Nýr meirihluti í Reykjavík leysir Laugavegsmálið

Strax á fyrsta sólarhringi sínum við völd hefur meirihluti Sjálfstæðisflokks og F-listans leyst Laugavegsmálið margumtalaða og hefur markað þá afgerandi pólitísku stefnu að varðveita nítjándu aldar götumynd við Laugaveg. Og nú þarf Þorgerður Katrín því ekki að skera úr um friðun húsanna við Laugaveg 4 og 6. Það er ekki hægt að segja annað en að Ólafur F. Magnússon, borgarstjóri, hafi unnið mikinn pólitískan sigur í þessu máli.

Hann hefur náð áherslum sínum í gegn. Hann hefur í mörg ár verið einn helsti baráttumaður þess að þar sé byggt upp á gömlum grunni. Það er tómt mál um að tala að hann sé valdalítill aðili í meirihluta nú, hefur á fyrsta sólarhringi náð meiru fram en það sem F-listinn náði áður í hundrað daga málefnalausum vinstrimeirihluta. Þetta er allavega stór pólitískur sigur og ætti að kæta þá sem hafa talað mest um friðun í miðbænum og byggja upp hið gamla og varðveita það, svipað og Sigmundur Davíð Gunnlaugsson talaði um af mikilli innlifun í Silfri Egils fyrir nokkrum vikum.

Það verður áhugavert að sjá hvernig umræðan verður um þetta mál. En niðurstaða er fengin og greinilegt að meirihlutinn í Reykjavík ætlar að láta verkin tala en forðast blaður án málefnasamnings eins og áður einkenndi hundrað-daga-meirihlutann.

Borgin kaupir Laugaveg 4 og 6

Athugasemdir

[Gísli Sigurðsson, 25.1.2008 kl. 18:05]

Nú er búið að falla frá friðun ruslahrúgunnar við Laugaveginn, þannig að þeir geta sett jarðýturnar á draslið. Þetta er náttúrulega bara viðbót við þennan ótrúlega farsa.

[Ívar Jón Arnarson, 25.1.2008 kl. 18:28]

Ég tel að þetta sé hið eina rétta hjá borgarstjórninni.  Laugavegurinn í núverandi mynd er ekki að gera sig sem verslunargata.  Best væri bara ef borgin ,með kannski fjárveitingu frá ríkinu, keypti upp flestar húseignir á neðanverðum Laugavegi með það í huga að rífa þau hús sem ekki falla inn í þá heildarmynd sem ákveðin yrði, bjóða svo út verkin út frá fyrirfram ákveðnum teikningum.

Held að Laugavegurinn eigi sér ekki viðreisnar von nema með þannig aðgerðum.  Laugavegurinn verður aldrei Kringlan 2, best að byggja upp gamaldags götumynd með fjöldan allan af sérverslunum í bland við veitingastaði og kaffihús.

Akureyri er ágætt dæmi um fallega götumynd. Þegar maður ekur Drottningarbraut blasa við gömul og falleg hús í röðum, og trjónir Leikfélag Akureyrar þar hæst (þó er kirkjan alltaf áberandi líka). Alger skyldu ökutúr þegar maður heimsækir Akureyri að mínu áliti :)

[Egill M. Friðriksson, 25.1.2008 kl. 18:29]

Já nú ætla ég að minna þig á fyrri færslu þína, sbr. þessa hér: http://stebbifr.blog.is/blog/stebbifr/entry/412411/

Þar kemur fram að það væri sóun vinstri manna á peningum skattborgara ef húsin eru friðuð. Það er greinilega í lagi ef hægri menn sóa peningum sínum þegar þau kaupa húsin en annað mál ef vinstri menn gera það.

[Þórður (IP-tala skráð) 25.1.2008 kl. 19:31]

12.1.2008 | 00:20

Góð skilaboð frá SUS um Laugavegsmálið

Það er gott að Samband ungra sjálfstæðismanna hafi sent frá sér þau skilaboð í ályktun í kvöld að Þorgerður Katrín Gunnarsdóttir, menntamálaráðherra, eigi ekki að friða húsin á Laugavegi. Það að gömul hús skuli vera átakamál í borgarstjórn er reyndar alveg með ólíkindum, enda sýnist manni að vinstrimeirihlutinn sé svo skrambi veikburða að þetta standi í honum.

Helst virðist vera deilt um það hver eigi að taka upp veskið og borga brúsann af öllu klúðrinu verði þessir hjallar friðaðir; á að demba þeim kostnaði á skattborgara á landsvísu eða bara í Reykjavík? Það virðist vera stóra spurningin. Ég segi nei takk við því að þessir hjallar verði sameign þjóðarinnar þar sem skattborgarar gera þetta upp. Vilji vinstrimeirihlutinn í Reykjavík standa vörð um það verður hann að taka það á sig.

