Reykjavíkurborg kaupir brunarústirnar

Ein helsta frétt dagsins er að Reykjavíkurborg stefnir að því að kaupa húsin sem brunnu í miðbæ Reykjavíkur á síðasta vetrardag. Það kom greinilega í ljós með afgerandi hætti strax á þeirri stundu er húsin stóðu í ljósum logum að borgin vildi fylgja málum þar eftir. Þá kom enda borgarstjóri strax með þá pólitísku yfirlýsingu að götumyndin á svæðinu ætti að halda sér eftir uppbyggingu sama hvernig færi.

Það er skiljanlegt að Reykjavíkurborg vilji fylgja þessu máli eftir, enda er um að ræða elstu heillegu götumynd borgarinnar og svæði sem skiptir án nokkurs vafa talsverðu máli. Þetta er viðkvæmt svæði sem þarf að hafa umsjón með að fari ekki á einhverjar villuslóðir. Samt sem áður er það eflaust mjög umdeilt að borgin sé að kaupa þetta svæði upp og vinna málið með þeim hætti. Ég verð nú að segja það alveg eins og er að það er stórt spurningamerki í huga mér yfir því hvort það sé rétta leiðin. En ég er svosem ekki kjósandi í Reykjavík og sé þetta frá annarri hlið.

Í dag var Hrafn Gunnlaugsson, leikstjóri, gestur í hádegisviðtalinu á Stöð 2. Hrafn hefur ekki farið troðnar slóðir við að tjá skoðanir og hefur sérstaklega verið ófeiminn við að tjá sig um skipulagsmál í Reykjavík. Sumir eru ekki ánægðir með skoðanir hans, aðrir fagna þeim. Ég er einn þeirra sem sá báða þætti hans þar sem hann teiknar upp lifandi myndir af skipulagsbreytingum og leikur sér með lifandi form þeirra. Það voru áhugaverðar myndir og margar aðrar hugmyndir lifnuðu við í kjölfar þeirra. Til dæmis var þar komið með flugvallarkost á Lönguskerjum og talað um að byggja hátt og byggja meira við ströndina.

Hrafn gaf lítið fyrir þessar pælingar um að vernda götumyndina og sagði sem rétt er að menn byggja ekki fornminjar frá grunni aftur. Þegar þær eru farnar eru þær svo sannarlega farnar veg allrar veraldar. Hann kallaði þessa pólitík meirihlutans vinsældapólitík á örlagastundu. Það er kannski eitthvað til í því. Þetta var allavega viðtal sem var áhugavert að sjá. Hrafn hefur þann stóra kost að tala máli sem er auðvelt að skilja og setja fljótt í samhengi. Hann vill greinilega nota tækifærið og byggja með öðrum hætti á þessu brunarústasvæði og gaf lítið fyrir forna götumynd.

Ég veit ekki hvað er rétt í þessu. Persónulega finnst mér þó rétt að gera engar drastískar breytingar á þessari götumynd. En ég efast um að ég myndi vera talsmaður þess að Akureyrarbær keypti upp brunasvæði dýrum dómum þó á viðkvæmu svæði væri svo að ég hugsi málið frá mínum sjónarhóli í eigin sveitarfélagi. Þetta er eflaust umdeilt og sitt sýnist hverjum.

Það verður fróðlegt að sjá hvernig byggt verður á þessu svæði og hvaða starfsemi verður þar. Varla ætlar borgin að eiga þau hús sem þar rísa.

Reykjavíkurborg vill kaupa hús sem urðu eldi að bráð

Athugasemdir

[Sveinn Ingi Lýðsson, 22.4.2007 kl. 09:52]

Góð pæling hjá þér eins og vanalega.  Ég held að Viljálmur og hans menn séu þarna að stunda hreinan og kláran populisma.  Að ætla sér að frysta söguna með endurbyggingu gamalla húsa sem betur væru komin á safni er mjög vond hugmynd.  Ég vísa í blogg mitt um opna samkeppni arkitekta um endurreisn á þessu "besta" horni borgarinnar.

Þó bruni húsanna hafi verið ömurlegur eins og allir brunar mega menn ekki glata þeim sóknarfærum sem hann hefur gefið.  Hluti sögunnar er bæði eyðing, endurnýjun, uppbygging og síðast en ekki síst framþróun.

Gleymum því ekki. 

[Gylfi Björgvinsson, 22.4.2007 kl. 10:57]

Já  ég  er  svo  sannarlega  sammála  þér  Sveinn, bruni  þessara  húsa  er orðinn  þó  nöturlegt sé   og við tekur  uppbygging á þessu horni við  byggjum  ekki  sömu  hjallana  aftur  heldur  ný hús,     glæsileg hús  sem  gera  götumynd  þessa horns  enn betri,  gamla götumyndin  var  þegar  afi var ungur  enn hann  dó  líka blessaður eins og  aðrir. Við þurfum  bara að  passa okkur á  að  halda í   miðborgarstílinn þegar  húsin  verða  hönnuð á  ný.  Hvort  Borgarstjórn  sé að gera rétt með  að kaupa  upp svæðið getur verið umdeilt enn með því móti  ættu þeir  allavega  að geta  haft meira um  það að segja  hvernig  uppbyggingin  verður, þannig  að mér  finnst það  í  fíinu  lagi

[Stefán Friðrik Stefánsson, 22.4.2007 kl. 17:37]

Takk fyrir kommentin og góðar pælingar.

mbk.