu. Í morgun var samþykkt þar ályktun undir yfirskriftinni Frelsum ástina - höfnum klámi, þar sem sérstaklega er vikið að klámráðstefnunni, sem halda átti hér í marsbyrjun en hefur nú verið slegin af. Fagnað er samstöðunni gegn ráðstefnunni í samfélaginu.

Fræg hefur verið afstaða femínista innan flokksins, t.d. Kolbrúnar Halldórsdóttur, alþingismanns, gegn klámvæðingu en þarna er stigið skrefið enn lengra. Virðist VG fagna því að ferðamenn sem ekkert hafi brotið af sér sé gert erfiðar að koma til landsins og eiginlega gert það ómöulegt. Það er undarleg stefna. Virðist VG hreykja sér af þessu verklagi. Vill VG fara að sortéra ferðamenn til landsins? Það virðist vera. Ekki get ég sagt að sú stefna sé gleðiefni og undrun er yfir því í mínum huga að flokkur hérlendis tali fyrir slíku.

Er samstaða um það í samfélaginu að sortera ferðamenn til landsins? Ég tek undir ályktun Samtaka ferðaþjónustunnar í gær. Þar var talað um málið með heilsteyptum og góðum hætti, mjög eðlileg sýn á ferðaþjónustuna. Það kann ekki góðri lukku að stýra að leggjast gegn komu ferðamanna því þeir geti mögulega gert eitthvað af sér. Þetta er ekki heillavænleg pólisía. Það er alveg rétt að það myndaðist þverpólitísk samstaða gegn ráðstefnunni. Í borgarstjórn leiddu sjálfstæðismenn undir forystu borgarstjóra andstöðuna af krafti - það er ég fjarri því ánægður með.

VG talar af áfergju um klámvæðingu í ályktun sinni. Það er talað þar með mjög hvössum hætti. VG málar sig merkilegum litum með þessari ályktun. Er þetta stefna fleiri flokka? Það væri fróðlegt að vita í raun. Ætli að kosningarnar, sem eru handan við hornið, muni gera það að verkum að fleiri flokkar sendi frá sér svona ályktanir? Það þarf allavega enginn að segja mér að þessi svokallaða pólitíska samstaða sé tilkomin út af öðru en því að kosningar eru að skella á.

Hvað segja annars sjálfstæðismenn í borgarstjórn? Ætla þeir að verða jafnákafir í sinni baráttu og vinstri grænir eru í dag? Það er ekki nema von að spurt sé, enda leiddu þeir andófið gegn þessari ráðstefnu á sviði borgarmálanna.

VG fagnar samstöðu gegn klámráðstefnu

Athugasemdir

[Sigurður Þór Guðjónsson, 24.2.2007 kl. 13:38]

Mér finnst það út hött að þetta snúist um frelsun ástarinnar enda er hvergi að ástinni vikið nema í fyrirsögn ályktunarinnar. Ég hef alltaf haft samúð með Vgv en þetta finnst mér hreinlega vera blaður. Er ekki hægt að halda ástinni  utan við pólitískar deilur? 

[Ingvar (IP-tala skráð) 24.2.2007 kl. 14:24]

Skelfilegt að horfa á þessa flokka að berjast í örvæntingu sinni að sýnast vera hvor öðrum siðprúðari og sýna þvílíka helgislepju og hræsni. 

Greinilega kosningar á næsta leyti, held að 90% þjóðarinnar sjái í gegnum reykinn, því að hver ber sér á brjóst núna til að reyna að höfða til allra.  Við vitum svo hvað gerist eftir kosningar.

Eina sem ég sé í þessu er múgæsingur "fárra" og aðrir hafa kannski ekki þorað að segja of mikið af hræðslu við að vera stimplaðir "pornodogs"  

Það var engin ástæða til að reka þetta fólk í burtu, þrátt fyrir að menn mótmæli þeirra atvinnustarfsemi sem er lögleg í þeirra löndum.  Frekar ef fólk var ósátt að vera bara með mótmæli og vekja athygli á þeirra málstað sem voru á móti þessum iðnaði.   Það hefði komið betur út fjölmiðlalega og hefði haft mun betri áhrif heldur en að hindra í að hópur fólks komist til landsins.

En svo á móti erum við á móti pyntingum og morðum og að sé traðkað á mannréttindum, við hneygjum okkur og beygjum fyrir ríkjum eins og Kína sem senda "morðingja" hér til landsins.  Allt í þágu viðskipta og þá eru friðsamlegir hópar eins og Falun Gong reknir úr landi. 

Hræsni, sleikjuháttur og tvískinnungsháttur er hluti sem flestir almennir borgarar sjá í gegnum.   Þetta minnir mann á svona hópa sem æsa sig upp vegna, fóstureyðinga og ganga jafnvel svo langt að drepa lækna sem gera aðgerðir.   Allt í þágu þeirra heilaga málstaðar.

Síðan koma "bændakóngarnir á Sögu" og setja sig á háan hest, ætla að ná í smá samúð og væntumþykkju inn á sinn málstað "of hás landbúnaðarvöruverðs"  En eru ímynd hræsninnar, eru með myndir á sínum herbergjum frá þessum aðilum  í sjónvarpi Hótelsins. 

Er ekki í lagi?   Hversu langt á að ganga í þessu bulli?   Maður líttu þér nær!

[Kolbrún (IP-tala skráð) 24.2.2007 kl. 14:29]

Man enginn eftir því þegar íslenskum unglingakór - nú man ég ekki lengur nákvæmlega hvaða kór - var á síðasta ári úthýst í skipulagðri tónleikaferð í bæ einum á nýja Englandssvæðinu  vegna hvalveiða landans?

Kanar leyfa þennan "klám"iðnað sem um er rætt en hins vegar ekki (amk ekki í orði) hvalveiðar sem við leyfum.  Mér finnst bara ágætt að okkar tvískinnungur sé notaður sem vopn gegn þeirra tvískinnungi.

[Steini Briem (IP-tala skráð) 24.2.2007 kl. 16:42]

Til að gera alla ánægða hefði náttúrlega verið hægt að senda klámhundana í einangrunarstöðina í Hrísey, eins og aðra erlenda hunda. Þeir hefðu getað eðlað sig þar í kynbótastöðinni og heilsað upp á Þorvald hinn gamla, Narfa Þrándarson og hann Hákarla-Jörund Jónsson. Og þeir sem hefðu viljað græða á öllu saman hefðu getað dansað í kringum gullkálfinn í holdanautastöðinni. Köttur úti í mýri og málið dautt!

[Ragnar Bjarnason, 24.2.2007 kl. 19:01]

Ég verð að segja fyrir mitt leyti að þá lyktar þetta allt saman af kosningum, þar verð ég að taka undir með þér. Þetta mál allt er svona frekar til unnið af einhverjum trúarhita frekar en það hafi fengið málefnalega umfjöllun, en hlutirnir eru auðvitað aldrei svart/hvítt. Ég ákvað í upphafi að taka ekki þátt í þessari umræðu þar sem hún var á þessum nótum en verð þó að segja að það er hægt að setja verulegt spurningamerki um "flokkun" ferðamanna á þennan hátt. Mér finnst eitthvað ríkulegra eigi að liggja að baki. Að því sögðu er ég líka ákaflega jafnréttislega sinnaður og styð jafnan rétt allra. Fannst þetta bara ekki alltaf vera á þeim nótum.