Frjálslyndir hækka á umdeildri innflytjendastefnu

Það vekur mikla athygli að sjá fylgismælingar flokkanna nú. Frjálslyndir virðast fá nokkuð fylgi út á umdeilda innflytjendastefnu og kemur það ekki að óvörum. Þetta er týpísk dægurflugumæling. Hinsvegar hefur tali þeirra tekist að vekja athygli og allt að því deilur í samfélaginu. Það verður fróðlegt að sjá hvort þessi umdeilda innflytjendastefna heldur áfram að tryggja Frjálslyndum fylgi.

Annað sem vekur mikla athygli er fylgismæling Samfylkingarinnar, sem bætir allnokkru við sig á meðan að vinstri grænir missa mikið fylgi. Framsókn er heillum horfin með aðeins rúm 6% fylgi og fjóra þingmenn, eru minni en Frjálslyndir. Sjálfstæðisflokkurinn mælist með rúmlega 38% fylgi og 25 þingsæti, vel yfir kjörfylginu 2003

Fylgi Frjálslynda flokksins eykst mikið

Demókratar ná völdum í öldungadeildinni

Stórtíðindi urðu í bandarískum stjórnmálum nú laust eftir miðnætti að íslenskum tíma þegar að demókratar náðu völdum í öldungadeild Bandaríkjaþings eftir tæplega fjögurra ára meirihlutasetu repúblikana. Demókratar hafa því unnið stórsigur í þessum þingkosningum. Þeim tókst að sigra fulltrúadeildina fyrir tæpum sólarhring og hafa nú náð fullum völdum í þingdeildum Bandaríkjanna og hafa fellt báða þingmeirihluta repúblikana, sem voru rausnarlegir fyrir kosningar þriðjudagsins.

Demókratar tókst með naumum hætti að vinna sigra bæði í Virginíu og Montana. Nú undir lokin voru auga allra á stöðunni í Virginíu. Þar hefur Jim Webb nú tekist að fella George Allen úr öldungadeildinni og Jon Tester felldi Conrad Burns úr sæti sínu í Montana. Þetta eru stórpólitísk tíðindi. Þessir sigrar eru naumir en gríðarlega táknrænir og til marks um algjört afhroð repúblikana í kosningunum. Meirihluti repúblikana var 15 sæti í fulltrúadeildinni en 6 í öldungadeildinni. Þeir hafa nú fallið eins og spilaborg í þessum eftirminnilegu kosningum. Miklar sviptingar það.

Þessi kosningaúrslit eru gríðarlegt pólitískt áfall fyrir George W. Bush, forseta Bandaríkjanna. Hann hefur nú þegar fórnað Donald Rumsfeld, varnarmálaráðherra, og liggur afsögn hans fyrir og tilnefning Robert Gates sem eftirmanns hans. Fyrir viku sagðist Bush ætla að halda Rumsfeld til loka kjörtímabilsins. Vika er langur tími í pólitík og nú er allt breytt - Rumsfeld er á útleið. Það má kannski segja að sólarhringur sé langur tími í pólitík fyrir George W. Bush. Pólitísk staða hans hefur veikst til mikilla muna. Nú þarf hann að búa við þingið undir stjórn demókrata það sem eftir lifir valdaferli hans. Það verður honum ekki auðvelt.

Harry Reid, leiðtogi demókrata í öldungadeildinni, verður nú leiðtogi meirihlutans í þinginu og sá sem þar ræður för. Það verður svo sannarlega athyglisvert að fylgjast með næstu tveim árum í bandarískum stjórnmálum. Það verður lokasprettur stjórnmálaferils George W. Bush. Hans gullaldartíð í bandarískum stjórnmálum heyrir nú sögunni til og hann verður nú að feta í fótspor t.d. Ronalds Reagan fyrir tveim áratugum og una við yfirstjórn þingsins í höndum algjörra andstæðinga sinna. Þeir ráða stöðu mála við staðfestingu dómara- og ráðherraefna forsetans og í fleiri mikilvægum málum, t.d. skipan rannsóknarnefnda. Yfirtaka demókrata á öldungadeildinni er miklu meira pólitískt áfall en það að missa fulltrúadeildina.

Það eru svo sannarlega spennandi tímar framundan í pólitískum refskákum í þinghúsinu tignarlega í heimsborginni Washington, þar sem valdahlutföll hafa færst með dramatískum hætti á örskotsstundu frá liðsmönnum forsetans til andstæðinga hans. Þær tilfærslur hafa gríðarleg áhrif á það sem við tekur og stefnumótun forsetans. Nú verður hann að hugsa sína pólitísku tilveru og hugmyndir út frá því sem andstæðingarnir vilja.

Það má telja það nokkuð öruggt að það verði erfitt fyrir mann af hans tagi. Hann hefur nú þegar boðað Nancy Pelosi og Harry Reid á sinn fund í Hvíta húsinu á morgun til að ræða stöðu mála og reyna að vinna hlutina fram á veg í sameiningu. Einstefna repúblikana í bandarískum stjórnmálum er á bak og burt og nú verður Bush að líta til demókrata við keyrslu sína í gegnum stjórnmálastörfin. 

Framundan eru líflegir tímar fyrir okkur bandaríska stjórnmálaáhugamenn næstu 24 mánuðina, þangað til að Bush flýgur til Texas sem almennur borgari úr valdakerfinu í Washington.

Dems win Senate - frétt CNN

Enn mjótt á munum í Virginíu; óljóst hvort kemur til endurtalningar

Styttist í prófkjör - fjörugur leiðtogaslagur

Það styttist óðum í prófkjör Sjálfstæðisflokksins hér í Norðausturkjördæmi, en það verður haldið eftir rúman hálfan mánuð, laugardaginn 25. nóvember nk. Þar verður eftirmaður Halldórs Blöndals á leiðtogastóli í kjördæminu kjörinn og valdir efstu frambjóðendur á lista flokksins í þingkosningum að vori. Flokkurinn hefur mikinn meðbyr hér á þessu svæði og skv. nýjustu könnun Gallups eru fjórir þingmenn inni sem kjördæmakjörnir. Það er glæsileg staða fyrir okkur öll í aðdraganda prófkjörsins.

Nú þegar hafa leiðtogaefnin Kristján Þór Júlíusson og Þorvaldur Ingvarsson opnað heimasíður á netinu og kosningaskrifstofu hér á Akureyri. Ennfremur hefur Ólöf Nordal, frambjóðandi í annað sætið, opnað hér kosningaskrifstofu. Um helgina stefnir Arnbjörg Sveinsdóttir að því að opna kosningaskrifstofu á efri hæð að Glerárgötu 20, sama húsi og Greifinn er í. Það er okkur sjálfstæðismönnum á Akureyri að sjálfsögðu mikið gleðiefni að frambjóðendur í efstu sætin opni hér kosningaskrifstofu og kynni sig og áherslur sínar vel fyrir okkur.

Það er þessum frambjóðendum enda pólitískt séð nauðsynlegt að höfða vel til Akureyringa, þar sem stærsta þéttbýlisbyggð kjördæmisins er. Það stefnir í mjög fjörugan leiðtogaslag. Það er gleðiefni að við höfum val um það hvern við viljum sjá sem leiðtoga hér. Við erum að sjá kapphlaup um lausan leiðtogastól sem getur fært mikla möguleika fyrir þann sem sigrar, svo skiljanlega eru margir sem sýna áhuga og vilja taka þátt. Það styrkir okkur öll að hafa val um hver eigi að leiða listann.

