Áramótakveðja

Í þessari síðustu bloggfærslu minni á árinu 2008 vil ég færa lesendum vefsins og vinum mínum og kunningjum, nær og fjær, mínar innilegustu nýárskveðjur, með þakkir fyrir allt hið gamla og góða. Óska ég þeim farsældar á nýju ári og þakka þeim samfylgdina á árinu sem er að líða. Þeim sem ég hef kynnst á árinu vil ég þakka fyrir notaleg kynni.

Kærar þakkir fyrir allt hið góða. Hafið það gott á nýju ári - vonandi verður það okkur öllum gjöfult og gott!

nýárskveðjur frá Akureyri
Stefán Friðrik Stefánsson


Nú árið er liðið í aldanna skaut
og aldrei það kemur til baka,
nú gengin er sérhver þess gleði og þraut,
það gjörvallt er runnið á eilífðar braut,
en minning þess víst skal þó vaka.

En hvers er að minnast? Og hvað er það þá,
sem helst skal í minningu geyma?
Nú allt er á fljúgandi ferð liðið hjá,
það flestallt er horfið í gleymskunnar sjá.
En miskunnsemd Guðs má ei gleyma.

Hún birtist á vori sem vermandi sól,
sem vöxtur í sumarsins blíðum,
í næðingum haustsins sem skjöldur og skjól,
sem skínandi himinn og gleðirík jól
í vetrarins helkuldahríðum.

Hún birtist og reynist sem blessunarlind
á blíðunnar sólfagra degi,
hún birtist sem lækning við böli og synd,
hún birtist þó skærast sem frelsarans mynd,
er lýsir oss lífsins á vegi.

Nú Guði sé lof fyrir gleðilegt ár
og góðar og frjósamar tíðir,
og Guði sé lof, því að grædd urðu sár,
og Guði sé lof, því að dögg urðu tár.
Allt breyttist í blessun um síðir.

Ó, gef þú oss, Drottinn, enn gleðilegt ár
og góðar og blessaðar tíðir.
Gef himneska dögg gegnum harmanna tár,
gef himneskan frið fyrir lausnarans sár
og eilífan unað um síðir.

Valdimar Briem

Ofbeldi og skemmdarverk á Austurvelli

Ekki er hægt að túlka aðförina að Kryddsíld Stöðvar 2 öðruvísi en sem árás að lýðræðislegri umræðu í fjölmiðlum landsins. Engum er það til sóma að hafa beitt líkamlegu ofbeldi gagnvart starfsmönnum Stöðvar 2. Enn furðulegra er að sjá einhverja reyna að verja slíkt með vandræðalegum hætti, allt í nafni laugardagsmótmælanna á Austurvelli. Ef þessi skrílslæti eru framlenging á þeim mótmælum sem verið hafa á Austurvelli og Akureyri síðustu vikur er ekki nema von að spurt sé hvert stefni.

Skemmdarverkin á þættinum og eigum stöðvarinnar er fyrir neðan allt og þeim sem voru þarna til skammar. Þetta fór yfir öll mörk. Þegar farið er að snúa útsendingu fjölmiðla upp í skemmdir og ofbeldi er skotið yfir markið og ég held að þeir sem þarna voru hafi ekki grætt mikið á þessari lágkúrulegu framkomu.

Mér finnst sjálfsagt að fólk hafi skoðanir og tjái þær, geti líka mótmælt vilji það koma einhverju á framfæri. En þessi árás að sjónvarpsþætti var engum til sóma.

Fólk slasað eftir mótmæli

Kryddsíld Stöðvar 2 eyðilögð vegna skrílsláta

Mér finnst það mjög dapurlegt að skrílslætin á Austurvelli hafi orðið til þess að eyðileggja hina árlegu Kryddsíld Stöðvar 2. Þessi þáttur hefur verið vettvangur árlegs uppgjörs í þjóðmálum á Íslandi og vakið mikla athygli. Ég sá áðan á skjátexta að Stöð 2 hefur blásið þáttinn af þar sem tæki hafa verið skemmd fyrir stöðinni og komið í veg fyrir að Geir H. Haarde, forsætisráðherra, gæti komið í þáttinn.

Þessi skrílslæti eiga fátt skylt við málefnaleg mótmæli og ég skil eiginlega ekki tilganginn. Hvers vegna má Stöð 2 ekki halda sinn árlega áramótaþátt í friði og því mega forystumenn stjórnmálanna ekki hittast og fara yfir árið með þessum hætti? Hver er tilgangurinn?

