Sýknun í tálbeitumáli Kompáss

Ég er alveg steinhissa á Hæstaréttardómi í tálbeitumáli Kompás. Kannski er þetta til marks um hvað dómar í kynferðisbrotamálum eru almennt vægir hér á Íslandi. Því miður er það orðin alþekkt staðreynd. Sú staðreynd hlýtur að endurspeglast vel í þessari niðurstöðu. Í þessum dómi felst að notkun á tálbeitu sé ekki lögleg og í raun hafi enga þýðingu. Mér finnst það vond niðurstaða á þessu ferli, enda var alveg ljóst hver tilgangurinn með komu mannanna á svæðið var og hvað hefði gerst hefði þetta verið raunverulegt mál.

Sýknaðir af tilraun til kynferðisbrots

Athugasemdir

[Páll Ingi Pálsson, 23.10.2008 kl. 18:27]

Umrætt myndband var eina sönnunargagn ákæruvaldsins, og vitni þeirra voru þeir sem stóðu að myndbandinu.

Ef dómari kemst að þeirri niðurstöðu að efni myndbandsins var aflað með aðferðum sem eru ekki viðurkenndar eða teljast ólöglegar (sem í þessu tilviki var vel rökstutt) þá er það almennt að dómstólar geta ekki litið á umrætt myndband sem sönnunargagn.

Hendur dómara eru því bundnar því samkvæmt mannréttindasáttmála Evrópu þá má ekki dæma menn nema "sekt hans er sönnuð að lögum." Þar sem ákæruvaldið hafði engin önnur gögn til að SANNA sekt viðkomandi þarf að sýkna viðkomandi.

Ég hugsa að þú hafir séð eitthvað svipað í amerískum réttarsápuóperum. Allir vita að viðkomandi er sekur en engin haldbær sönnunargögn eru fyrir hendi.

Um leið og dómarar segja "Innst inni veit ég að þú ert sekur og ætla því að dæma þig" þá er dómskerfið á rangri braut. Því miður. 

[Sigurður Ingi Jónsson, 23.10.2008 kl. 19:08]

Það er vandséð hvernig hægt hefði verið að dæma fyrir ásetning án afbrots.

Notkun tálbeita er umdeild, þessi dómur undirstrikar hversu vandmeðfarin aðferðin er. 

[Páll Jónsson, 23.10.2008 kl. 22:02]

Þetta hefur auðvitað ekkert að gera með hversu dómar í kynferðisbrotum eru "vægir" hér á landi. Sönnunarkröfur eru eitt, refsingar eru annað.

En lögreglu er a.m.k. ekki heimilað að beita tálbeitum í svona málum. Ég vil þó benda á að það var tekið með í reikninginn í málinu.

Að öðru leyti er ég ekki frá því að ég sé sammála þér.