Engin fyrirsögn

Tíðindi dagsins úr pólitíkinni hér á Akureyri í dag er klárlega yfirlýsing Jakobs Björnssonar formanns bæjarráðs og leiðtoga Framsóknarflokksins í bæjarstjórn, þess efnis að gefa ekki kost á sér í bæjarstjórnarkosningunum í vor. Jakob hefur setið í bæjarstjórn samfellt í sextán ár og leitt framsóknarmenn frá árinu 1994. Hann var bæjarstjóri á Akureyri árin 1994-1998 eða þar til að Kristján Þór Júlíusson tók við er nýr meirihluti tók við völdum. Á þeim tíma leiddi Jakob meirihluta Framsóknarflokks og Alþýðuflokksins. Hann féll í kosningunum 1998 enda bauð Alþýðuflokkurinn þá ekki fram. Jakob leiddi bæjarstjórnarminnihlutann 1998-2002 en frá 2002 hefur hann verið formaður bæjarráðs í meirihlutasamstarfi Sjálfstæðisflokks og Framsóknarflokks. Jakob er nú starfsaldursforseti bæjarstjórnar Akureyrar.


Líst vel á prófkjörsbaráttuna okkar. Allir að komast á fullt sýnist mér. Auglýsing með okkur öllum var í Dagskránni í gær og heppnaðist vel. Ég á grein í Vikudegi í dag og á degi.net og fleiri greinar eru framundan um málefni kosningabaráttunnar. Ég er farinn að auglýsa á Aksjón, enda er bæjarsjónvarpsstöðin okkar alveg virkilega góð og nær til almennings. Er okkur mjög nauðsynleg. Er t.d. mjög notalegt að geta þar horft á bæjarstjórnarfundi og fylgst með umræðunni um bæjarmálin. Það færir bæjarbúum hið gullna tækifæri til að fylgjast með forystumönnum sínum og vega og meta verk þeirra. Með þessu er líka tryggt að fólkið heima geti séð umræður um þau mál sem mestu skipta. Svo er fréttaþjónusta Aksjón alveg fyrsta flokks og mjög vel gerð.

Nú er svo orðið opið í Hamborg að Hafnarstræti 94 alla virka daga á milli kl. 17:00 og 19:00 fram að prófkjörinu 11. febrúar. Allir sem vilja ræða við mig eða aðra frambjóðendur eru eindregið hvattir til að koma og rabba. Það er alltaf gott að fá sér kaffisopa og ræða um málefni dagsins í dag. Svo er upplagt að ræða hitamálin og eða prófkjörsbaráttuna. Allavega mun ég verða alla virka daga fram að prófkjöri á þessum tíma og væri gaman að hitta þig og rabba á þessum tíma hafirðu áhuga á spjalli.


Í gær fór ég með góðum vini í bíó og sáum við myndina The Fog. Mikil spenna og skemmtilegt. Hitti þar mætan félaga sem nýlega er genginn í flokkinn og kominn til liðs við okkur í Verði sem vildi ræða um pólitík í hléinu. Áttum við mjög gott spjall. Fannst mjög gott að geta þar rætt um skoðanir mínar á skólamálum við hann, enda er hann nemi í tíunda bekk í Brekkuskóla og vildi heyra hvar ég væri staddur í þessum málum. Lykilorðið mitt í þeim málaflokki er stutt og laggott: "Valfrelsi í skólamálum". Ég vil sjá aukna samkeppni um þá þjónustu sem er verið að bjóða á leik- og grunnskólastigi með mismunandi rekstrarformum og valfrelsi! Frelsið er alltaf af hinu góða.


Stjórn Varðar hittist í vikunni og samþykkti eftirfarandi ályktun: "Vörður, félag ungra sjálfstæðismanna á Akureyri, lýsir yfir ánægju sinni með þau tíðindi að Iceland Express hafi í hyggju að hefja beint flug milli Akureyrar og Kaupmannahafnar nú í sumar. Jafnframt fagnar félagið tilkomu skipafélagsins Byrs, sem mun veita reglubundna þjónustu milli Akureyrar og hafna víðsvegar í Evrópu. Mun félagið hafa jákvæð áhrif á fyrirtæki á Norðurlandi sem standa í útflutningi og leiða til minni umferðar á stórum bílum á þjóðvegi 1. Stjórnin óskar aðstandendum Byrs og Iceland Express góðs gengis."


Má að lokum til með að hrósa Sjóvá fyrir góða og vel gerða auglýsingu sem birst hefur nýlega. Þar hljómar smellurinn God Only Knows með The Beach Boys. Vel gerð og fagmannleg auglýsing. God Only Knows er annars eitt af mínum uppáhaldslögum. Í júní 2005 valdi ég það sem eitt af tíu bestu í mínum huga. Umsögnin var þessi: "alltaf heillandi og hugljúft".


Á sunnudaginn mun Sinfóníuhljómsveit Norðurlands halda tónleika í Glerárkirkju klukkan 16:00. Dagskráin er mjög ljúf en það verða spilaðir Konsert í C dúr eftir Wolfgang Amadeus Mozart (250 ár eru á morgun liðin frá fæðingu hans) og Sinfónía nr. 1 eftir Johannes Brahms. Líst vel á þetta og er að hugsa um að fara og hlusta á þessi fögru tónverk.

[e-mail]

Engin fyrirsögn

Eins og flestir vita yfirgaf Oktavía Jóhannesdóttir Samfylkinguna fyrir nokkrum vikum og gekk til liðs við Sjálfstæðisflokkinn. Greinilegt er að sú ákvörðun er mjög umdeild. Í gær héldu Samfylkingarmenn í nefndum og ráðum bæjarins á fund bæjarstjórnar í Ráðhúsinu við Geislagötu og mótmæltu með því með þöglum hætti bágum hlut sínum í bæjarstjórn. Eins og flestir vita er flokkurinn nú bæjarfulltrúalaus og á engan málsvara í bæjarstjórn og bæjarráði. Greinilegt er að sú ákvörðun Oktavíu að fara í annan flokk en gerast ekki óháð mælist illa fyrir hjá fyrrum samherjum hennar. Framboðslisti Samfylkingarinnar liggur nú fyrir og hlýtur að vera erfitt fyrir leiðtoga framboðslista Samfylkingarinnar, Hermann Jón Tómasson, að eiga ekki sæti í bæjarstjórn og geta ekki komið sinni rödd að. Vissulega er sú ákvörðun Samfylkingarfólks táknræn að mæta á fundi bæjarstjórnar og fylgjast með verkum fulltrúa síns í bæjarstjórn - fulltrúa sem nú hefur skipt um flokkslit á einni nóttu.

Ef marka má vefi bæði flokksins í bænum og varaþingmannsins Láru Stefánsdóttur hefur Oktavía sært fyrrum samherja með vistaskiptunum - er það skiljanlegt enda hefur nú þeirra fulltrúi gerst málsvari meirihlutans en ekki minnihlutans sem sem hún tilheyrði í hálft fjórða ár - meginþorra kjörtímabilsins. Samkvæmt skrifum Jóns Inga Cæsarssonar formanns Samfylkingarfélags Akureyrar og sjötta manns á framboðslista flokksins við komandi kosningar er þetta ekki í eina skiptið sem Samfylkingarfólk mótmælir því að Oktavía hafi skipt um lit. Ætla þau að sitja alla fundi sem eftir lifir kjörtímabilsins og minna með nærveru sinni á sig og flokkinn sem Oktavía yfirgaf - flokk sem engan fulltrúa á lengur. Verður mjög fróðlegt að fylgjast með þessu næstu vikurnar. Annars munu væntanlega eðli mótmælanna ráðast mjög mikið af því hvort að Oktavíu Jóhannesdóttur verða falin einhver trúnaðarstörf að hálfu Sjálfstæðisflokksins í prófkjörinu í febrúar.

Ef marka má orðróminn á götunni var Oktavía lengi óánægð áður en hún yfirgaf Odd, Valgerði og Mössu í minnihlutanum. Ber Oktavíu og fyrrum samstarfsfólki hennar í kratadóbíunni ekki saman um ástæður þess að hún stökk af Samfylkingarfleytunni og stökk yfir á annað skip. Veit ég ekki um forsögu þeirrar úlfúðar og láta sem einkenndu Samfylkinguna undir forystu Oktavíu. Er óvarlegt af minni hálfu að tjá mig um þetta - verandi einstaklingur sem aldrei hef á fund í Lárusarhús farið eða tekið þátt í starfi látinna krataflokka eða arftaka þeirra, vonarneistans þeirra rauða sem tók upp krossmerki allra flokkanna fyrir nokkrum árum. En ég skynja það að mörgu sjálfstæðisfólki sé lítt um það gefið að hafa bæjarfulltrúa annars flokks sem barið hefur á Sjálfstæðisflokknum meginþorra kjörtímabilsins nú sem frambjóðanda til öruggs sætis á lista flokksins. Það blasir við - þó kannski einhverjum sé skemmt yfir flótta bæjarfulltrúans.

En ég skynjaði sárindi Samfylkingarfólks í gær - fólks sem kaus fulltrúa jafnaðarmennsku í bæjarstjórn sem varð á einni nóttu íhaldsmaður. Merkilegt nokk vissulega! Við sjálfstæðismenn fylgdumst altént á bæjarstjórnarfundi í gær með særðum krötum um leið og við horfum á fyrrum krata verða sjálfstæðismann með undraskjótum hætti.


Í gær heyrði ég fréttir austan frá Eskifirði um framtíð gömlu kirkjunnar á staðnum sem hefur verið nokkuð á reiki. Kirkjan var tekin í notkun árið 1900 og þjónaði bæjarbúum í heila öld, allt til ársins 2000. Kirkjan er órjúfanlega tengd fjölskyldu minni. Þar var Lína amma meðhjálpari í þrjá áratugi, mamma var þar skírð og fermd - mamma og pabbi giftust þar árið 1967, afi jarðsunginn þar árið 1990 og Lína amma var sú síðasta sem jarðsungin var þar, fyrir nákvæmlega sex árum, í janúar 2000. Fjöldi ættingja minna fyrir austan hafa átt þar ýmsar gleði- og sorgarstundir lífsins - rétt eins og ég sjálfur. Nú berast já þær fréttir að innrétta eigi þetta sögufræga hús í sögu Eskifjarðar sem íbúðarhús í þrem einingum. Mér varð svo brugðið að heyra af þessu að því fá engin orð lýst. Þvílíkt smekkleysi vissra manna hvernig farið er með þetta stórmerkilega guðshús. Svei mér þá ef ekki hefði verið hreinlega betra að rífa kirkjuna en velja henni þessi örlög.


Þau sögulegu tíðindi urðu í vikubyrjun að ríkisstjórn Frjálslynda flokksins í Kanada féll í þingkosningum. Með því lauk þrettán ára stjórnarferli vinstrimanna í landinu. Ég fjallaði um hægribylgjuna í Kanada í ítarlegum pistli á vef SUS í gær.

[e-mail]

Engin fyrirsögn

Þessi grein mín birtist á Íslendingi í dag:

Vöxtur í kraftmiklu sveitarfélagi

Vöxtur og uppgangur hefur verið mikill á Akureyri á undanförnum árum. Staða bæjarins hefur styrkst mjög á þessum tíma. Að mínu mati er mikilvægast að standa vörð um öflugt atvinnulíf í bænum, kraftmikla menntun og treysta undirstöður bæjarins sem öflugs samfélags sem gott er að búa í. Hér á Akureyri eru öll lífsins gæði, hér er gott að búa og samfélagið okkar er öflugt og traust. Við njótum hér allrar þeirrar þjónustu sem nauðsynleg er og öll erum við sammála um það markmið að hann verði öflugur og kraftmikill sem stærsti þéttbýlisstaðurinn á landsbyggðinni.

Það að halda vel utan um bæinn okkar og styrkja enn frekar á alltaf að vera markmið okkar og eftir því skal ávallt unnið. Það er og verður alltaf okkar helsta verkefni. Grunnurinn er að sjálfsögðu fólginn í því að skapa atvinnulífinu aðstæður til vaxtar. Forgangsmál að mínu mati eru góðir skólar, hagstætt orkuverð , góðar samgöngur, öflug þjónusta á sviði fjarskipta- og gagnaflutninga, nútímalegt stjórnkerfi og nægt framboð lóða. Mikilvægt er að vekja athygli á Akureyri sem álitlegum stað til búsetu og fyrirtækjarekstrar, standa vörð um hin öflugu sjávarútvegsfyrirtæki okkar og skilyrði þeirra til áframhaldandi vaxtar.

Akureyri þarf alltaf að iða af mannlífi þar sem uppbygging miðbæjar og nýrra hverfa skapar enn betri grundvöll fyrir fjölbreyttu og öflugu lista- og menningarstarfi. Ég vil sjá Akureyri sem öflugan valkost í skólamálum hvað snertir rekstrarform leik- og grunnskóla þar sem mismunandi hugmyndafræði er til staðar og val foreldra og nemenda þess því meira. Mikilvægt er að efla enn frekar bæjarbrag okkar og stolt íbúanna af því að vera Akureyringur. Vel hefur verið unnið í því með kynningarátakinu: Akureyri – öll lífsins gæði! Með öflugum og vel reknum miðbæ, fjölbreyttri menningarstarfsemi, framúrskarandi skólum, faglegu íþrótta- og tómstundastarfi, snyrtilegum bæ og umfram allt samkennd og samhjálp íbúanna eflum við kraftinn í sveitarfélaginu.