Kryddsíld lokið vegna skemmdarverka

Bloggdóni tekinn úr umferð - ábyrgð á orðum

Mér finnst mjög lágkúrulegt að einhver hafi reynt að skrifa undir nafni Kristins H. Gunnarssonar, alþingismanns Frjálslynda flokksins, hér á bloggkerfinu. Slíka bloggdóna ber að stöðva, enda eiga þeir ekki að misnota nöfn annarra og reyna að telja öðrum trú um að þeir séu aðrir en þeir í raun og veru eru. Þeir eiga ekki að fá að sigla undir fölsku flaggi. Ég fékk bloggvinaboð frá viðkomandi einstaklingi í gærkvöldi en staðfesti það ekki, enda þótti mér skrifin af því tagi að augljóst væri að þar væri annar en Kristinn H.

Nú um áramótin taka gildi nýjar reglur í bloggsamfélaginu hér á blog.is. Með þeim er tryggt að ábyrgð fylgir orðum. Ekki er hægt að skrifa bloggfærslur í gegnum mbl.is eða forsíðuna á blog.is nema þar fylgi með nafn og vitað sé hver skrifar. Þetta er auðvitað eðlilegt og ætti ekki að koma nokkrum manni að óvörum. Orðum verða alltaf að fylgja ábyrgð.

Harkaleg framkoma - táknrænn gjörningur í Tali

Framkoma Teymismanna við Hermann Jónasson, fyrrum forstjóra Tals, er ansi harkaleg og óvægin. Allt er þetta gert því hann vildi ekki lúta valdi eigendanna og gerði samning við Símann um að viðskiptavinir Tals hefðu aðgang að dreifikerfi Símans, sem er stærsta dreifikerfi á Íslandi. Þetta þoldu tilteknir menn ekki og losuðu sig við Hermann. Er þetta ekki gott dæmi um það þegar hin kalda hönd sýnir vald sitt?

Mér finnst þessi framkoma þó mun frekar táknræn en merkileg. Þarna sést eigendavaldið í hnotskurn. Þeim sem fylgja því ekki er kastað út á kaldan klakann.

Sagt upp og samningi rift

Kynslóðaskipti með formannskjöri í Framsókn

Mér líst mjög vel á framboð Sigmundar Davíðs Gunnlaugssonar til formennsku í Framsóknarflokknum. Þar fer traustur ungur maður fram til forystu og ég yrði ekki hissa á því þó hann myndi standa uppi sem sigurvegari og leiða Framsóknarflokkinn inn í nýja tíma. Aðrir frambjóðendur um formennskuna eru líka menn nýrrar kynslóðar í pólitísku starfi. Ljóst er því að Framsóknarflokkurinn mun endurnýja sig á flokksþingi eftir hálfan mánuð og sækja fram til nýrra tíma.

Sögulegt fylgisafhroð Framsóknarflokksins í þingkosningunum fyrir tæpum tveimur árum var áfellisdómur yfir forystunni á Halldórstímanum. Nú er greinilegt að grasrótin í flokknum er að velta henni til hliðar og kallar eftir nýju fólki til forystu. Þetta hefur gerst á undraskömmum tíma, í raun eftir átakafundinn í miðstjórninni fyrir rúmum mánuði og þeir sem sátu þann fund sem forystumenn flokksins frá miðjum tíunda áratugnum hafa síðan vikið til hliðar og opnað fyrir uppstokkun.

Sumir tala um að formannskandidatarnir séu óreyndir og skorti þungavigt. Halldór Ásgrímsson var rétt rúmlega þrítugur þegar hann var orðinn varaformaður Framsóknarflokksins og tók að byggja sína stöðu til forystu innan flokksins. Hann varð ráðherra 36 ára gamall og enn tiltölulega nýr sem varaformaður og þá í raun krónprins. Miðað við það er ekkert óeðlilegt að ungir menn vilji forystusess. Þeir verða þá að byggja upp vigt sína og vinna sig upp í hlutverkið.

Þessi landsfundur og formannskosningin er í raun örlagapunktur í langri sögu Framsóknarflokksins. Annað hvort verður þar horft til framtíðar og sagt skilið við forna valdatíð eða hann heldur áfram að hníga og á sér enga framtíð. Þetta er því spurning um endalok eða nýju tímana. Því er ekki óeðlilegt að þeir sem gefið hafa kost á sér séu allir ungir og lausir við byrðar fortíðar.

