Lýst eftir ungu fólki

Mér finnst það eiginlega orðið sláandi hversu algengt er orðið að auglýst sé eftir ungu fólki, flestu á aldrinum 13-17 ára. Eftir nokkra klukkutíma eða einhverra daga leit finnast krakkarnir eða koma sjálf heim oftast nær. Eflaust eru margar langar sögur á bakvið hvert tilfelli. En það er ekki hægt annað en hugsa aðeins þegar að það gerist að jafnvel fjöldi ungmenna hverfi á skömmum tíma og spyrja sig að því hvað sé eiginlega að gerast í samfélaginu, hvort að þau séu í einhverri ógæfu eða vilji hreinlega fara að heiman vissan tíma.

Svosem eru það engar nýjar fréttir að fólk hverfi. Stundum hefur eitthvað gerst, slys eða aðrar aðstæður, sem valda því að ungt fólk kemur ekki heim. Þegar að óregla eða ógæfa dynur yfir hefur það gerst að ungt fólk er komið í svo mikið öngstræti að það stingur af, lætur sig hverfa. Það er ekki nema von að spurningar um hvert tilfelli vakni. En mér finnst þetta farið að gerast svo oft, jafnvel að leitað sé dögum saman að ungu fólki.

Vonandi mun ganga vel að finna þessa stelpu. Hlýtur að vera skelfilegt að vera í þeirri stöðu að eiga ættingja sem finnst ekki og ekki er hægt að ná sambandi við. Gildir þá einu hverjar aðstæðurnar eru, enda er mjög óþægilegt og dapurlegt að eiga ástvin sem finnst ekki og það hlýtur að vera skelfilegt að horfast í augu við.

Lýst eftir stúlku

Í minningu dr. Bjarna Benediktssonar

Öld er í dag liðin frá fæðingu dr. Bjarna Benediktssonar, fyrrum forsætisráðherra og formanns Sjálfstæðisflokksins. Bjarni er sá stjórnmálamaður 20. aldarinnar sem er í mestum metum hjá mér. Hef ég aldrei farið leynt með aðdáun mína á stjórnmálamanninum Bjarna og stjórnmálastefnu hans sem varð meginstef Sjálfstæðisflokksins þann langa tíma sem hann starfaði í forystusveit hans.

Hef ég lesið margoft greinasafn hans, Land og lýðveldi, og jafnan þótt mikið til þess koma. Bjarni var arkitekt utanríkisstefnu Íslendinga og markaði söguleg áhrif í senn bæði á íslenskt samfélag og íslensk stjórnmál. Allir þeir sem kynna sér stjórnmálaferil dr. Bjarna komast fljótt að því hversu öflugur hann var.

Bjarni var sá forystumaður íslenskra stjórnmála á 20. öld sem hafði mest áhrif á að móta lýðveldinu Íslandi framtíðarstefnuna, færa Ísland fyrstu skrefin í átt að forystu í eigin málum og móta utanríkisstefnu landsins, sem hefur haldist að mestu óbreytt síðan. Sú forysta hefur skipt miklu máli og fer ekki á milli mála hversu afgerandi hún var.

Hef oft hugsað um það hver staða íslenskra stjórnmála hefði orðið á áttunda áratugnum hefði Bjarni lifað lengur. Sjálfstæðisflokkurinn gekk í gegnum erfiða tíma eftir fráfall hans og náði varla alvöru stöðugleika í sínum röðum fyrr en Davíð Oddsson var kjörinn formaður árið 1991. Átök stjórnmálanna á áttunda áratugnum, einkum innan Sjálfstæðisflokksins, hefðu tekið á sig annan blæ hefði Bjarni lifað lengur, tel ég.

Fyrir tæpum þrem árum, þegar að Samband ungra sjálfstæðismanna varð 75 ára, fórum við í þáverandi stjórn til Þingvalla og áttum góða stund í Hvannagjá, þar sem SUS var stofnað og lögðum blómsveig við minnisvarða um Bjarna, Sigríði og Benedikt litla, sem stendur á grunni forsætisráðherrabústaðarins. Heiðruðum við þar minningu eins af okkar traustustu leiðtogum fyrr og síðar.

Andlát Bjarna, Sigríðar og Benedikts var mikill harmleikur, ekki aðeins fyrir þá sem nærri þeim stóðu heldur og þjóðina alla. Þá kvaddi einn merkasti sonur þjóðarinnar á sínum hátindi. Alltaf þegar að ég fer til Þingvalla legg ég leið mína að minnisvarðanum. Er svolítið sérstök tilfinning sem fylgir því að koma þangað og hugleiða hversu sorglegir atburðir áttu sér þar stað.

Í dag afhentu afkomendur dr. Bjarna Benediktssonar Reykjavíkurborg einkaskjalasafn hans til varðveislu og borgarstjórinn í Reykjavík opnaði svo minningarvef um Bjarna, sem ég mæli með að allir líti á. Er það merkur minnisvarði um einn litríkasta stjórnmálamann landsins.