Þjónusta sú sem bæjarfélagið veitir skiptir líka mjög miklu máli. Við þurfum ávallt að vera tilbúin að auka gæði þjónustu okkar. Ég vil sjá aukna samkeppni um þá þjónustu sem er verið að bjóða á leik- og grunnskólastigi með mismunandi rekstrarformum og valfrelsi. Íbúar hér á Akureyri eiga í framtíðinni að geta valið að mínu mati um þjónustu hjá mismunandi aðilum. Það veitir nauðsynlegt aðhald og samkeppnin tryggir svo ennfremur aukin gæði.

Framtíðarsýn mín er að Akureyringar verði ávallt stoltir af sveitarfélaginu sínu. “Hér vil ég búa – við öll lífsins gæði” er gott slagorð sem gildir um okkur hér. Það er mikilvægt að áfram verði haldið á þeirri farsælu braut sem við sjálfstæðismenn á Akureyri höfum mótað og Akureyri verði í forystusveit sveitarfélaga á komandi árum – sem og á síðustu átta árum undir okkar forystu.

[e-mail]

Engin fyrirsögn

Þorgerður Katrín Gunnarsdóttir menntamálaráðherra, mælti fyrir frumvarpi sínu um Ríkisútvarpið á þingi í dag. Strax að lokinni framsögu ráðherrans hófust mikil átök um framtíð Ríkisútvarpsins í þingsölum. Stjórnarandstaðan er mjög ósátt við frumvarpið og mælir mjög á móti þeirri breytingu sem felst í hlutafélagavæðingunni. Við því að búast að stjórnarandstaðan reyndi að nöldra yfir stöðu mála - t.d. Samfylkingin sem hrýs hugur við að samstaða hafi náðst innan stjórnarmeirihlutans um málið svo hún geti ekki nöldrað yfir því lengur. Stærsta breytingin sem felst í frumvarpinu er eins og vel hefur áður komið fram að nýtt félag mun taka við réttindum og skyldum Ríkisútvarpsins, en stofnunin sem slík sem starfað hefur frá 1930 verður lagt niður. Hlutafélag í eigu ríkisins tekur við rekstrinum. Með þessu falla afnotagjöldin niður og mun ríkisábyrgð á rekstrinum verða aflétt. Ekki verður hægt að selja Ríkisútvarpið nema meirihluti þingsins samþykki það sérstaklega.

Þetta er annað frumvarpið á einu ári um breytingar á rekstrarformi ríkisútvarpsins, því í fyrravor kom fram á Alþingi ríkisstjórnarfrumvarp um að breyta stofnuninni í sameignarfélag. Mikilvægasta skrefið á þessari vegferð er hiklaust að hið gamalkunna miðstýringarskrímsli stofnunarinnar sem gengur almennt undir nafninu útvarpsráð mun brátt heyra sögunni til. Rekstrarstjórn kemur til sögunnar, sem taka mun á rekstrarmálum RÚV og ber loks ábyrgð á rekstrinum og tengdum málum. Ríkisútvarpið verður loksins eins og hvert annað fyrirtæki. Það hefur lengi verið einn af akkilesarhælum RÚV að þar hefur verið raðað upp í fremstu röð hverri silkihúfunni á eftir annarri sem enga ábyrgð ber á rekstrarlegum forsendum. Nú breytist það. Nú verða menn að fara að reka RÚV sem hvert annað fyrirtæki en ekki stofnun, sem er kyrfilega njörvuð á jötuna. Nú breytist það! Er það gott mál. Svo vonandi er hér komið skref í áttina að sölu á hinni algjörlega óþörfu Rás 2: loksins, loksins; segi ég!

Fyrsta umræða um frumvarpið hófst í dag og ljóst að átök verða um málið, eins og fyrr segir. Samfylkingin hefur lýst því yfir að hún vilji að RÚV verði gerð að sjálfseignarstofnun. Það er alveg ljóst að stjórnarandstaðan mun reyna að tefja afgreiðslu málsins og hefur gripið til ýmissa vopna gegn frumvarpinu. Ef marka má talið í dag má búast við að allt gerist. Hinsvegar er ljóst að frumvarpið verður samþykkt fyrir vorið og breytingar taki gildi samhliða því. Í kjölfar þess munu völd útvarpsstjóra verða meiri, enda getur hann ráðið og rekið starfsmenn án atbeina útvarpsráðsins, sem hverfur í núverandi mynd. Hinsvegar mun nýtt rekstrarráð ráða og reka útvarpsstjórann. Ef marka má pistil Össurar hræðist hann að breytingarnar leiði til sölu á Rás 2. Er ekki mjög sammála honum - eins og sést á skrifunum hér. Finnst merkilegt að lesa skrif Össurar og hræðslu hans við breytingar hjá RÚV.


Ef marka má skoðanakannanir er staða Sjálfstæðisflokksins mjög sterk í borgarmálunum núna. Staða leiðtogans, Vilhjálms Þ, er mjög vænleg og listinn er farsæll og nýtur trausts borgarbúa. Ef marka má skoðanakönnun Fréttablaðsins er Sjálfstæðisflokkurinn með yfir 50% fylgi og hlyti 9 borgarfulltrúa kjörna. Í könnun Fréttablaðsins í dag kemur fram að flestir borgarbúar vilja að Vilhjálmur Þ. verði næsti borgarstjóri. Það er gott að staða flokksins sé svona vænleg og greinilegt að borgarbúar hafa fengið nóg af R-listanum sáluga og flokkunum á bakvið hann. Annars er auðvitað ekkert fast í hendi - en ég tel að þetta standi nú allt og falli á samstöðu sjálfstæðismanna. Haldi þeir höndum saman og vinni vel saman mun sigur vinnast. Ég tel að sjálfstæðismenn viti nú að sigur er í seilingarfjarlægð og vinni saman til að tryggja þann sigur - enda eru andstæðingarnir mjög hræddir nú og hræðast þá samstöðu allra mest.


Horfði í gærkvöldi á hinn vandaða fréttaskýringarþátt NFS, Kompás. Í gær var fjallað um fuglaflensu og áhrif hennar. Hafði gaman af að sjá þáttinn. Kompás er flottur fréttaskýringarþáttur og eiga þeir hjá NFS hrós skilið fyrir vönduð og góð efnistök. Horfði svo í gærkvöldi á annan þátt íslensku sakamálamyndarinnar. Er mjög áhugavert og vekur athygli allra þeirra sem unna góðum krimma. Hlakka til að sjá seinasta þáttinn um næstu helgi og sögulokin. Nokkrir koma til greina sem morðingjarnir. Er farinn að sjá út hver hinn seki er - þó má auðvitað búast við að sú spá sé röng. Allavega þetta er vandað og vel gert - loksins almennileg íslensk sakamálasería.


Plönuð er ferð til Vínar í Austurríki fyrstu helgina í mars. Fer þar fyrir hönd SUS á þing Demyc, alþjóðasambands ungra hægrimanna. Meðal dagskráratriða er heimsókn til Wolfgang Schüssel kanslara, litið í þingið og forsetahöllina og fleira. Þetta verður því mjög góð ferð, hef aldrei til Austurríkis komið og er farinn að hlakka mjög til. :)

[e-mail]

Engin fyrirsögn

Prófkjör flokksfélaga okkar í Kópavogi var öflugt og gott að mínu mati. Listinn sem út úr prófkjörinu kom er sigurstranglegur. Það er allavega ljóst að ekki verður hægt að saka sjálfstæðismenn í Kópavogi um að úthýsa konunum sínum, enda eru sjö konur í tíu efstu sætunum. Semsagt allar konurnar sem gáfu kost á sér lenda í tíu efstu sætunum. Það er við hæfi að óska þeim til hamingju með það. Gunnar Ingi Birgisson hlaut, eins og við var að búast, afgerandi umboð flokksmanna til forystu á framboðslistanum. Hann hefur leitt flokkinn nú í sextán ár, við allar bæjarstjórnarkosningar í Kópavogi, frá árinu 1990. Hann var formaður bæjarráðs samfellt í fimmtán ár, 1990-2005, en hefur verið bæjarstjóri í Kópavogi frá 1. júní 2005. Gunnari tókst ásamt Sigurði Geirdal að koma vinstrimönnum frá völdum eftir kosningarnar 1990 og mynda sterkt bandalag til að stuðla að breytingum og eflingu bæjarins.

Sú uppbygging sem þeir leiddu saman í tæpan einn og hálfan áratug sést hvar sem farið er um bæinn. Kópavogur er kraftmikið og öflugt sveitarfélag - heldur áfram í öfluga átt undir farsælli forystu Gunnars sem bæjarstjóra. Hans staða er mjög sterk, eins og sést af úrslitum þessa prófkjörs. Það er alveg ljóst að Kópavogsbúar meta verk Gunnars - hann er öflugur forystumaður sem hefur til fjölda ára unnið að því að styrkja sitt nánasta umhverfi og leiða það af krafti. Hann er kraftmikill baráttumaður fyrir hag sveitarfélags síns, eins og sést hefur í störfum hans. Í öðru sætinu í prófkjörinu varð Gunnsteinn Sigurðsson skólastjóri. Hann kom nýr inn í bæjarstjórn árið 2002 og hlaut þá fimmta sætið á framboðslistanum. Með því fellur Ármann Kr. Ólafsson niður úr því öðru í það þriðja. Ármann er mætur maður og við hér fyrir norðan höfum kynnst honum í kosningabaráttu frá þeim tíma er hann var í starfinu hér. Það er leitt að hann hafi ekki haldið sínum hlut.

Í fjórða sætinu varð sigurvegari þessa prófkjörs, Ásthildur Helgadóttir. Hún hafði aldrei starfað í stjórnmálum er hún tók þátt í prófkjörinu og verið þekkt fyrir störf sín í íþróttamálum, en hún hefur verið fótboltakona frá æskuárum og spilað með landsliðinu í rúmlega sextíu leikjum. Það er ljóst að hún nýtur mikils stuðnings og hún mun verða flokknum góður liðsauki. Hún tekur sæti í bæjarstjórn með vorinu og það er gleðiefni að SUS-ari fari inn í bæjarstjórn í vor. Óska ég Ásthildi góðs gengis í verkum sínum í bæjarstjórn. Fimmta varð svo Sigurrós Þorgrímsdóttir. Hún hefur verið lengi í bæjarstjórn og er sem stendur á þingi í fjarveru Gunnars Birgissonar. Í sjötta sætinu varð svo Margrét Björnsdóttir varabæjarfulltrúi. Þekki ég félaga mína í Kópavogi rétt munu þeir stimpla á hana sem baráttukonuna - sjálfstæðismenn hljóta að stefna á hreinan meirihluta í vor. Óska þeim góðs gengis í kosningabaráttunni með þennan öfluga lista.


Í gærkvöldi hófst undankeppnin hér heima fyrir söngvakeppni evrópskra sjónvarpsstöðva. Vel er til keppninnar vandað að þessu sinni. Enda tilefni til - á þessu ári eru tveir áratugir liðnir frá því að við tókum fyrst þátt í keppninni. Það var í maímánuði árið 1986 sem Icy-söngflokkurinn (Pálmi Gunnarsson, Helga Möller og Eiríkur Hauksson) héldu til Bergen og fluttu Gleðibankann - glæsilegt lag Magnúsar Eiríkssonar, sem er fyrir löngu orðið sígilt. Að þessu sinni var ákveðið að halda veglega forkeppni og valdi valnefnd 24 lög af þeim 226 sem bárust í keppnina. Í gærkvöldi var semsagt fyrsta kvöldið. 8 lög flutt - 4 komust svo áfram á úrslitakvöldið þann 18. febrúar. Fannst lögin góð sem komust áfram. Sérstaklega fannst mér lög Hallgríms Óskarssonar, Trausta Bjarnasonar og Davíðs Olgeirssonar bera af. Ég allavega kaus þau - var því sáttur með að þau komust áfram.

Gert er ráð fyrir að 2 lög bætist í hóp þeirra 12 sem komast áfram þegar undankeppninni lýkur, þannig að 14 lög munu keppa til úrslita laugardagskvöldið 18. febrúar. Þá ræðst það hvaða lag verður framlag Íslands í keppninni þetta árið, sem verður haldin í Aþenu í Grikklandi. En já, mér leist vel á þetta form að keppni. Þetta var notalegt sjónvarpskvöld fyrir alla fjölskylduna. Fyrst var það Eurovision-spurningakeppnin (sem er mjög skemmtileg fyrir Eurovision-nörd eins og mig) - tókst hún vel upp og var áhugaverð. Spaugstofan átti svo flotta gríntakta í hléinu eftir að lögin höfðu verið flutt. Mjög vel heppnað kvöld hjá Sjónvarpinu. Allavega skemmti ég mér alveg konunglega og við þar sem ég var í gærkvöldi. Flest lögin voru enda mjög góð og vel flutt. Allavega þetta skapar skemmtilegt form og tryggir að keppnin verður lengri og áhugaverðari en ella.


Gestur Einar eðalAkureyringur (með stóru A-i) er nú kominn með nýjan spjallþátt með skemmtilegu ívafi, spjalli og gullaldartónlist, á Rás 1 á laugardögum sem ber heitið Til í allt. Ég hef alltaf haft gaman af Gesti Einari sem útvarpsmanni og sá mjög eftir morgunþáttum hans á Rás 2, sem með hreint ótrúlegum hætti voru slegnir af nýlega. Nú þegar ég skrifa þessa færslu snemma að sunnudagsmorgni er ég einmitt að hlusta á þáttinn hans í gær á ruv.is. Mikið er nú þægilegt að geta hlustað á það góða efni RÚV sem maður missir af þar. Hvet ég alla til að hlusta á þáttinn hans Gests Einars. Gestur hans í gær var organistinn okkar hann Eyþór Ingi. Skemmtilegt spjall og flott tónlist.