Ég bendi hérmeð á heimasíður þeirra frambjóðenda sem hafa opnað vefgátt
Arnbjörg Sveinsdóttir
Kristján Þór Júlíusson
Ólöf Nordal
Sigríður Ingvarsdóttir
Sigurjón Benediktsson
Þorvaldur Ingvarsson

Ég vona að þetta prófkjör styrki okkur að lokum og við stillum upp samhentri sigursveit til verka í kosningabaráttunni allt fram til 12. maí og að þann dag vinnum við hér sigur og tryggjum að eftirmaður Halldórs á leiðtogastóli verði fyrsti þingmaður kjördæmisins og ráðherra í ríkisstjórn að vori. Eins og staða mála sýnir okkur vel í könnunum er möguleikinn á því svo sannarlega til staðar - sóknarfærin eru til staðar. Við verðum að nýta þau vel og stilla upp sem sterkustum lista. Það mun ég allavega gera.

Afsögn Rumsfelds - Gates tekur við í Pentagon

Donald Rumsfeld, varnarmálaráðherra Bandaríkjanna, hefur sagt af sér og hefur Robert Gates, fyrrum forstjóri CIA, verið tilnefndur sem eftirmaður hans. Afsögn Rumsfelds var tilkynnt formlega nú síðdegis á blaðamannafundi og kom varla að óvörum eftir úrslit þingkosninganna í Bandaríkjunum þar sem að repúblikanar urðu fyrir gríðarlegu pólitísku áfalli. Það var ekki um neitt annað að ræða en að skipta um kúrs og áherslur - skipta um yfirmann í Pentagon.

Rumsfeld hefur verið varnarmálaráðherra frá 20. janúar 2001, allt frá valdatöku Bush Bandaríkjaforseta, og verið einn af hans nánustu pólitísku ráðgjöfum um utanríkis- og varnarmál. Hann stýrði stefnumótun forsetans í málaflokknum og verið lykilmaður í bandarískum stjórnmálum. Rumsfeld var áður varnarmálaráðherra 1975-1977 í forsetatíð Geralds Ford og er bæði yngsti og elsti maðurinn sem gegnt hefur embættinu. Hann er nú 74 ára gamall og því óneitanlega nokkuð roskinn. Hann er einn umdeildasti ráðherra í seinni tíma stjórnmálasögu Bandaríkjanna.

Það hefur verið brugðist við afgerandi úrslitum þingkosninganna með þeim eina hætti sem mögulegur var og réttur; því að skipta um yfirmann í Pentagon og breyta um áherslur. Það að Rumsfeld sé settur af eru stórpólitísk tíðindi og greinilega ákvörðun forsetans eftir þessi kosningaúrslit. Það blasti við að ekki gat öðruvísi farið. En nú reynir á samvinnu, enda er forsetinn ekki að fara neitt. Hann á sitt umboð til 20. janúar 2009 og situr þann tíma. Það er greinilegt að hann leitast nú eftir samstarfi við demókrata og það er eðlilegt. Það er jú þjóðin sem ræður för, hún velur þingið og forsetann. Það er bara þannig.

Robert Gates, fyrrum forstjóri CIA, hefur nú verið tilnefndur sem nýr varnarmálaráðherra, eins og fyrr segir. Mér finnst val forsetans á honum gott. Það er mikilvægt að stokka hlutina upp og það var kominn tími til að skipta um yfirmann í Pentagon. Gates er fæddur árið 1943, því orðinn 63 ára gamall. Gates var yfirmaður CIA í forsetatíð George H. W. Bush, föður núverandi forseta, á árunum 1991-1993 og hefur langan starfsferil þar að baki, en hann vann þar í heil 26 ár.

Tíðindi dagsins eru stór og síðasti sólarhringur verið viðburðaríkur. Bush forseti þarf nú að hefja samstarf við aðra valdhafa inni í þinginu og leita málamiðlana og samkomulags, eitthvað sem hann hefur ekki vanið sig mikið á. Miklar breytingar eru framundan hjá honum á lokaspretti valdaferilsins. Það verða viðbrigði fyrir hann og fleiri lykilmenn hans. Það eru svo sannarlega nýjir tímar framundan í bandarískum stjórnmálum.

En nú hefst hasarinn fyrir forsetakosningarnar 2008 í raun. George Walker Bush verður ekki sögupersóna í þeim kosningahasar. Þar verður nýr húsbóndi í Hvíta húsinu kjörinn. Það verður sérstaklega áhugavert að sjá í hvaða stefnu Repúblikanaflokkurinn þróast í þeirri atburðarás. Búast má við nokkrum breytingum þar með nýju forsetaefni, sem hefur jafnvel aðrar hugmyndir og áherslur á sömu málum og Bush forseti.

Bush: Réttur tími til að skipta um forustu í Pentagon

Donald Rumsfeld segir af sér

Donald Rumsfeld, varnarmálaráðherra Bandaríkjanna, er nú að tilkynna um afsögn sína á blaðamannafundi í Pentagon. Þetta gerist í kjölfar kosningasigurs demókrata nú síðasta sólarhringinn og í kjölfar yfirlýsinga Nancy Pelosi, verðandi forseta fulltrúadeildarinnar, um að Rumsfeld yrði að fara frá.

Robert Gates, fyrrum forstjóri CIA, hefur verið útnefndur sem nýr varnarmálaráðherra Bandaríkjanna. Ég mun skrifa ítarlega færslu um afsögn Rumsfelds innan skamms.

Nancy Pelosi vill afsögn Donalds Rumsfelds

Nancy Pelosi, verðandi forseti fulltrúadeildar Bandaríkjaþings, verður brátt ein valdamesta konan í 220 ára sögu Bandaríkjanna. Hún verður önnur í valdaröðinni, á eftir varaforsetanum, er hún tekur við forsetaembættinu í janúar af Dennis Hastert. Pelosi hefur alltaf verið harðjaxl í stjórnmálum og aldrei verið ófeimin við að tjá skoðanir sínar. Hún kemur með krafti nú inn í fremstu víglínu bandarískra stjórnmála. Það sést vel að hún ætlar að krefjast breytinga á valdamiklum stöðum - nýrrar stefnu í lykilmálum.

Ein sterkasta vísbendingin í þessa átt sást á blaðamannafundi aftur í dag er hún fór yfir áherslur sínar í kjölfar þess að hún verður fyrst kvenna til að leiða þingdeild í sögu Bandaríkjaþings. Hún krefst afsagnar Donalds Rumsfelds, varnarmálaráðherra Bandaríkjanna, og er ófeimin við að kalla eftir breytingum í Íraksmálinu og fleiri umdeildum málum. Pelosi og demókratar munu láta finna fyrir sér og nota sóknarfærið til að sækja að Bush forseta og stjórn hans.

George W. Bush, forseti Bandaríkjanna, mun í kvöld halda blaðamannafund í Hvíta húsinu þar sem hann tjáir skoðanir sínar um fall meirihluta repúblikana í fulltrúadeildinni og jafna stöðu í öldungadeildinni. Úrslit kosninganna eru pólitískt áfall fyrir forsetann og flokk hans. Best sést staða mála í kosningunni um fulltrúadeildina þar sem öll sæti voru undir og ósigurinn sérstaklega afgerandi og umboð demókrata sterkt til verka þar. Það verður fróðlegt að heyra skoðanir forsetans á stöðu mála.

Það verður fróðlegt að sjá hvernig valdasambúð forsetans og demókrata mun ganga er á hólminn kemur. Það verður stormasöm sambúð og því verður sérstaklega áhugavert að sjá mat forsetans á því sem gerst hefur. Bush verður að búa við þessa stöðu það sem eftir lifir valdaferilsins og það mun verða erfitt fyrir hann að koma málum í gegn og beita völdum sínum með sama hætti og verið hefur, enda hafa samherjar hans ráðið þinginu nær allan forsetaferil hans, fulltrúadeildinni frá 1994 en öldungadeildinni frá 2003.