Skilaboðin þar eru sennilega skýr, þau að klippt sé á Halldórstímann fyrir fullt og allt.

Sigmundur Davíð býður sig fram til formanns

Enginn vill verða sérlegur saksóknari

Ég verð að viðurkenna að ég varð svolítið undrandi á því að enginn sótti um stöðu sérstaks saksóknara í rannsókninni á bankahruninu. En kannski þarf maður ekki að vera hissa. Þetta er vægast sagt mjög óeigingjarnt verkefni og væntanlega bæði mjög flókið og erfitt í alla staði. Ég held að þeir séu fáir sem leggi í það verkefni að taka að sér svona nokkuð í því umhverfi sem blasir við í íslensku samfélagi nema þá að hafa nægt fjármagn á bakvið og traust bakland.

Þegar skipaður var sérstakur saksóknari í Baugsmálinu var ráðist mjög harkalega að þeim sem skipaður var og hann varð mjög umdeildur, allt að því vegið að persónu hans, æru og heiðri. Sá sem tekur þetta verkefni að sér þarf að hafa mjög sterk bein og bakland sem skiptir einhverju máli. Greinilegt er að enginn leggur í verkefnið á þessari stundu. Margt er að í samfélaginu og barnalegt að telja að einn maður geti svælt út við þessar aðstæður.

Þetta er hinn napri sannleikur málsins. Kannski spilar eignarhald fjölmiðlanna eitthvað inn í þetta? Niðurstaðan er einföld. Við verðum að fá erlenda aðila í þetta verkefni. Einhverja sem verða hafnir yfir allan vafa og geta tekið til hér massíft án þess að verða dregnir í svaðið á heimavelli.

Enginn sótti um embætti sérstaks saksóknara

Álitshnekkir fyrirliðans Gerrard

Þá hefur fótboltakappinn Steven Gerrard verið ákærður fyrir líkamsárás og gæti fengið allt að fimm ára refsingu. Afar ólíklegt telst að hann fái mjög þungan dóm. Helsta refsing hans gæti aðallega orðið álitshnekkir og vandræðaleg kynni við laganna verði. Gerrard hefur jú verið talinn táknmynd heilbrigðs lífsstíls og þótt vera strangheiðarlegur og rólegur að eðlisfari. Honum var t.d. falið að passa upp á fjörkálfinn Wayne Rooney í landsliðinu og hann væri til friðs.

Miðað við ákæruna og aðra dóma er ólíklegt Gerrard missi af mörgum leikjum vegna þessarar framkomu, en verði hinsvegar helst að horfast í augu við skaddað mannorð. Kannski er það eitt og sér mikil refsing fyrir mann sem talinn hefur verið strangheiðarlegur.

Gerrard gæti átt fimm ára fangelsi yfir höfði sér

Heiður að veði - stund sannleikans í bönkunum

Ég átti satt best að segja ekki von á öðru en Sigurður Einarsson og Hreiðar Már Sigurðsson myndu neita öllum sögusögnum um óeðlilegar eða ólöglegar millifærslur í Kaupþingi í aðdraganda bankahrunsins. Heiður þeirra er undir og auðvitað reyna þeir að verja hann. Þeir hafa þó að mörgu leyti þegar tapað þeim heiðri og virðingu sinni í umrótinu í hruninu. Reiði fólks í þeirra garð er mjög skiljanleg og allra annarra sem hafa spilað djarft og tekið þjóðina með sér í fallinu, saklaust fólk sem tók engan þátt í spilavítisleiknum.

Mikilvægt er að fá hið sanna fram í málinu, bæði til að hreinsa þá af grun sem eru sakaðir um alvarleg brot eða þá að fá það óyggjandi í ljós að orðrómurinn sé sannur. Leitin að sannleikanum er mjög mikilvæg hjá öllum bönkunum. Kortleggja allt sem gerðist og gera það opinbert. Engin þjóðarsátt verður við úrvinnsluna úr rústunum nema að byggð sé traust undirstaða og reynt að eyða allri tortryggni og efasemdum. Nóg er af þeim núna. Traustið er ekkert. Ég skil það líka mjög vel.

Stjórnvöld hafa ekki staðið sig nægilega vel í að eyða efasemdum og tortryggni en hafa enn tíma til stefnu áður en þau verða að fara í kosningar og gera öll mál síðustu mánaða upp í eitt skipti fyrir öll.