Eins og ég sagði frá í gær var fundurinn með Geir mjög vel heppnaður - gott að fá formanninn okkar hingað norður. Á mbl.is er í dag góð frétt um fundinn.

[e-mail]

Engin fyrirsögn

Það var mjög ánægjulegt að hefja daginn snemma á þessum fagra laugardagsmorgni hér nyrðra, fá sér kaffisopa og ristað brauð með osti og slettu af marmelaði á meðan að Mogginn var lesinn. Undir hljómaði morgunþáttur Gulla Helga á Bylgjunni sem var góður að vanda. Það hefur hlýnað í veðri og í stað kuldatíðarinnar er hláka. Sólin er farin að vinna á myrkrinu og hægt og rólega vinnur hún bug á myrkrinu eftir því sem líður á mánuðinn. Nú skömmu eftir hádegið er þessi færsla er rituð var ég svo að koma úr Kaupangi þar sem var haldinn vel heppnaður fundur með Geir Hilmari Haarde utanríkisráðherra og formanni flokksins okkar. Það var mjög ánægjulegt að hitta Geir og ræða við hann um málefni svæðisins okkar. Var fjölmennt á fundinum. Þar voru mættir frambjóðendur í prófkjörinu þann 11. febrúar nk. og aðrir trúnaðarmenn flokksins okkar; stjórnarmenn flokksfélaga, fulltrúaráða og kjördæmisráða. Gestir fundarins voru ennfremur þingmenn okkar, þau Halldór Blöndal og Arnbjörg Sveinsdóttir þingflokksformaður.

Á fundinum var skiljanlega mikið rætt um málefni svæðisins. Bar þar hæst atvinnumálin að sjálfsögðu. Fundarmenn báru fram góðar fyrirspurnir og Geir svaraði þeim skilmerkilega og ákveðið. Var mjög notalegt að eiga gott spjall við formanninn okkar og heyra skoðanir hans á hitamálum samtímans og málefnum svæðisins. Ég verð að lýsa yfir mikilli ánægju minni með þá ákvörðun Geirs að fara nú um landið og halda til fundar við trúnaðarmenn flokksins - ræða við þá um málefni sinnar heimabyggðar og eiga skoðanaskipti við fólk. Það eru nú 16 mánuðir til alþingiskosninga. Í þeim kosningum leiðir Geir flokk okkar. Nú er hann að fara um landið, hefja þá kosningabaráttu snemma og af krafti - heyra rödd landsmanna og kynna sér starfið víða um land. Mér finnst Geir hefja starf sitt mjög vel og hann hefur staðið sig vel að mínu mati. Geir mun vonandi leiða flokkinn til öflugs og góðs kosningasigurs þann 12. maí 2007 - leiða flokkinn í forsæti ríkisstjórnar að nýju.

Það er alveg ljóst að Geir hefur sterka stöðu - traust flokksmanna um land allt til forystu og að verða næsti forsætisráðherra. Ég vil þakka honum fyrir góðan fund og hlakka til að vinna með flokknum í kosningabaráttunni að ári undir hans stjórn.


Aðalfréttin hér nyrðra á þessum laugardegi er annars niðurstöður skoðanakönnunar sem IMG Gallup gerði fyrir Þyrpingu um viðhorf Akureyringa til hugmynda um nýtt skipulag á Akureyrarvelli. Könnunin leiddi í ljós að tæp 60% Akureyringa eru hlynntir því að Íþróttavöllurinn fari burt úr miðbænum, en 26% vilja halda íþróttavellinum í óbreyttri mynd. Eins og allir vita vill Þyrping fái svæði vallarins í sína eigu og staðsetja þar nýja Hagkaupsverslun með bílastæðum. Ég hef alltaf haft mjög ákveðnar skoðanir á þessu máli sem ég tjáði á íbúaþingi fyrir einu og hálfu ári, í september 2004, og geri aftur nú. Ég er hlynntur því að völlurinn fari en þar komi fjölskyldugarður eða einhver hófleg verslun jafnvel. En ég er ekki ginnkeyptur fyrir því að þar rísi risavaxin verslun með bílastæðarunum. Það er ekki glæsileg framtíðarsýn að malbika íþróttavöllinn fyrir bílastæðalengjum og henda risavöxnum verslunarkjarna fyrir Hagkaup. Nægar betri staðsetningar eru til fyrir það.

Ég tel framtíð vallarins vel liggja fyrir í þeim skipulagstillögum sem til umræðu eru í bæjarkerfinu. Annars kannast ég ekki við það að það hafi verið niðurstaða íbúaþingsins haustið 2004 að Hagkaup ætti að fá rétt á því að byggja risaverslunarkjarna á íþróttavellinum eins og forsvarsmenn Akureyrar í öndvegi eru að tala um. Hinsvegar er ég hlynntur því að stærri Hagkaupsverslun rísi en finna mætti betri staðsetningu fyrir það en þetta viðkvæma landsvæði í hjarta bæjarins sem íþróttavöllurinn hefur alla tíð verið. En vonandi verður hægt að vinna þetta mál í góðri samstöðu en ég má til með að ítreka mína skoðun á þessu. Í raun væri rétt að spyrja bæjarbúa hvort þeir vilji fá stærðarverslunarhús á reit vallarins og malbika svo bílastæði til hægri og vinstri. Sumir vilja það kannski en ekki ég. Ég vil leita annarra leiða við staðsetningu. Ég skil vel að Þyrpingarmenn vilji fá svæðið fyrir sig - en ég hallast frekar að því að þarna eigi að verða fjölskyldugarður.

En það eru sveitarstjórnarkosningar eftir örfáa mánuði. Afhverju ekki að færa Akureyringum valdið í hendurnar. Þeir eiga að kjósa um málið - segja sitt álit. Þetta mál er best að leysa með því að heyra skoðun bæjarbúa. Færum þeim ákvörðunarvaldið samhliða því að ganga að kjörborðinu þann 27. maí nk. Enginn vafi er á að það sé eina og réttasta leiðin í stöðunni.


Í dag halda flokksfélagar okkar í Kópavogi prófkjör sitt. Ég hef fylgst eilítið með prófkjörsslagnum. Það eru margir og góðir frambjóðendur sem þar keppa sín á milli um efstu sæti framboðslista flokksins í vor. Það er alveg ljóst að Gunnar Ingi Birgisson hefur góða stöðu til að leiða listann í vor. Hann hefur nú verið bæjarstjóri í Kópavogi í rúmlega hálft ár og staðið sig vel á þeim stóli. Staða hans og flokksins er sterk er kosningabaráttan hefst að prófkjöri loknu. Ég ætla að vona að listinn raðist vel upp og verði það sigurstranglegur að tryggja góða stöðu flokksins áfram og að Gunnar verði áfram bæjarstjóri - næstu fjögur árin.

[e-mail]

Engin fyrirsögn

Í gær birtist grein eftir Odd Helga Halldórsson bæjarfulltrúa Lista fólksins, í Vikudegi. Þar er hann að ráðast að Kristjáni Þór og ákvörðun hans um að sækjast eftir fyrsta sætinu á framboðslista flokksins fyrir komandi bæjarstjórnarkosningar. Oddur Helgi hefur verið í pólitískri kyrrþey seinustu árin - allt þetta kjörtímabil. Hann hefur passað sig á því að sitja hjá í bæjarstjórn og bæjarráði - verið lítt sýnilegur. Nú er greinilegt að Oddur Helgi er kominn á pólitíska leiksviðið, enda styttist í kosningar og stefnir á framboð. Þetta er sami status og við sáum fyrir kosningarnar 2002. Oddur Helgi fór inn við annan mann árið 2002: Marsibil Fjólu Snæbjarnardóttur. Massa hefur verið lítið sýnileg á tímabilinu og ekki verið áberandi t.d. á fundum bæjarstjórnar. En Oddur Helgi er greinilega kominn af stað og allt bendir til að Listi fólksins sé að undirbúa framboð. Þau hafa auðvitað mikið fylgi að verja - XL-ið hans Odds fékk enda tæp 20% atkvæða - er stærst minnihlutaaflanna nú.

Merkilegast í þessari kostulegu grein Odds Helga, sem einkennist af pólitísku óstuði, eru ummæli hans um ÚA. Er hann þar að væna okkar fólk um að hafa selt meirihlutavaldið í ÚA burt úr bænum. Eins og allir vita fór meirihlutastaðan í meirihlutatíð Framsóknarflokks og Alþýðuflokks - þá var Oddur Helgi bæjarfulltrúi Framsóknarflokksins. Það er ekki nema von að fólk kippist svona eilítið við að lesa þessa grein. Oddur Helgi varð vissulega uppsigað við Framsókn fyrir kosningarnar 1998 en eftir stendur að hann var í hópi framsóknarmanna þegar að söluferlið fór á fullt. Það muna annars flestir eftir hasarnum fyrir áratug þegar að kratinn Gísli Bragi tók framsóknarmennina fimm í sex manna meirihlutanum í gíslingu og fékk þá til að fylgja sinni línu. Oddur Helgi ætti að líta í sagnfræðina sína áður en hann talar meira um ÚA - alltsvo í þessum dúr. En það er greinilegt að Oddur er að vakna til lífsins og hyggur á framboð að vori. Verður fróðlegt að sjá hvort hann heldur fylginu sínu.

Þau gleðitíðindi berast nú hingað norður að Iceland Express hafi í hyggju að hefja beint flug milli Akureyrar og Kaupmannahafnar nú í sumar. Fyrsta ferðin mun verða farin undir lok maímánaðar. Er í hyggju að fljúga einu sinni í viku fram á haust og hugsanlega lengur ef áhuginn verður til staðar. Okkur hér fyrir norðan sárnaði þegar að beint flug lagðist af milli Akureyrar og Köben fyrir nokkrum árum. Vonum við auðvitað að betur muni nú ganga í þessum efnum. Ef marka má fréttir mun farmiðinn milli Akureyrar og Köben verða á eitthvað um 8000 kallinn aðra leiðina - sem er í samræmi við almennan prís hjá Iceland Express. Þetta er gleðiefni - óska okkur öllum til hamingju með þetta. Kannski maður skelli sér til Köben í sumar. :)

Fór á fund í gærkvöldi - er heim var komið var slappað af. Ég horfði á James Bond kvikmyndina Goldeneye frá 1995. Poppaði og fékk mér kók og Nóa kropp með - ekta gott. Myndin alltaf góð - Bondinn klikkar aldrei. Njósnari hennar hátignar er alveg ódauðlegur - hann átti bara mjög vel við á þessu ískalda vetrarkvöldi hér fyrir norðan í gærkvöldi.

Keypti mér í gær geisladiskinn með tónlist Mugison úr A Little Trip to Heaven - myndin er alveg frábær og tónlistin guðdómleg. Titillagið er algjör snilld. Hvet alla til að fá sér diskinn og hlusta á hann. Mugison klikkar aldrei og setur flottan svip á þessa góðu mynd Baltasar.

Jæja, þá er komið að bóndadegi. Þorrinn hafinn - öll þorrablótin framundan með allri þeirri gleði og ánægju sem þeim fylgir. :)

[e-mail]

Engin fyrirsögn

Aðalfréttin hér nyrðra eru fregnir af stofnun nýs skipafélags hér á Akureyri sem ber heitið Byr. Mun því ætlað að veita reglubundna þjónustu milli Akureyrar og hafna víðsvegar í Evrópu. Stjórnarformaður félagsins sem heitir Tommy Bönsnæs mun halda stutta kynningu á félaginu og áformum þess í dag á Hótel KEA klukkan 16:00. Mun skipafélagið hafa í hyggju að taka á leigu fimm til sex þúsund tonna gámaflutningaskip sem flutt getur á bilinu fjögur til fimm hundruð gáma í senn. Ætlunin er að halda yfirbyggingu félagsins í lágmarki til að geta tryggt lág flutningsgjöld. Er þess gætt í hvívetna að félagið hafi fjárhagslega burði til að halda úti skiparekstri með litlum tekjum fyrstu árin. Áfangastaðir félagsins erlendis verða eins og staðan er núna í Þýskalandi, Danmörku og Bretlandi. Jafnvel er íhugað að fara víðar. Til að byrja með ætla þeir hjá Byr að sigla tvisvar í mánuði á milli allra áfangastaðanna. Eins og fyrr segir mun skipafélagið hafa höfuðstöðvar sínar hér á Akureyri. Ég vil óska aðstandendum Byrs góðs gengis og fagna tilkomu skipafélagsins.

Fyrir viku kom nýr Vikudagur út fyrsta sinni í eigu nýrra aðila og undir ritstjórn Kristjáns Kristjánssonar. Tóku nýir aðilar reksturinn yfir milli jóla og nýárs og Kristján ráðinn sem ritstjóri. Kristján er reyndur fjölmiðlamaður: var fréttastjóri Dags til fjölda ára og síðasta áratuginn verið blaðamaður Moggans hér í bæ. Fyrri eigandi blaðsins, Hjörleifur Hallgríms, stofnaði Vikudag fyrir tæpum áratug, árið 1997, og stýrði því þar til eigendaskiptin urðu. Þó að ekki hafi ég alla tíð verið sammála Hjörleifi og stefnu hans við stjórn blaðsins á hann auðvitað hrós skilið fyrir að hafa haldið blaðinu úti svo lengi sem raun ber vitni. Vikudagur er gott fréttablað og nauðsynlegt okkur sem viljum fá fréttir og umfjöllun í heimabyggð. Ég hef alltaf saknað gamla Dags - þó að það hafi auðvitað verið óttalegt framsóknarblað færði það okkur fréttir og viðtöl úr heimabyggð. Það er jú efni sem við metum mikils og viljum fá. Ég vil því óska nýjum eigendum Vikudags góðs gengis!