Það er allavega greinilegt á ummælum Nancy Pelosi í dag að hún ætlar ekki að vera róleg í tíðinni og það eiga eftir að verða heldur betur stormasamar sviptingar í þessari valdasambúð þeirra.

Væntanlegur þingforseti hvetur til afsagnar Rumsfelds

Spennandi örlagastund í Virginíu og Montana

Augu allra stjórnmálaskýrenda í Bandaríkjunum beinast nú að Virginíu- og Montana-fylki þar sem það mun ráðast hvort að repúblikanar eða demókratar fara með völd í bandarísku öldungadeildinni næstu tvö árin, það sem eftir lifir af seinna kjörtímabili George W. Bush, forseta Bandaríkjanna. Þegar er auðvitað ljóst að demókratar hafa náð völdum í fulltrúadeildinni, eftir tólf ára valdasetu repúblikana þar eins og ég fjallaði um í ítarlegri færslu snemma í morgun.

Það verður fróðlegt að sjá hvernig fer varðandi þessi tvö þingsæti sem ráða því hversu laskaður Bush forseti er orðinn pólitískt. Tapi repúblikanar líka öldungadeildinni versnar staðan enn meira fyrir þá og stjórn forsetans. Bush virðist vera kominn í sömu stöðuna og Bill Clinton var megintíma valdaferils síns. Á árunum 1995-2001, meira en helming forsetaferilsins, höfðu repúblikanar meirihluta í báðum þingdeildum með Clinton við völd og hann var endurkjörinn sem forseti í nóvember 1996 án þess að ná þinginu á vald demókrata í leiðinni.

Það sem virðist vera öðruvísi í tilfelli Bush nú en Clintons áður er að hann leitaði eftir samstarfi við pólitíska andstæðinga og reyndi sitt besta til að halda friðinn við þá. Það eru allt aðrir tímar núna. Bandarískir hermenn eru í Írak og það mál hefur klofið þjóðina í tvær fylkingar. Umfram allt annað virðist Bush vera að verða fyrir þessum pólitíska skelli nú vegna þess máls. Þetta er algjör áfellisdómur yfir hans forystu í málinu. Það eru því meginskil milli þess pólitíska veruleika sem blasti við Clinton til fjölda ára og það sem stefnir í að komi fyrir Bush forseta nú. En heilt yfir er þetta jafnmikið pólitískt áfall og Clinton veiktist gríðarlega við valdamissi demókrata í þinginu þá.

Það má búast við endurtalningu í Virginíu þar sem að George Allen berst fyrir endurkjöri í hörkuslag við Jim Webb. Þar munar svo litlu að með ólíkindum er og hugurinn leitar ósjálfrátt til Flórída fyrir sex árum þar sem það réðst hvort að George W. Bush eða Al Gore varð forseti Bandaríkjanna. Munurinn þá var ótrúlega lítill og það sem gerðist þá varð sögulegt að öllu leyti, og vonandi mun aldrei gerast aftur í bandarískum forsetakosningum. Ekki síður er mikil spenna í Montana þar sem munurinn milli Conrad Burns og Jon Tester er ótrúlega lítill ennfremur. Þetta verða spennandi dagar. Fari svo að endurtalning fari fram og lagaflækjur verði ráðandi í málinu gætu úrslit ekki ráðist fyrr en í desember.

Það er ljóst að beðið er með spennu á brá eftir þessum úrslitum. Það verður slæmt tefjist þau mjög úr hömlu og vonandi að staða mála ráðist sem allra fyrst. En munurinn er í þessum fylkjum vissulega svo lítill að það verður að vinna stöðuna vel og tryggja að rétt sé á málum haldið. Það er mikið í húfi svo sannarlega í bandarískum stjórnmálum í þessum fylkjum þar sem örlögin ráðast að lokum. Segið svo að hvert atkvæði skipti ekki máli!

Demókratar hársbreidd frá því að ná meirihluta í öldungadeildinni

Brjóstmynd af Davíð í Ráðhúsinu

Þá er Davíð Oddsson, seðlabankastjóri, búinn að fá brjóstmynd af sér í Ráðhúsinu eins og allir fyrrum borgarstjórar sem sátu á undan honum. Sumir borgarstjórar hafa ekki lifað þennan atburð, en Davíð er á besta aldri enn, enda viðstaddur athöfnina í gær. Davíð var borgarstjóri í Reykjavík í rúm níu ár, frá júníbyrjun 1982 og fram í júlí 1991. Það var tímabil framkvæmda og krafts í Reykjavík. Merkilegt tímabil.

Á þessum árum var Reykjavík kölluð Davíðsborg, sem var til vitnis um kraft Davíðs sem borgarstjóra og vinsældir hans. Í síðustu borgarstjórnarkosningunum sínum fékk Sjálfstæðisflokkurinn undir forystu Davíðs yfir 60% fylgi og 10 borgarfulltrúa af 15. Það var til marks um stöðu mála, þrátt fyrir að gríðarlega hefði verið að Davíð sótt í Ráðhúsmálinu og við byggingu Perlunnar. Þetta var tímabil öflugra framkvæmda, heldur betur.

Ég vona að Davíð muni einhverntíma rita ævisögu sína og fara t.d. yfir borgarstjóraferilinn og verkin sem hann vann þar. Hann hefur oft sagst aldrei rita ævisögu sína en ég vona að Davíð snúist hugur í þeim efnum. Hann hefur nefnilega verið lykilmaður í íslenskum stjórnmálum og hefur verið í miðpunkti þeirra um árabil og hann hefur upplifað marga lykilatburði baksviðs stjórnmálabaráttunnar á okkar dögum.

Þess má að lokum geta að Davíð var bæði borgarstjóri og forsætisráðherra í maí og júní 1991. Undir lokin var þó Jón G. Tómasson, borgarritari á þeim tíma, orðinn starfandi borgarstjóri, en eftirmaður Davíðs varð Markús Örn Antonsson.

Davíð afhjúpaður

Sigur demókrata - barátta um öldungadeildina

Demókratar hafa tryggt sér völdin í fulltrúadeild Bandaríkjaþings og mun leiðtogi flokksins, Nancy Pelosi verða fyrst kvenna forseti fulltrúadeildarinnar. Tekist er nú á um völdin í öldungadeildinni. Enn á eftir að fá úrslit í Virginíu og Montana. Úrslitin þar munu ráða úrslitum um það hvor flokkurinn hafi völdin í öldungadeildinni næstu tvö árin. Báðir flokkar hafa hlotið 49 þingsæti af 100 og því stefnir í hárbeittan endasprett um það hvar valdahlutföll muni liggja í bandarískum stjórnmálum.

Úrslitin í fulltrúadeildinni eru pólitískt áfall fyrir George W. Bush, sem hefur nær allan sinn forsetaferil ráðið yfir báðum þingdeildum og haft afgerandi umboð til sinna verka og með þingið að baki sér. Þeir tímar eru nú liðnir. Þó að repúblikanar myndu halda þinginu í stöðunni sem uppi er verður það aldrei túlkað annað en sem vængbrotinn sigur og mikið áfall fyrir hann að hafa misst 15 sæta meirihluta í fulltrúadeild og öflugan meirihluta í öldungadeild niður í ekki neitt. Staða mála er því kristalskýr og blasir við öllum sem kynna sér tölurnar, miðað við árin 2002 og 2004.

