Útvöldum boðið að sjá friðarglampann í Viðey

Á þriðjudag verður friðarljós í minningu um tónlistarmanninn John Lennon tendrað í Viðey, á afmælisdegi hans. Þar mun verða mikil athöfn. Það kemur varla að óvörum að þar er lokuð athöfn fyrir útvalda gesti. Finnst það flott hjá tónlistarmanninum dr. Gunna að benda á að ekkert boðskort rataði heim til hans og hann þurfi því að sitja heima og horfa á ljósið kvikna þaðan. 

Það er að verða ansi áberandi að svona menningarsamkomur eða viðburðir eru að verða boðsviðburður þeirra sem sumir vilja kalla ríka og fræga fólkið, en ég vil kalla þverskurð samfélagsins og menningarelítunnar. Veit ekki hvaða mælistika er fengin út hinsvegar til að finna þennan þverskurð, það er kannski enn eitt spurningamerkið sem kviknar á rétt eins og friðarljósinu. Varla er bara verið að bjóða friðarsinnum í eyjuna.

Það er alveg ljóst að það er mjög vel til fundið að minningu meistara Lennons sé sómi sýndur. Friðarsúlan mikla er að ég held undir merkjum Imagine, sem ber ennfremur heiti eins þekktasta lags Lennons á sólóferli hans. Um er að ræða ljóssúlu sem stendur upp í mikla hæð. Það er viðeigandi að heiðra minningu Lennons og gott mál að þetta gerist hér á Íslandi. Lega landsins gerir það að verkum að það er mitt á milli austurs og vesturs og greinilega er Ísland valið til að birtunni stafi héðan um allan heiminn, enda miðja vegu milli risaveldanna.

Greinilegt er að þessi friðarsúla er hjartans mál Yoko Ono nú, enda liggur hún mikla áherslu á verkið. Hef ég lengi verið mikill unnandi tónlistar Lennons, sérstaklega áranna með Bítlunum og seinni hluta sólóferilsins. Framlag Bítlanna og Lennon varð til þess að breyta gangi sögu tónlistarinnar. Eitt þekktasta lag Lennons er fyrrnefnt Imagine. Er það ekki annars uppáhaldslag okkar flestra? Tær snilld.

Vonandi verður bein útsending á einhverri stöðinni frá þessu svo að friðarglampinn lýsist ekki bara yfir boðsgestina útvöldu og þá Reykvíkinga, án boðskorts, sem sjá ljósið heiman úr stofu.

Dr. Gunni fékk ekki boðskort

Athugasemdir

[Jens Guð, 6.10.2007 kl. 00:38]

  Ég hef ekki heldur fengið boðskort.  En það getur þó verið á leiðinni í póstinum.  Hinsvegar þótti mér áhugavert að heyra í útvarpsfréttum spilað brot af heimasíðu Yoko (varla fer maður að fallbeygja nafnið Yokoar?) þar sem að hún lofar Ísland í bak og fyrir vegna hreins lofts,  góðs drykkjarvatns og þess háttar.  Fréttinni fylgdi að yfir milljón manns fari inn á heimasíðu hennar á dag.  Þetta verður því að teljast einhver mesta ferðamálaauglýsing sem að Ísland hefur fengið.

  Friðarsúlan mun klárlega laða fjölda erlendra ferðamanna og fjölmiðlafólks til Íslands.  Ég er afar ánægður með þetta.

  Yoko er stærra nafn í myndlistarheiminum en margir halda.  Frægð Lennons skyggði eðlilega á hennar stöðu þar.  En áður en að þau kynntust var hún stærsta stjarna Flux-hópsins í Bandaríkjunum.  Myndlistarhóps sem að hafði um allan heim mikil áhrif á þann geira myndlistar sem að kallaðist nýlist á sjöunda áratugnum. 

  Ég er þér ósammála með að seinni hluti sólóferils Lennons hafi verið merkari en fyrri hlutinn.  Fyrsta alvöru sólóplata Lennons,  Plastic Ono Band,  er jafnan ofarlega á lista yfir bestu plötur rokksögunnar.  Enn í dag eru hljómsveitir að fara í efstu sæti vinsældalista með "coverum" af þeirri plötu.  Til að mynda Green Day með "Working Class Hero" og U2 með "Instant Karma",  sem að vísu var bara smáskífulag frá sama tímabili. 

  "Imagine"lagið var af næstu og samnefndri sólóplötu Lennons.  Ég veit ekki hver staðan er í dag en fyrir nokkrum árum var það næst mest "coveraða" lag heims (á eftir "Yesterday" eftir Paul McCartney).     

  Margrét Thatcher notaði"Imagine"sem þemalag í síðustu kosningabaráttu sinni og rökstuddi valið á því lagi með því að í það eina skiptið á ævinni sem að John Lennon kaus í alþingiskosningum þá kaus hann Íhaldsflokkinn - þrátt fyrir verkalýðssinnaða afstöðu.

  Yoko gaf "Imagine"lagið,  að mig minnir Amnesty International (eða hvort að það var Rauða krossinum?).  Það þýðir að öll höfundarréttarlaun fyrir lagið renna óskipt til AI.