Halldórsarmurinn berst fyrir ESB-aðild í Framsókn

Grein Jóns Sigurðssonar, fyrrum viðskiptaráðherra og formanns Framsóknarflokksins, þar sem hann hvetur til þess að Ísland sæki um aðild að Evrópusambandinu sýnir vel að Halldórsarmurinn í flokknum, undir forystu Valgerðar Sverrisdóttur, ætlar að setja málið á dagskrá og berjast fyrir því af alvöru á næstunni. Ekki hefur farið á milli mála að Guðni Ágústsson, formaður Framsóknarflokksins, hefur leitt harða andstöðu við ESB nú, og áður í formannstíð Jóns og Halldórs Ásgrímssonar.

Vakið hefur mikla athygli hvað Valgerður hefur talað afgerandi fyrir ESB-aðild, þvert á allt sem formaðurinn segir. Þetta sýnir andstæðurnar í forystusveitinni og hreina andstöðupóla sem hljóta um leið að flokkast sem átakapólar um valdasess í flokknum. Ef Evrópumálin verða sett á dagskrá innan Framsóknarflokksins má enda búast við miklum átökum. Á flokksþingi Framsóknarflokksins árið 2005 var hart tekist á um afstöðuna til Evrópusambandsins - Guðni og Halldór börðust hatrammlega fyrir opnum tjöldum um hversu langt ætti að ganga. Niðurstaðan varð málamiðlun.

Ekki ber að vanmeta afstöðu Jóns. Greinaskrif hans í dag eru mjög sterk skilaboð um að reyna mun á málið innan skamms. Innan við ár er síðan að Jón lét af formennsku í flokknum. Hann sat ekki það lengi sem formaður að reyndi virkilega á Evrópumálin undir forystu hans. Er á hólminn kom varð Jón mun hógværari í afstöðu sinni en Halldór, sem í forsætisráðherratíð sinni spáði að Ísland yrði komið í ESB eftir sjö ár, árið 2015. Valgerður hefur með afgerandi Evrópuforystu sinni innan Framsóknarflokksins tryggt að málið verður rætt fyrr en síðar. Hún talar ekki svona nema vegna þess að hún er viss um að reyna mun á málið fljótlega, sem og blasir við.

Staða Framsóknarflokksins er veik um þessar mundir. Hann hefur ekki náð sér á strik í stjórnarandstöðu undir forystu Guðna Ágústssonar síðasta árið og eðlilega er spurt um hversu sterk pólitísk staða hans er. Það ræðst á flokksþingi að ári. Fylkingamyndanir um Evrópusambandið gætu leitt til átaka um formennsku í flokknum. Halldór Ásgrímsson sætti sig ekki við Guðna sem eftirmann sinn fyrir tæpum tveim árum og lagði lykkju á leið sína til að sækja Jón í Seðlabankann, því hann taldi hann eina manninn sem gæti sigrað Guðna. Fullyrða má að traustið á Guðna hefur ekki aukist í þeim herbúðum eftir að hann tók við af Jóni, sem mistókst að ná kjöri á þing.

Stóra spurningin er hvort að Valgerður Sverrisdóttir fylgi eftir tæpitungulausum ummælum sínum um Evrópusambandið með formannsframboði að ári. Öllum er ljóst að Guðni Ágústsson mun sem formaður Framsóknarflokksins ekki leiða flokkinn í Evrópuátt, þó að nýleg könnun hafi sýnt að meirihluti kjósendanna styðji aðildarviðræður. Nýji Evróputónninn hennar Valgerðar er boðberi um að hún ætli að taka frumkvæðið innan flokksins, sýna forystu og myndugleika á meðan að formaðurinn bíður.

Átökin um Evrópusambandið verða án vafa stærstu átökin innan Framsóknarflokksins áratugum saman og bliknar átökin um formennsku Halldórs Ásgrímssonar væntanlega í samanburði. Afstaða formannsins mun ráða hvernig sá slagur verði á næstunni. Greinaskrif og tæpitungulaus ummæli þeirra sem standa næst Halldóri Ásgrímssyni, sem spáði ESB-aðild innan nokkurra ára, boða þau tíðindi að reyna muni á málið fyrr en síðar.

Væntanlega glottir sá vel við tönn sem situr nú á friðarstóli í Kaupmannahöfn. Enda munu þau átök verða um forystusess í Framsóknarflokknum ef formaðurinn tekur ekki skrefið með þeim sem pressa á málið nú.