Mér finnst orðið of seint að snúa málinu við og skil ekki hversvegna Húsafriðunarnefnd kemur með úrskurð sinn þegar að vinna við að rífa húsin er eiginlega farin af stað. Af hverju er þetta ekki unnið almennilega og faglega en ekki svona seint og um síðir? R-listinn samþykkti að rífa hjallana, það var staðfest af meirihluta Sjálfstæðisflokks og Framsóknarflokks og vinna við niðurrif var allt að því komin á fullt í valdatíð REI-meirihlutans málefnalausa.

Annars sýnist manni þessi meirihluti vinstrimanna vera aðeins valdapotsbandalag, þar hefur ekki verið tekið á neinum málefnum nema þeim hver eigi að fylla upp í hvaða stól. Aumari meirihluti hefur ekki sést í pólitík lengi - fari svo að hann geispi golunni á þessum hjöllum verður háðung þess fólks mikil.

Þetta skrifaðir þú 12 jan eða fyrir 13 dögum.  Hvað breyttist? 

[Stefán Friðrik Stefánsson, 25.1.2008 kl. 19:37]

Egill: Hver sagði að ég væri hlynntur þessari ákvörðun? Hef ekki skipt um skoðun. Hinsvegar fagna ég því að stjórnvöld í borginni hafi skýra skoðun á því hvað eigi að gera. Þeir verða að verja þá ákvörðun. Ekki ætla ég að gera það. Hinsvegar er greinilegt að Ólafur F. hefur unnið stórpólitískan sigur. Þeir sem hafa sakað hann um að mynda meirihluta án málefnum hafa haft rangt fyrir sér.

Ívar: Takk fyrir gott komment.

Gísli: Það verður ekkert rifið þarna.

Þórður: Sjá svar til Egils.

mbk.

[Egill M. Friðriksson, 25.1.2008 kl. 19:58]

Þú segir strax í blogi þínu að meirihluti Sjálfstæðisflokks og F-lista hafi leyst málefnaágreininginn. Mér finnst nú bara mjög skondið að þú talar um þetta án þess að gagnrýna nokkurn skapaðan hlut kostnaðinn á bakvið þetta en fyrir 2 vikum þá gagnrýndirðu hart þegar vinstri menn voru á sama stað.

Annars bendi ég á laugavegur.net þar sem hægt er að skoða húsin sem fengu leyfi til niðurrifs!

[Stefán Friðrik Stefánsson, 25.1.2008 kl. 20:03]

Það er mikilvægt, Egill, að afstaða meirihluta í sveitarfélaginu liggi fyrir. Það lá ekki fyrir nein ein afstaða fyrrum meirihluta í Reykjavík. Fyrri meirihlutar höfðu samþykkt niðurrif, fyrst R-listinn og svo meirihluti Sjálfstæðisflokks og Framsóknarflokks. Studdi þá ákvörðun og hef skrifað allavega þrjár, ef ekki fjórar greinar um þetta. Þessi er sú nýjasta.

Nú er ákvörðunin mjög afgerandi og greinilegt að Ólafur F. hefur sett þetta sem lykilskilyrði fyrir meirihlutaþátttöku og sett það á oddinn að það yrði keyrt áfram. Það blasir við að hann hefur haft sigur. Það er því varla hægt að tala um að hann hafi farið yfir í annan meirihluta án ástæðu. Ótrúlegur pólitískur sigur hjá honum.

Það eru mér auðvitað vonbrigði að Sjálfstæðisflokkurinn hafi ákveðið að fórna þessu máli í samningum við Ólaf, en það er víst þannig að þegar að mynda þarf meirihluta ná ekki allir öllu fram. En þetta er dýrkeypt dæmi. Finnst það mjög umhugsunarvert hvort að það sé hægt að sækja liðna tíma með þessu.

En þetta er niðurstaðan og greinilegt að með þessu er opnað á það að Laugavegur detti upp fyrir sem verslunargata. Þetta er eflaust biti í stærra púsli. Hinsvegar er gott að valdhafar hafi skoðun á svo stóru máli. Þeir verða að standa og falla með þessu í næstu kosningum og hafa rök fyrir máli sínu.

En þetta er mál sem er vont. Ég studdi ályktun SUS og þætti því gaman að heyra í þeim aftur eða þeim á Deiglunni, sem er haldið úti af ungum sjálfstæðismönnum sem standa nærri Villa, Geir og Gulla. Það væri gaman að heyra í þeim núna. En ég er ekki sammála þessari ákvörðun.

Einfalt mál í sjálfu sér.