Hef verið að lesa bókina Tími nornarinnar eftir Árna Þórarinsson. Ég fékk því miður bókina ekki í jólagjöf eins og ég hafði óskað eftir. Góð vinkona mín og spjallfélagi um pólitík lánaði mér bókina - vil ég þakka henni kærlega fyrir það góðverk sitt. Bókin var alveg virkilega góð - skemmtilegur krimmi sagður frá sjónarhóli blaðamanns dagblaðs sem staðsettur er hér á Akureyri. Sögusvið bókarinnar er að mestu leyti hér á Akureyri. Hafði ég gaman af lestri bókarinnar. Sérstaklega fannst mér ánægjulegt að sjá hversu vel Árni hafði sett sig inn í "akureysk" málefni. Hann er með alla staðhætti á hreinu og talar málið eins og hann væri á staðnum. Góð bók hjá Árna sem ég hvet alla áhugamenn um spennusögur að lesa. Mér fannst þó skondið að sjá lýsingar hans á málefnum Akureyrar og Reyðarfjarðar, en bókin er að hluta staðsett þar líka. Skemmtilegar tengingar og spennandi atburðarás sem fléttist vel saman undir lokin.

Gat ekki annað en hlegið í gærkvöldi er ég horfði á Strákana á Stöð 2. Þar var Halldór Ásgrímsson forsætisráðherra, gestur Sveppa, Audda og Péturs Jóhanns. Ógeðsdrykkurinn er ekki lengur við lýði en húmorinn er enn til staðar. Forsætisráðherrann reyndi að vera skondinn og ógisslega skemmtilegur er hann tók af sér bindið og var á skyrtunni hjá skopfélögunum. Undir lokin var hann svo kominn í náttfötin og upp í rúm hjá Strákunum. Sennilega er Halldór fyrsti forsætisráðherra sögunnar sem kemur fram á náttfötunum. Það var allavega skondið í gær að sjá einn flokksleiðtoga með blaðamannafund í rúminu og annan að sprella í rúminu með skopfélögunum á Stöð 2. Eru kosningar í nánd - Halldór minn? :)

Endilega hafið samband - netfangið er: [e-mail]

Engin fyrirsögn

Hef fengið góð viðbrögð á skrifin og umfjöllunina hér seinustu daga - mjög ánægjulegt að heyra góðar óskir og kveðjur af þessu tagi. Met það mjög mikils. Þakka góð orð um myndirnar líka - þær voru teknar í Vaðlaheiði í síðustu viku og tryggja góðan bakgrunn - Akureyrina okkar gömlu og góðu. :)

Í gærkvöldi var Sigbjörn Gunnarsson fyrrum krataþingmaður og sveitarstjóri, í viðtali við fréttastofu NFS. Þar var hann galopinn á bæði sveitarstjórnarpólitík og útilokaði meira að segja ekki landsmálaþátttöku fyrir Sjálfstæðisflokkinn. Það er merkilegt að fylgjast með þessu. Hann hefur nú verið í flokknum í eitthvað um tvær vikur en er þegar kominn með ambisjónir í að komast á þing í prófkjörsbaráttu fyrir sveitarstjórnarpólitík. Það er ekki nema von að fólk úti í bæ sé ráðvillt yfir þessum yfirlýsingum í fjölmiðlum frá kratanum fyrrverandi. Það er ágætt að hafa metnað fyrir sjálfu sér vissulega en það er ekki fjarri því að fólk sem hefur verið að vinna fyrir flokkinn til fjölda ára og verið mjög öflugt í innra starfinu mjög lengi finnist fátt til þessara fjölmiðlayfirlýsinga Sigbjörns koma. Kannski fer Oktavía að bætast við á næstu dögum og tala um þingframboð? Ja, hver veit. Maður á orðið von á öllu frá landflótta krötunum hérna.

Má til með að skrifa eilítið um sjónvarpsmyndina Allir litir hafsins eru kaldir, sem sýnd er nú á sunnudagskvöldum í Sjónvarpinu. Fyrsti þátturinn var seinasta sunnudag. Þessir þættir lofa góðu. Þeir eru allt í senn flott myndunnir, vel leiknir og leikstýrðir - svo er greinilegt að nostrað hefur verið við ytra útlit myndrammans. Þetta er allt fyrsta flokks. Þarna fer Marta Nordal að mínu mati algjörlega á kostum sem lögreglukonan Jara - það er ekki eins og hún sé að leika og sé bara hún sjálf. Selma Björns átti flotta innkomu sem kærasta lögmannsins. Svo fannst mér Þórunn Lárusdóttir standa sig vel og hún náði að skapa allt annan karakter en hún hefur áður túlkað. Hilmir Snær stendur sig vel sem lögmaðurinn. Svo var gaman að sjá gömlu brýnin Helgu Jóns og Pétur Einars fara á kostum í smáum en góðum rullum föður lögmannsins og konu hans. Þetta lofar góðu - ég hef alltaf haft gaman af krimmasögum og þetta er því eitthvað sem ég hef mjög gaman af.

Í dag var Vilhjálmur Egilsson ráðuneytisstjóri og fyrrum alþingismaður, ráðinn framkvæmdastjóri Samtaka atvinnulífsins í stað Ara Edwald sem tekur við sem forstjóri 365-miðla frá og með næstu mánaðarmótum. Vilhjálmur er ekki ókunnur þessum geira en hann vann lengi hjá Vinnuveitendasambandi Íslands, forvera SA, og var framkvæmdastjóri Verzlunarráðs Íslands í 15 ár, 1987-2003. Hann var alþingismaður Sjálfstæðisflokksins 1991-2003 og ráðuneytisstjóri frá árinu 2004. Vilhjálmur stóð sig vel á þingi þann tíma sem hann var þar og var öflugur talsmaður flokksins í efnahags- og viðskiptanefnd. Fannst mér illa komið fram við hann í prófkjöri flokksins í Norðvestri árið 2002 og taldi að hann hefði átt að fá sæti á lista flokksins. Reyndar munaði mjög litlu að hann hefði leitt listann.

Steingrímur J. hélt blaðamannafund í dag af sjúkrasæng á Landsspítalanum. Er ánægjulegt að sjá hversu hress hann er miðað við allar aðstæður. Vonandi er að hann nái sem fyrst fullum bata og komist aftur í stjórnmálaumræðuna. Satt best að segja er þingumræðan ekki nema svipur hjá sjón án Steingríms J.

Engin fyrirsögn

Það er ljóst að stefnir í spennandi og gott prófkjör þann 11. febrúar - eins og ég spáði hér í gær þegar ég ræddi um málefni þess og kratana sem til okkar hafa komið. Alls gefa 20 manns kost á sér í prófkjörinu, þar af eru sex konur en við karlarnir erum 14 talsins. Eins og ég sagði hér í gær lýst mér vel á það sem framundan er - er vel til í slaginn. Það er auðvitað visst áhyggjuefni að ekki skuli fleiri konur taka þátt í þessu prófkjöri. En þarna eru sterkur konur eins og Ella Magga, Sigrún Björk og Jóhanna Hlín sem allar hafa tekið þátt í starfinu innan flokksins um nokkurt skeið og vel þekktar fyrir störf sín þar. Þarna eru Kristján Þór og Doddi Blomm sem hafa setið í bæjarstjórn alla meirihlutatíð okkar. Doddi hefur reyndar verið í bæjarstjórn frá 1994 og fór þá í gegnum síðasta prófkjör sem þá var haldið. Hann er sá eini af okkur sem hefur farið í gegnum prófkjör hér hjá flokknum í bænum.

Athygli vekur að allir varabæjarfulltrúar flokksins gefa ekki kost á sér í prófkjörinu. Það stefnir því auðvitað í mikla uppstokkun á fólki, enda taka þátt þrír af fjórum efstu á listanum 2002 - en aðrir ekki af átta efstu. Þarna er svo auðvitað líka mikið af nýju fólki sem ekki hefur starfað af neinu ráði og fögnum við auðvitað því að fólk hafi áhuga á að starfa innan Sjálfstæðisflokksins - þó aldrei hafi það sést í Kaupangi eða í innsta starfinu. Svo eru jú þarna fyrrum alþingismaður Alþýðuflokksins og bæjarfulltrúi Samfylkingarinnar meginþorra kjörtímabilsins - hef fjallað um þau. Hjalti Jón skólameistari er svo kominn þarna og ætti það að vekja skemmtilega umræðu um það hvort að menn í hans stöðu eigi að vera í framboði. Já það stefnir í hörkuspennu bara tel ég og ljóst að baráttan verði bara nokkuð skemmtileg með að fylgjast - bæði fyrir okkur sem tökum þátt og aðra sem fylgjast með en hafa áhuga á stjórnmálaumræðunni.


Frétt dagsins er auðvitað að Steingrímur J. Sigfússon alþingismaður og formaður VG, slasaðist þegar að bíll hans valt í Bólstaðahlíðarbrekku ofan við Húnaver seint í gærkvöldi. Var Steingrímur einn í bílnum. Var allnokkur hálka á þessum slóðum og hríðarkóf. Bíllinn fór nokkrar veltur - var þyrla Landhelgisgæslunnar send frá Reykjavík til að sækja Steingrím, sem fluttur var til Blönduóss. Er Steingrímur J. illa brotinn, ekki þó mænuskaddaður sem betur fer, en hann hafði meðvitund allan tímann. Er guðs mildi að Steingrímur J. slapp þetta þó vel miðað við aðstæður. Brá mér mjög að heyra í morgun af slysinu sem Steingrímur lenti í, enda veit ég að brekkan er ekki góð í vetrarveðrum. Foreldrar eins vinar míns lentu þar í slæmu slysi fyrir um áratug og slösuðust illa - þekki því vel hversu vond hún er á þessum árstíma. Hugur okkar allra er hjá Steingrími og fjölskyldu hans á þessari stundu - vona ég að hann nái sem fyrst góðri heilsu.

Erlend pólitík er mér alltaf mjög hugleikin. Nú er aðalfréttin erlendis auðvitað staða stjórnmálanna í Mið-austurlöndum. Ariel Sharon forsætisráðherra Ísraels, er enn fárveikur og í dái á sjúkrahúsi í Jerúsalem - ljóst er að hann mun ekki eiga afturkvæmt í stjórnmálaforystu. Á meðan ljær pólitísk forysta landsins, undir forystu Ehud Olmert, máls á friðarviðræðum við stjórn Palestínu undir forystu Mahmoud Abbas. Er ljóst að spennandi tímar eru framundan, enda eru þingkosningar framundan bæði í Ísrael og Palestínu. Ef marka má kannanir nú bendir flest til þess að Kadima (Áfram!) vinni kosningarnar og Olmert verði forsætisráðherra að þeim loknum. Þó að aldrei hafi reynt á Olmert sem þjóðarleiðtoga fyrr en nú blasir við að hann njóti trausts Ísraela. Fyrst og fremst virðast átakalínur í ísraelskri pólitík verða um hvort semja eigi við Palestínumenn. Í dag skrifaði ég ítarlegan pistil um stöðu stjórnmálanna þarna á vef SUS - alltaf gaman að velta fyrir sér erlendri pólitík og skrifa um.

Golden Globe-verðlaunin voru afhend í nótt. Einhverntíma hefði ég eytt miklum tíma í analísum um niðurstöðurnar en nú gefst ekki mikill tími. Ætla að skauta svona yfir það helsta sem stóð eftir nóttina. Kvikmyndin Brokeback Mountain var valin besta dramatíska kvikmyndin - hlaut alls fjögur verðlaun. Leikstjórinn Ang Lee var verðlaunaður fyrir sitt verk. Myndin sem fjallar um tvo samkynhneigða kúreka á sjöunda áratugnum hefur skapað umtal í Bandaríkjunum, sérstaklega í suðurríkjunum þar sem hún víða fæst ekki sýnd. En myndin er rómuð sem falleg ástarsaga um sannar tilfinningar og ást sem lifir í skugga fordóma. Hlakka til að sjá hana. Philip Seymour Hoffman var verðlaunaður fyrir hlutverk sitt í Capote. Joaquin Phoenix og Reese Witherspoon voru verðlaunuð fyrir hlutverk sín í kvikmyndinni Walk the Line, sem fjallar um líf Johnny Cash. Felicity Huffman, var svo verðlaunuð fyrir hlutverk sitt í Transamerica.

Valdir partar af verðlaunaafhendingunni verða sýndir á Stöð 2 í kvöld - hvet alla sem ekki gátu skiljanlega vakið í nótt að horfa á þá það helsta sem uppúr stóð eftir kvöldið. Það er ljóst að fjöldi góðra mynda eru á leiðinni upp á skerið og nóg af úrvalsefni fyrir okkur kvikmyndaáhugafólk að sjá - sérstaklega hlakkar mér til að sjá Munich og Walk the Line - enda Johnny Cash lengi í uppáhaldi hjá mér. Allar upplýsingar um Golden Globe 2006.