Vinni demókratar ennfremur sigur í öldungadeildinni mun það leiða til þess að forsetinn standi eftir með þingið á móti sér. Það myndi leiða til þess að öll mál forsetans væru upp á náð og miskunn demókrata komin. Það er sú staða sem repúblikanar óttuðust mest alla kosningabarátta. Komi sú staða nú upp mun pólitískur kraftur forsetans lamast til muna. Það er þegar ljóst að repúblikanar urðu fyrir þungu áfalli í þessum kosningum og ganga veikir frá velli, eru sigraðir. Því verður ekki neitað að úrslitin eru áfellisdómur yfir forsetanum.

George W. Bush hefur nær allan forsetaferil sinn haft sterkt umboð landsmanna til verka. Hann hlaut gott umboð landsmanna í forsetakosningunum fyrir tveim árum, hlaut hreinan meirihluta atkvæða og sterka stuðningsyfirlýsingu landsmanna við pólitísk verk hans. Það umboð er verulega skaddað við þetta afhroð repúblikana um nær allt land. Þeir gullaldartímar, sem einkennt hafa valdaferil forsetans, hafa liðið undir lok og nú hefur hann fengið gula spjaldið svo um munar. Hann verður nú að taka tillit til skoðana landsmanna og ennfremur hlusta á skoðanir demókrata, sem hafa nú stöðu mála í þingdeildunum svo til á sínu valdi.

Nóttin var spennandi. Eins og fram kom hér í nótt vann Joe Lieberman fjórða sigurinn í Connecticut, nú sem óháður eftir tap í forkosningu í ágúst. Hann sagðist myndu halda til verka í þinginu sem demókrati væri og myndi vinna með sínum gömlu félögum, þó að þeir hefðu flestir snúið við honum baki eftir tapið í ágúst. Hillary Rodham Clinton vann glæsilegan sigur í New York og fékk tæp 70% atkvæða.

Þekktir öldungadeildarþingmenn repúblikana, þeir Jim Talent í Missouri, Lincoln Chafee í Rhode Island, Rick Santorum í Pennsylvaníu og Mike DeWine í Ohio féllu allir af þingi fyrir misvel þekktum andstæðingum sínum í skýrri demókratabylgju um gervöll Bandaríkin.

Arnold Schwarzenegger var endurkjörinn ríkisstjóri Kalíforníu og Charlie Crist var kjörinn ríkisstjóri í Flórída í staðinn fyrir Jeb Bush, bróður Bush forseta, sem gat ekki gefið kost á sér að nýju. Blökkumaðurinn og demókratinn Deval Patrick var kjörinn ríkisstjóri í Massachusetts, í stað repúblikanans Mitt Romney sem gaf ekki kost á sér til endurkjörs.

Hann er annar blökkumaðurinn í sögu Bandaríkjanna sem verður ríkisstjóri. Blökkumaðurinn Keith Ellison náði kjöri í fulltrúadeildina í kjördæmi í Minnesota. Hann er fyrsti múslíminn á Bandaríkjaþingi. Demókratinn Martin O´Malley var kjörinn ríkisstjóri í Maryland og Bill Richardson var endurkjörinn í Nýju Mexíkó, svo fátt eitt sé nefnt.

Heilt yfir voru kosningarnar því skellur fyrir Bush Bandaríkjaforseta og repúblikana. Þær voru áfellisdómur yfir forsetanum og verkum hans. Það er mjög einfalt mál og greinilegt að Bandaríkjamenn vilja uppstokkun á stöðu mála og sendir Bush kaldar kveðjur. Hann þarf nú lokasprett valdaferilsins að deila völdum með demókrötum.

Nancy Pelosi hefur verið harður andstæðingur hans. Það að hún verði sem forseti fulltrúadeildarinnar nú önnur í valdaröð landsins, á eftir varaforsetanum, eru stórtíðindi og segja allt sem segja þarf um það pólitíska áfall sem úrslitin boða fyrir forsetann.

Demókratar ná völdum í fulltrúadeildinni

Demókratar ná völdum í fulltrúadeildinni

Stórtíðindi urðu í bandarískum stjórnmálum nú á fimmta klukkutímanum þegar að demókratar náðu völdum í fulltrúadeild Bandaríkjaþings eftir tólf ára meirihlutasetu repúblikana. Demókratar hafa verið á sigurbraut í talningunni í alla nótt og hefur stefnt í sigur þeirra í skoðanakönnunum síðustu mánaða. Þessi úrslit marka þáttaskil að mjög mörgu leyti og laskar George W. Bush, forseta Bandaríkjanna, verulega og veikir pólitíska stöðu hans mjög.

Nancy Pelosi, sem verið hefur leiðtogi demókrata í fulltrúadeildinni frá árinu 2003, mun nú verða forseti fulltrúadeildarinnar. Hún er fyrsta konan sem leiðir fulltrúadeildina í langri sögu hennar. Pelosi tekur við forsetaembættinu af Dennis Hastert, sem hefur verið forseti allt frá árinu 1999, og var kominn í hóp þaulsetnustu forseta deildarinnar. Nancy Pelosi hefur verið harður andstæðingur George W. Bush og verið mjög andsnúin pólitískum verkum hans. Sigur hennar og demókrata eru stórpólitískt áfall fyrir Bush forseta.

Úrslitin verða brátt ljós í öldungadeildinni. Þegar að sjö sæti eru enn undir hafa demókratar hlotið 47 en repúblikanar 46. Demókratar hafa unnið þrjú sæti af repúblikönum og þurfa að sigra þrjú önnur til að vinna. Það ræðst innan klukkutíma hvernig fer í þessu. Nú þegar hafa þó stórpólitísk tíðindi orðið og pólitísk staða Bush forseta veikst til muna við fall meirihluta repúblikana í fulltrúadeildinni.

Lieberman heldur velli - Santorum fellur

Úrslitin eru óðum að verða ljósari í bandarísku þingkosningunum. Það stefnir í að demókratar séu að ná árangri, en ekki ræðst enn hver full úrslit verða. Fyrir stundu varð ljóst að Joe Lieberman heldur velli í öldungadeildinni í baráttu stjórnmálaferils síns. Honum tókst að hafa sigur sem óháður í baráttu við Ned Lamont, sem felldi hann í forkosningu demókrata í fylkinu í ágúst um hver ætti að verða frambjóðandi flokksins. Lieberman hefur setið í öldungadeildinni fyrir demókrata frá 1989.

Jákvæð afstaða Lieberman til Íraksstríðsins og stuðningur hans við ákvarðanir Bush-stjórnarinnar fyrir og eftir stríðið leiddi til víðtækrar óánægju með störf hans meðal íbúa í fylkinu og staða hans varð ótrygg. Svo fór að Lamont, sem var lítt kunnur viðskiptamaður, gaf kost á sér gegn honum. Framan af þótti hann ekki eiga séns gegn hinum víðreynda og vinsæla Lieberman sem var einn af forystumönnum flokksins á landsvísu og hafði verið varaforsetaefni demókrata í forsetakosningunum 2000, fyrsti gyðingurinn í lykilframboði í bandarísku forsetakjöri.

Á nokkrum mánuðum breyttist staðan. Svo fór að Lamont tókst að fella Lieberman í forkosningunum og ná útnefningu flokksins í þessu örugga vígi hans. Flestir töldu eftir tapið að Lieberman myndi lamast sem stjórnmálamaður. Allar stjörnur demókrata sem studdu hann snerust yfir til Lamont og flokksmaskínan sem malaði gegn Lamont varð að vinna fyrir hann. Lieberman hélt ótrauður sínu striki og boðaði óháð framboð á eigin vegum og tókst að koma standandi frá þessu.