[Ingólfur, 25.1.2008 kl. 22:34]

Stebbi, ef ekki hefði verið fyrir framtak fyrri meirihluta að þá væri búið að rífa kofana. Núna ákveður Sjálfstæðisflokkurinn, sem vildi í raun rífa kofana, að kaupa húsin og setur Borgina um leið í ómögulega stöðu. Um leið og það er ljóst að borgin ætlar að kaupa að þá geta eigendur sett upp hvaða verð sem þá lystir. Alveg eins og með háspennumálið að þá fá eitthverjir aðilar úti í bæ haldartak á Villa og við borgarbúar sitjum uppi með reikninginn.

Í þetta skiptið er reikningurinn upp á litlar 500 millur og þá á eftir að gera kofana upp, sem kostar líklega annað eins.

Til samanburðar að þá minnir mig að lækkun fasteignargjalda hafi verið rétt rúmar 100 millur.

[steiner (IP-tala skráð) 25.1.2008 kl. 23:47]

þetta er nátturlega orðið rugl...fyrir þessa 2 kofa þurfa þeir að borga 580milljónir og síðan segja sérfræðingar að annað eins kosti að gera þá upp og breyta þeim í upphaflega mynd, sem sagt 1000 milljónir ( 1 milljarður) sem þessi 2 hús eiga eftir að kosta okkur skattgreiðendur í Reykjavík, væri ekki þessum milljarði betur varið? ég bara spyr? og ef þeir ætla síðan að halda áfram að kaupa upp gömul hús og lappa upp á þau eins og manni skilst að Ólafur vilji þá verður nú varla mikið eftir í brýnari verkefni eins og td. félags og öldrunarmál, skólamál. samgöngumá og svo framv. NEI ÞETTA ER SKANDALL

[Haraldur Haraldsson, 26.1.2008 kl. 00:26]

Verð að segja það lika ,að þetta er of dýru verði keypt/Halli gamli

[Stefán Friðrik Stefánsson, 26.1.2008 kl. 02:27]

sumahama: Góðir punktar.

Ingólfur Harri: Það kom engin ein skoðun frá 100 daga meirihlutanum. Bingi sagði eitt, Ólafur annað og Svandís allt annað, Dagur kom svo með það að flytja húsin í Hljómskálagarðinn, sem var ídeótískt. Þú verður að skila því til Dofra frá mér að þeir hafi fallið feitt á því að gera ekki málefnasamning og leysa þessi mál öll á fyrstu dögum meirihlutans en falla ekki á hverju bananahýðinu á leiðinni eins og þau gerðu.

steiner: Það er skylda meirihlutans að hafa skoðun. Þetta er hún. Er ekki sammála henni og velti því fyrir mér hver heildarmynd meirihlutans með Laugaveginn sé, önnur en að friða. Það verður að tala hreint út um allan pakkann og hafa raunhæfar tillögur þar um.

[Stefán Þór Steindórsson, 26.1.2008 kl. 03:56]

Var það ekki borgastjórn (sú sem var fyrir Dag B Eggerts tíma) sem leyfði niðurrif þessarra húsa í upphafi?

Þó þeir séu að gera þetta núna gerir það þá ekki að betri mönnum því spara hefði mátt tæplega 600 milljónir með að samþykkja þeta aldrei í upphafi.

 En frábært að þeir hafi efni á að kaupa þessi hús sem hafa því miður ekkert gildi, hvorki sem húseign né minnisvarði um byggingarlist.

[María Jónsdóttir (IP-tala skráð) 26.1.2008 kl. 05:16]

Ég kaus Sjálfstæðisflokkinn í síðustu kostningum, vegna þess að ég taldi að fulltrúar hans færu betur með fjármuni okkar borgarbúa heldur en vinstriskríllinn (sorry, en eftir síðustu uppákomu hefur orðið skríll fests við VG- og Samfylkingarfólk í mínum huga) sem hefur ítrekað í gegnum árin sýnt og sannað að hann ber enga virðingu fyrir almanna fé.   Eftir þennan hálfvitaskap af hálfu sjálfstæðismanna hef ég misst alla trú á fulltrúum flokksins í borgarstjórn.

Það er ekki bara að þarna sé verið að sólunda a.m.k. 500 milljónum (endar sennilega í enn hærri tölu, skv. reynslu af opinberum framkvæmdum), heldur þýðir þetta líka að þróun Laugavegarins og miðbæjar Reykjavíkur stöðvast og hnignunin heldur áfram, þar til að eftir stendur algjört "slömm", því fjárfestar munu eftir þetta alveg örugglega draga að sér hendurnar.

