Hvernig gat þetta staðið svona lengi?

Það er eiginlega sláandi að heyra af því að það hafi getað gengið vikum saman að sex ungmenni um tvítugsaldur á Akranesi hafi tekið án heimildar milljónir króna ófrjálsri hendi til að fjármagna fíkniefnaneyslu og sukklíferni í jólamánuðinum. Þetta er auðvitað verulegur áfellisdómur yfir fjármálastofnunum og hlýtur að leiða til þess að einhverjir hugsi sitt ráð allverulega. Þeir sem hafa verið í viðskiptum við tiltekinn sparisjóð hugsa eflaust sitt ráð, fyrst einn aðili gat gert þetta hlýtur að vera stór glufa til staðar.

Það er kannski eðlilegt að fólk geti farið framyfir og lifað hátt um vissan tíma, en þegar að þetta stendur vikum saman og allt að mánaðartíma hljóta spurningar að vakna um stöðu málsins. Ef marka má fréttir sólundaði unga fólkið fimm og hálfri milljón á þessum mánuði í neyslu sína. Það eru miklir peningar vægast sagt og ótrúlegur sofandaháttur sem liggur að baki því að þetta gat gengið. Það hlýtur að þurfa að vera í senn ansi óforskammaður og örvæntingarfullur til að leggja í svona fjársvikastarfsemi.

Það má alltaf eiga von á að glufur séu til staðar hjá fjármálastofnunum sem hægt er að misnota, en það hlýtur að vera ansi sofandi fjármálastofnun sem getur fært fíkniefnaneytendum svo sæluríkan mánuð í vímu.

Sjö ungmenni handtekin

Athugasemdir

[Páll Geir Bjarnason, 6.1.2008 kl. 01:30]

...það er talað um fíkniefnaviðskipti. Ekkert talað um neyslu. Þarna er tvennt ólíkt á ferðinni. Samt ólíklegt að blessuð börnin hafi ekki notað eitthvað líka

[Stefán Friðrik Stefánsson, 6.1.2008 kl. 01:41]

Aðalatriðið í þessu er að fólkið gat tekið út milljónir án þess að eiga fyrir því. Það er stóra fréttin.

Ef marka má rúv.is voru þau að fjármagna eigin neyslu.

Það segir orðrétt:
"Lögreglan lét til skarar skríða í nótt en alls voru átta manns yfirheyrðir í tengslum við málið. Sex voru hins vegar handteknir og var það allt saman ungt fólk í kringum tvítugt. Svo virðist vera sem unga fólkið hafi notað peningana til að greiða upp fíkniefnaskuld, auk þess sem það fjármagnaði frekari neyslu og lifði hátt í jólamánuðinum."
Nánar hér

En þetta er alvarlegt mál, það blasir við. Í hvað peningarnir fóru er eflaust aukaatriði að vissu marki. Það er verið að kæra þau fyrir að stela peningunum, þau hafa stolið hið minnsta fimm og hálfri milljón.

mbk.

[Páll Geir Bjarnason, 6.1.2008 kl. 01:42]

Já, þetta horfir öðruvísi við í frétt RÚV. En það er rétt að aðalmálið er peningaþjófnaðurinn.

[Guðrún María Óskarsdóttir., 6.1.2008 kl. 02:17]

Ég er þér sammála Stebbi það eru glufur í fjármálaumhverfinu og það miklar , einkum og sér í lagi þegar einstaklingar í neyslu verða allt í einu 18 ára og geta gengið inn í banka sem fínir viðskiptavinir sjálfstæðir einstaklingar og með bankaþjónustunni opnast dyr lántöku hér og þar, bara nefndu það hvílík og önnur eins della kann að vera á ferð.

Án ábyrgðarmanna getur 18 ára einstaklingur keypt tæki og tól á lánum fyrir hundruði þúsunda án þess að sýna fram á svo mikið sem virðist að eina krónu í innkomu, tæki og tól sem fara ef til vill beint í viðskipti undirheima.

kv.gmaria.