Mikil viðbrögð við skrifum um Árna Johnsen

Ég hef síðustu dagana fengið mikil viðbrögð við skrifum mínum um þingframboð Árna Johnsen. Hef ég farið talsvert yfir þau mál hér á vefnum og verið mjög andvígur því að Árni verði í framboði undir merkjum flokksins eftir ummæli hans um tæknileg mistök, þar sem hann vísaði til lögbrota sinna sem leiddu til endaloka þingferils hans árið 2001. Nær allir tölvupóstarnir sem ég hef fengið hafa verið til að lýsa yfir stuðningi við skrif mín um þetta. Met ég þessar kveðjur mikils.

Ég taldi ekki annað hægt en að skrifa hér hreint út, það hafa verið tæpitungulaus skrif. Það er ekki neitt annað hægt í þessari stöðu. Málið er ekki í höndum minna eða fleiri sem mér hafa skrifað, en við getum og eigum að láta skoðun okkar í ljósi. Skoðanakannanir hafa sýnt stöðuna mjög vel og við gerum hið rétta með öflugum og góðum skrifum um þessi mál. En það er gott að fá þessar kveðjur. Ég hreinlega vissi ekki á hverju ég ætti von við skrifunum, en varla þessum mikla fjölda tölvupósta. Mjög ánægjulegt og sannkallað gleðiefni að finna fyrir þessum straumum. Þakka fyrir alla þessa pósta.

Nú er valdið í höndum flokksmanna í Suðurkjördæmi. Kjördæmisþing mun þar taka afstöðu. Að því loknu fer framboðslistinn fyrir miðstjórn flokksins. Vona ég að viðeigandi breytingar verði á framboðslista Sjálfstæðisflokksins í Suðurkjördæmi á þessum stöðum muni Árni Johnsen ekki draga framboð sitt til baka. Það er ekki fýsilegt í mínum augum að standa í því á þessum kosningavetri að verja þingframboð Árna Johnsen og það mun ég ekki gera. Ég hef tekið afstöðu í þá átt og mun standa við það.

Athugasemdir

[Snorri Bergz, 7.12.2006 kl. 18:45]

Já, ég veit um aðila sem hafa sagt sig um flokknum vegna Árna og sagst munu ekki kjósa hann í komandi kosningum. Helstu tæknilegu mistök Árna voru, að segjast hafa gert tæknileg mistök, þegar hann stal frá þjóðinni. Hitt var bara lögbrot. Vona ég að Árni geri hið tæknilega rétta og fari bara í sérframboð á Suðurlandi...eða verði gerður að sendiherra á Falklandseyjum.

[Benóný Jónsson (IP-tala skráð) 8.12.2006 kl. 00:21]

Árni Johnsen er fullkomlega kjörgengur í suðurkjördæmi, hann er búinn að fá uppreisn æru - uppáskrifaða frá handhöfum forsetavalds (hverjir voru það nú aftur?). Skoðanakönnun er búin að fara fram um styrk hans þar sem hann fékk annað sætið. Mér finnst líka óþarfa taugaæsingur að ætla að úrsagnirnar úr flokknum segi eitthvað um vanhæfni Árna. Það er deginum ljósara að það voru margir sem skráðu sig í flokkinn fyrir prófkjör, sem á engan hátt ætluðu að kjósa X-D. Árni er búinn að taka út sína refsingu, hann sat inni og mér finnst ekki á nokkurn hátt að það eigi að verða til þess að maður eigi ekki séns á þingsæti. Vissulega eru það fordómar að ætla Árna að brjóta af sér aftur. Þrátt fyrir að ummæli sem hann lét út úr sér hafi verið óheppilleg, þá hefur hann beðið afsökunar á þeim. Persónulega finnst mérlítið varið í málflutning Árna, en samt sýnir árangur hans að íbúar suðurlands vilja hagsmunapólitíkus og ekkert annað. Kannski er það vegna þess að sunnlendingum er nóg boðið að sjá þingmenn annarra landsbyggðarkjördæma verða árangurs njótandi með einbeittu kjördæmapoti - og sjá að það er það eina sem þýðir.

[Óskar Þór Hallgrímsson (IP-tala skráð) 8.12.2006 kl. 09:58]

Við í Sjálfstæðisfélagi Fáskr. og Stöðvf. höfum sent áskorun til Árna um að draga framboð sitt til baka, vísvitandi að framboð hans hefur slæmar afleiðingar fyrir okkur hér fyrir austan og kyngjum ekki þessum köldu kveðjum sem hann sendir okkur með þessu framboði sínu. 

Þessar umræður um Árna, biðlaun Kristjáns og lóða sala fyrrverandi framkvæmdastjóra ogfl. eru vatn á millu þeirra sem keyra á okkur með þeim málflutningi  að sjálfstæðið sé bara peninnga og hagsmunapólitíkusar. Við getum risið upp á afturlappirnar og svarað þessum öflum með jú  að Árna Johnsen verði ekki gefinn kostur á því að fara fram í nafni flokksins og að Kristján þiggi ekki þessi biðlaun, það er jú hægt að segja að þetta hafi verið gert annar staðar og látið slag standa en flokkurinn þarf að sýna annan hugsunarhátt heldur en þann sem Árni Johnsen stendur fyrir.

[Stefán Friðrik Stefánsson, 8.12.2006 kl. 16:52]

Takk fyrir öll kommentin.

Vil benda Benóný á að Árna Johnsen var veitt annað tækifæri að mínu mati. Hann mélaði það sjálfur algjörlega niður, algjörlega án allrar hjálpar. Hann situr eftir með skellinn sjálfur og verður að fara. Það er mjög einfalt að mínu mati. Ég sé mér allavega ekki fært að verja hann og vona að honum verði sparkað hætti hann ekki sjálfur við þetta framboð sitt, sem verður Sjálfstæðisflokknum mjög dýrkeypt annars að vori. Klúður Árna Johnsen má ekki verða klúður Sjálfstæðisflokksins. Mín skoðun er allavega skýr og mun verða beittari verði ekki breyting á stöðu málsins.

Flott ályktun hjá ykkur Óskar. Líst mjög vel á þetta.