Lamont náði aldrei eftir forkosningarnar náð alvöru forskoti á Lieberman og nú hefur hann tapað sjálfum kosningunum, þó formlegur flokksframbjóðandi demókrata sé. Fátt virðist hafa gengið Lamont í hag í átökunum sjálfum, handan forkosninganna meðal flokksmanna. Hann hefur ekki komist út úr talinu um Íraksstríðið og varð bensínlaus á miðri leið, þrátt fyrir áfangasigurinn. Honum mistókst að fókusera sig á aðra málaflokka og öðlast tiltrú kjósenda sem breiður stjórnmálamaður ólíkra hópa. Því fór sem fór.

Ein stórtíðindi kvöldsins eru svo auðvitað fall Rick Santorum þingmanns fyrir Pennsylvaníu úr öldungadeildinni. Hann var einn af lykilmönnum flokksins í þinginu og verið áberandi í stjórnmálum. Hann hefur setið í öldungadeildinni í tólf ár, var kjörinn í kosningunum sögulegu árið 1994 og endurkjörinn í kosningunum 2000, samhliða forsetakjörinu eftirminnilega á milli Bush og Gore. Repúblikanar hafa nú þegar misst þrjú öldungadeildarsæti en missi þeir sex hafa þeir misst deildina úr höndum sér.

Það stefnir svo sannarlega í spennandi nótt. Meðal helstu tíðinda annarra sem af er telst auðvitað sigur Edward M. Kennedy, bróður John F. Kennedy, 35. forseta Bandaríkjanna, í Massachusetts en hann hefur verið í öldungadeildinni allt frá árinu 1962 og hefur því unnið níu sinnum kjör í deildina og er að verða sá þingmaður þar sem lengst hefur setið. Kennedy er orðinn 74 ára gamall og verður því orðinn rösklega áttræður er kemur að næstu kosningum eftir sex ár.

Ein tíðindi kvöldsins eru tækniörðugleikar á kjörstað. Ljótt er að heyra. Vonandi verður ekkert Flórída-syndrome í nótt, segi ég og skrifa. Gleymi annars aldrei þessum 36 örlagaríku dögum fyrir sex árum er deilt var um hvor væri nýkjörinn forseti (president-elect) Bush eða Gore. Ógleymanlegir dagar svo sannarlega. Þá var Flórída nafli alheimsins, í orðsins fyllstu merkingu.

Tækniörðugleikar valda töfum á kjörfundum víða í Bandaríkjunum

Örlagarík kosninganótt í Bandaríkjunum

Kjörstöðum hefur verið lokað í fyrstu fylkjunum í Bandaríkjunum - örlagaríkir klukkutímar eru framundan í bandarískum stjórnmálum. Úrslit í bandarísku þingkosningunum verða brátt ljós. Kosninganóttin er hafin - úrslit verða ljós fyrir dögun að íslenskum tíma.

Eins og fram kom í bloggfærslu minni hér síðdegis stefnir í mjög spennandi talningu. Það verður áhugavert að sjá hver staðan verður að loknum kosningunum, enda mun þar ráðast hvernig Bush forseti getur stýrt málum út síðara kjörtímabil sitt.

Ég hef alltaf fylgst með miklum áhuga með bandarískum stjórnmálum, mikið skrifað um þau og spekúlerað. Ég fylgist því með þessum kosningum af miklum áhuga. Það verður mest fylgst með því hvernig valdahlutföll verða í þingdeildunum og hverjir hljóti kjör í tvísýnum baráttum um öldungadeildarsæti.

Einnig eru áhugaverðir ríkisstjóraslagir sem vert verður að fylgjast með, t.d. í Kaliforníu og Flórída. Þetta verður því nótt spennu í Bandaríkjunum og víðar um heim.

Bandarísku forsetahjónin kjósa í heimabæ sínum Crawford

Mikil spenna í bandarísku þingkosningunum

Æsispennandi þingkosningar eru í Bandaríkjunum í dag. Kosið er um alla fulltrúadeildina, hluta öldungadeildarsæta og ríkisstjóraembætti, auk fjölda annarra embætta. Kosningarnar gætu orðið sviptingasamar. Skv. nýjustu skoðanakönnunum hefur forskot demókrata á repúblikana í kosningum til fulltrúadeildarinnar, þar sem kosið er um öll 435 sætin, minnkað þónokkuð. Ekki er því vitað í hvað stefnir í kvöld og nótt þegar að tölur um allt land taka að streyma inn.

Kosningabaráttunni lauk seint í gærkvöldi með krafti. Tveir menn voru þar áberandi í að vinna flokki sínum stuðnings með kosningaferðalögum um þau ríki þar sem lykilbarátta kosninganna stefna í að verða er yfir lýkur. Hvorugur var þó í framboði í þessum kosningum. Þetta voru George W. Bush, forseti Bandaríkjanna, og forveri hans á forsetastóli, Bill Clinton. Skilaboð þeirra voru áberandi á lokaspretti baráttunnar og bandarískir fjölmiðlar gerðu kosningaferðalagi þeirra góð skil. Óvíst er þó hvort þeirra innlegg ráði nokkuð úrslitum. Efast má satt best að segja um það.

Þessar þingkosningar eru heilt yfir kosningar um George W. Bush og stöðu hans og ríkisstjórnarinnar, nú þegar að nákvæmlega tvö ár eru til forsetakosninga, þar sem eftirmaður hans á forsetastóli verður kjörinn. Kosið er um hvort forsetinn heldur áhrifum sínum og völdum með sama hætti og verið hefur, enda hafa repúblikanar ráðið yfir báðum deildum þingsins og Hvíta húsinu á sama tíma. Öllum er ljóst að mjög mun þrengjast um hann ef að Nancy Pelosi verður forseti fulltrúadeildarinnar af hálfu demókrata. Þar sem kosið er um alla fulltrúadeildina verða skilaboðin skýrari þar. Repúblikanar mega teljast ljónheppnir haldi þeir velli þar. Þar verður meginbarátta kvöldsins og þar munu örlög umfangs valda forsetans næstu tvö árin ráðast.

Sérfræðingar sem höfðu spáð afgerandi sigri demókrata voru þó orðnir tvístígandi í gær og ekki eins vissir um afhroð repúblikana. Bob Schieffer, hinn gamalreyndi sérfræðingur og fréttaþulur CBS, sem hafði fyrir um viku spáð afgerandi sigri demókrata í báðum deildum var orðinn efins í gær en spáði þó að demókratar tækju fulltrúadeildina en það yrði jafnt í öldungadeildinni. Þar sem 100 sæti eru í öldungadeildinni getur sú staða komið upp. Það gerðist síðast í kjölfar forsetakosninganna 2000. Þá er varaforsetinn með oddaatkvæðið. Á því réðu demókratar deildinni í 17 daga í janúar 2001, eða þar til að Dick Cheney varð varaforseti í stað Al Gore. Sú staða gæti hæglega komið upp, en sú staða er þó verulega erfið og þýðir í raun valdajafntefli, þó að varaforsetinn tryggi flokksvald sitt.

Bush forseti var á kosningaferðalagi m.a. í Flórída í gær. Það vakti athygli að Charlie Crist, ríkisstjóraframbjóðandi repúblikana í fylkinu, ákvað að sleppa kosningafundi forsetans og halda í staðinn sinn eigin fund á svipuðum tíma. Þetta þótti niðurlægjandi fyrir forsetann og vont. Það er vissulega svo að það hefur sett mark sitt á baráttuna að forsetinn er óvinsælli en hefur verið. Það er reyndar um fátt meira talað en þessa ákvörðun Crist, einkum og sér í lagi í ljósi þess að hann er að berjast um að verða eftirmaður Jeb, bróður forsetans, sem getur ekki boðið sig fram aftur nú í Flórída í ljósi þess að ríkisstjóri getur ekki setið lengur en tvö kjörtímabil. Það bendir nær allt til þess að Crist verði eftirmaður Jeb Bush, en munurinn hefur þó minnkað þar síðustu daga.

