6 dagar: pælingar um stöðuna í Norðaustri

Það eru aðeins sex dagar til kosninga. Rólegur dagur í pólitíkinni fyrir alla aðra en þá sem eru að sækja sér atkvæði. Horfði þó á Halldór Blöndal tala um kjördæmaskipan í Silfri Egils í dag og leist vel á skoðanir hans. Finnst reyndar mjög sérstök tilhugsun að þetta sé síðasta vika Halldórs sem stjórnmálamanns. Löngum og farsælum ferli að ljúka þar. Hef alltaf borið mikla virðingu fyrir Halldóri. Hann er hiklaust mesti karakterinn í þingflokki Sjálfstæðisflokksins og að honum er eftirsjá að mínu mati. En það kemur alltaf að pólitískum leiðarlokum hjá öllum.

Er alveg innilega sammála Halldóri um að þessi kjördæmaskipan er algjört rugl. Þessi landsbyggðarkjördæmi eru alltof stór og erfið. Margir hafa spurt sig hvort þessi kjördæmaskipan hafi gengið upp. Að sumu leyti hefur hún vissulega tekist vel - að öðru leyti ekkert sérstaklega eða hreinlega illa. Heilt yfir hefur þetta þó tekist furðanlega vel miðað við allar aðstæður. Hinsvegar er ekki öfundsvert að vera stjórnmálamaður í svona stórum kjördæmum. Það er enda mikil vinna að sinna vel svo stóru svæði.

Margir hafa spurt sig hvort önnur mynd á kjördæmi á svæðinu hefði verið betri. Ég var þeirrar skoðunar er kjördæmabreytingin var gerð fyrir sjö til átta árum að illskárra hefði nú verið ef Norðurland hefði orðið eitt, sameina hefði átt Norðurland eystra og vestra. Þá hefði myndast sterkt norðlenskt kjördæmi með Akureyri sem grunnmiðpunkt. Það gerðist illu heilli ekki. Þess í stað enduðum við t.d. með dreifðari kjördæmi og ólíkari svæðisheildar. Það er hiklaust mitt mat að þessar kjördæmaheildar verði ekki langlífar.

Það var gaman að fylgjast með Silfrinu og heyra í stjórnmálamönnum sem annaðhvort eru hættir eða að hætta. Mat þeirra á landsbyggðarkjördæmin var hið sama. Þarna sameinuðust Halldór, Magga Frímanns og Hjörleifur um það mat. Það var gaman að hlusta á þetta spjall. Og ég held að flestir landsbyggðarmenn séu á þessari skoðun. Að mörgu leyti var þessum bastarði sem kjördæmaskipunin er þröngvað illu heilli upp á okkur á landsbyggðinni. Við getum huggað okkur við það að þessi skipan er dæmd til að breytast fljótlega.

Sex dagar í pólitík eru skammur tími. Hér inn um póstlúguna mína streyma glansbæklingar og kynningarefni. Seint verð ég þó talinn óákveðinn kjósandi. Það er samt gaman að lesa bæklingana. Akureyringarnir í framboði eru vel kynntir. Það mun ekki líða vikan áður en jafnvel áhugalausasta fólk um stjórnmál veit að Akureyringar eru í baráttusætunum. Það er mikilvægt að eitthvað af þeim komist inn. Það er alveg ljóst að baráttan skiptir máli frá þeim forsendum. Það verður fróðlegt að sjá hvernig þeirri rimmu lýkur.

Mesti þunginn verður virku dagana fimm sem framundan eru. Á morgun verður framboðsfundur í Sjallanum. Það verður áhugavert að sjá kynningu á málum hér og alvöru pólitíska umræðu í Sjallanum. Ég ætla að skella mér þangað og blogga um þá upplifun annað kvöld alveg hiklaust.

Kristján Þór vill stjórnarsamstarf með Samfylkingu

Mikil umræða hefur verið í dag um þau ummæli Kristjáns Þórs Júlíussonar, leiðtoga Sjálfstæðisflokksins í Norðausturkjördæmi og fyrrum bæjarstjóra á Akureyri, á fundi á Dalvík nýlega þess efnis að hann vilji að Sjálfstæðisflokkurinn horfi til stjórnarsamstarfs með Samfylkingunni og vilji ekki líta til áframhaldandi stjórnarsamstarfs með Framsóknarflokknum, eftir tólf ára sögulegt samstarf.

Þessar skoðanir eru í takt við ummæli Kristjáns Þórs á borgarafundi Stöðvar 2, 4. apríl sl, um að þjóðin sé að kalla eftir breytingum í stjórnarsamstarfi vegna vondrar stöðu Framsóknarflokksins. Í raun þurfa þessi ummæli varla að koma að óvörum enda er Sjálfstæðisflokkurinn hér á Akureyri í meirihlutasamstarfi með Samfylkingunni. Kristján Þór var bæjarstjóri á Akureyri í sjö mánuði með stuðningi bæjarfulltrúa Samfylkingarinnar eins og flestum er kunnugt.

Þessi afstaða vekur athygli vissulega á lokaspretti kosningabaráttunnar. Þetta ómar í takt við skoðanir Halldórs Blöndals, fráfarandi kjördæmaleiðtoga okkar, sem sagði á súpufundi á Dalvík rétt fyrir kosningarnar 2003 að Sjálfstæðisflokkurinn ætti að horfa til samstarfs með VG félli stjórnin í þeim kosningum. Þessi ummæli á Dalvík að þessu sinni eru greinilega sterkari í umræðunni. Það er skiljanlegt svosem að Dalvíkingurinn Kristján Þór vilji tala skýrt til síns fólks.

Stóri dómurinn á það hvað gerist þó verður á laugardaginn. Fyrst og fremst verður fylgst með því hvort að ríkisstjórnin haldi velli. Kannanir benda mun sterkar til þess nú en á lokasprettinum vorið 2003 að hún haldi velli. Staða hennar virðist vera traustari nú en þá. Falli stjórnin koma aðrir kostir upp á borðið. Á það ber þó að minnast að það þarf ekki að þýða áframhaldandi samstarf þó stjórnin haldi. Árin 1991 og 1995 héldu ríkisstjórnir velli en þeim var ekki haldið áfram, enda studdust þær við naumasta mögulega meirihluta, 32 þingsæti.

En örlögin ráðast á laugardaginn með dómi þjóðarinnar. Það gerist ekki á fundi á Dalvík, þó að allar pólitískar pælingar skipti jú alltaf máli.

Nicolas Sarkozy kjörinn forseti Frakklands

Nicolas Sarkozy, fyrrum innanríkisráðherra Frakklands, hefur verið kjörinn forseti Frakklands. Hann tekur við embættinu og lyklavöldum í Elysée-höll af Jacques Chirac í næstu viku, fimmtudaginn 17. maí nk. Sigur Sarkozys var nokkuð afgerandi, hann hlaut rúmlega 53% atkvæða en Segolene Royal, frambjóðandi sósíalista, hlaut tæp 47% atkvæða.

Sigur Sarkozy hefur verið í kortunum mánuðum saman. Hann hlaut rúmlega 30% í fyrri umferð forsetakosninganna 22. apríl sl. og leiddi í öllum könnunum á þeim tveim vikum sem síðan hafa birst. Hann hefur verið með forskot á Segolene Royal er spurt hefur verið um afstöðu til þeirra beggja allt frá því í janúar.

Nicolas Sarkozy verður fyrsti forseti Frakklands sem fæddur er eftir lok seinni heimsstyrjaldarinnar. Hann fæddist í París þann 28. janúar 1955. Nicolas Sarkozy hefur tekið þátt í stjórnmálum allt frá unglingsárum. Hann hefur unnið sig hægt og rólega upp í pólitísku starfi á hægrivængnum frá ungliðastarfinu. Sarkozy var innanríkisráðherra Frakklands 2002-2004 og 2005-2007 og fjármálaráðherra Frakklands 2004-2005. Hann hefur leitt UMP-blokk hægrimanna frá árinu 2004.

