Ferðalag í einræðið - á Þorgerður að fara til Kína?

Greinilegt er á yfirlýsingum Þorgerðar Katrínar Gunnarsdóttur, menntamálaráðherra, að hún ætlar sér að fara á Ólympíuleikana í Peking að nýju, væntanlega bæði til að hvetja landsliðið áfram og verða við lokaathöfn leikanna á sunnudaginn. Eins umdeild og ferð Þorgerðar Katrínar á setningarathöfnina var má teljast líklegra að ferð ráðherra íþróttamála til að fylgjast með handboltaliðinu verði minna umdeild.

Ef svo fer að við vinnum undanúrslitaleikinn og spilum um gullverðlaunin er það mikilvægt augnablik fyrir ráðamenn væntanlega að geta verið á svæðinu og hvatt liðið áfram. Ég sá að Ólafur Ragnar og Dorrit eru komin til Peking og þau böðuðu sig í sviðsljósinu með liðinu eftir sigurinn gegn Pólverjum í morgun. Væntanlega vill menntamálaráðherrann gera slíkt hið sama í leikjunum sem framundan eru á föstudag og sunnudag.

Mér finnst mannréttindaáherslur skipta miklu máli og var andsnúinn því að Þorgerður Katrín færi til Kína á setningarathöfnina. Finnst afleitt að Ólympíuleikarnir séu haldnir í einræðisríki og finnst mikilvægt að taka þá afstöðu og sýna hana í verki. Hvað varðar ferð til að fylgjast með þessum leikjum er ég eiginlega sama sinnis. Mér finnst hægt að senda liðinu góðar óskir og notalegheit án þess að vera á svæðinu.

Annars er þetta og verður matsatriði þeirra sem gegna embættum. Þó finnst mér Þorgerður Katrín eiga meira erindi á þessa leika sem ráðherra íþróttamála en forseti Íslands, en mér skilst að hann sameini ferðina á leikana för á einhverja loftslagsráðstefnu, en meira en hálf yfirlýsing hans um Ól-ferðina snerist um að segja hvað væri nú mikilvægt að fara á þá ráðstefnu.

Hitt er svo annað mál að afleitt er að koma málum svona fyrir með því að staðsetja mikilvægustu íþróttahátíð sögunnar í einræðisríki. Auðvitað á það ekki að geta gerst.

Íhugar að fara aftur út

Athugasemdir

[H.T. Bjarnason (IP-tala skráð) 20.8.2008 kl. 14:57]

Ég er með ágætis lausn á þessu pínlegu vandamáli.  Ég skal fara, í stað Þorgerðar, til Beijing á kostnað íslenskra skattborgara og ég skal hvetja landsliðið til dáða og vera einnig viðstaddur lokaathöfnina.  Ég skal einnig dvelja á fínu hóteli og þiggja dagpeninga.