Er áramótaskaupið orðið úrelt sjónvarpsefni?

Ég er enn að melta áramótaskaupið sem okkur landsmönnum var boðið upp á í gærkvöldi. Varð eiginlega fyrir nokkrum vonbrigðum, enda átti ég von á meiru miðað við þann mannskap sem hélt utan um efnið. Reyndar er áramótaskaupið eitt umdeildasta sjónvarpsefnið á hverju ári og erfitt að gera öllum til hæfis. Þetta er kannski vanþakklátasta verkefni leikstjórans á hverju ári.

Mér fannst mörg atriði svosem alveg ágæt. Það sem mér fannst hinsvegar verst af öllu var uppbygging skaupsins og Lost-þemað sem var beinagrind þess. Það var sá þáttur sem mér fannst ekki hitta í mark og hann skemmdi fyrir heildarmyndinni allnokkuð. Mér fannst skaupið vera alllengi að komast af stað og fannst fyrstu mínúturnar hreinlega hundleiðinlegar og þetta varð ekki sá þétti pakki sem ég bjóst við frá Ragnari Bragasyni, sem átti besta leikna sjónvarpsefni ársins 2007, hina frábæru Næturvakt.

Þegar að það komst loks af stað voru atriði sem mér fannst sum hver ansi fyndin. Nægir þar að nefna grínið með tjaldsvæðamálin á Akureyri um verslunarmannahelgina, Steingrím J, Árna Johnsen, Randver og vinslitin í Spaugstofunni, hundinn Lúkas, okkur bloggarana, Bubba Morthens, svo dæmi sé nefnt. Þarna var greinilega mun meiri þjóðfélagsádeila en hefur verið í skaupum á síðustu árum og stjórnmálamenn fengu tiltölulega mikinn frið frá rætnu gríni. Við bloggarar fengum okkar sneið, sem var svolítið súrsæt en kómíst innst inni. Það var skautað að mestu yfir hitamál á borð við REI og pólitísk örlög eftir kosningarnar, sem var miður.

En heildarpakkinn var ekkert meistaraverk að mínu mati. Það var of lengi af stað og ég varð fyrir vonbrigðum. Átti einfaldlega von á betra efni og þéttari pakka, miðað við mannskapinn sem stóð að skaupinu. Það er þó fjarri því að það hafi verið dautt í gegn, þarna voru ágætispunktar en það var samt verulega gloppótt. Var svolítið hugsi yfir útkomunni og eiginlega þurfti að sjá það aftur til að  botna í sumu á meðan að annað varð enn óskiljanlegra kannski.

Hugleiði hvort að það sé kannski orðið svo að áramótaskaupið sé orðið úrelt sjónvarpsefni, sé orðið gloppótt og lélegt hreinlega. Auglýsingin komst þó vel til skila. Hinsvegar finnst mér það prinsippmál að klippa ekki þátt af þessu tagi í tvennt, aðeins fyrir auglýsingamaskínuna. Er ekki góð ákvörðun og gott hjá menntamálaráðherra að slá aðeins á puttana hjá þeim er stjórna för hjá RÚV, en það gerði hún með áberandi hætti en ekki dómínerandi svosem.

Það er því miður að verða árviss viðburður að ekki sé horfandi á þetta áramótaskaup eða það valdi gríðarlegum vonbrigðum hið minnsta. Miklu er kostað til, en það verður lélegra eða óskiljanlegra með hverju árinu. Ég man ekki eftir almennilegum skaupum síðan að Óskar Jónasson gerði tvö eftirminnileg árin 2001 og 2002. Skaup Spaugstofunnar árið 2004 var allt í lagi en ekkert meistaraverk, en það var þó hægt að hlæja að því og hafa gaman af. Skaupin síðustu tvö ár voru ekkert spes.

Sú spurning verður sífellt háværari hvort að skaupið líði senn í aldanna skaut eins og árin sem það á að dekka, nú í seinni tíð með sífellt gloppóttari hætti. En ég vil þó taka fram að þetta skaup var það skársta nú í nokkur ár en það var samt eitthvað sem stórlega vantaði. Annars skiptist fólk í tvo hópa eins og fyrri daginn og sitt sýnist jú hverjum.