Sarkozy fær sterkt umboð til valda. Kjörsókn í þessum forsetakosningum var hin mesta frá árinu 1965 er Charles De Gaulle var kjörinn í síðasta skiptið á litríkum stjórnmálaferli. Nicolas Sarkozy tekur við völdum í Elysée-höll á bylgju mikils stuðnings. Hann er þó mjög umdeildur stjórnmálamaður og hefur ekki hikað við að stuða á löngum ferli. Þingkosningar fara fram í næsta mánuði í Frakklandi - þar verður fyrsta prófraun Sarkozy á forsetastóli.

Samkvæmt útgönguspám í Frakklandi fær Sarkozy 52-55% atkvæða

Veikindi Ólafs Ragnars

Ólafur Ragnar Grímsson, forseti Íslands, var fluttur með þyrlu Landhelgisgæslunnar á LSH í Fossvogi frá Ólafsvík í dag vegna veikinda. Fór hann þar í rannsóknir. Fyrstu fréttir hljómuðu eins og ástand forsetans væri alvarlegt enda bentu aðstæður til þess, miðað við að þyrla flutti hann með hraði til Reykjavíkur. Nú hefur verið gefin út yfirlýsing frá forsetaskrifstofunni um að veikindi hans séu ekki alvarleg.

Það er ekki óeðlilegt að ætla miðað við aðstæður að um ofþreytu sé að ræða. Ekki virðist vera um hjartveikikvilla að ræða og fréttatilkynningar gefa ekki til kynna að hann hafi fengið áfall af einhverju tagi. Um ónot virðist vera að ræða og mikil þreytuviðbrögð. Væntanlega verður meira fjallað um þetta eftir að forsetinn hefur undirgengist einhverjar rannsóknir.

Ég sendi Ólafi Ragnari góðar kveðjur og óskir um góðan bata.

Forsetinn við góða heilsu

Norðausturkjördæmi

Það eru aðeins sex dagar til alþingiskosninga og þar til að örlögin í kosningabaráttunni ráðast. Í kosningaumfjöllun dagsins á sus.is fjalla ég um kjördæmið mitt: Norðausturkjördæmi. Farið er yfir stöðu mála í kjördæminu; úrslit síðustu kosninga, sviptingar í stjórnmálum á kjörtímabilinu og í aðdraganda þessara þingkosninga. Ennfremur er fjallað um frambjóðendur, um mörk kjördæmisins og komið með fróðleiksmola.

Norðausturkjördæmi nær frá Siglufjarðarkaupstað í norðri til Djúpavogshrepps í austri og er víðfeðmasta kjördæmi landsins. Norðausturkjördæmi var myndað í kjördæmabreytingunni árið 2000 úr tveim kjördæmum; Norðurlandskjördæmi eystra og Austurlandskjördæmi.

Eina breytingin var þó sú að Siglufjörður og nærsveitir sem áður tilheyrðu Norðurlandskjördæmi vestra færðist yfir í Norðausturkjördæmi og Hornafjörður og nærsveitir sem áður tilheyrðu Austurlandskjördæmi færðust yfir í Suðurkjördæmi.

Á kjörtímabilinu hafa þingmenn kjördæmisins verið 10 talsins; níu kjördæmasæti og eitt jöfnunarsæti. Svo verður áfram eftir kosningarnar 12. maí nk.

Umfjöllun um Norðausturkjördæmi

Vænleg staða Sjálfstæðisflokksins - Jón ekki inni

Skv. kjördæmakönnun Gallups í Reykjavík norður mælist Sjálfstæðisflokkurinn með 5 kjördæmakjörna þingmenn og rúmlega 40% fylgi. Enn mælist Jón Sigurðsson, viðskiptaráðherra og formaður Framsóknarflokksins, utan þings og er fylgi Framsóknarflokksins aðeins 7% í kjördæmi formannsins. Hann rær því pólitískan lífróður í kjördæmi sínu, rétt eins og sumir aðrir forystumenn Framsóknar.

Samfylkingin stendur þónokkuð fjarri kjörfylginu í Reykjavík norður vorið 2003, en þá varð flokkurinn sjónarmun stærri en Sjálfstæðisflokkurinn en fáir hafa átt von á að þeir næðu að halda velli. Fylgi VG er greinilega að síga þessa dagana og sést það vel á kjördæmakönnunum sem sýna flokkinn mun lægri en hann lengi vel var í kosningabaráttunni. Þetta sést líka vel í Fréttablaðskönnun í dag. Frjálslyndir og Íslandshreyfingin eru nokkuð frá því að ná inn manni. Þar berjast hin fornu frjálslyndu skötuhjú Magnús Þór og Margrét harðri baráttu.

Sjálfstæðisflokkurinn: 40,4% (35,5%)
Samfylkingin 26,3% (35,8%)
VG: 17,8% (9,7%)
Framsóknarflokkurinn: 7% (11,6%)
Frjálslyndi flokkurinn: 4,9% (5,5%)
Íslandshreyfingin: 3,6%

Þingmenn skv. könnun

Guðlaugur Þór Þórðarson (Sjálfstæðisflokki)
Guðfinna S. Bjarnadóttir
Pétur H. Blöndal
Sigurður Kári Kristjánsson
Sigríður Ásthildur Andersen

Össur Skarphéðinsson (Samfylkingu)
Jóhanna Sigurðardóttir
Helgi Hjörvar

Katrín Jakobsdóttir (VG)
Árni Þór Sigurðsson

Fallnir skv. könnun

Magnús Þór Hafsteinsson
Guðjón Ólafur Jónsson

Það er auðvitað athyglisverðast að sjá enn og aftur vonda stöðu Framsóknarflokksins í Reykjavík. Jón Sigurðsson mælist enn utan þings, en er þó greinilega að bæta við sig á lokasprettinum miðað við aðrar kjördæmakannanir. Það eru mikil tíðindi að formaður Framsóknarflokksins standi jafnilla og raun ber vitni. Þetta hefur þó gerst áður. Kosningabaráttan 2003 var erfið í Reykjavík fyrir Halldór Ásgrímsson, sem lengst af baráttunni mældist ekki inni. Honum tókst með ævintýralegri lokasveiflu að fara inn við annan mann. Það verður fróðlegt að sjá hvernig fer nú.

Sjálfstæðisflokkurinn bætir við sig kjördæmakjörnum þingmanni í Reykjavík norður og er yfir 40% markinu, vel yfir kjörfylginu 2003, er Davíð Oddsson, fyrrum forsætisráðherra, leiddi flokkinn þar í sinni síðustu kosningabaráttu. Barist er fyrir því að tryggja stöðu Sigríðar Ásthildar Andersen - skv. þessari mælingu er hún nokkuð vel trygg inn. Óvíst er um hverjir yrðu jöfnunarmenn en skipting þeirra verður enn meira spennandi nái minnstu flokkarnir ekki kjördæmakjöri. En þetta er vissulega mjög góð staða fyrir sjálfstæðismenn, enda með ferskan lista. Ungur en reyndur stjórnmálamaður leiðir listann og þar eru tvær öflugar kjarnakonur í mikilvægum sætum.

Samfylkingin er að missa talsvert fylgi frá kosningunum 2003, en ég held að fáir hafi átt von á að flokkurinn næði jafngóðri kosningu og þá. Þarna eru kjördæmaleiðtogar flokksins í borginni; Össur og Jóhanna, efst á lista og með Helga Hjörvar og Steinunni Valdísi í næstu sætum. Það er greinilegt að Samfylkingin er farin að ná aftur til sín kvennafylginu sem þau voru farin að missa með svo áberandi hætti. Enda er greinilegt á vali Jóhönnu í kjördæmaþáttinn að það á að reyna að tala kvennafylgið í þessa átt með áberandi hætti. Talið um Steinunni segir líka sitt.