Engin fyrirsögn

Ég vil þakka fólki fyrir góð viðbrögð á bloggfærsluna og pælingar sem þar komu fram. Bloggið verður eins og fyrr segir í dag öðruvísi fram að prófkjöri. Þá sleppum við fastaliðunum en höldum okkur í pælingum um prófkjörið og pólitík - styttri færslur og snarpari. Þakka góð viðbrögð - vona að þið fylgist með næstu vikurnar.

Í dag fylgdist ég með blaðamannafundi forsætisráðherrans í Ráðherrabústaðnum á NFS. Kom svosem fátt nýtt fram þar. Þingið kemur jú saman á morgun - þar verður úrskurður kjaradóms tekinn fyrir og hækkunin felld úr gildi. Munu laun forsetans lækka til samræmis við þá prósentulækkun og aðrir verða fyrir. Líst vel á þetta. Það er alveg ljóst að sátt ætti að nást um þessar breytingar og væntanlega verður það fljótafgreitt að taka þetta fyrir. Er sammála mati forsætisráðherrans á málefnum RÚV. Það er mikilvægt að frumvarp þar um verði afgreitt sem fyrst og mál í stofnuninni færð til nútímans - þó fyrr hefði verið. Eftir sem áður er mikilvægt að nýtt fjölmiðlafrumvarp komi til sögunnar nú á vorþingi og verði að lögum fyrir lok þinghalds - er mikilvægt að frumvarp verði byggt á fjölmiðlaskýrslunni frá því í fyrra og samstaða náist um málið milli allra flokka. Þó að ég sé ekki alltaf sammála honum Halldóri má hann eiga það að hann stendur sig vel með þessa blaðamannafundi - þeir eru mjög af hinu góða.

Svo stendur auðvitað upp úr seinustu daga ákvörðun borgaryfirvalda um að draga sig út úr viðræðum um kaup ríkisins á eignarhluta borgarinnar og Akureyrarbæjar í Landsvirkjun. Er alveg greinilegt að ástæðan er sú að hinn steindauði R-listi hefur engan kraft í að klára málið og frestar því fram yfir kosningar. Greinilegt er að VG er þrándur í götu málsins - bæði Árni Þór og Björk Vilhelms hin brottflutta vinstri græna sem flúði í fang Samfylkingarinnar og kallar sig óháða í prófkjörinu. Kostulegt, ekki satt? R-listavofan hefur ekkert afl í að klára málið greinilega. Nú sé ég svo í dag að Valgerður iðnaðarráðherra er að senda R-listanum pillu í pistli á vef sínum - það er vel skiljanlegt. Borgin bað um viðræðurnar en hrökklast frá þessu. Mjög merkilegt. Annars á Akureyrarbær að halda sínu striki og selja hlut sinn. Þó að R-listinn hafi ekki pólitískan mátt til að feta í söluátt eigum við Akureyringar að halda ótrauð okkar stefnu og klára málið fyrir kosningar.

Sé svo í dag að menn eru að rífast um prófkjörsúrslitin í Garðabæ. Það er vel skiljanlegt - hlutur kvenna er afspyrnuslakur. Engin kona í vonarsætunum fjórum og Laufey Jóhannsdóttir, sem setið hefur í bæjarstjórn frá 1990, beið algjört afhroð. Þessi niðurstaða er dapurleg, enda eru margar efnilegar konur þarna, t.d. Ragnhildur Inga, Ingibjörg og Laufey. Er þegar farið að tala um að breyta röðun listans. Er það vissulega hægt í ákvörðun fulltrúaráðs - en umdeildanlegt. Enda varla líklegt að einhver vilji afsala sér öruggu bæjarfulltrúasæti sem vannst í prófkjöri. Þetta er jú einu sinni val prófkjörs og erfitt upp að stokka. En þeir í Garðabænum taka ákvörðunina. Hitt er svo annað mál að það er rétt hjá Jóni Guðmundssyni formanni fulltrúaráðs, að þetta er ekki seljanlegur listi. Ákvörðun um uppstokkun er því ekki ólíkleg, þykir mér - þó það gæti kostað einhver særindi.

Í kvöld verða Golden Globe-verðlaunin afhend í Los Angeles. GG er ein af þeim verðlaunaafhendingum sem eru ómissandi fyrir kvikmyndafíkla eins og mig - þau hafa enda oft haft mikið um að segja hverjir fá Óskarinn í mars. Það er pottþétt að ég reyni að vaka fram á nótt og horfa á þetta. Ekta popp og kók-kvöld framundan við að horfa á afhendingu Gullhnattarins. Góða skemmtun (sérstaklega aðrir bíófíklar). :)

Engin fyrirsögn

Framboðsfrestur í prófkjöri okkar sjálfstæðismanna á Akureyri sem haldið verður laugardaginn 11. febrúar nk. rennur út klukkan 17:00 í dag. Má búast við góðri þátttöku - spennandi prófkjöri. Skilaði ég framboði mínu inn til formanns kjörnefndar í síðustu viku og var því vel tímanlega í þessu öllu. Líst mér vel á slaginn framundan - ég er til í slaginn allavega. Eins og fólk sér hefur bloggið tekið eilitlum breytingum og mun það til prófkjörs einkennast af stuttum punktum og pælingum. Heimasíðan mun taka stakkaskiptum í vikunni og verða miðstöð mín í baráttunni. Hvet ég alla sem vilja heyra í mér til að senda mér póst - mikilvægt að heyra í fólki og þeir sem vilja tjá sig um baráttuna eða málefni hennar eru eindregið hvattir til að hafa samband.

Um helgina fór ég sem oftar niður í miðbæ og fór þar á kaffihús. Þar hitti ég mætan mann sem tók mig tali og spurði mig með alvarlegum blæ hvort að allt væri að fyllast hjá okkur af landflótta krötum úr Samfylkingunni. Það er ekki nema von að fólk spyrji sig að því eins og staða mála er orðin. Oktavía hefur flúið Samfylkinguna sem hún var kjörin í bæjarstjórn fyrir árið 2002 og komin til okkar og í framboð núna ef marka má fréttir gærdagsins. Sigbjörn fyrrum krataþingmaður hefur svo bæst við ennfremur - kominn úr sveitasælunni við Mývatn þess albúinn að reyna fyrir sér eftir langa pólitíska útlegð. Fleiri kratar eða nýtt fólk er komið til okkar líka - fólk sem aldrei hefur starfað fyrir Sjálfstæðisflokkinn en vill einhverra hluta vegna spreyta sig hjá okkur. Er sjálfsagt að fagna öllu því fólki sem flýr vinstrimennsku og gengur til fylgilags við sjálfstæðisstefnuna - gengur til liðs við stærsta flokk landsins.

Merkilegt var annars að sjá framboðstilkynningu Oktavíu Jóhannesdóttur sem mun takast á við mig og fleiri um þriðja sætið. Þar telur hún upp afrek sín fyrir Alþýðuflokkinn sáluga og Samfylkinguna. Það er óneitanlega skemmtilega skondið að frú Oktavía sleppir því algjörlega að geta þess að hún fór í framboð með Árna Steinari Dalvíkingi og fyrrum græningjaþingmanni með meiru í bæjarstjórnarkosningum árið 1990 og munaði litlu að hún fylkti liði með honum í þingframboð með glans árið 1991. Það er þó auðvitað af litlu að státa í verkum fyrir Sjálfstæðisflokkinn, enda hefur hún aðeins verið þar í tvær vikur, eða síðan að hún hélt frægan blaðamannafund með Kristjáni Þór í Hamborg. Svo er kominn til liðs við okkur hinn frægi smalari Sigbjörn Gunnarsson. Flestir muna annars hvernig fór fyrir honum eftir að hafa sigrað í samfylkingarprófkjörinu 1999 - vék þar til hliðar fyrir Svanfríði Jónasdóttur.

Sú saga hefur farið hátt og verður kannski rifjuð eitthvað upp í þessu prófkjöri - hver veit? Fleiri vinstrimenn eru komnir til liðs við okkur og ætlast til að verða lyft upp til skýjanna af flokksfólki sem hér hefur haldið starfinu uppi með þeim þunga sem fylgir. Verður fróðlegt hvort það fari svo. Sjáum til hvernig þeim gengur. Eflaust munu margir í baráttunni á næstu vikum rifja upp ummæli og takta Oktavíu gegn okkur sjálfstæðisfólki. Fagna ég öllum þeim sem rifja upp tal hennar og pælingar innan Samfylkingarinnar gegn þeim sem hún er nú að koma sér í mjúkinn hjá. Það er annars engin furða að fólk sem er orðið landlaust í pólitík reyni fyrir sér - reyni að koma sér burt af pólitískri eyðieyju. Þó það nú væri. Það er sennilega betra að reyna fyrir sér þarna en í eymdinni á vinstrivængnum.

Ég hlakka til baráttunnar við landlausa krata og fleiri. Næstu daga heyrum við listann yfir prófkjörskandidata og þá getum við haldið í baráttuna af krafti. Þetta verður spennandi.

Engin fyrirsögn

Ritstjórar DV segja af sér

Báðir ritstjórar DV, Jónas Kristjánsson og Mikael Torfason, sögðu af sér í dag og voru þeir Páll Baldvin Baldvinsson og Björgvin Guðmundsson ráðnir í þeirra stað. Með því lauk miklum umhleypingatímum í samfélaginu - byltingu fólksins gegn DV og vinnubrögðum blaðsins seinustu árin. Óhætt er að segja að samfélagið hafi skekist vegna "fréttamennsku" DV seinustu vikuna. Hafði blaðið reyndar virkað sem ein tímasprengja allt frá því að gerðar voru breytingar á blaðinu og ritstjórnarstefnu þess um leið og nýir eigendur tóku við eftir gjaldþrot gamla DV árið 2003. Mikael Torfason og Illugi Jökulsson tóku við ritstjórn blaðsins - segja má að það hafi þá algjörlega umpólast. Var um að ræða sorpblaðamennsku, hannaða af fyrrnefndum ritstjórum og viðbætt með innkomu Jónasar Kristjánssonar, sem var ritstjóra gamla DV á árunum 1981-2001 og aftur frá 2005, og Reynis Traustasonar.

Ekki ætla ég að fara mörgum orðum um það mál sem varð til þess að þjóðinni varð nóg boðið. Sjálfsmorð Gísla Hjartarsonar á Ísafirði er mikill harmleikur - það hlaut að slíku að koma eftir "fréttamennsku" DV. Forsíða þriðjudagsblaðs DV og umfang umfjöllunarinnar var sorgleg og fór langt yfir strikið - allt sómakært fólk blöskraði. Þjóðfélagið tók við sér og stíflan brast. Fólk fékk algjörlega nóg. En þetta er sorgleg þróun - sem vert er að hugsa um. Hvert stefnir þjóðfélagið okkar eiginlega? Er aftaka án dóms og laga aftur komin til sögunnar? Þetta er spurningin sem við fengum svar við í vikunni og vakti okkur vonandi öll til umhugsunar. Það varð allavega svo í mínu tilfelli. Mér brá og viðbrögð mín voru aðallega reiði og gremja yfir vinnubrögðum þessa blaðs - þetta varð kornið sem fyllti mælinn.

Oft hafði blaðið vakið athygli fyrir harðskeytta ritstjórnarstefnu. Fyrsta merki þess sást strax í desember 2003 þegar að DV birti nafn og mynd af manni frá Patreksfirði sem sakaður hafði verið um kynferðislega misnotkun á börnum. Var myndbirtingin réttlætt með því að um væri að ræða mikilvægt mál, fréttaefni sem komi öllum við. Var þetta ljótur blettur á ferli þessa blaðs og slæm slóð sem þarna var fetuð. Ritstjórar blaðsins vörðu þetta strax þá með lélegum rökum, ómögulegt var að verja þessa gjörð með góðu. Það vissu ritstjórar blaðsins. Um var einungis að ræða auglýsingabragð til að selja blaðið. Leitt var að menn gripu til svona ljótra ráða til að auka söluna. Ekkert annað var jú reynt með þessu. Þessi tegund blaðamennsku er ekki geðsleg og vonandi hverfur hún með þessum breytingum sem nú hafa orðið með því að Jónas og Mikael hrökklast í burtu frá sneplinum.

Í kjölfar umfjöllunar DV um mál Gísla Hjartarsonar var ákveðið að efna til undirskriftasöfnunar gegn ritstjórnarstefnu DV. Var hún samstarfsverkefni Deiglunnar, Sambands ungra sjálfstæðismanna, ungra jafnaðarmanna, stúdentaráðs HÍ, Sambands ungra framsóknarmanna, Tíkarinnar, Múrsins, ungra frjálslyndra, ungra vinstrigrænna, Heimdallar, Vöku, Röskvu og H-listans. Söfnun undirskrifta stóð í nákvæmlega tvo sólarhringa. Alls skráðu 32.044 einstaklingar nafn sitt við áskorun þessara aðila um endurskoðun ritstjórnarstefnunnar. Þetta er því mjög breið samstaða sem kom fram í þessari undirskriftasöfnun. Samfélagið logaði vegna málsins og vel kom fram afgerandi vilji almennings þess efnis að þessi tegund blaðamennsku hafi náð endastöð. Þetta var kornið sem fyllti mælinn.

