Endatafl Vilhjálms Þ. - hver mun taka af skarið?

Ég fæ ekki betur séð en að það sé endanlega að fjara undan Vilhjálmi Þ. Vilhjálmssyni. Sögusagnir um að bæði Geir H. Haarde og Þorgerður Katrín Gunnarsdóttir hafi snúið við honum baki eru að ég tel réttar. Þegar að við bætist að Vilhjálmur hefur misst stuðning flokksmanna og borgarbúa eins og kannanir sýna er öllum ljóst að örlög hans eru ráðin. Honum er ekki sætt lengur.

Það væri réttast að Vilhjálmur myndi hætta að hugsa um eigin hag og nokkurra annarra, sem ég tel hann hafa því miður gert með því að kaupa sér tíma þegar að allir með snefilsvit á stjórnmálum vita hvernig landið liggur. Eins og staðan er orðin nú er Vilhjálmur aðeins að skaða Sjálfstæðisflokkinn með leiðtogasetu sinni og blasir við öllum að hann er rúinn trausti. Staðan er orðin þannig að verði ekki tekið af skarið með þessi mál strax um helgina eða hið síðasta á mánudag mun allur borgarstjórnarflokkurinn skaðast á leiðtogasetu Vilhjálms og ég tel að flokkurinn muni finna verulega fyrir því á landsvísu. Mistök Vilhjálms Þ. fylgja þá flokknum sem mara.

Það er eðlilegt að það sé spurt um það núna hver muni taka af skarið og segja hingað og ekki lengra. Sá sem það myndi gera gæti fengið á sig þann stimpil að hafa bjargað flokknum úr þessari vitleysu sem hefur staðið síðustu vikurnar, hefur staðið alltof lengi. Það hefði mátt binda enda á þennan farsa fyrir blaðamannafundinn misheppnaða í Valhöll fyrir tæpum tveim vikum. En betra er seint en aldrei. Það er alveg ljóst að dugi ekki til að Vilhjálmi séu gefin skilaboð um að hætta þurfi að grípa til aðgerða, annað hvort með íhlutun formanns Sjálfstæðisflokksins eða vantrausti innan úr borgarstjórnarflokknum.

Fréttir dagsins sýna mjög vel að REI-málið mun fylgja Vilhjálmi Þ. Vilhjálmssyni úr þessu. Það er brennimerkt honum og öll mistök þess máls verða hans mistök. Verði ekki tekið af skarið hið allra fyrsta munu þau mistök verða brennimerkt öllum borgarfulltrúunum styðji þeir Vilhjálm áfram, að ég tali nú ekki um ef hann verður aftur gerður að borgarstjóra. Þegar að við bætist ávirðingar um spillingu í lóðamálum er komin upp staða sem er óviðunandi. Vilhjálmur verður að fara, sem fyrst!

Ég sem sjálfstæðismaður í trúnaðarstöðum fyrir flokkinn til fjölda ára tel þetta ástand ekki ganga lengur. Það er ekki valkostur hjá mér að sitja og þegja þessa vitleysu af mér. Það verður að hafa á því skoðanir þegar að hagsmunir nokkurra einstaklinga eru settar ofar flokkshag.

Tel að það sé stutt í stór tíðindi af þessum forystukapal. Það er ljóst að stuðningur flokksforystunnar við Vilhjálm er ekki lengur fyrir hendi. Þar er hugsað um heill og hag flokksins. Nú er spurt um hvort Vilhjálmur Þ. hugsar í raun um hagsmuni flokksins, ofar prívathag.

Vilhjálmur Þ. Vilhjálmsson víkur ekki

Athugasemdir

[Ásdís Sigurðardóttir, 23.2.2008 kl. 16:10]

Algjörlega sammála þér. Starfa mikið innan flokksins og hef eins og þú og er í trúnaðarstöðum.  Vil að hann hætti strax. Þetta er ómögulegt að mínu mati.