VG bætir við sig mjög miklu fylgi frá þingkosningunum 2003, en hefur lækkað skv. nýlegum kjördæmakönnunum eins og víða um land. Þarna mælist Árni Þór Sigurðsson inni sem kjördæmakjörinn, en gæti orðið mjög tæp í þeirri stöðu sem hefur sýnt sig vel síðustu dagana. Það er líka mjög afgerandi ljóst að VG er að taka af Framsókn. Vinstrafylgið sem hefur verið hjá Framsókn þarna er greinilega að fara yfir til Katrínar og hennar fólks. Það gæti farið svo að þetta yrði slagur milli Jóns og Árna Þórs um kjördæmasæti.

Frjálslyndir missa nokkuð fylgi frá síðustu kosningum. Magnús Þór Hafsteinsson virðist kolfallinn í þessari mælingu og virðist vera að missa fylgi á lokasprettinum. Margréti Sverrisdóttur gengur ekkert greinilega með Íslandshreyfinguna í því sem átti að vera besta kjördæmi flokksins. Það verða stórtíðindi ef hin fornu frjálslyndu skötuhjú slá hvort annað út eins og mælingin sýnir klárlega æ ofan í æ.

Þetta er athyglisverð staða í borginni vissulega. Þarna virðist allt geta gerst í raun hvað varðar tæpustu sætin en vond staða Framsóknar vekur mesta athygli. Það verða stórtíðindi fari úrslit á þennan veg og Jón nái ekki inn, þó líkur á kjöri hans aukist við hverja könnun. Það verður fróðlegt að sjá hvernig fer.

Það eru aðeins sex dagar til kosninga og spennandi lokasprettur framundan síðustu sólarhringana í baráttunni.

Gallupkönnun: Formaður Framsóknar nær ekki kjöri

Hver verður næsti forseti Frakklands?

Sjötti forseti Franska fimmta lýðveldisins verður kjörinn í dag. Nýr forseti mun taka við völdum í Elysée-höll eftir ellefu daga, er Jacques Chirac, lætur af forsetaembætti eftir tólf ára forsetasetu. Allar skoðanakannanir benda til þess að Nicolas Sarkozy, fyrrum innanríkisráðherra, verði kjörinn forseti Frakklands í dag og vinni Segolene Royal nokkuð afgerandi.

Sarkozy vann sigur í fyrri umferðinni, þann 22. apríl,  með rúmlega 30% atkvæða en Royal hlaut rúm 25%. Næst þeim varð miðjumaðurinn Francois Bayrou með tæp 20%. Þjóðernisöfgamaðurinn Jean-Marie Le Pen sem komst óvænt í seinni umferð forsetakosninganna 2002 fékk rúm 11% þá. Kjörsókn í þessari fyrri umferð forsetakosninganna var hin mesta frá forsetakosningunum 1974, er Valery Giscard d´Estaing var kjörinn eftirmaður Georges Pompidou.

Flestir hafa í gegnum þessa kosningabaráttu talið að þetta yrði einvígi Sarkozy og Royal. Fjölmiðlar í Frakklandi hafa allt frá vorinu 2006 talað um forsetakosningarnar 2007 sem Sarko-Sego kosningar. Þau eru hefðbundnar andstæður vinstri og hægri og því eru valkostirnir eins afgerandi og þeir geta í raun orðið fyrir franska kjósendur. Þungu fargi var létt af sósíalistum við úrslit fyrri umferðarinnar, þó að Sarkozy hafi unnið Royal, enda óttuðust margir að eins færi fyrir Royal og Lionel Jospin vorið 2002 er hann var sleginn harkalega út af taflborði franskra stjórnmála í einu höggi er hann tapaði mjög óvænt.

Þessar kosningar marka endalok litríks stjórnmálaferils Jacques Chirac, forseta Frakklands, sem hefur verið lykilspilari í frönskum stjórnmálum í áratugi og verið áberandi þar allt frá valdadögum stríðskempunnar Charles De Gaulle. Það verður fróðlegt hver úrslit verða í dag - einu kappræður kosningabaráttunnar fóru fram í vikunni. Þar missti Royal stjórn á sér í garð Sarkozy, en það funaði á milli þeirra. Kannanir hafa sýnt mjög vel að bilið breikkaði milli Sarko og Sego eftir kappræðurnar.

Forseti Frakklands er einn af lykilleikmönnum stjórnmálanna, bæði innan Evrópusambandsins og á alheimsvísu, enda einn valdamesti stjórnmálamaður heims. Það verður fylgst vel með því hvort að hægri- eða vinstribylgja verður í Frakklandi í dag er nýr húsbóndi í Elysée-höll verður kjörinn.

Það hefst nýr tími í frönskum stjórnmálum í dag hvernig sem fer. Nýr forseti verður fyrsti franski þjóðhöfðinginn fæddur eftir seinni heimsstyrjöldina og verður því leiðtogi nýrra tíma nú þegar að Jacques Chirac hættir.

Sego eða Sarko? Vinstri eða hægri? Vinna eða velferð?

Viðbrögð framsóknarmanna við Jónínumálsskrifum

Ég hef fengið talsverð viðbrögð frá framsóknarmönnum vegna skrifa minna um málið margfræga tengt veitingu ríkisborgararéttarins til Luciu Celeste Molina Sierra, tengdadóttur Jónínu Bjartmarz, bæði hér í kommentum á heimasíðunni og eins tölvupósta um málið. Það eru ekki allir sammála skrifunum, sumir telja greinilega óþarfa að skrifa um málið og öðrum finnst eðlilegt að skrifa um það.

Það eru auðvitað misjafnar skoðanir á skrifunum, enda varla við öðru að búast. Ég held að þessi vefur væri ekki spennandi ef allir sem hér koma inn væru sammála hverju orði. Met það mikils þó að heyra í fólki um skrifin, þetta mál og svo bara varðandi kosningarnar. Fæ miklu meiri komment en bara hér á vefnum. Það er alltaf gaman að lesa tölvupóst frá þeim sem lesa. Þeir sem eru ósammála senda oft ágætis línu, stundum koma miður skemmtileg komment frá nafnlausum en flestir eru kurteisir og málefnalegir.

Persónulega tel ég að mjög margir hafi verið mun hvassari í skrifum um þetta Jónínumál en ég. Vissulega hef ég skrifað um það nokkrar færslur og velt upp álitaefnum og óhikað haft á því skoðanir, enda hví ekki? Við lifum í samfélagi skoðana, fólk er að blogga allan daginn til að hugsa um það sem er að gerast, koma skoðunum niður á blað fyrir sig og þá sem vilja líta í heimsókn. Þegar að ég byrjaði að blogga skrifaði ég bara fyrir mig og nokkra félaga sem höfðu gaman af að lesa. Lesendahópurinn hefur stækkað talsvert. Ég hef þó ekkert breyst.

Ég skrifa þegar að ég finn hjá mér þörf að gera það. Stundum skrifa ég mikið, stundum lítið. Stundum skrifa ég hikandi til að pæla mig áfram í málinu, stundum með hvöss og afgerandi skrif. Þó koma þau öll frá hjartanu, enda á maður að skrifa sé maður sannfærður um hvað sé rétt. Ég hef aldrei verið halelúja-maður fyrir einn flokk eða einhvern einn mann. Það er enginn fullkominn í þessum heimi. Sjálfur þoli ég ekki þá sem verja sinn flokk algjörlega út í dauðann. Það er mikilvægt að þora að vera gagnrýninn, meira að segja á garðinn sinn.