Ánægjulegt var svo að sjá alla þingflokka lýsa yfir stuðningi við undirskriftasöfnunina og fordæma vinnubrögð DV. En nú eru ritstjórarnir farnir eftir lélega framgöngu sína og að hafa misst trúnað almennings. Komu örlög þeirra engum á óvart. En nú er það Björgvins og Páls Baldvins að taka við blaðinu. Líst mér vel á hina nýju ritstjóra á DV. Vona ég að þeir vinni af krafti í sínum störfum og færi blaðið rétta leið - burt frá sorpblaðamennskunni og í áttina að eðlilegri fréttamennsku. Það má telja öruggt að DV fari nú eftir siðareglum Blaðamannafélagsins, enda er Björgvin Guðmundsson ritstjóri DV, í stjórn BÍ. Málinu sem skekið hefur samfélagið er því lokið með því að Jónas og Mikael taka pokann sinn. Er það mikið gleðiefni!

Saga dagsins
1268 Gissur Þorvaldsson jarl, lést, sextugur að aldri - einn af mestu höfðingjum hérlendis á 13. öld.
1830 Friðrik Sigurðsson og Agnes Magnúsdóttir, sem myrtu Natan Ketilsson og Pétur Jónsson, voru tekin af lífi í Vatnsdalshólum í A-Húnavatnssýslu - þetta var síðasta aftakan sem fram fór hér á Íslandi.
1940 Einar Benediktsson skáld, lést, 75 ára að aldri, að heimili sínu í Herdísarvík. Einar var jarðsettur í þjóðargrafreitnum á Þingvöllum, 27. janúar, fyrstur allra. Einar Ben var eitt af bestu skáldum okkar.
1976 Breska skáldkonan Agatha Christie, lést, 86 ára gömul - var einn besti spennusagnahöfundurinn.
1993 Samningur um aðild Íslands að hinu Evrópska efnahagssvæði (EES), var samþykktur á Alþingi eftir lengstu umræðurnar í þingsögunni, alls um 100 klukkustundir. Samningurinn tók gildi 1. janúar 1994.

Snjallyrðið
Ef ætlarðu að svívirða saklausan mann,
þá segðu aldrei ákveðnar skammir um hann,
en láttu það svona í veðrinu vaka
þú vitir, að hann hafi unnið til saka.

En biðji þig einhver að sanna þá sök,
þá segðu, að til séu nægileg rök,
en náungans bresti þú helst viljir hylja,
það hljóti hver sannkristinn maður að skilja.

Og gakktu nú svona frá manni til manns,
uns mannorð er drepið og virðingin hans,
og hann er í lyginnar helgreipar seldur
og hrakinn og vinlaus í ógæfu felldur.

En þegar svo allir hann elta og smá,
með ánægju getur þú dregið þig frá,
og láttu þá helst eins og verja hann viljir,
þótt vitir hans bresti og sökina skiljir.

Og segðu " Hann brotlegur sannlega er,
en syndugir aumingja menn erum vér,
því umburðarlyndið við seka oss sæmir.
En sekt þessa vesalings faðirinn dæmir."

Svo legðu með andakt að hjartanu hönd.
Með hangandi munnvikum varpaðu önd,
og skotraðu augum að upphimins ranni,
sem æskir þú vægðar þeim brotlega manni.

Já, hafir þú öll þessi happasælu ráð,
ég held þínum vilja þá fáir þú náð
og maðurinn sýkn verði meiddur og smáður.
En máske, að þú hafir kunnað þau áður!
Páll J. Árdal skáld (1857-1926) (Ráðið)

Engin fyrirsögn

Engin fyrirsögn

Staðfestingarferli vegna skipunar
Samuel Alito í hæstarétt Bandaríkjanna

Í gær kom Samuel Alito fyrir dómsmálanefnd öldungadeildar Bandaríkjaþings og með því hófst staðfestingarferli vegna skipunar hans í Hæstarétt Bandaríkjanna. Var hann skipaður til setu í réttinum af George W. Bush forseta Bandaríkjanna, þann 31. október sl. sem eftirmaður Söndru Day O'Connor, sem tók fyrst kvenna sæti í réttinum árið 1981. Var hann þriðja dómaraefnið sem skipað var í stað Söndru. Upphaflega, fyrr í sumar, í kjölfar afsagnar Söndru hafði forsetinn skipað John G. Roberts sem dómara við réttinn. Í kjölfar andláts William H. Rehnquist forseta Hæstaréttar, í septemberbyrjun, var Roberts skipaður í stað hans og var staðfestur sem forseti réttarins í lok september. Þá skipaði forsetinn Harriet Miers yfirlögfræðing Hvíta hússins, sem dómara. Hætti hún að lokum við að þiggja útnefninguna er sýnt varð að henni skorti nauðsynlegan meirihluta í dómsmálanefnd öldungadeildar Bandaríkjaþings og í þingdeildinni sjálfri.

Andstaða við hana innan hins íhaldssama arms Repúblikanaflokksins varð henni að falli - án þess stuðnings var borin von að hún hlyti tilskilinn stuðning í þinginu. Því fór sem fór. Brotthvarf Miers frá ferlinu og erfiðleikar hennar í stöðunni markaði vandræðalegt ástand fyrir forsetann. Það hefur enda jafnan þótt vandræðalegt fyrir sitjandi forseta þegar dómaraefni hans er ekki staðfest af þinginu eða viðkomandi neyðist til að bakka frá ferlinu vegna þess að ferlið er strandað eða sá sem forsetinn hefur valið missir baklandið. Tók Bush forseti engar áhættur í valinu á næsta dómaraefni. Skipaður var tryggur hægrimaður - umfram allt tryggur íhaldsmaður í lykilmálum. Alito er mjög tryggur íhaldsmaður hvað varðar þau lykilmál sem deilt hefur verið um seinustu árin. Hann er allavega talinn svo líkur hæstaréttardómaranum íhaldssama Antonin Scalia, að hann er almennt uppnefndur Scalito. Þessi brandari hefur löngum þótt lífseigur og rifjast upp nú þegar hann hefur baráttuna fyrir staðfestingu þingsins í embættið.

Bakgrunnur Alito er mjög honum til styrktar hvað varðar stuðning repúblikana í þinginu. Bush gerði sér allavega grein fyrir því hvaða stuðning þarf til að dómaraefnið komist heilt í land - vandræði Miers og harkaleg endalok staðfestingarferlisins sannfærðu hann vel um það. Því var skipaður tryggur íhaldsmaður með þær grunnskoðanir sem forsetinn telur þurfa til að dómaraefnið nái í gegnum hið langvinna og harðvítuga ferli. Búast má við umtalsverðum deilum og hefur það sést vel seinustu vikur af tali demókrata - verið er að spila um mun meira nú en þegar Roberts kom fyrir dómsmálanefndina í haust. Nú er verið að fylla í skarð Söndru, sem var þekkt sem swing vote í réttinum. Búast má við að demókratar berjist hatrammlega gegn því að yfirlýstur íhaldsmaður taki við af Söndru. Þegar hafa þekktir demókratar tjáð andstöðu sína við Alito og líklegt að nokkur átök verði í þinginu. Um mun meira er enda verið að spila nú en þegar Roberts kom fyrir þingið.

Samuel Alito er fæddur í Trenton í New Jersey hinn 1. apríl 1950. Hann útskrifaðist frá Princeton-háskóla árið 1972 og fór í Yale lagaskólann að því loknu. Hann útskrifaðist þaðan árið 1975. Árin 1976-1977 starfaði hann sem aðstoðarmaður alríkisdómarans Leonard I. Garth. Árin 1977-1981 var Alito aðstoðardómsmálaráðherra New Jersey-fylkis. 1981-1985 var Alito aðstoðarmaður Rex E. Lee lagasérfræðings Hvíta hússins. Árin 1985-1987 var Alito aðstoðardómsmálaráðherra Bandaríkjanna, í ráðherratíð Edwin Meese. 1987-1990 var Alito saksóknari New Jersey-fylkis. Frá árinu 1990 hefur Alito verið alríkisdómari við áfrýjunardómstólinn í Philadelphiu. Hann hefur flutt tólf mál fyrir Hæstarétti Bandaríkjanna og býr því yfir víðtækri reynslu. Alito og eiginkona hans, Martha, búa í West Caldwell í New-Jersey. Þau eiga tvö börn, soninn Phil og dótturina Lauru. Eins og sést á upptalningu á verkum Alito hefur hann gríðarlega reynslu að baki og erfitt verður að finna að verkum hans sem lagasérfræðings.

Það er jafnan talin ein helsta arfleifð forseta Bandaríkjanna á hverjum tíma hverja hann tilnefnir til setu í hæstarétti Bandaríkjanna. Með vali sínu getur forsetinn sett mark sitt á stefnu réttarins og samfélagið á hverjum tíma ennfremur. Til dæmis mun það væntanlega verða ein helsta arfleifð forsetatíðar George W. Bush að á þeim tíma varð hinn 55 ára gamli John G. Roberts forseti réttarins - einkum í ljósi þess hversu ungur hann er og hversu víðtæk áhrif Roberts-rétturinn mun hafa um langt skeið. Eins og vel hefur komið fram í uppstokkunarferlinu í réttinum seinustu mánuði verður dómaraefni forsetans að hljóta staðfestingu meirihluta öldungadeildar Bandaríkjaþings og því er forsetinn auðvitað ekki einráður um það hverjir veljast þar til setu. Þingið verður að samþykkja þann kost sem forsetinn telur vænlegastan. Hæstiréttur Bandaríkjanna er stjórnlagadómstóll og því dæmir hann fyrst og fremst í málum sem rísa vegna ágreinings um stjórnarskrá Bandaríkjanna.

Bandarískir hæstaréttardómarar eru ekki bundnir neinum aldursmörkum og eru því skipaðir til dauðadags, nema þeir biðjist lausnar frá setu þar eða gerast sekir um brot á lögum og verða vegna þess að láta störfum. Gott dæmi um þetta er að William H. Rehnquist sat í réttinum í 33 ár (frá því í forsetatíð Richard M. Nixon) og var forseti hans í tæpa tvo áratugi, árin 1986-2005. Tveir dómaranna eru undir sextugu, Roberts sem er 55 ára gamall og Clarence Thomas sem verður 58 ára á þessu ári. Er Roberts var staðfestur til setu í réttinum hafði ekki losnað þar sæti í áratug, en síðast áður hafði verið skipað í réttinn árið 1994 er Bill Clinton tilnefndi Stephen Breyer. Segja má því með sanni að Alito sé einn virtasti og hæfasti dómari í Bandaríkjunum. Ólíkt Harriet Miers hafa demókratar fátt á hann er staðfestingarferlið hefst. Verður merkilegt að fylgjast með því er hann kemur fyrir dómsmálanefndina og svarar þar spurningum um lagaleg álitaefni og hitamál samtímans.

Þrátt fyrir kurteislegt yfirbragð við upphaf staðfestingarferlisins í Washington í gær var alvarleikinn áberandi. Við blasir að Arlen Specter og Patrick Leahy, leiðtogar repúblikana og demókrata í nefndinni, eru ósammála um ágæti hins tilnefnda og búast má við að demókratar verði mjög aðgangsharðir í spurningum. Þegar er ljóst að demókratarnir Dianne Feinstein, Edward Kennedy og Charles Schumer muni verða mjög hvassir í ferlinu og hafa hótað því að reyna að hindra staðfestingarkosningu fyrir deildinni svari hann ekki spurningum um mikilvæg málefni eins og málefni samkynhneigðra og fóstureyðingar. Búast má við að Alito fái á sig margar krefjandi spurningar og sótt verði að honum með því. Greinilegt er að andstæðingar íhaldsgildanna eru að búa sig undir átök í samfélaginu og spurning hvað gerist með demókratana sem helst hafa haldið uppi andmælum við tilnefningunni. Það er alveg ljóst að ef átök verða vegna skipanarinnar fyrir þinginu muni þau verða mjög harkaleg.

Frjálslyndir telja Samuel Alito ekki viðeigandi dómaraefni - hann hafi að þeirra mati lagst gegn mál- og trúfrelsi og gæti þrengt lagaramma þess sem dómari. Þá segir hópur, sem berst fyrir frjálsum fóstureyðingum, að Alito sé alfarið andvígur fyrri afstöðu Hæstiréttar til fóstureyðinga. Frægt er málið, Roe v. Wade frá árinu 1973, þar sem réttur kvenna til fóstureyðinga var staðfestur. Nýir dómarar gætu snúið þeim tímamótadómi og hert lagarammann til muna. Þó hefur Alito ekki fullyrt í fjölmiðlum að það verði að gera. En demókratar óttast stöðu mála með Alito sem oddaatkvæðið í mikilvægum málum er hann hefur tekið sæti Söndru Day O'Connor. En nú ræðst hvert ferlið stefnir. Það er þó alveg ljóst að staðfestingarferlið mun verða gegnumskrifuð pólitík, ef harka leggst í málið. En almennt talið af sérfræðingum sem tjáð hafa sig í fjölmiðlum að líkur á hvassyrtu staðfestingarferli hafi aukist til muna. Muni aðgangsharka demókrata í ferlinu í dómsmálanefndinni velta mjög á svörum Alito er demókratarnir fara að spyrja um hitamálin fyrrnefndu.

Tel ég viðbúið að búast megi við átökum fyrir þinginu vegna skipunar Bush forseta á kaþólikkanum Alito í Hæstarétt Bandaríkjanna. Þar verða átakapunktarnir klassískir - en umfram allt harðir. Þar takast á grunnpólar, með og á móti íhaldssömum sjónarmiðum. Verður sá slagur mjög hvass, enda mun sá sem tekur sæti Söndru Day O'Connor í réttinum hafa umtalsverð áhrif á skipan mála á komandi árum og framvindu hitamálanna sem allir þekkja. Því má búast við að það muni reyna mjög bæði á Alito, sem berst fyrir staðfestingu þingsins, og ekki síður George W. Bush, sem skipar hann til setu í réttinum.