Bush forseti kaus síðdegis í dag í heimabæ sínum, Crawford í Texas, ásamt eiginkonu sinni, Lauru Welch Bush. Hún varð sextug á dögunum en lítið varð um hátíðarhöld í ljósi harðnandi þingkosningabaráttu og munu þau hjón væntanlega taka því rólega er úrslitin liggja fyrir. Er þau fóru að kjósa voru þau nýkomin úr kosningaferðalaginu, sem verður þeirra síðasta væntanlega. Þetta eru síðustu kosningarnar sem skipta George W. Bush verulegu máli. Eftir tvö ár halda þau í eftirlaunalífið í Crawford og fara úr sviðsljósinu. En baráttan nú skiptir máli fyrir pólitíska arfleifð forsetans. Þetta eru lykilkosningarnar sem ráða því hvernig Bush getur sagt skilið við stjórnmálastörf sín og forystuverk í Washington.

Það má búast við spennandi kvöldi. Það verður fróðlegt að sjá hvernig kosningarnar fara í þingdeildunum, en ekki síður hvernig spennandi ríkisstjórabaráttur fara um allt landið. Mikil spenna er yfir þingkosningunum í Connecticut, þar sem að Joe Lieberman berst fyrir endurkjöri, nú sem óháður. Allt bendir til að hann haldi velli og sama má segja um Hillary Rodham Clinton sem mun án vafa vinna stórsigur í New York. Þetta verður væntanlega líka sigurkvöld Arnold Schwarzenegger í Kaliforníu, en hann hefur barist fyrir endurkjöri og sigur hans nokkuð tryggur. Svo verður spennandi að sjá hvernig fer fyrir George Allen í sinni spennandi baráttu.

Ég mun fjalla um úrslitin eftir því sem þau berast og fylgjast með stöðunni og reyna að skrifa um eftir því sem mögulegt er. Framundan eru spennandi klukkutímar sem hafa áhrif á lokasprett valdaferils George W. Bush og ekki síður valdahlutföll í heimsborginni Washington.

Kjörstaðir opnaðir í Bandaríkjunum; 200 milljónir á kjörskrá

Ungliðar gagnrýna yfirlýsingar frjálslyndra

Forsvarsmenn ungliðahreyfinga í öllum stjórnmálaflokkum nema Frjálslynda flokknum hafa sent frá sér ályktun og gagnrýnt þar yfirlýsingar Magnúsar Þórs Hafsteinssonar, varaformanns Frjálslyndra, um innflytjendamál. Þeir lýsa vonbrigðum með þá ákvörðun nokkurra forystumanna Frjálslyndra að ala á trúarbragðafordómum og tortryggni í garð útlendinga í tilraunum sínum til að auka fylgi flokks síns.

Þetta er góð og öflug ályktun sem mikilvægt var fyrir ungliðahreyfingar fjögurra stærstu flokka landsins að senda frá sér og ég fagna henni, enda skrifaði ég ítarlegan pistil um málið í gær á vef SUS og lét í ljósi sömu skoðanir á málinu.

Ályktun ungliða

Lýsa yfir vonbrigðum með trúarbragðafordóma meðal Frjálslyndra

Jón Gunnarsson hættir í stjórnmálum

Jón Gunnarsson, alþingismaður, hefur ákveðið að hætta þátttöku í stjórnmálum í kjölfar úrslita prófkjörs Samfylkingarinnar í Suðurkjördæmi. Í prófkjörinu féll Jón í fimmta sætið, en hefði fengið það sjötta vegna kynjakvóta. Það var ljóst nær alla talninguna í gærkvöldi að Jón hefði misst þingsæti sitt og hefði verið í varamannsframboði hefði hann tekið sjötta sætið.

Jón er þriðji þingmaður Samfylkingarinnar sem fellur í prófkjörum flokksins. Anna Kristín Gunnarsdóttir féll í óöruggt sæti í prófkjörinu í Norðvesturkjördæmi og Valdimar Leó Friðriksson, sem varð þingmaður við afsögn Guðmundar Árna Stefánssonar fyrir rúmu ári, fékk mikinn skell í Suðvesturkjördæmi.

Jón hefur setið á þingi frá þingkosningunum 2003, en hann komst inn á þing með dramatískum hætti undir lok talningar á utankjörfundaratkvæðum sem gerðu það að verkum að Ingibjörg Sólrún datt út sem jöfnunarmaður í Reykjavík en Jón komst inn fyrir Samfylkinguna sem jöfnunarmaður í Suðri.

Enginn fulltrúi Suðurnesja komst í fimm efstu sætin í prófkjöri Samfylkingarinnar í Suðurkjördæmi, svo að væntanlega eru úrslitin mikið áfall fyrir flokksmenn þar, sem hafa misst þingmann við þessa stöðu mála, en ætti að styrkja aðra flokka þar.

Ég skil Jón vel að vilja fara út við þessar aðstæður. Þingsætið er tapað og eftir litlu að berjast. Enginn fulltrúi Suðurnesjamanna í fimm efstu sætum og minnist Jón vel á í viðtali við RÚV að þrír fulltrúar Vestmannaeyja séu í efstu fimm, Lúðvík, Róbert og Guðrún, sem færist upp fyrir Jón.

Jón Gunnarsson hættir í stjórnmálum

Björgvin sigrar í Suðrinu - Róbert inn og Jón út

Úrslit liggja nú fyrir í prófkjöri Samfylkingarinnar í Suðurkjördæmi. Björgvin G. Sigurðsson, alþingismaður, sigraði í prófkjörinu og verður leiðtogi Samfylkingarinnar í kjördæminu í stað Margrétar Frímannsdóttur, sem setið hefur á þingi allt frá 1987, og var á löngum stjórnmálaferli t.d. formaður Alþýðubandalagsins og varaformaður og þingflokksformaður Samfylkingarinnar. Björgvin hefur setið á þingi frá 2003, en hann var varaþingmaður Suðurlandskjördæmis 1999-2003 og framkvæmdastjóri flokksins 1999-2002.

Sigur Björgvins er þónokkuð afgerandi. Hann hlaut 1681 atkvæði í fyrsta sætið. Sigur hans var orðinn vel ljós tæpum klukkutíma fyrir lokatölur og hann var efstur í gegnum alla talninguna. Það er greinilegt að Björgvin hefur hlotið afgerandi stuðning Margrétar Frímannsdóttur (lærimóðir BGS í pólitík) og stuðningsmanna hennar, en Margrét sigraði naumlega í prófkjörinu 2002 í leiðtogaslag gegn Lúðvík Bergvinssyni. Björgvin er með þessu orðinn kjördæmaleiðtogi, 36 ára að aldri, og hefur stimplað sig heldur betur inn sem einn af forystumönnum Samfylkingarinnar. Hans staða er orðin heldur betur gríðarlega sterk í Suðurkjördæmi.