Skjalasafn Bjarna Benediktssonar afhent Borgarskjalasafninu

Aðalsteinn Jónsson látinn

Aðalsteinn Jónsson, útgerðarmaður á Eskifirði, er látinn, 86 ára að aldri. Alli markaði merk spor í sögu Eskifjarðar. Hann var guðfaðir byggðarinnar, sannur baráttumaður fólksins og hafði heill og hag þeirra að leiðarljósi fyrst og fremst í sinni atvinnuuppbyggingu

Ég vil eiginlega ekki hugsa um hvernig hefði farið fyrir Eskifirði án kraftsins og forystunnar sem einkenndi verk Aðalsteins í atvinnusögu Eskifjarðar. Allir sem þekkja til mála á Eskifirði vita að án hans væri staðurinn varla svipur hjá sjón. Traust forysta hans tryggði tækifæri á Eskifirði þegar að erfiðir tímar voru.

Aðalsteinn Jónsson leit alltaf á sig sem þjón fólksins. Hann fæddist fátækur, en reis upp til metorða með eigin dugnaði. Öllum ætti að vera hollt að kynna sér lífssögu hans í bókinni Lífið er lotterí eftir Ásgeir Jakobsson. Alli barðist áfram og byggði upp fyrirtæki sem hefur verið í fararbroddi á Eskifirði.

Saga fyrirtækisins var ekki alltaf dans á rósum, enda var ekki alltaf beinn og greiður vegur í stöðu mála í sjávarútveginum. Enginn einn maður hefur gert meira fyrir Eskifjörð og verk hans munu aldrei gleymast. Alli var einfaldlega traustur maður sem fólkið gat treyst, útgerðarmaður sem hugsaði fyrst um fólkið, svo sig og sinn hag.

Alli var einn af fólkinu. Hann var í góðu sambandi við verkafólkið; var sjálfur lengi sjómaður og byggði upp þetta fyrirtæki af ótrúlegri elju. Eitt af því sem skapaði fyrirtækið voru tengsl Alla við fólkið sem vann hjá honum. Þau litu á hann sem einn þeirra sem vann þar, aldrei sem auðugan mann sem var yfir aðra hafinn.

Þar liggur farsæld Aðalsteins Jónssonar sem útgerðarmanns og föður heillar byggðar. Hans verk er ómetanlegt og allir munu minnast hans með þeim hætti. Guð blessi minningu Alla.

Erfið sálfræðileg uppbygging á brotnum sálum

Eðlilegt er að sú spurning vakni hvernig hægt sé að bæta fólki upp að vera lokað í vítisholu í hálfan þriðja áratug án dagsljóss og frelsis. Þær sálir sem það upplifa hljóta að vera brotnar og þurfa allsherjar uppbyggingu, til þess eins að horfast í augu við hversdaginn og mannlífið, sem það hefur farið algjörlega á mis við. Verkefnið sem blasir við í Austurríki er að byggja upp líf í hinum brotnu sálum fórnarlamba blóðskammar Fritzl-fjölskyldunnar.

Sálfræðilega er mál Fritzl-fjölskyldunnar mjög mikilvægt. Um er að ræða stórfrétt, enda er þetta mál harmleikur í alla staði og merkilegt rannsóknarefni. Ekki eru mörg dæmi um svo skelfilega misnotkun innan fjölskyldu á síðustu áratugum og jafnvel alla tíð, einkum vegna þess hversu lengi það stóð. Allavega er þetta mál sem hefur vakið heimsathygli og spurningar um hversu lengi það taki að byggja upp svo mikinn skaða.

Pressan lýsir Fritzl sem djöfli í mannsmynd. Eðlilega. Hann hefur verið dæmdur af allri heimsbyggðinni vegna sinna viðurstyggilegu verka. Ekki munu næstu skref aðeins snúast um að koma fjölskyldu hans, dóttur og börnunum sem hún eignaðist í kynlífsdrottnun undir stjórn föður síns, út í samfélagið, heldur líka að sálgreina gerandann. 

Sálfræðilega er mikilvægt að skyggnast inn í svo sýktan huga; fá svör við spurningunum áleitnu og átta sig á því afli sem knúði hann í þennan blekkingarleik og misnotkun á eigin barni. Í gær var sálfræðingur í Kastljósi sem ræddi þessi mál. Hann talaði um mörg mál sem viðmiðun en hafði samt ekkert mál sem dæmi um nákvæmlega þetta.

Sennilega verður það stóra málið þegar að róast yfir málinu að fara yfir sálfræðilegu hliðarnar. Eftir hálfan þriðja áratug án dagsljóssins hlýtur að þurfa mikið verk til að gefa fólki úr svo sorglegri vítiseinangrun annað líf. Við tekur annað líf, enda fer konan brotin út í annað samfélag en hún upplifði fyrir löngu síðan.

Og hvernig er hægt að færa afkomendur blóðskammarinnar lífið, sum eru um tvítugt fyrst að upplifa lífið. Áleitin viðfangsefni blasa við til að gefa þolendum tækifæri til að upplifa það líf sem við teljum sjálfsagðast af öllu í veröldinni.

Endurfundir Fritzl-barnanna

Obama afneitar öfgaklerkinum - skaðinn er skeður

Mér fannst það algjör aumingjaskapur hjá Barack Obama að afneita ekki öfgaklerkinum sínum, Jeremiah Wright, þegar að upp komst um boðskap hans og hann gat fjarlægt sig honum. Nú er sá tímapunktur kominn að klerkurinn er að leggja framboðið í rúst með yfirlýsingum sínum. Seint og um síðir hefur Obama nú vísað klerkinum úr sínu lífi og reynir að aftengja þann skaða sem orðið hefur. Tel að einum of seint sé að afneita honum núna. Skaðinn er skeður.