Þannig skrifa ég og þannig verður þetta bara. Það gildir það sama um þetta Jónínumál eins og skrifin um veðrið á Akureyri. Vilji ég skrifa og telji þörf á að koma einhverri skoðun frá mér kemur hún bara. Svo fæ ég bara viðbrögð. Eina sem ég vil er málefnalegt spjall um skrifin. Sjálfur hef ég alla tíð vanið mig á að vera málefnalegur og reyna að skrifa með þeim forsendum um öll mál. Og ætlast ekki til annars en að þeir sem svari geti verið málefnalegir líka.

Þeir sem hafa eitthvað að segja en vilja ekki segja það hér geta óhikað haft samband. Það er alltaf gaman að kynnast góðu fólki með skoðanir. Það er líka stóri kosturinn við þennan vettvang að maður kynnist alltaf nýju fólki og böndin við góða vini sem lesa verða alltaf traustari. Það er engin skylda hér að vera sammála um allt.

Jónínumálið er bara eitt þeirra mála sem þarf að skrifa um í dagsins önn og það gerum við svo mörg, held að ég hafi hvorki verið orðhvatastur í þeim efnum eða svosem hógværastur - en mitt á milli einhversstaðar, en það er þá bara gott að fá viðbrögð þeirra sem lesa.

7 dagar: pælingar um stöðuna í Norðaustri

Það eru bara sjö dagar til þingkosninga. Ég ætla að nota dagana sem eftir eru til að fókusera vel á málin hér, stundum í einni færslu á dag, stundum fleirum. Ég hef verið hugsi yfir stöðunni hér. Fylgið virðist á fleygiferð. Könnun Gallups í gær var ekki góð fyrir Sjálfstæðisflokkinn í kjördæminu. Í síðustu þrem mælingum hjá Gallup hefur fylgi flokksins verið að dala með mjög áberandi hætti. Vísbendingar eru um að hann eigi undir högg að sækja hér á Eyjafjarðarsvæðinu. Margir spyrja sig hvað geti verið að. Fyrir því eru eflaust fleiri en ein skýring.

Það er úrslitaatriði fyrir Sjálfstæðisflokkinn að mælast vel hér og það verður tekið mjög eftir því nái hann ekki flugi í vor. Staðan eins og mælingin í gær sýndi er að mínu mati pólitískt áfall fyrir forystuna hér, svona lítil fylgisaukning frá kosningunum 2003 verður ekki metið viðunandi. Sjálfur leiði ég hugann að því hvort að löng valdaseta flokksins í bænum sé farin að koma niður á honum og jafnvel hvort að fólk finni ekki samhljóm með nýrri forystu bæjarmálanna. Mér finnst bæjarmálin frekar daufleg og fer ekki leynt með það að mér finnst bæjarstjórnarmeirihlutinn dauflegur.

Það er vissulega rétt að meirihluti Sjálfstæðisflokks og Samfylkingar er eitthvað stirður á að líta. Þar ræður margt eflaust sem við okkur blasir. Eitt eru bæjarstjóraskiptin, það er auðvitað viðbrigði að líta á bæjarmálin núna frá traustri forystu Kristjáns Þórs á þeim vettvangi til þeirrar ládeyðu sem mér finnst ríkja á þessum vettvangi nú. Mér finnast bæjarstjórnarfundir verulega óspennandi og hef hverfandi áhuga á því. Það er frekar þreytt fólk sem þar er í forgrunni. Það var leitt að ekki fékkst fram ferskari uppstokkun með yngra fólk ofar á listum. Það situr enn í mér að það tókst ekki.

Staða Sjálfstæðisflokksins hér verður metin af stöðunni eftir viku. Kannanir sýna misjafna mynd. Þessi könnun í gær er að mínu mati áfall fyrir flokkinn hér, miðað við að þar erum við aðeins rétt yfir verulega vondum árangri síðast. Það er alveg ljóst af þeirri stöðu, sé hún rétt, að eitthvað er ekki eins og það á að sér að vera. Miðað við mikla uppstokkun í efstu sætum og að leiðtogi listans er héðan er þessi staða ekki viðunandi. Hinsvegar má ljóst vera að staðan fyrir austan er góð. Hér þarf að taka til hendinni - fulltrúar flokksins verða að horfast í augu við þessa stöðu.

Mér finnst staða Samfylkingarinnar athyglisverð. Flokkurinn rokkar til og frá eftir könnunum. Flugið hjá þeim frá kjördæmakönnun fyrir viku til þess sem gerist í nýju Gallup-könnuninni er athyglisverð. Þar ræður eflaust miklu þetta klúður með Grímseyjarferjuna sem mér finnst algjört og vonbrigðin með að ekki hefur fengist meiri fjármunir í Vaðlaheiðargöng. Það er ekki fjarri lagi að mér og mörgum sjálfstæðismönnum hér hefur þótt samgönguráðherra draga lappirnar óþarflega mikið. Það er ekki gott og ég skal vera síðastur manna til að verja það verklag.

VG er að síga greinilega. Það kemur mér ekki á óvart. Það eru hverfandi líkur á þau nái Birni Vali inn. Framsókn rokkar líka til og frá. Lögð er mikil áhersla hjá þeim á að ná Höskuldi inn. Það skiptir máli hér á Akureyri að vera frambjóðanda á hans kalíber sem hefur tengsl og er þekkt nafn. Það mun reyna mikið á Akureyringana í framboði næstu dagana. Það er ekki undrunarefni að við sjálfstæðismenn keyrum þetta á Þorvaldi. Hann er mikilvægur okkur hér, það var rétt áhersla að setja hann í kjördæmaþáttinn, enda þarf að kynna Þorvald betur.

Þessi vika verður spennandi. Kannanirnar eru reyndar aldrei heilagur sannleikur þó kannski skrifi ég oft um þær eins og þær séu þannig. En þær eru glampi í myrkrinu sem þarf að fara eftir. Það er mæling á stöðu sem getur verið uppi og það má ekki hlæja niður flokkakannanir. Það á ekki að taka þeim þó sem úrslitum kosninga heldur vísbendingu um að gera betur sé einn flokkur í vanda eða einn flokkur í uppsveiflu. VG hefur séð vel síðustu dagana að menn sigra ekki kosningar á könnunum, heldur hvernig kosningabaráttan er keyrð.

Sá reyndar á föstudag að Sigurjón frjálslyndi er kominn inn, sem jöfnunarmaður sýnist mér. Þeir ætla greinilega að reyna að keyra hann inn þannig, með Guðjóni Arnari. Staðan er reyndar helst þannig nú að hann muni geta tekið tvo með sér inn ef hann fer inn sem kjördæmakjörinn í Norðvestri. Kristinn H. virðist vera búinn að sleggjast sitt síðasta. Sumir þingmenn, jafnvel háttvirtir ráðherrar, eru komnir á hnén í baráttunni fyrir endurkjöri. Staðan er misjöfn um landið.

Það verður spurt að leikslokum og það verður gaman að rýna í stöðuna næstu dagana enn betur.

Steingrímur J. farinn að lofsyngja bjórinn

Það vekur talsverða athygli að sjá í kosningabaráttunni hér í Norðausturkjördæmi hvernig að Steingrímur J. Sigfússon, sem greiddi atkvæði gegn lögleiðingu bjórsins fyrir tveim áratugum, er farinn að tala fyrir bjórverksmiðjunni útfrá á Árskógssandi og nefnir hana sem nýsköpun í atvinnumálum sem VG geti talað fyrir. Þetta eru vissulega stórtíðindi að mínu mati. En er þetta ekki bara vandræðagangur hjá VG?

Það kemur manni vissulega spánskt fyrir sjónir að sjá bjór-efasemdarmanninn og andstæðing lögleiðingar hans hérlendis tala fyrir bjórverksmiðju í einkaeigu til að nota sem tal fyrir nýsköpun í atvinnulífinu gegn tali um álver á Bakka við Húsavík. Það eru ekki ný tíðindi að stjórnmálamenn teygi sig a nýjar slóðir í kosningabaráttu en þetta vekur vissulega mikla athygli svo ekki sé meira sagt.