Saga dagsins
1884 Ísafold, sem varð fyrsta stúka góðtemplara, var formlega stofnuð í Friðbjarnarhúsi á Akureyri.
1942 Ford bílaverksmiðjurnar hófu framleiðslu á jeppum, sem varð notaður fyrst sem farartæki í hernaði. Jeppinn náði fljótt miklum vinsældum og hefur síðan orðið eitt helsta farartæki samtímans.
1944 Laxfoss strandar í byl út af Örfirisey - mannbjörg varð. Endurbyggt en fórst síðar við Kjalarnes.
1957 Harold Macmillan fjármálaráðherra Bretlands, tekur við embætti sem forsætisráðherra Breta.
1994 Þyrla varnarliðsins bjargar 6 mönnum af Goðanum í Vöðlavík á Austfjörðum - einn maður fórst.

Snjallyrðið
Hvað er nú tungan? - Ætli engin
orðin tóm séu lífsins forði.
Hún er list, sem logar af hreysti,
lifandi sál í greyptu stáli,
andans form í mjúkum myndum,
minnissaga farinna daga,
flaumar lífs, í farveg komnir
fleygrar aldar, er striki halda.

Tungan geymir í tímans straumi
trú og vonir landsins sona,
dauðastunur og dýpstu raunir,
darraðarljóð frá elztu þjóðum.
Heiftareim og ástarbríma,
örlagahljóm og refsidóma,
land og stund í lifandi myndum
ljóði vígðum - geymir í sjóði.
Sr. Matthías Jochumsson prestur og skáld (1835-1920) (Íslensk tunga)

Engin fyrirsögn

Sunnudagspistillinn
Í fyrsta sunnudagspistli ársins 2006 fjalla ég um þrjú mál:

- í fyrsta lagi fjalla ég um áramótapistil minn sem birtist á gamlársdag á vef SUS og það sem í mínum huga stendur uppúr frá liðnu ári, ennfremur fjalla ég um áramótauppgjör forsætis- og utanríkisráðherra og fróðlegar umræður í Kryddsíld á fréttastöðinni NFS á gamlársdag. Mörgum að óvörum útnefndi fréttastofa NFS, Davíð Oddsson seðlabankastjóra, sem mann ársins 2005. Sérstaklega beini ég sjónum mínum í umfjölluninni að grein Geirs H. Haarde formanns Sjálfstæðisflokksins, í Morgunblaðinu á gamlársdag. Þar beinir Geir helst sjónum sínum að þeim skattalækkunum sem ríkisstjórn Sjálfstæðisflokks og Framsóknarflokks hefur staðið fyrir á þessu kjörtímabili. Ýmsar breytingar urðu þar um áramótin, t.d. var eignarskattur afnuminn og tekjuskattur lækkaði.

- í öðru lagi fjalla ég um veikindi Ariels Sharons forsætisráðherra Ísraels, sem fékk alvarlegt heilablóðfall í vikunni. Það hefur sýnt sig seinustu daga að ísraelska þjóðin er þrumu lostin vegna veikindanna og óvissustaðan er mikil. Einkum er það auðvitað viðbúið sérstaklega vegna þess hversu stutt er til kosninga í landinu og raun ber vitni. Mikil óvissa hefur einkennt ísraelsk stjórnmál allt frá því að Sharon baðst lausnar í nóvember og boðað var til þingkosninga þann 28. mars. Jafnframt tilkynnti Sharon að hann hefði ákveðið að segja skilið við Likud-bandalagið og stofna nýjan flokk, Kadima. Nú horfir svo við að kosningabaráttan er að hefjast á fullum krafti. Við upphaf hennar liggur forsætisráðherra landsins og vinsælasti stjórnmálamaður landsins í dái á sjúkrahúsi.

- í þriðja lagi fjalla ég um stöðuna í breskum stjórnmálum en Charles Kennedy leiðtogi frjálslyndra, hefur sagt af sér eftir að boðuð hafði verið vantraustskosning gegn honum. Með þessu lauk tæplega sjö ára löngum leiðtogaferli Kennedys. Merkilegt er hvernig ferlinum lauk. Árið 2005 var enda sigursælasta ár flokksins í áttatíu ára sögu hans og hann náði sínum bestu kosningaúrslitum frá stofnun. Á meðan að frjálslyndir glíma við innri vandamál styrkist sífellt staða David Cameron og íhaldsmanna.

Spennumyndir eftir sögum
Agöthu Christie

Til fjölda ára hef ég verið mikill unnandi spennusagna bresku skáldsagnakonunnar Agöthu Christie. Hún var drottning spennusagnanna á 20. öld - enginn var betri en Agatha í þessum geira. Hún kunni betur þá list en nokkur annar að segja flotta spennusögu sem hélt plottinu leyndu allt til loka. Á ég nokkrar af bókum hennar og ennfremur fjölda kvikmynda eftir sögum hennar. Lengi hef ég metið mest spennusögur hennar um leynilögreglumanninn Hercule Poirot. Að öðrum ólöstuðum var hann besta spennusagnahetjan hennar. Að kvöldi þorláksmessu bar svo við að Ríkissjónvarpið sýndi eina bestu myndina eftir sögum hennar, Evil under the Sun. Um kvöldið, er öllum jólaundirbúningi var lokið, settist ég því niður og horfði á þessa flottu mynd. Ótrúlegt en satt var það í fyrsta skiptið í um áratug sem ég sá myndina. Reyndar fyrsta skiptið sem ég sá hana einn. Mér fannst myndin ennþá betri í það skiptið en oft áður. Horfði ég á með miklum áhuga, þó að ég vissi auðvitað allt plottið frá upphafi til enda bakvið morðið á Arlenu Stuart, aðalpersónunni sem myrt er um miðbik myndarinnar. Myndin er sólrík og flott - allt smellur saman.

Það er enda oft svo að maður skynjar betur plottið með því að fara yfir atburðarásina vitandi niðurstöðuna. Þá sér maður enn betur smáatriðin sem máli skipta. Best er þó auðvitað að sjá myndina fyrsta sinni, vitandi ekki um neitt hver hinn seki er - þá getur maður spáð og spekúlerað í niðurstöðunni og reynt að vita hver hinn seki er. Þegar ég sá myndina fyrst árið 1989 þóttist ég viss nær alla atburðarásina hver hinn seki væri. Vitaskuld var það vitlaust mat og Agatha kom mér á óvart - ekki í fyrsta skiptið né hið síðasta. Hún var sannkallaður snillingur í fléttumyndun hinnar fullkomnu skáldsögu. Í Evil under the Sun leikur óskarsverðlaunaleikarinn Sir Peter Ustinov aðalsöguhetjuna. Hann varð ógleymanlegur kvikmyndaáhugafólki fyrir leik sinn á spæjaranum í fimm kvikmyndum á áttunda og níunda áratugnum. Hann hlaut óskarsverðlaun tvívegis á sjöunda áratugnum fyrir leik í aukahlutverki, í kvikmyndunum Spartacus og Topkaki. Lést hann í marsmánuði 2004. Oft átti hann stórleik á glæsilegum ferli, t.d. sem Poirot (enginn kom einkaspæjaranum betur til skila á hvíta tjaldinu en hann að mínu mati).

Um jólin hélt ég áfram að horfa á Poirot-myndir - þetta voru því sannkölluð spennujól og gaman að horfa á þessar myndir aftur. Sá t.d. Death on the Nile (aðra Poirot-mynd með Ustinov) og Murder on the Orient Express (þar sem Albert Finney leikur Poirot með snilldarbrag). Báðar eru í sérflokki. Þær eru alltaf viðeigandi - flottar og vel gerðar. Ég hvet alla unnendur góðra spennumynda um að horfa á þessar myndir - hafi þeir tækifæri til. Nú ef ekki er að fara út í næsta bókasafn og fá bækur Agöthu og kynna sér meistaraverk hennar. Oft er ekki síðra að lesa bækurnar og skapa söguhetjurnar í huga sér og kynna sér plottið betur áður en horft er á myndirnar.

Saga dagsins
1895 Framsókn, fyrsta kvennablaðið hérlendis, hefur göngu sína á Seyðisfirði. Kom út allt til 1903.
1928 Knattspyrnufélag Akureyrar, KA, stofnað á Akureyri - alla tíð stærsta íþróttafélagið á Akureyri.
1959 Charles De Gaulle hershöfðingi, tekur við forsetaembættinu í Frakklandi - var við völd til 1969.
1965 Sigríður Sigurðardóttir handknattleikskona, var kjörin íþróttamaður ársins, fyrst allra kvenna.
1996 Francois Mitterrand fyrrv. forseti Frakklands, lést úr krabbameini, 79 árs að aldri. Mitterrand gegndi embætti forseta landsins, lengur en nokkur annar, í rúm 14 ár, eða á tímabilinu 1981-1995.

Snjallyrðið
Þig, sem í fjarlægð fjöllin bak við dvelur
og fagrar vonir tengdir líf mitt við.
Minn hugur þráir, hjartað ákaft saknar,
er horfnum stundum, ljúfum dvel ég hjá.
Heyrirðu ei, hvern hjartað kallar á,
heyrirðu storminn kveðju mína ber?
Þú fagra minning eftir skildir eina
sem aldrei gleymi, meðan lífs ég er.
Valdimar Hólm Hallstað skáld (1905-1996) (Í fjarlægð)

Engin fyrirsögn

Veikindi Ariel Sharon

Sl. miðvikudagskvöld var Ariel Sharon forsætisráðherra Ísraels, fluttur á Hadassah-sjúkrahúsið öðru sinni. Fljótlega kom í ljós að hann hefði fengið heilablóðfall öðru sinni og það væri mun alvarlegra en hið fyrra sem hann fékk um miðjan desembermánuð. Sharon sýndi þá engin merki alvarlegrar heilabilunar eða þess að veikindin hefðu sett mark á hann að neinu alvarlegu ráði. Sharon var útskrifaður af sjúkrahúsinu tveim dögum síðar. Birtist hann skælbrosandi er hann yfirgaf spítalann og sagði heilsu sína góða. Fréttir bárust þó af því að læknar hefðu fyrirskipað honum að leggja af, en hann hefur til fjölda ára verið of þungur og barist við offituvandamál. Í þetta sinn var sýnt að staða mála væri grafalvarleg. Var hann færður í bráðaaðgerð eftir að komið hafði í ljós í sneiðmyndatæki alvarleg heilablæðing. Var forsætisráðherrann á skurðarborðinu í tæpa sjö klukkutíma. Að því loknu var heili Sharons kannaður að nýju í sneiðmyndatækinu. Kom önnur blæðing í ljós og önnur aðgerð tók við, að þessu sinni í rúma fjóra tíma. Sólarhring síðar tók við þriðja aðgerðin.

Umheiminum varð ljóst að veikindi Sharons væru lífshættuleg. Þeir sem þekkja til veikinda af þessu tagi vita að heilablóðfall er dauðans alvara. Það boðar enda aldrei gott þegar að sjúklingur er á skurðarborðinu í aðgerð á heila í tæpa tólf tíma á innan við sólarhring. Blæðing í heilanum boðar enda í fjölda tilfella mikinn skaða, lömun og getur auðvitað leitt til dauða. Þegar um er að ræða jafnáhrifamikinn mann og forsætisráðherra Ísraels lamast auðvitað stjórnmálalitrófið. Enda hefur það sýnt sig seinustu daga að ísraelska þjóðin er þrumu lostin vegna veikindanna og óvissustaðan er mikil. Einkum er það auðvitað viðbúið sérstaklega vegna þess hversu stutt er til kosninga í landinu og raun ber vitni. Mikil óvissa hefur einkennt ísraelsk stjórnmál allt frá því að Sharon baðst lausnar og boðað var til þingkosninga þann 28. mars. Jafnframt tilkynnti Sharon að hann hefði ákveðið að segja skilið við Likud-bandalagið, sem hann hafði leitt frá árinu 1999. Hann var einn af stofnfélögum í flokknum árið 1973 og lykilforystumaður innan hans alla tíð.

Í nóvember tilkynnti Sharon um stofnun nýs flokks síns, miðjuflokksins Kadima. Nú horfir svo við að kosningabaráttan er að hefjast á fullum krafti. Við upphaf hennar liggur forsætisráðherra landsins og vinsælasti stjórnmálamaður landsins í dái á sjúkrahúsi. Um leið og ljóst varð að kvöldi miðvikudags að Sharon hefði fengið annað heilablóðfall og þyrfti að fara í aðgerð var ákveðið að Ehud Olmert aðstoðarforsætisráðherra Ísraels, tæki við völdum hans. Segja má að sú staða sé nú komin upp að Olmert sé orðinn forystumaður í ísraelskum stjórnmálum. Litlar sem engar líkur eru enda á því að skriðdrekinn Sharon nái að sigrast svo á þessum veikindum að hann geti snúið til starfa að nýju. Reyndar má telja kraftaverki líkast ef Sharon tekst að halda lífi eftir þessi alvarlegu veikindi og þrjár heilaskurðaðgerðir á innan við þrem sólarhringum. Jafnvel kraftaverkamaður á borð við Sharon er ekki líklegur til að snúa aftur í forystu stjórnmálaheimsins eftir slíkt áfall. Reyndar hefur verið sagt seinasta sólarhringinn að líðan hans sé betri en pólitísk endurkoma er þó mjög ólíkleg.