Stóri vandi Obama nú er einmitt sá að klerkurinn er stjórnlaus og lætur sömu öfgarnar, trúar- og kynþáttaöfgar, flakka í viðtölum og predikunum æ ofan í æ. Í hvert skipti sem klerkurinn talar úr þessu vita allir að Obama sneri ekki baki við honum í upphafi - hann virti klerkinn og dáði, mætti auk þess með konu og börn í messur til hans.

Erfitt er að aftengja þennan skaða með sóma nú, enda virkar eins og Obama vilji fara auðveldu leiðina út í megaklúðri, og klippa á þessa tengingu, eftir að hafa náð góðu tækifæri til að gera það áður. Lykiltækifærið til þess gafst þegar að predikanir hans láku á netið og vitnað var í boðskapinn. Í staðinn hélt Obama ræðu og reyndi að afsaka klerkinn.

Yfirlýsingar klerksins eru skaðlegar og tengingin við hann er mjög eldfim. Enn hefur Obama ekki náð útnefningunni og honum hefur mistekist að heilla alþýðufylkingarnar í flokknum, sem hefur hallað sér að Hillary. Þetta er pólitískt stórslys fyrir Obama á viðkvæmum tímapunkti og spurt hversu mikill skaðinn muni verða er á hólminn kemur.

Kannanir sýna nú að Obama er að missa flugið. Hillary hefur styrkt stöðu sína síðustu þrjár vikurnar og aukið fylgi sitt í lykilfylkjum og á landsvísu. Þau eru nú jöfn í landskönnunum. Alvarlegustu tíðindin fyrir Obama er að Hillary hefur nú meiri möguleika á að sigra McCain samkvæmt nýjustu könnunum.

Fjölmargir ofurfulltrúar hafa ekki enn tekið afstöðu til forsetaefnanna í þessu langvinna einvígi. Þeir munu ráða úrslitum í útnefningaslagnum, enda ljóst fyrir nokkru að enginn sigurvegari verður í forkosningaferlinu. Þar verður horft til þess hverjir geti sigrað lykilfylkin og náð til alþýðufólksins.

Obama hefur gert mikil mistök síðustu vikurnar. Hefði allt verið með felldu hefði hann náð útnefningunni áður en hefur sjálfur skemmt fyrir sér. Með fulla vasa fjár hefur honum mistekist að tryggja sér útnefninguna traust og afgerandi. Ástæður þess verða sífellt augljósari.

Obama snýr baki við prestinum sínum

Þrumufleygur hjá Scholes - tjallaslagur í Moskvu

Var alveg stórglæsilegt að sjá Manchester United slá út Barcelona í Evrópubikarnum á heimavelli á Old Trafford í kvöld og komast í úrslitaleikinn í fyrsta skiptið frá því að þeir unnu bikarinn fyrir áratug. Markið hans Scholes var auðvitað algjör þrumufleygur, sannkölluð snilld og unun á að horfa. 

Nú er ljóst að í fyrsta skiptið í sögu Evrópukeppninnar munu tvö bresk knattspyrnulið berjast um bikarinn. Á morgun ræðst hvort Liverpool eða Chelsea mæta Man Utd. Megi betra liðið sigra. Vona auðvitað að Liverpool nái að sigra, enda gaman að fá slag þessara tveggja stórvelda, sem hafa eldað grátt silfur í gegnum tíðina, um Evrópubikarinn.

Held að fáir hefðu veðjað á í upphafi keppninnar í vetur að það yrði tjallaslagur í Moskvu í maímánuði. Allavega sögulegur og vonandi fínn leikur framundan, hvernig sem fer á morgun. Allt topplið. Ef Chelsea vinnur á morgun er auðvitað framundan skemmtileg rimma milli liðanna um bæði titilinn heima og í Evrópu.

Scholes skaut Man Utd til Moskvu

Sveðju-Plank framseldur til Póllands

Ég tel að það sé rétt ákvörðun hjá Birni Bjarnasyni, dómsmálaráðherra að framselja hinn meinta pólska sveðjumorðingja Premyslaw Plank til síns heimalands. Eðlilegast er að hann verði dreginn fyrir dóm þar vegna þeirra glæpa sem hann er sakaður um.

Fulltrúi saksóknara í Póllandi segist hafa óyggjandi sannanir um sekt Planks í sveðjumorðinu margumtalaða. Þar er því haldið fram að Plank sé vægðarlaus sérfræðingur hjá glæpaklíku ytra og hafi verið leigumorðingi þeirra, alveg vægðarlaus hrotti. Það er greinilegt að þeir virðast hafa nokkuð traust mál á hendur honum.

Þetta mál með Plank minnir einna helst á atburðarás í svæsinni bandarískri glæpamynd. Þetta er ekki veruleiki sem ég tel að við viljum hér og það er afleitt ef Ísland er að breytast í einhvern griðastað fyrir erlent glæpafólk.