Athugasemdir

[Fannar frá Rifi, 2.1.2008 kl. 00:59]

Mér þykir þú vera frekar neikvæður á Skaupið kæri Stefán. Mér fannst skaupið bara alveg ágætt að þessu sinni. Þau hafa verið mörg verri heldur en þetta. Það var tekið með allt öðrum hætti á þessu skaupi heldur en öðru. Önnur mál voru tekin fyrir. Þ.e.a.s. ekki bara pólitík út í gegn eins og oft vill verða.

Mér fynnst Skaupið eiga að halda áfram. Það er gaman að sitja með fjölskylu vinum fyrir fram sjónvarpið eftir að hafa komið af Brennu og vera nýbúinn að borða góða máltíð og/eða eftirrétt og hafa gaman af og hlæja. Maður þarf aðeins að melta áður það er vaðið út að sprengja. 

Skaupið lifi. og Gleðilegt nýtt ár. 

[Stefán Friðrik Stefánsson, 2.1.2008 kl. 01:11]

Takk kærlega fyrir kommentið Fannar minn. Óska þér gleðilegs árs og þakka allt hið gamla og góða.

Er kannski ekkert rosalega neikvæður. Hrósa sumu en blóta öðru reyndar. Ekkert að fella skaupið algjörlega svosem, en það hefur verið gloppótt síðustu árin vissulega. Allavega að mínu mati. En vonandi er það á réttri leið. En mér fannst mörg ekkert spes móment í skaupinu en svo kom ágætis grín inn á milli. Þetta var svona misjafn kokteill, maður er enn að átta sig á bragðinu svosem.

Hafði gaman af mörgu og við hlógum mikið yfir sumum atriðum, sérstaklega atriðunum sem stóð okkur hér næst; tjaldsvæðamálinu og Lúkasarmálinu. Því var gerð mjög góð skil. :)

mbk.

[Stefán Friðrik Stefánsson, 2.1.2008 kl. 01:22]

Takk fyrir kommentið Sigurður Helgi. Það var margt mjög fínt í þessu skaupi. Það sem fór helst í taugarnar á mér var þungamiðjan sem var Lost-dæmið. Kannski fannst öðrum það gott. En fjarri því að ég hafi setið steinrunninn yfir þessu. Margt gott, t.d. var Bubba og Steingrími gerð frábær skil. Jón Gnarr er auðvitað algjör snillingur.

mbk.

[Þorsteinn Siglaugsson, 2.1.2008 kl. 10:05]

Sammála þér varðandi þetta fólk þarna í hrauninu. Hver var eiginlega punkturinn í því?

Að öðru leyti var vissulega eitt og eitt atriði í þessu fyndið, en flest fannst mér missa marks.

[Gísli Baldvinsson (IP-tala skráð) 2.1.2008 kl. 10:24]

Ég hallast að því að Skaupið sé barn síns tíma. Á árum áður voru ekki til skemmtiþættir en í dag varla opnað fyrir sjónvarp án þess að sjá slíka. Tilvísanir í aðra þætti sem ekki eru opnir almenningi detta dauðar niður. Þá fannst mér ósmekklegt að vísa í nýlátinn söngvara sem skemmtiefni.

[Ómar Örn Hauksson, 2.1.2008 kl. 12:02]

Þetta var alveg skelfilegt skaup að mínu mati og var ég að búast við mun beyttari húmor en þessum leiðindum. Lost grínið var algjörlega tilgangslaust og verst fannst mér hvað það þurfti alltaf að útskýra alla brandarana og ekki gert ráð fyrir því að fólkið í landinu viti hvað er verið að gera grín af.

Það voru margar ágætar hugmyndir en þær alveg eyðilagðar með vondum útfærslum og útskýringum á því hverju var verið að gera grína að.

Svo virðist að þetta teimi sem skrifaði Næturvaktina á nánast allt sitt að þakka Pétri Jóhanni, því hann var sá eini sem vantaði í þennan pakka.

[Margrét Össurardóttir (IP-tala skráð) 2.1.2008 kl. 12:02]

Sammála þér í mörgu með þetta skaup, bjóst eiginlega við betri pakka en árin á undan. Þetta Lost þema var algerlega úti á þekju. Hins vegar á skaupið að fá að lifa og hinum og þessum menningargúrunum á að fá tækifæri á að tjá sig í skaupinu frá ári til árs. Skaup er alltaf skaup hvort sem það er leiðinlegt eða skemmtilegt.