Rifjum annars upp hvað Steingrímur J. sagði um bjórinn í lokaafgreiðslu um hann á Alþingi í maí 1988. Þá sagði núverandi stuðningsmaður verksmiðjunnar sem bruggar eðalbjórinn Kalda: "Ég hef til viðbótar pólitískar ástæður fyrir því að ég vil ekki standa að breytingum hvorki í áfengismálum né annarsstaðar sem gera fólkið óvirkara og sljórra gagnvart umhverfi sínu. Það tel ég að stóraukin neysla bjórs, jafnvel þó að eitthvað dragi úr neyslu annarra áfengistegunda, muni gera."

Batnandi (vinstri/grænum) mönnum er best að lifa! Það liggur við að maður skáli í Kalda fyrir Steingrími J.

Siv enn úti í Kraganum - varnarbarátta Framsóknar

Skv. kjördæmakönnun Gallups í Suðvesturkjördæmi mælist Sjálfstæðisflokkurinn með 5 kjördæmakjörna þingmenn og tæplega 42% fylgi. Enn mælist Siv Friðleifsdóttir, heilbrigðisráðherra, utan þings og er fylgi Framsóknarflokksins aðeins 7% í kjördæminu. Hún rær því pólitískan lífróður í kjördæmi sínu.

Samfylkingin stendur nærri kjörfylginu vorið 2003 en lækkar örlítið frá nýlegri kjördæmakönnun. VG hækkar verulega frá kjörfylginu og tekur mikið fylgi af Framsókn. Frjálslyndir eru nokkuð frá því að ná inn manni og Íslandshreyfingin nær ekki flugi.

Sjálfstæðisflokkur: 41,9% (38,4%)
Samfylkingin: 28,5% (32,8%)
VG: 14,5% (6,2%)
Framsóknarflokkur: 7% (14,8%)
Frjálslyndi flokkurinn: 5,5% (6,7%)
Íslandshreyfingin: 2,6%

Þingmenn skv. könnun

Þorgerður Katrín Gunnarsdóttir (Sjálfstæðisflokki)
Bjarni Benediktsson
Ármann Kr. Ólafsson
Jón Gunnarsson
Ragnheiður Elín Árnadóttir

Gunnar Svavarsson (Samfylkingu)
Katrín Júlíusdóttir
Þórunn Sveinbjarnardóttir

Ögmundur Jónasson (VG)
Guðfríður Lilja Grétarsdóttir

Fallin skv. könnun

Siv Friðleifsdóttir
Valdimar Leó Friðriksson

Það er athyglisvert að sjá enn og aftur vonda stöðu Framsóknarflokksins í Kraganum. Siv er enn úti og hefur bætt mjög lítið við sig frá nýlegri kjördæmakönnun. Það eru mikil tíðindi að Siv, sem hefu langan stjórnmálaferil að baki, standi jafn illa í þessari kosningabaráttu og raun ber vitni. Það er mikil varnarbarátta sem Framsókn er komin í á höfuðborgarsvæðinu og þar er staða þriggja ráðherra mjög veik; Sivjar, Jóns og Jónínu. Það verður vel fylgst með því hvernig fer fyrir Framsókn á þessu svæði.

Samfylkingin missir mann frá nýlegri kjördæmakönnun til VG en stendur tiltölulega nærri vissulega kjörfylginu 2003. Það virðist þó vera stutt í Árna Pál ef marka má stöðuna og væri hann væntanlega inni sem jöfnunarmaður í þessari mælingu. Það er spurning hvort að það komi flokknum til góða að hafa kjördæmaleiðtoga úr Hafnarfirði. Það hafði klárlega áhrif í kosningunum 2003 er Guðmundur Árni Stefánsson leiddi kjördæmalistann, reyndar í eina skiptið á sínum stjórnmálaferli.

Sjálfstæðisflokkurinn bætir eins og í fyrri könnunum við sig kjördæmakjörnum þingmanni og er yfir 40%, örlitlu yfir kjörfylginu. Eins og vel hefur komið fram er staða Ragnheiðar Ríkharðsdóttur, bæjarstjóra í Mosfellsbæ, mjög ótrygg skv. þessum mælingum og óvíst um hvort henni tækist að ná jöfnunarþingsæti á þessu. Reyndar er mikið fylgi að falla dautt niður skv. þessu svo að staðan er óljós. En staða sjálfstæðismanna til að fá jöfnunarsæti í þessari stöðu virðist vænleg.

VG bætir við sig mjög miklu fylgi frá þingkosningunum 2003, en hefur lækkað skv. nýlegum kjördæmakönnunum eins og víða um land. Þarna mælist Guðfríður Lilja Grétarsdóttir inni sem kjördæmakjörin, en er mjög tæp í þeirri stöðu. Það er líka mjög afgerandi ljóst að VG er að taka af Framsókn. Vinstrafylgið sem hefur verið hjá Framsókn þarna er greinilega að fara yfir til Ögmundar. Það gæti farið svo að þetta yrði slagur milli Sivjar og Guðfríðar Lilju um þingsæti.

Frjálslyndir missa fylgi frá síðustu kosningum. Þeir náðu Gunnari Örlygssyni á þing í þessu kjördæmi fyrir fjórum árum. Hann sagði skilið við flokkinn á miðju kjörtímabili. Nú leiðir Kolbrún Stefánsdóttir, framkvæmdastjóri Sjálfsbjargar, listann og vantar talsvert upp á þingsæti og Valdimar Leó Friðriksson, alþingismaður, er kolfallinn könnun eftir könnun. Íslandshreyfingunni gengur ekkert í stöðunni og fátt sem bendir til að Stuðmaðurinn Jakob Frímann nái inn á þing.

Þetta er athyglisverð staða í Kraganum. Þarna virðist allt geta hvað varðar tæpustu sætin en vond staða Framsóknar vekur mesta athygli. Það verða stórtíðindi fari úrslit á þennan veg og Siv falli jafnvel, en hún virðist tæpari en nokkru sinni þarna. Það verður fróðlegt að sjá hvernig fer.

VG eykur við fylgi sitt í Suðvesturkjördæmi

Gordon Gekko snýr aftur tveim áratugum síðar

Það eru tveir áratugir liðnir frá því að Michael Douglas vann stærsta leiksigur ferilsins og hlaut óskarinn fyrir hlutverk hins vægðarlausa fjármálabraskara Gordons Gekko á Wall Street. Myndin fókuseraði meistaralega á græðgina í bissness-heiminum og hversu vægðarlaus hann er innst við kjarnann. Douglas var yndislega illkvittinn og nasty í rullunni.

Nú hefur Douglas samþykkt að leika Gordon Gekko aftur í framhaldsmynd Wall Street tveim áratugum síðar. Annars er kvikmyndin Wall Street auðvitað mjög eftirminnileg, sennilega ein sterkasta kvikmyndin séð frá þessum sjónarhól á vægðarleysi viðskiptalífsins. Ég hafði ekki séð myndina lengi er ég sá hana á kvikmyndamarkaði þar sem ég fór á. Ég nældi mér í eintak.

Það var mjög notalegt að rifja myndina upp og sjá hana aftur eftir langt hlé. Það er oft gaman að upplifa bíómyndir aftur; finna annan punkt á þeim og pæla í þeim aftur. Frábær túlkun Douglas er enn toppur myndarinnar en handritið er auðvitað bravúr alveg. Svo var auðvitað gaman að sjá byrjunina aftur; New York að vakna til lífsins og undir hljómar Frank Sinatra að syngja Fly Me to the Moon.