Framseldur til Póllands

Sofandagangur yfirvalda - einangruð vítishola

Eftir því sem meira er fjallað um hryllingshúsið og austurrísku blóðskömmina verður sífellt undarlegra að engar viðvörunarbjöllur skyldu klingja hjá yfirvöldum. Nú er ljóst að Fritzl er dæmdur kynferðisafbrotamaður og þekktur ofstopamaður. Þrátt fyrir það var ekki kannað betur aðstæður á sjálfu heimilinu þegar að dóttirin hvarf, ekki heldur þegar að börnum fjölgaði á heimilinu.

Finnst þetta mál, eftir því sem meira kemur í ljós, vera áfellisdómur yfir þeim sem rannsökuðu málið og áttu að kveikja á perunni vegna veigamikilla staðreynda um Fritzl og heimilisaðstæður hans, auk þess karaktereinkenni hans og fyrri afbrot. Fritzl faldi svo vel slóð sína að enginn gat komist í kjallarann nema hann, enda með rammgerðan lás með sérvöldu leyniorði til að komast niður hina litlu holu.

Mun kjallarinn vera svo rammgerður að ekki heyrðust grátur eða öskur þaðan upp á efri hæðir hússins og því var dóttirin algjörlega á valdi hans. Barátta við hann var því allt að því tilgangslaus. Hún varð því að hafa hann góðan. Þvílíkt ógeð. Þessi kona var lifandi dauð í 24 ár, enda hvers virði er lífið án dagsljóss og lífsneista. Allur lífsvilji hlýtur að deyja í svona vítisholu.

Hótaði börnum sínum dauða í kjallaranum

Halldórsarmurinn berst fyrir ESB-aðild í Framsókn

Grein Jóns Sigurðssonar, fyrrum viðskiptaráðherra og formanns Framsóknarflokksins, þar sem hann hvetur til þess að Ísland sæki um aðild að Evrópusambandinu sýnir vel að Halldórsarmurinn í flokknum, undir forystu Valgerðar Sverrisdóttur, ætlar að setja málið á dagskrá og berjast fyrir því af alvöru á næstunni. Ekki hefur farið á milli mála að Guðni Ágústsson, formaður Framsóknarflokksins, hefur leitt harða andstöðu við ESB nú, og áður í formannstíð Jóns og Halldórs Ásgrímssonar.

Vakið hefur mikla athygli hvað Valgerður hefur talað afgerandi fyrir ESB-aðild, þvert á allt sem formaðurinn segir. Þetta sýnir andstæðurnar í forystusveitinni og hreina andstöðupóla sem hljóta um leið að flokkast sem átakapólar um valdasess í flokknum. Ef Evrópumálin verða sett á dagskrá innan Framsóknarflokksins má enda búast við miklum átökum. Á flokksþingi Framsóknarflokksins árið 2005 var hart tekist á um afstöðuna til Evrópusambandsins - Guðni og Halldór börðust hatrammlega fyrir opnum tjöldum um hversu langt ætti að ganga. Niðurstaðan varð málamiðlun.

Ekki ber að vanmeta afstöðu Jóns. Greinaskrif hans í dag eru mjög sterk skilaboð um að reyna mun á málið innan skamms. Innan við ár er síðan að Jón lét af formennsku í flokknum. Hann sat ekki það lengi sem formaður að reyndi virkilega á Evrópumálin undir forystu hans. Er á hólminn kom varð Jón mun hógværari í afstöðu sinni en Halldór, sem í forsætisráðherratíð sinni spáði að Ísland yrði komið í ESB eftir sjö ár, árið 2015. Valgerður hefur með afgerandi Evrópuforystu sinni innan Framsóknarflokksins tryggt að málið verður rætt fyrr en síðar. Hún talar ekki svona nema vegna þess að hún er viss um að reyna mun á málið fljótlega, sem og blasir við.

Staða Framsóknarflokksins er veik um þessar mundir. Hann hefur ekki náð sér á strik í stjórnarandstöðu undir forystu Guðna Ágústssonar síðasta árið og eðlilega er spurt um hversu sterk pólitísk staða hans er. Það ræðst á flokksþingi að ári. Fylkingamyndanir um Evrópusambandið gætu leitt til átaka um formennsku í flokknum. Halldór Ásgrímsson sætti sig ekki við Guðna sem eftirmann sinn fyrir tæpum tveim árum og lagði lykkju á leið sína til að sækja Jón í Seðlabankann, því hann taldi hann eina manninn sem gæti sigrað Guðna. Fullyrða má að traustið á Guðna hefur ekki aukist í þeim herbúðum eftir að hann tók við af Jóni, sem mistókst að ná kjöri á þing.

Stóra spurningin er hvort að Valgerður Sverrisdóttir fylgi eftir tæpitungulausum ummælum sínum um Evrópusambandið með formannsframboði að ári. Öllum er ljóst að Guðni Ágústsson mun sem formaður Framsóknarflokksins ekki leiða flokkinn í Evrópuátt, þó að nýleg könnun hafi sýnt að meirihluti kjósendanna styðji aðildarviðræður. Nýji Evróputónninn hennar Valgerðar er boðberi um að hún ætli að taka frumkvæðið innan flokksins, sýna forystu og myndugleika á meðan að formaðurinn bíður.