Þetta er líka heimskulegt fyrir nýjan meirihluta, sem veitir ekki af að reyna að öðlast stuðning og traust borgarbúa, í ljósi þess að skoðanakannanir hafa sýnt að 80% borgarbúa eru á móti því að þessir húskofar, sem ef eitthvað er, eru lýti á menningarsögu okkar, verði þarna áfram.

Ég lít á þetta sem svik við fólk sem aðhyllist grundvallarstefnu Sjálfstæðisflokksins!

[Ívar Jón Arnarson, 26.1.2008 kl. 11:18]

Greinilegt að seljendur þessarra lóða eru ekki að tapa krónu á þessum viðskiptum, en það á líka eftir að koma í ljós hvort borgin græði ekki á þessu líka.  Vissulega er þetta dýru verði keypt, en til langs tíma, EF vel til tekst, þá getur þetta gert Laugaveginn að algerri gullnámu.  T.d. á Spáni var fyrir margt löngu konungur sem nánast tæmdi ríkiskassan til að byggja stórar og merkilegar byggingar, og hafði hann mest dálæti á Madrid með þeim verkum. Sagan segir að á þeim tíma hafi mönnum óað yfir eyðslunni, en í dag þakka honum allir framsýnina. Madrid er með fegurstu borgum Evrópu og þar eru fjölmargar glæsibyggingar sem hreint sópa að sér ferðamönnum. 

Ég hef sagt það í öðrum kommentum annarsstaðar að sjálfsagt er borgin ekki í raun að kaupa þessar húseignir, heldur staðsetningarnar, til einmitt að geta ráðið framhaldinu. Ég er þeirrar skoðunar að borgin eigi að halda áfram þa þessarri braut. Og mér er spurn, á borgin ekki forkaupsrétt á fasteignum og lóðum við Laugaveg ? Vissulega er æskilegt að ná hagstæðum kjörum við kaup á eignum við Laugaveg, en ég tel að sú stefna sé af hinu góða.

[Ingólfur, 26.1.2008 kl. 12:21]

Stebbi, gamli meirihlutinn var sammála um að þeir vildu ekki að húsin yrðu rifin en þar sem búið var að leyfa niðurrif húsanna væri allavega skárra að færa þau.

Þú hefur áður sagt að stjórnmálamenn eigi að fylgja eigin sannfæringu, en ég held að það sé greinilegt að sjálfstæðisflokkurinn hafi þarna svikið eigin sannfæringu til þess að komast í meirihluta.

Reikningurinn fellur hins vegar á borgarbúa. 

[Ingólfur, 26.1.2008 kl. 13:05]

Ívar, þannig að þetta er svona fjárfesting hjá borginni sem kannski gefur vel af sér eða að hún tapi stórt á þessu. Í rauninni svona áhættufjárfesting.

[Ívar Jón Arnarson, 26.1.2008 kl. 15:20]

Ingólfur, núverandi ástand á Laugaveginum er óviðunandi og varla nokkur maður nennir að rölta hann í góðum fílíng, þannig að það er eiginlega ekki betur heima setið en af stað farið.  Greinilegt að eitthvað þarf að gera fyrir Laugaveginn og dæmin sýna og sanna að aðferðin sem ég mæli með hefur í flestum ef ekki öllum tilfellum borgað sig margfalt í þeim borgum erlendis þar sem þetta hefur verið gert.

Nú, ef sú stefna að bara drita upp +5 hæða steinsteypuklumpum verður ofaná nú þá verðuð svo að vera, en þá er ég hræddur um að Laugaveginum verði endanlega slátrað sem verslunargötu. 

Nú er ég ekki að segja að aðhald í fjáraustri skuli ekki viðhaft, og vonandi hafa ráðamenn í borginni kænsku til að gera þetta án of mikils kostnaðar í framtíðinni.

[Ingólfur, 26.1.2008 kl. 17:47]

Ívar, fyrr á tímum vöru það aðallega kóngar og kirkjan sem gátu byggt stórar mikilfenglegar byggingar. Þannig hafa fjölmargar mikilfenglegar byggingar verið byggðar.

Hins vegar er ekki hlutverk nútímastjórnvalda að byggja hús svo maður geti dáðst að þeim í framtíðinni. Hlutverk borgaryfirvalda er að skipuleggja byggðina. T.d. væri hægt að setja kvaðir á nýbyggingar á laugarveginum að þær þyrftu að vera í ákveðnum stíl. Þannig er hægt að varðveita/bæta sjarmann í miðbænum og til langs tíma auka verðmæti hans.

Það er hins vegar hörmuleg stefna að ætla að koma í veg fyrir byggingu á steypukössum með því að ætla að reyna að kaupa eigendurna frá því á síðustu stundu. Slíkt ber allavega ekki vott um mikið fjármálavit.