[Kolbrún Baldursdóttir, 2.1.2008 kl. 12:48]

Sorglega leiðinlegt. Man ekki eftir því svona fullkomlega glötuðu.
 Náttúrulega vel hugsandi að ég sé sjálf orðin svona leiðinleg.
Gat þó brosað út í annað þegar Árni Jonsen gróf sig upp í sandkassa barna, búinn að grafa og grafa og grafa.

[Ívar Jón Arnarson, 2.1.2008 kl. 15:30]

Fannst skaupið í fyrra svo arfaslakt að ég nennti ekki að horfa á skaupið að þessu sinni, datt bara inn í ágætis bíómynd á Stöð2 bíó í staðinn. Mér var nú tjáð eftir á að ég hefði hreinlega ekki misst af neinu, þannig að ég er bara nokkuð sáttur við mitt val :)

Ég held að ég hafi ekki náð að gera meira en a brosa út í annað síðasta áratug af áramótaskaupum, en kannski hef ég bara svona sérstakan húmor.

[Sædís Ósk Harðardóttir, 2.1.2008 kl. 15:34]

Mér fannst skaupið bara nokkuð gott og gat hlegið af því.  Ég vil ekki missa það út, vil halda því inni.  Auðvitað er misjafn humor hjá fólki og ekki hægt að gera öllum til hæfis. Eg t.d sá aldrei þessa "Lost" þætti og var þar af leiðandi ekki að tengja það við neitt.  En mörg atriði voru mjög góð

[Eyjólfur O. Benediktsson (IP-tala skráð) 2.1.2008 kl. 15:42]

Fannst bara Skaupið ekkert fyndið frekar en Skaupið árið 2006.  Þetta var samhengislaust og enn og aftur er Framsókn aðalskotspónn hinna svokölluðu grínara sem er hallærislegt, því Framsókn er ekki lengur við völd og er orðin áhrifalaus.  Samkvæmt Skaupinu er Framsókn hins vegar stærsti stjórnmálaflokkur landsins.  Aðrir flokkar eru minni, þar með taldin Samfylkingin og Sjálfstæðisfolkkurinn.

[Theódór Norðkvist, 2.1.2008 kl. 16:00]

Svar við spurningunni:

JÁ, líka Ríkissjónvarpið, að Rás 1 undanskilinni.

[Stefán Friðrik Stefánsson, 2.1.2008 kl. 16:04]

Takk kærlega fyrir öll kommentin. Gaman að heyra skoðanir ykkar á þessu. Þetta er og verður einn umdeildasti þátturinn ár hvert en mér finnst ansi margir sammála því að það hafi vantað allnokkuð upp á þetta skaup til að það yrði pottþétt.

mbk.

[Georg P Sveinbjörnsson, 2.1.2008 kl. 16:31]

Er sammála að Lost þemað hafi verið frekar misheppnað, sérstaklega fyrir þá sem gera lítið af því að horfa á framhaldsþætti eða jafnvel Stöð 2, en það var mikið hlegið á mínu heimili og hátt...með betri skaupum heilt á litið.

[Halla Rut , 2.1.2008 kl. 16:53]

Mér fannst Skaupið bara alveg ágætt. Ég held að við séum farin að gera of miklar kröfur til skaupsins og ættum kannski aðeins að slaka á og njóta frekar en að setjast niður sem dómarar.

Lifum og njótum.

[Ólafur Hannesson (IP-tala skráð) 2.1.2008 kl. 17:58]

Mér þótti það ágætt, að vísu sammála hvað varðaði Lost þemað(ekki að passa inn í Íslenska pakkann) og einnig þótti mér nú vanta kosningarnar og REI málið.

En tók engin eftir því hvað skaupið var stutt í ár, það náði held ég ekki 50 mín með auglýsingunni, það var búið 23:14 eða eitthvað því um líkt. Þeir hefðu vel getað haft það þennan klukkutíma, og náð að setja það sem vantaði inn, nógur var tíminn eftir.

mbk

Óli

[Rannveig Bjarnfinnsdóttir, 2.1.2008 kl. 20:41]

Ágætis skaup svo sem í ár.  Margir góðir punktar en ég hló ekkert mjög hátt.  Brosti meira út í annað

Væri ekki ráð að fara að sýna bara aftur gömlu góðu skaupin og byrja á ca 1980.  Skaup '84 og '85 eru langbestu skaupin að mínu mati. 