Það er annars verulega sjaldgæft að framhaldsmyndir gangi upp, oftar en ekki eru þær skelfilegt flopp. Ætla þó rétt að vona að þessi mynd standi vel ein og sér og skemmi ekki gömlu myndina. Annars verður að ég held gaman að sjá karakterinn Gordon Gekko aftur tveim áratugum síðar og í enn vægðarlausari heimi viðskipta nú en var árið 1987.

Einræða Gekko um græðgi er besta kvikmyndaatriði Douglas á ferlinum og því auðvitað hápunktur Wall Street. Pjúra snilld! Læt textann flakka hér með; óborganleg sena.

The point is, ladies and gentlemen, that: Greed, for lack of a better word, is good. Greed is right; greed works. Greed clarifies, cuts through, and captures the essence of the evolutionary spirit. Greed, in all of its forms, greed for life, for money, for love, knowledge — has marked the upward surge of mankind and greed, you mark my words — will save not only Teldar Paper but that other malfunctioning corporation called the USA.

Michael Douglas aftur í hlutverk Gordon Gekko

Samfylkingin hefur eytt mest í kosningabaráttunni

Samfylkingin hefur eytt flokka mest það sem af er kosningabaráttunni, skv. mælingum Capacent Gallup. Það er áhugavert að fara yfir það sem flokkarnir hafa eytt í auglýsingar og kynningarmál sín nú þegar að aðeins vika er í kjördag. Samfylkingin hefur varið tæpum 12 milljónum króna í baráttuna.

Það eru nokkrar vikur síðan að framkvæmdastjórar flokkanna, annarra en Íslandshreyfingarinnar, settu sér þak í samkomulagi upp á 28 milljónir króna í baráttunni. Capacent Gallup fylgist vel með öllum auglýsingum og þeirri auglýsingakeyrslu sem almennt er í gangi svo að það mun vel koma fram hvað flokkarnir eyða í þessa baráttu að flestu leyti. Það er mikilvægt að halda vel bókhald um það og fara yfir er á hólminn kemur hvort einhver sprengi rammann.

Framsóknarflokkurinn hefur eytt næstmestu, tæpum 11 milljónum. VG hefur varið rúmlega 9 milljónum króna og Frjálslyndi flokkurinn tæplega 9 milljónum. Minnstu hefur Sjálfstæðisflokkurinn varið í kosningabaráttuna það sem af er liðið, eða aðeins 6 og hálfri milljón króna. Samtals er því auglýsingakeyrslan það sem af er á tæpar 50 milljónir króna.

Í gær var gefin út fréttatilkynning þar sem sagt var að Framsókn hefði varið mestum peningum í baráttuna, en það var víst einhver reikningsskekkja þar á ferð og var send út áberandi afsökunarbeiðni til flokksins í dag og er það svona mest umtalaða frétt dagsins sýnist mér í kosningapakkanum.

Það verður fróðlegt að sjá að lokum hversu vel eða illa flokkunum gengur að halda rammann, en mesta auglýsingakeyrsla kosningabaráttunnar er auðvitað handan við hornið núna næstu sjö dagana, þegar að mest er auglýst og mesti þungi baráttunnar fer skiljanlega fram.

Capacent: Auglýsingakostnaður Framsóknarflokksins ofreiknaður

Norðvesturkjördæmi

Það er vika til alþingiskosninga - vika þar til að örlögin í kosningabaráttunni ráðast. Næstu dagana mun ég fjalla um kjördæmin sex í kosningaumfjöllun á sus.is í aðdraganda alþingiskosninga. Fyrsta kjördæmið í umfjöllun er Norðvesturkjördæmi.

Farið er yfir kjördæmin og stöðu mála í þeim; úrslit síðustu kosninga, sviptingar í stjórnmálum þar á kjörtímabilinu og í aðdraganda þessara þingkosninga. Ennfremur er fjallað um frambjóðendur í kosningunum og fjallað um mörk kjördæmisins og komið með fróðleiksmola.

Norðvesturkjördæmi er fámennasta kjördæmi landsins. Það nær frá Akraneskaupstað til Akrahrepps í Skagafirði. Norðvesturkjördæmi var myndað í kjördæmabreytingunni árið 2000 úr þrem kjördæmum; Vesturlandskjördæmi, Vestfjarðakjördæmi og Norðurlandskjördæmi vestra. Eina breytingin er þó sú að Siglufjörður og nærsveitir sem áður tilheyrðu Norðurlandskjördæmi vestra færðist yfir í Norðausturkjördæmi.

Á kjörtímabilinu hafa þingmenn kjördæmisins verið 10 talsins; níu kjördæmasæti og eitt jöfnunarsæti. Í kosningunum 12. maí nk. fækkar kjördæmakjörnum þingmönnum um einn og færist það sæti yfir til fjölmennasta kjördæmis landsins, Suðvesturkjördæmis.

Umfjöllun um Norðvesturkjördæmi

Styttist í stóru stundina hjá Eiríki í Helsinki

Aðeins fimm sólarhringar eru þar til að Eiríkur Hauksson mun syngja lagið Valentine Lost í Helsinki. Stóra spurningin er auðvitað hvort að Eiríki takist að komast upp úr undanriðlinum. Það er fyrsta baráttan í spilinu. Tvisvar hefur okkur Íslendingum mistekist að lyfta okkur af botninum í keppninni og nú er spurt hvort að þriðja skiptið verði farsælla.

Eiríkur Hauksson er maður sögu í Eurovision. Hann hefur keppt tvisvar áður og er mjög reyndur, bæði sem tónlistarmaður og áhugamaður um Eurovision. Hann býr að þeirri reynslu í þessari þriðju ferð sinni út. Lagið er vissulega mjög gott, textinn venst en er ekkert meistaraverk þó. Mörgum, þar á meðal mér, finnst íslenska útgáfan mun betri, hún rennur betur í gegn finnst mér og hljómar betur í heildina. Myndbandið við lagið vakti athygli og hann hefur fengið mikla bylgju stuðnings héðan að heiman.

Á síðasta ári söng Silvía Nótt sig út úr keppninni með bæði eftirminnilegum og magnþrungnum hætti. Hún stuðaði allt og alla í Aþenu en vakti um leið mikla athygli. Hún öðlaðist þó sögulegan sess í keppninni er púað var á hana fyrir og eftir flutning sinn. Hún gleymist allavega ekki. Rauða ljónið kemur úr allt annarri átt og svo mikið er víst að þessir tveir söngvarar eru ólík eins og dagur og nótt.

Íslenski hópurinn er kominn út og æfingar eru þegar hafnar. Það styttist í örlagaríku stundina. Það verða víða partý á fimmtudaginn þar sem við fylgjumst með okkar manni. Það verður fróðlegt að sjá hvort að þar verði þjóðargleði eða þjóðarsorg er úrslit undanriðilsins liggur fyrir. Það verður varla neitt millibil þar á.

Það verður mikið áfall nái Eiríkur ekki að komast á úrslitakvöldið þann 12. maí. Það verður strax litlausara kosningakvöldið komist hann ekki áfram. Augu allra landsmanna verða á því sem gerist í Helsinki þann 10. maí og við vonum að þetta fari allt vel.

Fyrsta æfingin í Helsinki í dag

Átti Kastljós að biðja Jónínu Bjartmarz afsökunar?

Eins og vel er kunnugt hefur Jónína Bjartmarz, umhverfisráðherra, ákveðið að kæra umfjöllun Kastljóss Sjónvarpsins um íslenskan ríkisborgararétt Luciu Celeste Molina Sierra, tengdadóttur sinnar, til siðanefndar Blaðamannafélags Íslands. Hefur Jónína sagt í dag að hún geri það því að forsvarsmenn Kastljóssins hafi ekki beðið sig afsökunar á umfjöllun sinni um hana og þetta umdeilda mál.