Átökin um Evrópusambandið verða án vafa stærstu átökin innan Framsóknarflokksins áratugum saman og bliknar átökin um formennsku Halldórs Ásgrímssonar væntanlega í samanburði. Afstaða formannsins mun ráða hvernig sá slagur verði á næstunni. Greinaskrif og tæpitungulaus ummæli þeirra sem standa næst Halldóri Ásgrímssyni, sem spáði ESB-aðild innan nokkurra ára, boða þau tíðindi að reyna muni á málið fyrr en síðar.

Væntanlega glottir sá vel við tönn sem situr nú á friðarstóli í Kaupmannahöfn. Enda munu þau átök verða um forystusess í Framsóknarflokknum ef formaðurinn tekur ekki skrefið með þeim sem pressa á málið nú.

Tímabært að sækja um ESB-aðild

Austurrískur óhugnaður

Blóðskömmin óhugnanlega í Austurríki hefur eðlilega vakið heimsathygli. Var að horfa á bresku fréttaumfjöllunina um málið. Nú er verið að púsla saman helstu karaktereinkennum hins brenglaða manns að baki þessum verknaði. Verst af öllu er sennilega að maðurinn reyni að halda því fram að dóttirin hafi viljað upplifa þennan óhugnað og hann hafi ekki beitt hana valdi.

Allt viti borið fólk sér að hann drottnaði yfir henni og neyddi hana til vistar í kjallara þar sem hún sá ekki dagsljós í hálfan þriðja áratug. Eitt og sér er slík frelsissvipting svo alvarlegt mál að engar málsbætur geta nokkru sinni varið það. Kynferðislega misnotkunin er skelfileg og getur enginn ímyndað sér, varla brotabrot af því hvernig það hefur farið með þessa konu. Þetta er sorinn í sinni verstu mynd.

Sá áðan brot af viðtali við lögregluforingjann sem stýrir rannsókninni. Hann segir þetta versta mál sitt á þriggja áratuga starfsferli, sé mun verra en morð og svæsnustu líkamsárásir. Enda er þessi meðferð á konunni ígildi morðs, þar sem tekið er í raun lífið frá henni. Svona mál hafa verið dekkuð í mörgum kvikmyndum og bókum, en þetta toppar allt. Slík blóðskömm er sorglegur harmleikur á okkar dögum.

Var áhugavert að sjá viðtalið við Gunnar Hrafn Birgisson, sálfræðing, í Kastljósi í kvöld þar sem hann fór heilsteypt og ítarlega yfir þetta sorglega mál. Mæli eindregið með að allir líti á það.

Segist ekki hafa beitt valdi

Ógeðið í hryllingshúsinu

Fjölmiðlar eru nú, eðlilega, farnir að nefna húsið þar sem Josef Fritzl hélt dóttur sinni fanginni í hálfan þriðja áratug hryllingshúsið. Var að skoða fréttamyndirnar úr þessum kjallara sem dóttirin varð að dúsa í allan þennan tíma. Hvorki hún né börnin sáu dagsljós allan þennan tíma og voru svipt lífinu - eru nú fyrst að kynnast lífinu utan þessarar vítisholu.

Þetta er virkilega sorglegt mál. Held að flestir spyrji sig að því hverskonar bilun hafi gert manninn svo trylltan að gera dóttur sinni þetta. Þetta er geðveiki af skelfilegri sort. Austurrísk yfirvöld tala um einn versta glæp í sögu þjóðarinnar. Eðlilega.

Þetta er svo mikill harmleikur að fá dæmi eru um annað eins á okkar dögum. Þetta er mun verra en nokkru sinni morð.

Píslarvættið í hryllingshúsinu

Gasið slær í gegn

Sennilega þarf það ekki að koma að óvörum að gas-viðvörunarhróp lögreglunnar við Rauðavatn hafi slegið í gegn og sé kominn út sem hringitónn. Hversu margir ætlu sé með þetta á símanum sínum?

Nú hafa rappararnir í Rottweiler gert lag um mótmælin stjórnlausu við Rauðavatn í síðustu viku og þar er einmitt gasið notað sem viðlag, nema hvað.

Meiri áhugi virðist vera á gasummælunum en flestum óraði fyrir daginn sem lætin voru við Rauðavatn. En á móti kemur að þetta gerist sjaldan.

Hefur verið mikill misskilningur um þessi gashróp, en þetta er auðvitað standard-aðgerð til að gefa fólki tækifæri til að bregðast við gasinu.

Spennandi að sjá hvort að þetta verði vinsælasti hringitónn ársins.

Gas! Hringitónn slær í gegn

Svívirðileg blóðskömm í Austurríki

Eðlilega líkja fjölmiðlar um allan heim hinni svívirðilegu blóðskömm í bænum Amstetten í Austurríki við annað frægt mál í Austurríki, hvarf Natöschu Kampusch, sem slapp fyrir tveim árum úr haldi mannræningja sem hafði misnotað hana. En þetta mál er mun alvarlegra, enda blóðskömm. Faðir misnotar dóttur sína, á með henni fjölda barna og eyðileggur líf þeirra allra með gjörðum sínum.