Það hljóta að vera gríðarleg vonbrigði fyrir Lúðvík Bergvinsson, alþingismann, að verða annar eins og síðast og hafa aldrei í allri talningunni átt raunhæfa möguleika á leiðtogasætinu, en hluta talningarinnar 2002 var hann yfir Margréti, sem vann á lokasprettinum. Hann varð þriðji í fyrstu tölum, lækkaði svo rúmlega 18:30 niður í fjórða sætið og var undir lok talningarinnar tæpur í annað sætið. Barátta hans og Ragnheiðar Hergeirsdóttur, leiðtoga Samfylkingarinnar í Árborg, var mjög spennandi og um tíma virtist sem Ragnheiður myndi hafa slaginn um sætið, en svo tók Lúðvík fram úr og sigraði. Það er þó ljóst að staða Lúðvíks hefur nú veikst mjög mikið innan flokksins.

Róbert Marshall, er rétt eins og Björgvin, sigurvegari þessa prófkjörs. Hann var rekinn frá 365 í september er fréttastöðin NFS var lögð niður og var verkefnalaus. Hann skellti sér í slaginn og hafði líf og fjör í baráttunni. Hann uppsker vel og er kominn í öruggt þingsæti fyrir Samfylkinguna og fer á þing með vorinu. Litlu munaði að hann yrði ofar á listanum en Lúðvík Bergvinsson og hefði það orðið svo sannarlega saga til næstu bæja, eða kjördæma skulum við segja. Róbert vinnur góðan sigur og hlaut þriðja sætið með glans. Hann hafði þriðja sætið í höndum sér alla talninguna eftir að aðrar tölur voru kynntar kl. 18:40. Það verður fróðlegt að sjá til verka hans á þingi. Hann hefur þó verið í pólitík en fyrir áratug var hann formaður ungra allaballa.

Jón Gunnarsson, alþingismaður, er fallinn niður í sjötta sætið. Hann varð fimmti en fellur niður fyrir Guðrúnu Erlingsdóttur, fyrrum bæjarfulltrúa í Vestmannaeyjum, vegna kynjakvóta. Jón er því á útleið af þingi. Honum tókst að komast á þing með eftirminnilegum hætti í stormasamri atkvæðatalningu á utankjörfundaratkvæðum undir morgun á kosninganótt í þingkosningum 2003 og missir sætið sitt nú í ekki síður stormasamri talningu. Hann var í fimmta sætinu alla talninguna og eru úrslitin mikill skellur fyrir hann. Úrslitin þýða það að Suðurnes á engan fulltrúa í topp fimm sætum og hljóta flokksmenn þar að vera gríðarlega ósáttir við sinn hlut. Sigríður Jóhannesdóttir, fyrrum alþingismaður, sem féll í prófkjöri 2002, komst aldrei á blað nú.

Ragnheiður Hergeirsdóttir hlýtur að vera sár við að vera fjórða, miðað við gang talningarinnar. Henni vantaði aðeins 25 atkvæði til að slá Lúðvíki við og hljóta öruggt þingsæti. Mikið drama augljóslega á Selfossi í kvöld. En úrslitin eru semsagt ljós. Þetta var lífleg talning og mikið fjör að fylgjast með stöðu mála. Athygli vekur að Lúðvík og Jón yfirgáfu Hótel Selfoss, þar sem talið var, talsvert áður en lokatölur lágu fyrir. Varla eru þeir sáttir við stöðu mála. Jón er fallinn af þingi og Lúðvík þarf nú að sætta sig við Björgvin G. Sigurðsson, sem hefur setið átta árum skemur en hann á þingi, sem kjördæmaleiðtoga. Vonbrigði þeirra hljóta að vera gríðarlega mikil.

Konur hljóta svo að vera ósáttar, enda eru þrír karlmenn í þrem efstu sætum. Ingibjörg Sólrún Gísladóttir, formaður Samfylkingarinnar, virkaði frekar vandræðaleg á talningarstað í kvöld, en vart var annað rætt í viðtali í tíufréttum Sjónvarps en það að engin kona verður í öruggu sæti skv. skoðanakönnunum nú, þó að Samfylkingin sé stærst á landsvísu einmitt í Suðrinu í könnunum Gallups. Það verður allavega seint sagt að prófkjör Samfylkingarinnar um allt land séu afgerandi sigur kvenna.

Björgvin sigraði - Lúðvík náði öðru sæti

Sigur Björgvins - hörkubarátta um annað sætið

Björgvin G. Sigurðsson hefur sigrað prófkjör Samfylkingarinnar í Suðurkjördæmi. Þó enn hafi talningu ekki lokið er sigur Björgvins öruggur. Lúðvík Bergvinsson og Ragnheiður Hergeirsdóttir takast á um annað sætið af miklum krafti. Hafa þau skipst á að skipa annað sætið síðasta klukkutímann og þegar að aðeins örfá hundruð atkvæða eru ótalin munaði aðeins þrem atkvæðum milli þeirra. Spennan er því mikil á talningarstað á Selfossi.

Það verður fróðlegt að sjá hvernig fer að lokum. Núna á Samfylkingin fjóra þingmenn í kjördæminu en mælast með þrjá í mælingum Gallups, eins og fram hefur komið hér í kvöld. Það verður nokkuð merkilegt verði karlar í þrem efstu sætunum, nú þegar að Margrét Frímannsdóttir hættir.

Svo er merkilegt að þó Jón Gunnarsson sé fimmti fær hann væntanlega ekki sætið vegna kynjakvótanna. Flest stefnir í að Guðrún Erlingsdóttir í Eyjum fái það, þó sjötta sé vegna reglna um kynjaröðun. Það er því nokkuð ljóst að Jón hefur misst þingsætið sem hann vann svo dramatískt við lok talningar árið 2003.

Ragnheiður aftur í annað sætið - munar þrem atkvæðum á henni og Lúðvík

Björgvin með forystu í spennandi talningu

Talning stendur nú yfir í prófkjöri Samfylkingarinnar í Suðurkjördæmi, sem fram fór á laugardag. Þegar talin hafa verið 2000 atkvæði eða 40% er Björgvin G. Sigurðsson, alþingismaður, í fyrsta sætinu. Í öðru sæti er Ragnheiður Hergeirsdóttir, bæjarfulltrúi í Árborg, og svo koma þeir Róbert Marshall, fjölmiðlamaður, Lúðvík Bergvinsson, alþingismaður, og Jón Gunnarsson, alþingismaður. Björgvin leiddi líka eftir fyrstu tölur fyrir innan við klukkutíma en Róbert komst upp fyrir Lúðvík í þriðja sætið í öðrum tölum.

Það stefnir í sigur Björgvins G. Sigurðssonar í prófkjörinu. Athyglisvert er að sjá það pólitíska áfall sem Lúðvík Bergvinsson er að verða fyrir eftir tæplega tólf ára þingmannsferil, en hann er nú kominn í óöruggt sæti skv. skoðanakönnunum og Jón Gunnarsson virðist fallinn skv. þessu úr þingsæti. Athyglisverður er árangur Björgvins og Ragnheiðar, sem koma af svipuðu svæði, og hafa greinilega gert með sér öflugt bandalag.

Það stefnir því í að Björgvin G. Sigurðsson verði eftirmaður Margrétar Frímannsdóttur sem leiðtogi Samfylkingarinnar í Suðrinu. Það verður væntanlega fylgst með því hvernig fer í Suðurkjördæmi. Flokkurinn hlaut þar flest atkvæði í kosningunum 2003 og fjóra þingmenn kjörna, vegna þess að Sjálfstæðisflokkurinn veiktist vegna klofningsframboðs. Skv. nýjustu mánaðarkönnun Gallups er Samfylkingin stærst þó á landsvísu í Suðrinu með tæp 30% og þrjú sæti.