Ég verð nú að segja alveg eins og er að ég tel að Kastljós eigi ekki að biðjast afsökunar á einu né neinu. Það er enginn vafi á því að þetta mál var frétt. Þetta var mjög athyglisvert mál. Þeir fengu upplýsingar sem sýndu athyglisvert vinnuferli málsins og þeir birtu það. Það má vel vera að deilt sé um hvernig verkið var unnið, en fréttin var stór engu að síður. Þetta hefur verið stórmál í umfjöllun og á því hafa verið skiptar skoðanir.

Það má deila vissulega um ýmislegt í þessu máli. Hinsvegar finnst mér eðlilegt að þættir af því tagi sem Kastljós er þori að koma fram með afgerandi mál og skapa umræðu um þau. Það má vel vera að það komi við stjórnmálamenn og sé ekki þeim að skapi. Hinsvegar hef ég aldrei litið á fjölmiðla sem halelúja-miðstöð umfjöllunar í stjórnmálum. Ég get ekki betur séð en að allt þetta mál hafi vakið stórar spurningar og málið allt var það stórt að það varð að koma í umræðuna.

Það er eðlilegt að ráðherrann vilji verja heiður sinn, telji hún að ráðist hafi verið að honum. Hinsvegar skil ég ekki að Kastljós hafi átt að biðjast afsökunar á umfjölluninni, sem er byggð á máli sem hefur vakið mikla athygli. Vissulega er þetta vont mál að bera fyrir ráðherrann inn á lokasprett kosningabaráttu og þetta mál hefur ekki verið henni gott á viðkvæmum hjalla baráttunnar. En það er hlutverk fjölmiðla að leita svara við spurningum sem vakna.

Vika til þingkosninga - hverjir næðu kjöri á þing?

Það eru aðeins átta dagar til alþingiskosninga - spennan vex sífellt eftir því sem styttist í kjördaginn. Könnun Gallups í dag hefur vakið mikla athygli og sýnir talsverðar sviptingar. Ég hef nú sett upp lista yfir það hvaða þingmenn nái kjöri gangi könnunin eftir, sem sýnir stöðu mála á þessum tímapunkti.

Það er athyglisverð mæling - mikill fjöldi nýrra alþingismanna myndu ná inn í slíkri stöðu. Lítum á nafnalistann:

Sjálfstæðisflokkur (27)

Geir H. Haarde - Reykjavík suður
Björn Bjarnason
Illugi Gunnarsson
Ásta Möller
Birgir Ármannsson
Dögg Pálsdóttir

Guðlaugur Þór Þórðarson - Reykjavík norður
Guðfinna S. Bjarnadóttir
Pétur H. Blöndal
Sigurður Kári Kristjánsson

Þorgerður Katrín Gunnarsdóttir - Suðvesturkjördæmi
Bjarni Benediktsson
Ármann Kr. Ólafsson
Jón Gunnarsson
Ragnheiður Elín Árnadóttir
Ragnheiður Ríkharðsdóttir

Sturla Böðvarsson - Norðvesturkjördæmi
Einar Kristinn Guðfinnsson
Einar Oddur Kristjánsson
Herdís Þórðardóttir

Kristján Þór Júlíusson - Norðausturkjördæmi
Arnbjörg Sveinsdóttir
Ólöf Nordal

Árni M. Mathiesen - Suðurkjördæmi
Árni Johnsen
Kjartan Ólafsson
Björk Guðjónsdóttir

Sjálfstæðisflokkurinn hlaut 22 þingsæti í kosningunum 2003 (bættist liðsauki við inngöngu Gunnars Örlygssonar í maí 2005, sem kom úr Frjálslynda flokknum) - bætir við sig fimm þingmönnum í könnuninni.
Þingmenn sem falla: Drífa Hjartardóttir, Guðjón Hjörleifsson og Gunnar Örn Örlygsson (féllu í prófkjöri Sjálfstæðisflokksins í Suðurkjördæmi í nóvember 2006).
Þingmenn sem hætta: Halldór Blöndal, Sólveig Pétursdóttir, Sigríður Anna Þórðardóttir, Guðmundur Hallvarðsson og Sigurrós Þorgrímsdóttir.


Samfylkingin (16)

Ingibjörg Sólrún Gísladóttir - Reykjavík suður
Ágúst Ólafur Ágústsson
Ásta Ragnheiður Jóhannesdóttir

Össur Skarphéðinsson - Reykjavík norður
Jóhanna Sigurðardóttir
Helgi Hjörvar
Steinunn Valdís Óskarsdóttir

Gunnar Svavarsson - Suðvesturkjördæmi
Katrín Júlíusdóttir
Þórunn Sveinbjarnardóttir
Árni Páll Árnason

Guðbjartur Hannesson - Norðvesturkjördæmi

Kristján L. Möller - Norðausturkjördæmi
Einar Már Sigurðarson

Björgvin G. Sigurðsson - Suðurkjördæmi
Lúðvík Bergvinsson

Samfylkingin fékk 20 þingsæti í kosningunum 2003 (missti eitt með brotthvarfi Valdimars Leós Friðrikssonar til Frjálslynda flokksins) - missir fjögur þingsæti í þessari könnun.
Þingmenn sem falla: Mörður Árnason og Anna Kristín Gunnarsdóttir.
Þingmenn sem hætta: Margrét Frímannsdóttir, Rannveig Guðmundsdóttir, Jóhann Ársælsson, Guðrún Ögmundsdóttir og Jón Gunnarsson.


VG (11)

Kolbrún Halldórsdóttir - Reykjavík suður
Álfheiður Ingadóttir

Katrín Jakobsdóttir - Reykjavík norður
Árni Þór Sigurðsson

Ögmundur Jónasson - Suðvesturkjördæmi
Guðfríður Lilja Grétarsdóttir

Jón Bjarnason - Norðvesturkjördæmi
Ingibjörg Inga Guðmundsdóttir

Steingrímur J. Sigfússon - Norðausturkjördæmi
Þuríður Backman

Atli Gíslason - Suðurkjördæmi

VG fékk 5 þingsæti í kosningunum 2003 - bætir við sig sex þingsætum í þessari könnun.
Þingmenn sem falla: Enginn.
Þingmenn sem hætta: Enginn


Framsóknarflokkur (6)

Jón Sigurðsson - Reykjavík norður

Magnús Stefánsson - Norðvesturkjördæmi

Valgerður Sverrisdóttir - Norðausturkjördæmi
Birkir Jón Jónsson

Guðni Ágústsson - Suðurkjördæmi
Bjarni Harðarson

Framsóknarflokkurinn fékk 12 þingsæti í kosningunum 2003 (missti eitt með brotthvarfi Kristins H. Gunnarssonar til Frjálslynda flokksins) - missir sex þingsæti í þessari könnun.
Þingmenn sem falla: Jónína Bjartmarz, Siv Friðleifsdóttir, Sæunn Stefánsdóttir og Guðjón Ólafur Jónsson.
Þingmenn sem hætta: Jón Kristjánsson, Hjálmar Árnason og Dagný Jónsdóttir.


Frjálslyndi flokkurinn (3)

Guðjón Arnar Kristjánsson - Norðvesturkjördæmi

Sigurjón Þórðarson - Norðausturkjördæmi

Grétar Mar Jónsson - Suðurkjördæmi

Frjálslyndi flokkurinn fékk 4 þingsæti í kosningunum 2003 (einn þeirra gekk til liðs við Sjálfstæðisflokkinn árið 2005 og flokkurinn fékk tvo nýja þingmenn árið 2007) - missir eitt þingsæti í þessari könnun.
Þingmenn sem falla: Magnús Þór Hafsteinsson, Kristinn H. Gunnarsson og Valdimar Leó Friðriksson.
Þingmenn sem hætta: Enginn.