Engar ólögmætar færslur

Fótboltastjarna fellur af stallinum

Eiginlega er það alltaf svolítið sérstakt þegar stjörnur íþróttanna falla af stalli sínum og gera eitthvað til að skaða ímynd sína, strax í kjölfarið á íþróttaafreki. Steven Gerrard er sennilega enginn dýrlingur en handtakan á honum er örugglega ekki til að bæta ímynd hans í augum ungs fólks um víða veröld sem dýrkar hann og knattspyrnuliðið hans. Drykkjulæti og slagsmál eru ekki góð viðbót við boltatilveruna og mörkin hans tvö nokkrum klukkustundum fyrir atvikið á barnum.

En kannski er boltatilveran og sportið ekki fullkomið. Menn eru mannlegir þar eins og annars staðar þó reynt sé að draga upp mynd af því að hraustir menn þar séu hálfgoð.

Steven Gerrard handtekinn

Varnargrein án auðmýktar

Varnargrein Jóns Ásgeirs Jóhannessonar í Mogganum í dag er ekki mjög auðmjúk og einlæg - fjarri því í sannleika sagt. Þetta er vélrænn spuni í áttina að því að taka fólk með sér enn einn hring í blekkingunni sem var utan um útrásina og alla lykilþætti hnignunar Íslands sem við horfumst í augu við núna. Greinin er ekki síður varnargrein fyrir Baug, sem á mjög í vök að verjast og alls óvíst um hvað verði um fyrirtækið á næsta ári. Ég held samt að flestir hafi heyrt þessa varnarrullu áður og hafi satt best að segja fengið alveg nóg.

Fréttavefurinn AMX birtir góða grein um Baug um helgina. Þar er farið yfir stöðu fyrirtækisins og örlagaárið 2008 fyrir það og eigendurna. Ekki eru nema átta mánuðir liðnir síðan þeir skáluðu við Ólaf Ragnar Grímsson, forseta Íslands, á Bessastöðum. Hann hafði þá veitt fyrirtæki sem er ekki í útflutningsbransa hin margfrægu útflutningsverðlaun forsetaembættisins fyrir forystuhlutverk sitt og árangur í íslensku útrásinni, eins og það var víst orðað.

Eins og flestir vita situr dóttir forsetans, Guðrún Tinna, í stjórn Haga með feðgunum. Tengingin hefur svosem lengi verið augljós. Þetta er grein sem allir áhugamenn um bissness ættu að lesa. Kannski er líka rétt að mæla með grein Jóns Ásgeirs. Þessi grein er skólabókardæmi um afneitun og vélræna úttekt á miklum vanda, án þess að sá sem hana skrifar horfist í augu við að hann beri stóra ábyrgð á vandanum.

Jón Ásgeir tekur dóma nærri sér

Lélegt hjá Mogganum

Ég verð að segja það alveg eins og er sem áskrifandi Morgunblaðsins að mér finnst það mjög lélegt að blaðið komi ekki út fyrr en á morgun, eftir fimm daga jólaleyfi. Kannski væri annað ef þetta væri fríblað en þegar það er selt sem áskriftarblað er eðlilegt að áskrifendur spyrji sig hvort það sé rétt að borga fyrir blaðið við þessar aðstæður. Auðvitað má allsstaðar búast við sparnaði og það sést á mörgum fjölmiðlum nú að skorið er niður á öllum sviðum.

Hef reyndar spurt mig að því síðustu dagana hvort ég eigi að hætta að kaupa Moggann. Ég er reyndar að mestu hættur að lesa dagblöð og hef að gömlum vana keypt Moggann af og til frá árinu 1994. En kannski líður það undir lok eins og sumt annað.

Morgunblaðið kemur næst út á morgun

Bítlarnir brúa kynslóðabilið í tónlistinni

Bítlarnir höfðu mikil áhrif á tónlistarsöguna með verkum sínum á sjöunda áratugnum; heilluðu unga sem aldna þá og tónlist þeirra er sígild. Hef alltaf verið miklu meira fyrir Bítlana en Rolling Stones. Þó hinir síðarnefndu séu snillingar er eitthvað við verk Bítlanna sem er svo einstakt og traust að það á engan sinn líka í tónlistarsögu síðustu áratuga. Lögin eru sígild og þau verða jafnvel enn betri með árunum, eins og hið besta rauðvín.