Þetta er með ógeðslegri málum í langan tíma. Eðlilega er spurt hvernig þetta gat gengið í hálfan þriðja áratug. Með miklum feluleik var það hægt, en samt er þetta svo óraunverulegt og sorglegt mál að fólk er gapandi hissa. Að svona geti gerst í nútímanum og sérstaklega þetta lengi er skelfilegasta hlið málsins. Misnotkunin og einangrunin sem þessi kona hefur orðið fyrir er svo rosaleg að hún mun aldrei bera þess bætur.

Eitt er fyrir saklaust barn að lenda í svona aðstæðum með ókunnugu fólki, sem er vitfirrt og fer sínu fram meðan að leit fer fram, en það að foreldri fari svona með eigið barn er viðurstyggilegt. Eitt af því sem sló mig mest í gær var að birtar voru myndir af manninum en augun voru falin. Þótti ekki rétt að sýna hver hefði gert þetta og nafngreina hann. Nú hefur verið bætt úr því og myndir af þessum ógeðslega föður eru á fréttavefum um allan heim. Enda á ekki að leyna því hver þetta er og auðvitað átti að sýna strax myndir af manninum.

Samlíkingin við Kampusch-málið nær upp að því marki að barn er svipt lífsmöguleikum sínum og neydd í kynferðislega ánauð. En þarna er farið mun lengra og þetta er mun meira sláandi og ógeðslegt mál. Og greinilegt er að þetta er mikið áfall fyrir austurrískt samfélag. Að tvö svona alvarleg mál eigi sér stað í friðsælu evrópsku landi á innan við tveim árum er dapurleg staðreynd.

Austurríkismaður viðurkennir brot sín

Fámenni hjá Sturlu - byrjað á vitlausum enda?

Ekki voru þeir nú margir sem studdu málstað Sturlu Jónssonar og bílstjóranna með því að labba með talsmanninum frá húsi verslunarinnar til Austurvallar í dag. Held að bílstjórarnir séu búnir að missa stuðning meginþorra þjóðarinnar á síðustu dögum. Sennilega hafði hasarinn á Kirkjusandi á sumardaginn fyrsta mestu áhrifin á hvernig komið er.

Held að bílstjórarnir hafi byrjað á vitlausum enda í mótmælum sínum. Hefðu þeir byrjað með einmitt svona týpu af mótmælum, löglegum fyrir það fyrsta, eins og Sturla var með í dag hefðu þeir náð meiri árangri; verið markvissari, yfirvegaðri og náð einhverjum stuðningi. Þeir höfðu sennilega mjög mikinn stuðning í upphafi en mistök talsmannsins og þeirra sem næst honum stóðu höfðu fljótt þau áhrif að landsmenn voru argir yfir að vera fastir í biðröð og þeir gengu einfaldlega of langt.

Í dag virkaði þetta eins og einn maður væri að mótmæla, maður án stuðnings, einkum almennings. Þetta var allavega mjög einmanalegt. Þetta hefur verið viðburðarík vika, hennar verður sennilega minnst sem vikunnar þegar að bílstjórarnir misstu stuðning almennings. Einvera Sturlu, með örfáa á eftir sér í göngunni verður táknræn fyrir það hvað hann var einmana.

Sturla: Ég berst fyrir ykkur

Óhugnaður í Austurríki

Mikil sorgarsaga er að afhjúpast nú í bænum Amstetten í Austurríki. Faðir hélt þar dóttur sinni fanginni í kjallara í hálfan þriðja áratug og átti með henni sjö börn. Eðlilegt er að spurt sé hvernig þetta hafi getað staðið svo lengi. Mér skilst að stelpan hafi verið talin týnd frá árinu 1984 og hún hafi verið talin af árum saman og þar séu helstu ástæður þess að ekki hafi verið leitað betur að henni. Er þessi saga reyndar svo ótrúleg að það hefur helst minnst á súrrealisma að sjá fréttir af þessu á bresku fréttastöðvunum.

Virðist föðurnum hafa tekist með miklum brögðum að halda öllu leyndu þar til nýlega að eitt af börnunum sjö þurfti á sjúkrahús. Er eiginlega með ólíkindum að svona geti gerst í nútímanum. Held að þetta sé með skelfilegri málum þar sem fólki er haldið föngnu og fær ekki að lifa eðlilegu lífi. Þarna er þó faðir að halda dóttur sinni, á með henni börn og hefur framið alvarlega glæpi, ekki aðeins einn heldur mun fleiri, sem verða væntanlega lengi í minnum hafðir.

Þetta lýsir auðvitað einhvers konar bilun og vitfirringu af verstu sort, enda er þetta hreinn óhugnaður. Vekur alltaf athygli kastljóss fjölmiðla þegar að fólk er heimt úr helju eftir áralanga vist sem fangi einhvers. Þetta málist virðist þó hreinlega einstakt að svo mörgu leyti - skelfilegt mál í alla staði.

Lokaði dóttur sína inni í 24 ár

Bíllausi dagurinn hans Sturlu

Bíllaus er Sturla Jónsson nú á hálfgerðri eyðimerkurgöngu um götur Reykjavíkur með boðskap sinn. Þetta er bíllausi dagurinn hans. Veit ekki hverju hann telur sig áorka með þessari gönguferð en sjálfsagt er fyrir hann að reyna að tala sínu máli ef hann telur þetta réttu aðferðina fyrir því að vekja athygli á honum. Sennilega er það þó gáfulegra en að blokkera umferð á götum borgarinnar.