Þetta eru mjög athyglisverðir nafnalistar og öllum ljóst að gríðarleg uppstokkun verður á Alþingi í vor verði þetta niðurstaðan. En vika getur verið langur tími í pólitík. Það má búast við leiftandi pólitískri spennu næstu átta dagana.

Bloggið hennar Ellýjar slær í gegn

Það leikur enginn vafi á því þessa dagana að Ellý Ármannsdóttir, þula, eigi vinsælasta blogg landsins nú um stundir. Hún er með um helmingi meiri lestur á viku en næsti bloggari hér á Moggablogginu og virðist hækka með degi hverjum og fá um eða yfir 10 þúsund lesendur á dag. Hún virðist hafa náð algjörum topp hér í bloggkerfinu okkar og toppar meira að segja vinsældir Steingríms Sævarrs meðan að hann skrifaði hér.

Ég er ekki í vafa um að önnur efnistök Ellýjar hér veki athygli og það er greinilegt að fólk vill lesa af miklum áhuga. Ég vil óska Ellýju til hamingju með góðan árangur á blogginu og vona að hún haldi áfram að skrifa á fullu.

Ellý segist hissa á hvað bloggið hennar er vinsælt

Vænleg staða Sjálfstæðisflokks - VG missir flugið

Skv. nýrri könnun Gallups, þegar að átta dagar eru til þingkosninga, er fylgi Sjálfstæðisflokksins rúm 40% og Samfylkingin hefur fest sig aftur í sessi sem næststærsti flokkurinn, með 23,5%. VG missir flugið og mælist nú með 17,6%. Framsóknarflokkurinn hækkar ekki milli vikna og mælist enn með 10%. Frjálslyndir eru með 5,5% og Íslandshreyfingin hækkar í 3,2%.

Fall vinstri grænna milli vikna eru stærstu tíðindi þessarar könnunar. Ef marka má þessa stöðu er VG að síga hressilega á lokasprettinum, eins og svo margir spáðu. Þeir náðu hæst upp í tæp 28% og eru greinilega að missa fylgi til Íslandshreyfingar og Samfylkingar. Í síðustu viku voru vinstriflokkarnir jafnstórir með 21,2% en það hefur semsagt breyst með þeim hætti að sex prósentustig skilja flokkana að. Þessi staða er eitthvað sem margir hafa bent á að myndi gerast, enda hefði það orðið stórtíðindi hefði VG náð yfir 20% markið í þessum kosningum.

Þessi staða er mjög vænleg fyrir Sjálfstæðisflokkinn. Hann má vel við þetta una. Allar kannanir hafa sýnt flokkinn í hressilegri uppsveiflu alla kosningabaráttuna. Staða flokksins er þó mjög misjöfn eftir kjördæmum. Hér í Norðausturkjördæmi er flokkurinn greinilega að missa fylgi og virðist þriðji maður vera kominn í hættu skv. þeim veruleika sem könnunin sýnir þar. Á móti kemur að flokkurinn hefur fylgi helmings kjósenda í Reykjavík norður, kjördæmi Geirs H. Haarde, forsætisráðherra, á meðan að flokkurinn mælist mun minni í Reykjavík norður. Staðan er misjöfn en heilt yfir getur flokkurinn vel við þessar mælingar unað.

Samfylkingin virðist vera að rétta úr kútnum einkum á höfuðborgarsvæðinu. Víða úti á landi er staða þeirra frekar slöpp en það sem vekur mesta athygli er hversu mun betri flokkurinn mælist í kjördæmi Össurar Skarphéðinssonar en Ingibjargar Sólrúnar Gísladóttur. Það er mjög mikilvægt fyrir Samfylkinguna að sækja fram og ná góðri kosningu. Þrátt fyrir uppsveiflu er Samfylkingin enn átta prósentustigum undir kjörfylginu 2003 og virðist eiga talsvert langt í land. En sveiflur milli vikna eru greinilegar og fróðlegt að sjá hvort að þar verði sótt fram, en það er orðið langt síðan að flokkurinn hefur farið yfir 25% markið.

Staða frjálslyndra virðist mjög ótrygg. Þeir mælast sem fyrr með þrjú þingsæti en rétt lafa yfir 5% markinu í könnunum, því marki er færir þeim jöfnunarsæti. Íslandshreyfingin hefur ekki átt sjö dagana sæla og hefur ekki átt gott start. Það verður fróðlegt að sjá hvort henni duga sjö dagar í viðbót til að redda sér. Það hefur stefnt í háðulega útreið fyrir Íslandshreyfinguna um nokkuð langt skeið en hún þokast nú upp. Það verður fróðlegt að sjá hvernig fer fyrir forystumönnum flokksins í Reykjavík, en það verður auðvitað metið mikið áfall fyrir Margréti og Ómar nái þau ekki kjöri á þing eftir allt sem gengið hefur á.

Stóru tíðindi könnunarinnar eru væntanlega þau að ríkisstjórnin hefur þriggja manna meirihluta og styrkist hann milli vikna. Staða ríkisstjórnarinnar virðist traustari í aðdraganda þessara kosninga en þeirra sem voru fyrir fjórum árum, er stjórnin mældist fallin meira og minna alla kosningabaráttuna. Stór tíðindi önnur eru auðvitað fylgishrap VG og sú staðreynd kristallast sífellt betur að tveggja flokka stjórn verður ekki mynduð án Sjálfstæðisflokksins, en í það hefur vissulega stefnt um nokkuð skeið.

Harold Wilson, fyrrum forsætisráðherra Bretlands, sagði forðum að vika væri langur tími í pólitík. Það hafa svo sannarlega æ ofan í æ reynst orð að sönnu. Það verður fróðlegt að sjá hversu örlagarík þessi vika til þingkosninganna verður og hversu mjög fylgissveiflur verða á þeim tíma.

Samfylkingin aftur fram úr VG

Jónína Bjartmarz kærir Kastljós til siðanefndar

Jónína Bjartmarz, umhverfisráðherra og leiðtogi Framsóknarflokksins í Reykjavík suður, hefur nú ákveðið að kæra umfjöllun Kastljóss Sjónvarpsins um íslenskan ríkisborgararétt Luciu Celeste Molina Sierra, tengdadóttur sinnar, til siðanefndar Blaðamannafélags Íslands. Málið var fyrst kynnt í kvöldfréttum Ríkissjónvarpsins fyrir viku og var síðan tekið til umfjöllunar í þættinum sama kvöldið og sólarhring síðan tókust ráðherrann og þáttastjórnandi á í viðtali með eftirminnilegum hætti.

Kastljós hefur haldið umfjölluninni áfram með áberandi hætti. Það var greinilegt að það fauk í ráðherrann vegna umfjöllunar þáttarins í fyrrnefndu viðtali og það hefur sést vel að hún telji að sér sótt. Í gær skiptust ráðherrann og Þórhallur Gunnarsson, ritstjóri Kastljóss, á skeytasendingum í formi yfirlýsinga og greinilegt að hvorugt vildi gefa eftir, bæði telja sig hafa heiður að verja.

Þetta mál er orðið teygt og vont. Það er auðvitað enn meira áberandi því að svo stutt er til þingkosninga og ráðherrann berst mjög erfiðri baráttu fyrir endurkjöri. Hún rær pólitískan lífróður, enda mælist hún fallin af þingi í skoðanakönnunum. Það er skiljanlegt að ráðherrann se ósátt við umfjöllunina. Þetta er auðvitað mjög vandræðaleg hlið sem birtist á þessu máli með gögnum þáttarins og umræður hafa verið skiptar í samfélaginu.

Málið tekur allavega sífellt nýja stefnu og fróðlegt að sjá hvernig því lýkur, burtséð frá pólitískri stöðu ráðherrans sjálfs.

Umhverfisráðherra ætlar að kæra umfjöllun til siðanefndar