[Stefán Friðrik Stefánsson, 23.2.2008 kl. 16:31]

Ásdís: Takk fyrir kveðjuna vinkona. Já, þetta er orðið dapurlegt mál og verst að ekki hafi enn fundist endalok á því og maðurinn hafi ekki séð stöðuna augljóslega. Skil ekki hvað hann er að hugsa.

Einar: Þetta er búið. Því fyrr sem Vilhjálmur sér það, því betra.

mbk.

[Stefán Friðrik Stefánsson, 23.2.2008 kl. 16:44]

Veistu það Bjarni að mér finnst staðan í Reykjavík dapurleg. Þetta er orðinn harmleikur fyrir flokkinn. Við erum stödd á þeim mörkum málsins nú að við verðum að hugsa um flokkinn, ekki persónur. Það er ekki valkostur að halda í manninn á þeim forsendum að hann sé svo góður og hafi staðið sig svo vel hérna í gamla daga. Þetta er alvarleg krísa, sem fer ekki neitt og skaðar flokkinn.

Ég skil mjög vel að það séu tilfinningar í þessu tafli. Vilhjálmur hefur átt sér langa sögu innan flokksins, unnið vel á mörgum sviðum síns stjórnmálaferils og verið vandaður í sínum verkum lengst af. Þessi kaflaskipti sem nú eru í augsýn eru erfið fyrir alla aðila, sérstaklega Sjálfstæðisflokkinn. En það er engum greiði gerður með því að líta framhjá staðreyndum mála.

Mér finnst umboð Vilhjálms orðið stórlega skaddað. Hann er farinn að draga flokkinn með sér. Staða flokksins í borginni er orðin óviðunandi og staða flokksins á landsvísu er í húfi í þessum efnum. Við verðum að hugsa um heill og hag Sjálfstæðisflokksins, ekki persónanna í taflinu, Bjarni.

[Ingólfur, 23.2.2008 kl. 16:49]

Málið er að borgarfulltrúarnir og meira að segja Geir hafa lýst yfir fullu trausti á honum.

Enginn treystir honum líklega í raun til þess að vera oddviti, en sumir vilja þó halda honum í öndunnarvélinni til þess að eiga sjálfir meiri séns í leiðtogasætið en þeir eiga núna.

[Stefán Friðrik Stefánsson, 23.2.2008 kl. 16:53]

Ingólfur Harri: Þú mátt ekki gleyma því að Gísli Marteinn háði eitt eftirminnilegasta einvígi íslenskrar prófkjörssögu við þennan mann. Þar var öllu beitt og það hefur ekkert prófkjör á Íslandi verið fjölmennara en það. Spennandi slagur. Það var engin eining um Vilhjálm sem leiðtoga þá og það var kosið. Í því umboði situr Vilhjálmur. Væri hann embættismaður á borgarstjórastóli væri hann enn veikari en hann er. Umboð hans úr prófkjöri og kosningum styrkir hann í sessi þó staðan sé erfið. Enda getur enginn sagt honum að fara í raun. Þetta er erfitt við að eiga og mér finnst flestir hafa talað með þeim hætti að Vilhjálmur verði sjálfur að átta sig á stöðunni.

[Ingólfur, 23.2.2008 kl. 17:04]

Nei, formlega séð getur enginn sagt Vilhjálmi að fara. Hins vegar ráða borgarfulltrúarnir sjálfir hvort þeir kjósa hann sem borgarstjóra og þeim er frjálst að lýsa því yfir að þeir styðji hann ekki sem oddvita.

Ef þau gerðu það að þá mundi Villa ekki detta það í hug að sitja áfram undir þannig kringumstæðum. 

[Haraldur Haraldsson, 23.2.2008 kl. 18:16]

Endatafl verður oft þráskák,þetta er allt umdeilt en maður er samt á því að hann haldi áfram, sé ekki annað i stöðunni/Halli gamli