Þetta var vond vika fyrir bílstjórana. Held að allir sjái það, ekki síður bílstjórarnir en almenningur allur. Hef farið yfir stöðu þeirra mála hér í síðustu færslu. Málstaður þeirra og staða er stórlega sködduð. Þeir gerðu alvarleg mistök í baráttuherferð sinni, fóru verst allra sjálfir með málstaðinn sem þeir trúðu á og Sturla hefur komið mjög illa fyrir sem talsmaður þessa hóps. Ber mikla ábyrgð á því hvernig komið er fyrir þeim.

Sturla hefur meira að segja opnað moggablogg til að reyna að ná til okkar allra, bloggaranna jafnt og landsmanna allra. Heldur er það samt holur boðskapur í heildina. Enda sést það vel að hann áttar sig á mistökum sínum síðustu dagana. Erfitt er þó að gleyma því og sennilega er þessi gönguferð einhver leið til þess að byggja upp baráttuna. Efast um að það beri mikinn árangur. Þeir fengu vissa samúðarbylgju fyrst. Þeir sendu út statement um stöðu sína og náðu athygli en höfðu ekki kraft og klókindi til að fara með þá baráttu alla leið.

Held að engum hópi með kröfur gegn ríkinu hafi áður tekist að klúðra sínum málum jafn illa og bílstjórunum í þessari viku. Þetta vita allir. Staðreynd mála bara. Þessi ganga um stræti borgarinnar mun ekki breyta því að ríkisvaldið mun ekki tala við þá um kröfur sínar og baráttumál. Einfaldlega vegna þess að þeim tókst ekki að ná samstöðu með þjóðinni - fóru fram úr sér og verða víst að bíta úr nálinni með það.

Bílstjóri í mótmælagöngu

Snautleg afsökun á ofbeldinu á Kirkjusandi

Ekki er hægt að segja annað en að yfirlýsing Ágústs Fylkissonar, sem réðst á lögregluþjóninn á Kirkjusandi á sumardaginn fyrsta, sé snautleg afsökun á ofbeldisverkinu. Staðreynd mála er að hann réðst að tilefnislausu á lögregluþjón og hefur sér engar málsbætur vegna þess. Miðað við frásagnir hafði hann haft litla stjórn á sér fyrir þetta atvik og var eins og eldibrandur á svæðinu. Vildu ekki einu sinni félagar hans kannast við hann, t.d. talsmaðurinn Sturla.

Eðlilegt er að Ágúst vilji reyna að bæta fyrir þessi mistök sín og reyna að svara fyrir sig. Það er þó oft erfitt þegar að engar eru málsbæturnar og afsökunarbeiðnin er hol í gegn. Finnst þetta frekar innantóm yfirlýsing, sett fram til þess eins að reyna að laga ásýnd sína í fjölmiðlum, en skiljanlega hefur þetta atvik eitt og sér gert út af við bílstjórabaráttuna miklu, fyrir utan öll önnur mistök þessa hóps, og gert það að verkum að samúð almennings við bílstjórana er meira og minna gufuð upp.

Sennilega var það dapurlegast af því öllu að Sturla Jónsson vildi ekki kannast við Ágúst á vettvangi en sagði samt í sömu andrá að maðurinn væri nýkominn úr hnéaðgerð. Sennilega er þetta eitt fyndnasta augnablik vikunnar rétt eins og þessi tilefnislausa líkamsárás á lögregluþjón er með þeim sorglegri. Ágúst má þó eiga það að hann sendir frá sér yfirlýsingu og er ekki alls varnað. En það vantar innilegheitin í yfirlýsinga. Það er eitthvað við þessa yfirlýsingu sem hljómar ekki heilt í gegn og ég held að allir sem lesi þetta finni það vel að innilegheitin vantar, því miður.

Öll þessi vika hefur verið dapurleg fyrir bílstjórana. Þeim tókst að klára sín mótmæli af algjörlega af eigin völdum og gera út af við alla möguleika á því að stjórnvöld töluðu við þá. Ferðin til Bessastaða, ruglið við Rauðavatn og þetta ofbeldi á Kirkjusandi, fyrir utan talsmanninn afspyrnuslaka hjálpast allt saman í vonda heildarmynd sem enginn gleymir. Og barátta bílstjóranna er því miður runnin út í sandinn, hafi hún einhvern tímann verið trúverðug.

Missti stjórn á skapi sínu

Sættir á milli Ólafs F. og Spaugstofunnar

Var gaman að sjá Ólaf F. Magnússon, borgarstjóra, og Spaugstofuna sættast í síðasta þætti vetrarins í kvöld þar sem Ólafur F. fékk "andlitið sitt" aftur en hann hefur verið sýndur blörraður í þættinum frá því að deilurnar stóðu um grínið um borgarstjórann í janúar. Þá var gert grín að geðheilsu hans er hann tók við embætti og varð grínið mjög umdeilt og fátt um meira rætt þá í bloggheimum.