Tímabært að sækja um ESB-aðild

Athugasemdir

[Fannar frá Rifi, 29.4.2008 kl. 14:25]

Mér þykir afstaða Halldórsarmsins ekki koma á óvart. Eru þeir ekki fyrir löngu orðnir frægir fyrir að reyna að veiða atkvæði út á vexti og lán(samanber 90-100% íbúðarlánasjóðslán). Ætli ESB vextirnir sem þau girnast myndu ekki ýta verðbólgunni upp yfir þriggjastafa tölu?

[Ævar (IP-tala skráð) 29.4.2008 kl. 20:34]

Esb átök framsóknarmanna nú um stundir verða í ljósi sögunnar hjáróma væl miðað við þau átök sem eru í uppsiglingu hjá sjálfstæðismönnum í ESB málum.  Tími skoðanakúgana í þeim flokki er liðinn og þingmannahjörðin fer að átta sig á því smátt og smátt að það er málsfrelsi á Íslandi og þetta fólk fer að opna sig smátt og smátt eins og t.d. Ólöf Nordal.

Fannar frá Rifi, þú þyrftir að vanda betur til verka þegar þú tekur til máls.  90% lán íbúðalánasjóðs hafa ekkert með aukna verðbólgu á Íslandi að gera. 75% þjóðarinnar býr á sv. horninu og meginþorri fólks þar átti einungis möguleika á 40-60% lánum sökum 18 milljóna kr. hámarksins á lánum sjóðsins. Íbúðaverð er einfaldlega of hátt þar til þess að 90% virki.  Að tala gegn 90% lánunum er því einvörðungu árás á landsbyggðina sem ekki hefur fengið eðlilega lánafyrirgreiðslu hjá bönkunum vegna "markaðsaðstæðna", þ.e. bankarnir meta eignir svo út um allt land að fasteignir þar séu ekki á veð setjandi, í besta falli er veðþol fasteignanna 60% af fasteignamati á meðan að á stór Reykjavíkursvæðinu er sambærilegt mat bankanna að lágmarki mv. brunabótamat og eftir atvikum allt að 1.5 af því mati.  Íbúðalánasjóður hefur því haldið viðskiptum á fasteignum á landsbyggðinni gangandi.

Þetta með þensluna vegna 90% lánanna er því hreinn brandari.  Lán íbúðalánsjóðs drógust saman um á annað hundrað milljarða á árunum 2004-2006, er það þessi verðbólguhvati sem talað er um?  Ja hérna, það má sannarlega hafa endaskipti á hlutunum.  Auðvitað var það innkoma bankanna inná þennan markað sem mestu hefur valdið um þensluna.  Hvernig stendur annars á því að ekki er hægt að vera með 95% lán á Íslandi ens og víðast hvar í nágrannalöndunum.  Það þykir mér undarlegt í meira lagi.

[Stefán Friðrik Stefánsson, 29.4.2008 kl. 20:51]

Takk fyrir kommentið Fannar.

Ævar: Vissulega verða átök um ESB víða. Munurinn á Framsóknarflokki og Sjálfstæðisflokki er að forystan er gegnumklofin í Framsókn og átökin þar munu ekki síður snúast um forystu flokksins. Þau eru í hreinu stríði gegn hvoru öðru í ESB-málum Guðni og Valgerður. En það eru spennandi tímar framundan. ESB-umræðan er komin á fullt og eðlilegt að rætt sé af viti um þau mál.

mbk.

[Benedikt Sigurðarson, 30.4.2008 kl. 17:08]

Nú gerir þú pólitísku afli Guðna Ágústssonar alltof hátt undir höfði;  hann barðist hvergi og aldrei hatrammlega fyrir eða gegn neinu máli sem Halldór Ásgrímsson hélt fram eða bar fram í sínum ráðherratíma og formannstíma í Framsókn.

Það dugar ekki fyrir Guðna að SER skrifi um hann ágæta bók - í mörgum köflum - til þess að koma upp "pólitísku innihaldi" eða sýna fram á málafylgju af hans hálfu  - því miður. (Eða getur þú tilgreint dæmi úr þingræðum eða greinum Guðna á ráðherratíma hans og varaformannstíð - - sem sýna fram á að hann hafi fylgt einhverri annarri stefnu en Halldór? Ekki man ég eftir neinum slíkum dæmum í svip - né vinur minn Framsóknarmaður sem er í Evrópuandstöðulínunni og var á móti Íraksinnrásinni . . . . .geti sýnt mér fram á).