Glæsilegur sigur hjá Bubba í Hæstarétti

Það er óhætt að segja að Bubbi Morthens vinni góðan sigur í frægu máli sínu gegn DV og Hér og nú og fái sitt fram. Hæstiréttur staðfestir dóm Héraðsdóms í mars 2006. Eins og flestir vita birti tímaritið forsíðumynd í blaði sínu í júní 2005 með flennifyrirsögninni Bubbi fallinn! Á myndinni sást Bubbi með sígarettu í munnvikinu sitjandi í bíl sínum talandi í farsíma. Bubbi krafðist þess að ummælin yrðu dæmd dauð og ómerk og að honum yrðu dæmdar miskabætur.

Ummælin eru dæmd dauð og ómerk og er ritstjóri blaðsins á þeim tíma dæmdur til að greiða Bubba 700.000 krónur í miskabætur. Ennfremur er tekið sérstaklega fram í dómnum að myndataka af manni í bifreið sinni sé með öllu óheimil á sama hátt og um væri að ræða myndatöku að heimili hans. Ráðist sé að friðhelgi einkalífs hans með slíku.

Tek ég undir þetta mat. Man ég vel þegar að ég sá þetta tiltekna blað fyrst. Fyrsta hugsun mín og flestra voru án vafa að nú væri Bubbi aftur kominn í dópið. Allavega er ljóst að fyrirsögnin bauð heim misskilningi og dómurinn er svo sannarlega skiljanlegur. Svona umfjöllun er enda fyrir neðan allar hellur.

Það er gott að það liggi fyrir dómur sem tekur í vonandi eitt skipti fyrir öll á "blaðamennsku" af þessu tagi sem var á ótrúlegu plani á þeim tímapunkti sem þessari forsíðu var slengt fram. Bubba Morthens vil ég óska til hamingju með sigur sinn í málinu. Sá sigur er í senn bæði afgerandi og nokkuð sögulegur.

Bubba Morthens dæmdar bætur fyrir meiðyrði

Athugasemdir

[Eyþór Laxdal Arnalds, 1.3.2007 kl. 21:56]

Tek undir þetta Stefán; þetta er sigur fyrir vandaðri fréttamennsku.

 - þakka góðar kveðjur frá þér.

[Páll Sævar Guðjónsson, 1.3.2007 kl. 23:21]

Þetta er frábær sigur hjá Bubba. Þetta er sigur fyrir góðri og faglegri blaðamennsku.

[Steini Briem (IP-tala skráð) 2.3.2007 kl. 01:42]

Það þarf að taka upp flengingar á Austurvelli fyrir svona perra. Stelpurnar á Sóðali, beint á móti Alþingi, gætu séð um þær. Verst að sumir myndu bara sækjast eftir þeim.