Spaugstofan kvaddi reyndar með svolítið sérstökum þætti. Þar var Spaugstofan svolítið að biðjast afsökunar á húmor vetrarins og fengu þeir reyndar þekkta einstaklinga sem þeir hafa verið að grínast með í vetur til að taka þátt í herlegheitunum og voru allir sennilega að gera grín að sjálfum sér, ekkert síður Spaugstofumenn en gestirnir. Sérstaklega fyndin atriðin með Össuri, Birni Inga og Vilhjálmi Þ.

Mér skilst að Spaugstofan hafi ákveðið að næsti vetur verði þeirra síðasti á skjánum. Þeir eiga tuttugu ára afmæli með þáttinn á næsta vetri og viðeigandi fyrir þá að hætta á þeim tímamótum. Þó að Spaugstofan hafi stundum verið gloppótt verður því ekki neitað að þeir hafa leikið lykilhlutverk í grínsögu landsins. Hafa séð um þáttinn í tvo áratugi og haldið dampi í gegnum góða tíma og slæma. Ekki alltaf verið sammála gríninu þeirra, enda er aldrei hægt að hlæja svosem að öllu.

Allavega er gott að vita að Ólafur F. og Spaugstofan halda sáttir frá grínvetri þeirra síðarnefndu og hafa samið frið. Væntanlega verður þá Ólafur F. varla blörraður næsta vetur. Eða hvað?

Hvassar skeytasendingar milli Árna og Gunnars

Hvöss orð ganga nú á milli Gunnars Gunnarssonar, aðstoðarvegamálastjóra, og Árna Johnsen, alþingismanns, og hefur Gunnar ákveðið að kæra Árna fyrir ærumeiðingar í Morgunblaðsgrein í morgun. Það er orðið langt síðan að ég hef séð jafn harðorða yfirlýsingu gegn kjörnum fulltrúa og Gunnar beinir til Árna eftir þessi greinaskrif. Segir hann Árna vera Sjálfstæðisflokknum og þjóðinni til skammar.

Hef í sjálfu sér aldrei farið leynt með að ég vildi ekki Árna í þingframboð á síðasta ári. Fannst það rangt að hann færi aftur í framboð eftir alvarleg lögbrot sín fyrir nokkrum árum. Fannst það hvorki honum né Sjálfstæðisflokknum til góða. Fór meira að segja í viðtal á Stöð 2 til að tala gegn þingframboðinu eftir ítarleg bloggskrif. Er enn sömu skoðunar og finnst ekkert hafa breyst í þeim efnum að afleitt hafi verið að Árni hafi aftur farið á þing.

Enda sýnist mér það hafa sannast af því að Árna hefur ekki verið treyst fyrir trúnaðarstörfum innan flokksins, eftir að flokksmenn í Suðurkjördæmi völdu hann á þing, þó þeir hafi reyndar lækkað hann um sæti með útstrikunum á kjördegi og veikt pólitíska stöðu hans til muna. Hann hefur verið utangarðsmaður í þingflokknum. Var ekki treyst fyrir formennsku eða varaformennsku í þingnefndum eftir kosningarnar, né öðrum embættum, þó hann hafi átt fjórtán ára þingferil áður að baki er hann sneri aftur á þing.

Þegar að Einar Oddur Kristjánsson féll frá var Ólöf Nordal, nýliði á þingi, valin varaformaður samgöngunefndar fram yfir Árna. Árni hafði verið formaður samgöngunefndar áður, á árunum 1999-2001, er hann varð að segja af sér þingmennsku eftir að uppvíst varð um afbrot hans, sem mikið hefur verið fjallað um. Held að sagan muni dæma endurkomu hans á þing sem mistök og mér finnst forysta flokksins hafa fellt þann dóm vel með því að velja Árna ekki til neinna trúnaðarstarfa.

Árni gengur mjög langt í greinaskrifum sínum í dag og mér finnst hann ráðast ómaklega að Gunnari. Enda svarar hann vel fyrir sig og ætlar að kæra Árna. Má vera að Gunnar sé einum of hvassyrtur í yfirlýsingunni, en það þarf kannski ekki að koma að óvörum þar sem vegið er mjög að heiðri hans og þarf ekki að undrast að hann grípi til varna.

Ætlar að kæra Árna Johnsen

Svekkjandi úrslit - spennandi einvígi um titilinn

Ansi var það nú svekkjandi að Manchester United hafi ekki tekist að tryggja sér meistaratitilinn í dag, en sigur hefði nokkuð örugglega fært þeim titilinn vegna markatölunnar. En kannski er ekkert svo slæmt, þrátt fyrir gremjuna með úrslitin, að spennan haldist í einvígi Chelsea og United um titilinn eilítið lengur.

Bara ágætt að hafa spennu í þessu allt til síðasta leiks, þó ég verði að vera alveg heiðarlegur og viðurkenna að ég hefði ekki syrgt að komast hefði mátt hjá þeirri spennu með sigri í dag. Svo verður að auki áhugavert að sjá hvernig fer í Evrópubikarnum.

Chelsea og Manchester United eiga spennandi leiki framundan á móti Liverpool og Barcelona á næstunni. Allir knattspyrnuspekingar munu fylgjast vel með því.

Verður gaman að sjá hvort að sama lið nær að taka báða þessa titla.

Chelsea sigraði Man Utd, 2:1, og liðin jöfn að stigum