Viðbót - kl. 20:20

Þegar að talin hafa verið 3500 atkvæði nú í kvöld á Selfossi er röð efstu manna óbreytt frá því sem var kl. 18.40 er aðrar tölur voru lesnar. Skv. vef Samfylkingarinnar munar nú aðeins fjórum atkvæðum á Ragnheiði Hergeirsdóttur og Lúðvík Bergvinssyni í annað sætið. Það stefnir í spennandi lokastundir talningarinnar, en alls eru 5146 atkvæði. Úrslit ættu að vera ljós fyrir kl. 22.00.

Viðbót - kl. 20:55

Þegar talin hafa verið 4000 atkvæði er staðan óbreytt. Munurinn á Ragnheiði og Lúðvík í annað sætið er nú örlítið meiri, en þó aðeins 13 atkvæði. Mesti slagurinn virðist nú vera um það hvort að Lúðvík haldi sínu öðru sæti.

Viðbót - kl. 21:20

Þegar talin hafa verið 4700 atkvæði hefur Björgvin sigrað prófkjörið. Forskot hans er orðið það mikið að enginn getur náð honum. Lúðvík hefur náð öðru sætinu af Ragnheiði, sem féll í það fjórða við það. Þrír karlmenn eru því nú í þrem efstu sætunum.

Björgvin efstur í prófkjöri Samfylkingar á Suðurlandi skv. fyrstu tölum

Dauðadómur yfir Saddam Hussein

Ekki er hægt að segja að dauðadómurinn yfir Saddam Hussein komi óvænt. Það hefur eiginlega blasað við frá handtökunni í desember 2003 að það kæmi til þessa. Ekki er þó hægt að sjá að endalok málsins séu framundan þó þessi dómsdagur hafi verið hjá Saddam í gær. Fleiri mál eru enn eftir og þessu umfangsmikla máli hefur ekki verið lokið með þessu dómsorði. Óeirðir voru á vissum stöðum í Írak, en þó ekki eins umfangsmikil og búist var við. En það eru auðvitað ólíkar skoðanir um þennan dóm.

Ég skrifaði aðeins um þetta í gær og fór yfir stöðu mála. Eftir það fékk ég tölvupóst frá lesanda sem vildi fá að heyra um skoðanir mínar á dauðarefsingum. Ég hef margoft sagt það í skrifum að ég er ekki hlynntur dauðarefsingum. Það er mjög einfalt mál. Ég verð þó fúslega að viðurkenna að mér er nákvæmlega sama um Saddam Hussein og er ekki mjög áhyggjufullur yfir hans örlögum. Þeir sem hafa lesið um verk hans á valdastóli og vinnubrögð gegn pólitískum andstæðingum eru ekki mjög umhyggjusamir um velferð hans. Ég hef lesið það mikið um pólitísk verk hans að ég ætla ekki að verja þann mann.

En það er alveg rétt sem Tony Blair segir að barátta gegn dauðarefsingum getur ekki gengið í eina átt. Öll munum við eftir fréttamyndunum sem sýndu aftökuna á Elenu og Nicolae Ceausescu, forsetahjónum Rúmeníu, í desember 1989. Við fall einræðisstjórnar þessa kommúnistaleiðtoga voru þau elt uppi sem hundar væru og þau skotin eftir snöggleg réttarhöld. Svipmyndirnar af líkum þeirra fóru um allan heim og vöktu verulega athygli. Rúmenar voru kúgaðir af þessari einræðisstjórn og þar var sú afstaða tekin að drepa þau áður en kommúnistar gætu byggt sig upp aftur. Óttinn um bakslag í byltingunni réði afstöðunni. Ég var tólf ára þegar að ég sá þessar fréttamyndir og þær sitja enn í mér. Ég skildi afstöðu þeirra, þrátt fyrir allt.

Það er erfitt að meta það hvort að einræðisherrar sem halda þjóð sinni í kúgun og drepi pólitíska andstæðinga sína verðskuldi örlög sem þau er þeir velja andstæðingunum og meta eigi þá betur. Þetta er mikið umhugsunarefni. Heilt yfir styð ég ekki dauðarefsingar og á erfitt með að tala fyrir því. En ég hef ekki samúð með Saddam Hussein og er nokkuð sama um hver örlög hans verða. Ekki kippi ég mér mikið við fréttir af þessum dómi og ætla ekki að tala gegn honum, það er mjög einfalt mál.

Blair á móti dauðarefsingum

Sigur stóriðjusinna - hugleiðingar um prófkjör

Ekki varð ég hissa á því að Kristján Möller myndi sigra prófkjör Samfylkingarinnar hér í Norðaustri. Það hafði blasað við alla baráttuna, fannst mér. Útkoma Akureyringanna var þó athyglisverð. Það er hinsvegar greinilegt að sú útkoma eflir sjálfstæðismenn hér á Akureyri í því að berjast fyrir því að Akureyringur leiði listann hér í kjördæminu að vori. Það stefnir allt í það að Sjálfstæðisflokkurinn verði eini flokkurinn á þingi í dag sem hafi Akureyring í forystusæti. Vilji okkar flokksmanna hér blasir við öllum. Krafan er mjög áberandi um þetta.

Sigur Kristjáns Möllers í Norðausturkjördæmi og Gunnars Svavarssonar í Suðvesturkjördæmi í prófkjörum helgarinnar hjá Samfylkingunni eru athyglisverð, svo ekki sé meira sagt. Þar fara menn sem hafa með áberandi hætti talað fyrir stóriðju og stutt hana víða í orði og verki. Kristján var mikill baráttumaður fyrir Kárahnjúkavirkjun, rétt eins og Austfirðingurinn Einar Már, sem hélt sínu öðru sæti, og var frekar vandræðalegur þegar að umhverfisstefna flokksins, sem var úr hinu augljósasta gerviefni, var kynnt. Sigur Kristjáns er táknrænn og afgerandi. Það er allavega orðið ljóst að bæði eru KLM og Gunnar orðin ráðherraefni innan Samfylkingarinnar, þó að greinilega sé það ISG ekki gleðiefni.

Gunnar hefur í bæjarstjórn Hafnarfjarðar tekið afstöðu með stækkun Alcan í Straumsvík, enda er hann forseti bæjarstjórnar. Reyndar munu víst bæjarbúar hafa örlög málsins í höndum sér. En Gunnar er ekki andvígur stækkuninni. Það er ljóst að sigur hans á Þórunni Sveinbjarnardóttur í prófkjörinu er táknrænn og áberandi. Einkum og sér í lagi í ljósi þess að Þórunn var önnur þingmanna flokksins sem tók afstöðu með Kárahnjúkavirkjun. Hinn þingmaðurinn var Rannveig Guðmundsdóttir, fráfarandi leiðtogi flokksins í kjördæminu. Þórunn talaði í prófkjörsbaráttunni gegn stækkun Alcan. Hún var ótrúlega nærri því að sigra Hafnarfjarðaveldið um helgina. Gunnar er hinsvegar ekki með sterkt umboð sem leiðtogi.

Það væri áhugavert að heyra meira af því hvernig að Akureyringum innan Samfylkingarinnar líður. Miðað við nýjustu kannanir verður Lára Stefánsdóttir áfram varaþingmaður og Bensa Sig var hafnað, meira að segja af flokksfélögum í bænum, þó mjög þekktur sé og áberandi í bænum. Lára og Bensi sóttu að þingmönnum flokksins og urðu undir. Prófkjörið varð ósigur öflugra fulltrúa Akureyringa í prófkjörinu. Það er örugglega mikið spáð og spekúlerað þar. Björn Þorláksson sagði einmitt að það hefði slegið þögn á Akureyringana í Lárusarhúsi við fyrstu tölur á laugardaginn. Ekki er ég hissa á því, svo mikið er víst.