Fannst mjög skemmtilegt að sjá klippuna á YouTube þar sem fjögurra ára snáði syngur Hey Jude af innlifun og áhuga. Og fólk fylgist með honum syngja þennan fjögurra áratuga tónlistarsmell sem Paul McCartney gerði ódauðlegan. Bítlalögin eru auðvitað einstök. Fannst það samt með því dapurlegra þegar að yfirráð yfir þessum tónlistarfjársjóði fór til söngvarans Micheals Jacksons og ég held að fleirum Bítlaaðdáendum en mér sárni það. Held þó að yfirráðum hans yfir lögunum ljúki brátt. Vona það allavega.

En snilldin minnkar ekki við það hver á þessi lög, enda eru þau hluti af sögunni og bera vitni mikilli snilld þeirra sem skipuðu hljómsveitina. Eitt er víst; Bítlarnir brúa kynslóðabilið í tónlistinni. Þessi fjögurra ára snáði frá Kóreu er gott dæmi um það.

Heimsfrægð á netinu

Fær fólk útrás við að sprengja útrásarvíkinga?

Ég hef oft hugleitt á áramótum hvað landsmenn borgi mikið fyrir flugeldaskothríðina - eigum örugglega met í þeirri eyðslu á höfðafjölda. Ljóst er nú að flugeldar hækka í verði um 40% frá síðustu áramótum og því fróðlegt að sjá hversu mikið selst núna og hvort minna verði sprengt upp en fyrir ári, þegar við slógum örugglega enn eitt metið. Mér fannst allavega flugeldaskothríðin í fyrra ansi vegleg.

Margir landsmenn hafa ekki haft efni á að taka þátt í útrásinni. Nú geta þeir þó fengið útrás á gamlársdag og sprengt upp útrásarvíkinga. Finnst þetta ansi fyndið og ágætis húmor. Ég man þá tíð að hægt var að kaupa flugelda fyrir eitthvað um tveim áratugum þar sem myndir af stjórnmálamönnum, að mig minnir í skopmyndateikningu Sigmunds Jóhannssonar, voru til sölu.

Mikið sport var að sprengja upp Ólaf Ragnar Grímsson og skal engan undra, enda þá skattmann og fjármálaráðherra. Fróðlegt að sjá hvort útrásarvíkingarnir slái í gegn í þessum bransi og landsmenn fái útrás á hatrinu í þeirra garð með þessu.

Bankamenn sprengdir

Mikilvægt að koma upp um alla bankaspillingu

Tíðindin um millifærslurnar frá Kaupþingi inn á erlenda bankareikninga koma sannarlega ekki að óvörum. Grunar að þau verði allnokkur málin þar sem við sjáum undarlegar millifærslur í aðdraganda bankahrunsins eða einhver óeðlileg vinnubrögð. Fyrst núna hefur maður loksins á tilfinningunni að rannsóknin í bönkunum sé alvöru en ekki spuni í áttina að því að blinda almenning algjörlega. Góðs viti það.

Mér finnst atburðarásin síðustu vikurnar því miður helst minna á að fela eigi slóð manna og reyna að láta sönnunargögn brenna inni. Heldur óþægilega leit það þannig út. Mörg spurningamerki eru í málinu og mikilvægt að almenningur finni að það er vakandi auga með atburðarásinni og ráðamenn muni leita sannleikans en ekki vera eins og flækjufótur fyrir rannsókninni.

Óvarlegt er að spá hversu margir lendi illa út úr slóð sannleikans í aðdraganda bankahrunsins. En það er fyrst og fremst mikilvægt að staðið verði við það að allt fari upp á borðið og við fáum alvöru úttekt og yfirferð á þessari sögu en ekki hvítþvott og sýndarmennskuúttekt á mikilvægum staðreyndum í skugga falls bankanna.

Rannsaka millifærslur

Íslenska ríkið vaknar af löngum Baugsblundi

Loksins berast fréttir af því að íslensk stjórnvöld hafi í hyggju að leita sér ráðlegginga varðandi umsvif Baugs í Bretlandi. Hvers vegna eru stjórnvöld hér fyrst nú að vakna af Baugsblundinum? Þetta hefði átt að gerast fyrir þónokkuð löngu síðan. Enda er ekki óvarlegt að ætla að sá sem eigi skuldir þessa verslunarrisa eigi fyrirtækið. Varla þarf bráðgáfað fólk í bissnesskreðsum til að átta sig á því.