[Ásdís Sigurðardóttir, 2.1.2008 kl. 20:44]

Endilega að halda áfram með Skaupið, það er hluti af jóla og áramóta þemanu, ekki hætta með þessa hefð, finnst mér.  Annars fannst mér margt gott og góðir sketsar inn á milli. 

[Marinó Már Marinósson, 2.1.2008 kl. 21:19]

Nei.    Það horfa næstum allir landsmenn á það. 

[Kristján Eldjárn Þorgeirsson, 2.1.2008 kl. 23:38]

Mér fannst skaupið vera svona meðal gott.  Þetta voru flest allt stuttir þættir og misjafnir eins og þeir voru margir.  Auglýsingahléið truflaði mig ekkert og kom bara út eins og hluti af skaupinu.  Ég held að með svona skaup að fólk þurfi að vera búið að horfa svolítið að sjánvarp yfir árið, til að fatta sum atriðin.  Það er nefnilega þannig að skaup undanfarinna ára hafa gert grín að sjónvarpsþáttum sem eru t.d. á Skjá einum og Stöð 2.  Svo er líka húmor manna misjafn og ég sem mikill spaugstofuaðdáandi, saknaði þess að það væri ekki meira af svona spaugstofugríni.  Ég er sammála þér að skaupin 2001 og 2002 standa uppúr skaupum seinni ára

[Erna Friðriksdóttir, 3.1.2008 kl. 00:02]

Já við erum eðlilega misjöfn, hvað okkur finst um skaupið, auk þess er fariða að sýna þræl skemmtilega íslenska leikna þætti og sketsa allt árið og við viljum MEIRA. Það er af sem áður var þegar að næstum eina íslenska efnið var æaramótaskaup og betur má ef dua skal og viðurkenni alveg alveg ,að skaupið var betra í fyrra mep Pétri Frans og fleirum , en það voru margir góðir kaflar, fór það mest  í taugsrnsr ´mér hve miklum tíima var varið í brotlendinu flugvélanar og því sem því fylgdi .... en ágætt æa köflum, svo er bara næs er fjölskyldan sest saman við að horfa á skaupið. Áralöng hefð sem ég vil halda í.  En þið sem voruð eitthvað súr þá horfið bara á Næturvaktina , hún breggst ekki he e he.  Já og nýárskveðjur

[Stefán Friðrik Stefánsson, 3.1.2008 kl. 00:05]

Takk kærlega fyrir öll kommentin og pælingarnar um skaupið. Gaman að lesa.

Elli: Það er verið að vísa til Luciano Pavarotti, Lýður Oddsson í túlkun Jóns Gnarr, var að djóka með að hann gæti fengið hann í tónlistaratriði.

mbk.

[Vilhelm (IP-tala skráð) 4.1.2008 kl. 13:25]

Sælt veri fólkið.

Ég verð að viðurkenna að ég hló og hló af þessu skaupi. Eins og oft áður eru punktar í skaupinu sem höfða til manns og aðrir sem gera það síður. Foreldrar mínir voru lost yfir Lost þemanu sem þó er vinsælasti þáttur RUV síðastliðin ár.

Mikið var um lúmsk og fyndin skot á landsþekkta einstaklinga að þessu sinni. Geir Ólafs með The Secret, Pólverjarnir voru sér kapituli útaf fyrir sig með frábær skot á Jónínu Ben, Ásgeir Kolbeins (Innlit/Útlit) og Stefán Kjærnested, Jón Gnarr var snilldin ein sem Steingrímur J og Bubbi, setningar eins og "Hver heldurðu að hlusti á þig? Þú ert bara mella" og "Hefurðu meðtekið Guð í þínu lífi" auk barnana í Saving Iceland.

Allt í allt var ég mjög sáttur. Eina sem ég er ósáttur við varðandi öll áramótaskaup er að það er aðeins sýnt einu sinni.

Kveðja og þakkir fyrir skemmtilegar lestningar í gegnum tíðina.

Vilhelm