En hvers vegna hefur þetta tekið svona langan tíma? Af hverju var ekki búið að taka þessa vinnu fyrir nokkrum mánuðum. Þetta eru jú eigur þjóðarinnar sem um er spilað. Vonandi er komið að sannleiksleik varðandi Baug. Hvers vegna gat það gerst að Baugur fékk þessa peningadóbíu lánaða frá Landsbankanum. Hver var ástæðan. Hverjir bera ábyrgð á þeim gjörningi. Allt á borðið takk. Hætta þessum feluleik!

Leita ráðgjafar vegna Baugs

Óheppilega orðað hjá Geir

Mér finnst ummæli Geirs H. Haarde, forsætisráðherra, um gjaldtöku í heilbrigðiskerfinu vægast sagt mjög óheppileg. Gjaldtakan er mikið áfall fyrir fjölda fólks eftir þau ár þegar allt lék í lyndi í samfélaginu og kemur illa við margar fjölskyldur. Þetta eru ekki góð skilaboð til fólks sem á mjög erfitt og horfist í augu jafnvel við mjög erfitt ár.

Á þessum tímum eiga forystumenn þjóðarinnar að tala frekar kraft og kjark í þjóðina frekar en gefa í skyn að auknar gjaldtökur fyrir skuldsetta þjóð komi sér vel eða hún geti tekið öllu sem að höndum ber.

Standa undir gjaldtöku

Skuggahliðar jólanna

Jólin, hátíð ljóss og friðar, eru í huga okkar flestra hátíð þar sem fólk kemur saman og gleðst - getur fagnað öllu því góða í lífinu. En á jólum erum við mörg minnt á fráfall náinna ættingja, einhvern vanti í hópinn. Sorg getur verið í hjarta yfir jólin, rétt eins og gleði. En vonandi geta allir fundið gleðina í sínu sálartetri og fundið ánægjuna í tilverunni.

Öll vonumst við eftir því að aðrir njóti hátíðarinnar líka með frið og ró í hjarta. En svo einföld er veröldin ekki að við hlustum og horfum á fréttir um hátíðirnar, sumar mjög sorglegar og aðrar mjög hversdagslegar af hörmungum eða óhugnanlegum atburðum. Ekki eru allir sem geta notið jólanna eða fundið frið í sálu sér þessa daga.

Fréttin af morðinu á Kanaríeyjum og sprengingunni í Úkraínu eru þær fréttir sem efst eru á baugi á fréttamiðlum á meðan hátíð ljóss og friðar gengur í garð og við njótum sælunnar í lífinu, alls hins góða. Ekki eru allir með frið í sínu hjarta og geta horft sælir fram á veginn.

Jólin eru eftir allt saman eins og hverjir aðrir dagar þegar hlustað er á fréttirnar. En við getum vonandi glaðst og hugsað að þetta séu dagar sem séu einstakir, þó ekki sé nema í hugarskoti okkar.

Kona barin til bana á Kanaríeyjum

Hátíðleg jólastund - Eartha og Santa Baby

Jólin hafa verið yndisleg og góð - sannkölluð hátíðarstund og algjör sælutíð. Á milli jólaboða hefur verið litið í bækur og horft á góðar kvikmyndir. Sérstaklega var gaman að sjá hina yndislegu mynd, Kjötborg, í kvöld. Því miður eru jólin snjólaus, snjórinn fór allur síðustu dagana fyrir hátíðina. Þau verða alltaf svolítið svipminni þannig en það á örugglega eftir að koma einhver snjór áður en jólin klárast. Vona að þið hafið öll átt notaleg jól.



Í dag kvaddi söngkonan og leikkonan Eartha Kitt. Hún hafði frábæra rödd og var einn af þeim skemmtikröftum sem gátu heillað alla fram í andlátið. Þurfti ekkert að hafa fyrir stjörnuljómanum og hafði allt sem stjarna þarf til að ná langt. Heillandi stórstjarna.

Jólalagið hennar, Santa Baby, er væntanlega hennar frægasta verk og hefur alltaf verið ómissandi í jólalagasafninu ár hvert. Viðeigandi að hlusta á þetta frábæra lag með hinni rámu rödd bandarísks skemmtanalífs.

Eartha Kitt látin

Jólakveðja

Ég færi lesendum vefsins, og vinum nær og fjær, innilegar óskir mínar um gleðilega og kærleiksríka jólahátíð. Hafið það öll sem best yfir hátíðirnar.

jólakveðjur frá Akureyri
Stefán Friðrik Stefánsson