Það er því mikið tómarúm sem fylgir stöðu mála í ísraelskum stjórnmálum þessa stundina. Ariel Sharon var enda bæði umdeildasti stjórnmálamaður Ísraels undanfarna áratugi og jafnframt sá vinsælasti. Telja má líklegt að Olmert muni nú takast á hendur það verkefni að leysa Sharon af hólmi og leiða Kadima inn í þingkosningarnar þann 28. mars. Vandinn sem blasir við Olmert er auðvitað tvíþættur. Í fyrra lagi er ekki formlega búið að byggja Kadima upp sem stjórnmálaflokk - hann var stofnaður utan um áherslur Sharons og vinsældir hans sem stjórnmálamanns. Í seinna lagi blasir við honum það verkefni að stjórna Ísrael næstu 100 dagana, fram yfir kosningarnar, og halda þeim öfluga svip sem var á landsstjórninni á taflborði stjórnmálanna undir stjórn Sharons þrátt fyrir að hún væri í raun fallin. Olmert er ekki öfundsverður af sínu hlutskipti. Það er þó margt sem verður til þess að hjálpa honum. Hann virðist hafa óskoraðan stuðning innan Kadima til forystustarfa deyji Sharon eða verði það varanlega heilaskaddaður að hans njóti ekki við.

Ehud Olmert sem fæddur er árið 1945, og er því tæplega tveim áratugum yngri en Sharon, er einn nánasti samstarfmaður hans og fylgdi honum úr Likud um leið og Sharon fór úr honum. Olmert var borgarstjóri í Jerúsalem í tíu ár, árin 1993-2003, og hefur gegnt fjórum ráðherraembættum á ferlinum. Hann er nú utanríkisráðherra í stjórn Sharons. Segja má að Olmert sé mjög líkur Sharon á hinu pólitíska taflborði og sé sá eini sem geti tekið við keflinu af Sharon og leitt hjörðina saman í kosningar. Það stefnir í spennandi kosningar þann 28. mars njóti Sharons ekki við. Forveri Sharons á leiðtogastóli í Likud, Benjamin Netanyahu, sem var forsætisráðherra Ísraels 1996-1999 og leiðtogi Likud 1993-1999, hefur verið kjörinn leiðtogi flokksins að nýju. Það stefnir því í spennandi baráttu milli Olmerts og Netanyahus um hægrafylgið. Segja má að Netanyahu stjórni nú leifunum af Likud, öfgasinnaðasta armi flokksins og sæki fram, enda geti staðan varla versnað fyrir þá í ljósi þess að Likud hefur verið að mælast með um 15 þingsæti seinustu vikur í stað um 40.

Likud hefur til fjölda ára verið stærsti flokkur landsins og berst nú við Kadima um að leiða hægrihliðina. Á vinstrihliðinni er Verkamannaflokkurinn, miklu vinstrisinnaðri en lengi áður, nú undir forystu verkalýðsleiðtogans Peretz. Segja má að kosningarnar í mars snúist um hvort að pólitískt hugarfóstur Ariels Sharons verði eitthvað meira en nafnið eitt - hvort þess bíði eitthvað líf og raunhæf stjórnarforysta í Ísraels í skugga minningarinnar um skriðdrekann öfluga Ariel Sharon. Ef marka má kannanir á Kadima líf án Sharons framundan. Það gæti þó breyst er alvörubarátta hefst. Kadima leggur nú í kosningabaráttu undir forystu Ehud Olmert - í skugga þess liggur hinn sterki og kraftmikli Ariel Sharon á sjúkrahúsi í Jerúsalem og berst fyrir lífi sínu. Stjórnmálaferill hans virðist á enda en við blasir að mesta barátta hins aldna leiðtoga verði að berjast fyrir lífi sínu en ekki forsætisráðherrastólnum í kosningum.

Það sem átti að verða sigurferð hins aldna höfðingja á vettvangi stjórnmálanna virðist nú runnið út í sandinn vegna heilsuleysis. Lífsbaráttan ein stendur nú eftir fyrir skriðdreka ísraelskra stjórnmála.

Saga dagsins
1919 Theodore Roosevelt 26. forseti Bandaríkjanna, lést, 61 árs að aldri. Hann var forseti 1901-1909.
1923 Halldór Laxness var skírður og fermdur til kaþólskrar trúar í Clervaux-klaustri í Lúxemborg. Með þessu tók hann formlega upp kaþólska dýrlingsnafnið Kiljan. Halldór var kaþólskur allt til æviloka. Trú Halldórs staðfestist er hann var kvaddur að hætti kaþólskra við sálumessu sína í febrúarmánuði 1998.
1949 Leikstjórinn Victor Fleming lést, 59 ára að aldri. Fleming leikstýrði á löngum ferli fjölda góðra kvikmynda, þeirra þekktastar eru án vafa stórmyndirnar Gone with the Wind og The Wizard of Oz.
1968 Rannsóknarstöð Hjartaverndar í Reykjavík, tekin í notkun. Tilkoma hennar markaði þáttaskil í hjartalækningum og aðstöðu til rannsókna. Fyrsti yfirlæknir þar var Ólafur Ólafsson, síðar landlæknir.
2001 George W. Bush ríkisstjóri í Texas, formlega kjörinn sem forseti Bandaríkjanna, er öldungadeild Bandaríkjanna staðfestir formlega úrslit forsetakosninganna 2000. Það kom í hlut Al Gore varaforseta, sem forseta öldungadeildarinnar að stjórna fundinum og lýsa formlega yfir kjöri Bush. Gore hafði verið mótframbjóðandi Bush í kjörinu og hlotið fleiri atkvæði á landsvísu en tapað í kjörmannakjöri.

Snjallyrðið
Þar sem lækir fleygjast
hvítum vængjum
ofan hlíðina
gegnt upprisu dagsins
drúpi ég höfði
einn með sorg minni og þrá
trúin á regnbogann
byrgð undir hellu
sem enginn morgunn fær lyft

En magn jarðar
finn ég undir fótum mér
finn ég í brjósti
taugar slagæðar líf
mátt upprunans
sem rofið gæti steininn
vakið nýtt líf
nýja trú.
Snorri Hjartarson skáld (1906-1986) (Dögun)

Engin fyrirsögn

Áramótakveðja 2006

Í upphafi ársins 2006 vil ég þakka lesendum þessa vefs samfylgdina í gegnum tíðina og jafnframt óska þeim farsæls og gleðilegs árs. Ennfremur vil ég færa þeim öllum kveðju sem ég hef kynnst í gegnum skrifin hér fyrir gagnleg skoðanaskipti og umræður um stjórnmál með einum eða öðrum hætti. Ég hef kynnst mörgum í gegnum skrifin og pólitíska þátttöku á liðnu ári og fyrir það þakka ég af heilum hug, samskipti við fólk um pólitík eða aðra þætti eru nú sem fyrr mjög mikilvæg og gagnleg þegar málefni samtímans eru rædd. Ég vil þakka öllum þeim sem litu á vefinn á liðnu ári fyrir að lesa pistla mína og hugleiðingar um hitamál samtímans.

Árið sem að baki er var einkar viðburðaríkt og eftirminnilegt. Margir stórviðburðir áttu sér stað. Fyrir þá sem skrifa um málefni samtímans var nóg að fjalla um. Á seinasta ári ritaði ég rúmlega 130 pistla, vikulega birtust sunnudagspistlar um helstu fréttir hverrar viku og margir ítarlegir pistlar um fleiri málefni voru ritaðir og ég hélt úti þessum bloggvef með nær daglegri umfjöllun um helstu málefnin. Ég lít því yfir árið með gleði í huga. Margt gott gerðist á þessu merka ári, mörg ný tækifæri komu til sögunnar og mörg krefjandi verkefni eru að baki. Vonandi verður árið 2006 jafn viðburðaríkt og spennandi eins og hið liðna ár.

Áramótaþættirnir

Venju samkvæmt var horft á áramótaþættina af miklum áhuga. Í hádeginu á gamlársdag hófst Pressuballið á NFS. Þar var mjög áhugavert spjall um málefnin við ýmsa blaða- og fréttamenn. Svansí, Þorsteinn J. og Inga Lind stjórnuðu þættinum af miklum krafti og hann var virkilega áhugaverður. Um tvöleytið fór ég að horfa á Kryddsíld Stöðvar 2. Þar voru leiðtogar flokkanna gestir venju samkvæmt. Nú eru Davíð og Össur horfnir á braut og Geir og Ingibjörg Sólrún komin í þeirra stað. Spjallið var mjög líflegt og skemmtilegt, venju samkvæmt. Farið var yfir helstu fréttir ársins á innlendum vettvangi og eins og nærri má geta var mest rætt um brotthvarf Davíðs úr stjórnmálum, stöðuna í borgarmálum og endalok R-listans.

Mjög ánægjulegt var að Davíð Oddsson var valinn maður ársins af NFS. Hann er svo sannarlega vel að því kominn. Þór Jónsson átti mjög gott viðtal við Davíð í þættinum. Davíð var senuþjófur þáttarins, þó hann hafi vikið af hinu pólitíska sviði. Klukkan þrjú hófst áramótaþátturinn á bæjarsjónvarpsstöðinni Aksjón, Gaffalbitar. Þar tóku Birgir, Hilda Jana, Þráinn og Sigrún á móti góðum gestum. Undir lokin var rætt við bæjarstjóra, Oktavíu, Hermann Jón, Sigrúnu Stefánsdóttur og Odd Helga um bæjarmálin í skugga þess að Oktavía hefur sagt skilið við Samfylkinguna sem hún leiddi í kosningunum 2002. Var mjög áhugavert spjall þar og sérstaklega merkilegt að sjá spennuna milli Oktavíu og Hermanns Jóns. Var rætt um pólitík af krafti.

Um kvöldið var ég með matarboð og bauð góðum gestum þar upp á svínabóg og góðan eftirrétt. Að því loknu var farið að brennu úti í þorpi og mjög notaleg og góð stund sem þar var. Síðar um kvöldið var horft á áramótaskaupið. Þótti mér það óvenjuslappt núna, vægast sagt. Nokkur fyndin atriði voru en í heildina var þetta það daprasta sem ég man eftir. Alveg með ólíkindum að RÚV geti ekki fundið fyndið fólk til að semja og leikstýra þessum árvissa viðburði sem svo mikilvægt er að sé vandað mikið og vel til. Þetta skaup er það lélegasta sem ég hef séð frá því ég man eftir mér. Mjög mikið drasl, svo ég orði þetta pent. Var það svo lélegt að maður var farinn út að skjóta upp flugeldum áður en því lauk.

Eftir miðnættið fór ég í áramótateiti hjá Hönnu systur og var þar til um tvö. Þá fór ég á skemmtistað með góðu fólki og skemmti mér vel fram á rauðanótt. Á nýársdag var horft á gamlar og góðar kvikmyndir og slappað vel af. Rifjaði ég upp góð kynni mín af Íslenska drauminum, frábærri íslenskri mynd. Alltaf hægt að hlæja vel að henni. Að kvöldi nýársdags horfði ég ásamt fleirum á góða dagskrá á Stöð 2. Þar voru flottir tónleikar og myndin Dís með Álfrúnu frænku minni Örnólfs. Horfði svo á afgang hinnar stórfenglegu myndar As Good as it Gets með eilífðartöffaranum Jack Nicholson. Var því mjög góð helgi hér á þessum bænum.

Kvikmyndir ársins 2005

Á gamlársdag birti ég á vef mínum lista yfir bestu kvikmyndir ársins 2005. Á listanum sem ég setti saman voru eftirtaldar eðalmyndir: Sin City, Der Untergang, Oldboy, Hotel Rwanda, Million Dollar Baby, The Aviator, King Kong, Sideways, Batman Begins, A Little Trip to Heaven, Vera Drake, Ray, Finding Neverland, Harry Potter and the Goblet of Fire, Cinderella Man, Closer, The Sea Inside, Charlie and the Chocolate Factory, Star Wars: Episode III – The Revenge of the Sith og Kinsey. Allt eru þetta toppmyndir.

Enginn vafi er í mínum huga um að Sin City skari fram úr öðrum sem sýndar voru hér í bíó í fyrra. Þetta er mögnuð úrvalsmynd frá þeim Robert Miller og Robert Rodriguez. Er hún byggð á teiknimyndasögunum Sin City eftir Miller og er teiknimyndasögustílnum viðhaldið með snilldarlegum hætti. Stórbrotið meistaraverk þar sem bókstaflega allt gengur upp kvikmyndalega séð: tónlist, handrit, kvikmyndataka og leikur, allt er í úrvalsflokki. Mjög frumleg og fersk mynd sem segir þrjár sögur sem tengjast allar. Sannkölluð kvikmyndabomba. Útkoman er mynd sem að mínu mati stendur algjörlega uppúr í kvikmyndagerð ársins. Hiklaust besta kvikmynd ársins 2005.

Saga dagsins
1597 Heklugos hófst með miklum eldgangi og jarðskjálftum - varð eitt stærsta Heklugos sögunnar.
1888 Kristín Bjarnadóttir kaus fyrst kvenna til bæjarstjórnar í Reykjavík og varð fyrst kvenna til að notfæra sér kjörrétt til sveitarstjórna sem veittur var 1882. Kosningaréttur kvenna var lögfestur 1915.
1925 Benito Mussolini tilkynnir að hann taki sér einræðisvald á Ítalíu - sat þar við völd allt til 1943.
1948 Þýskur togari bjargaði fjórum skipverjum sem hrakist höfðu í nær átta sólarhringa á hafi úti á vélbátnum Björgu eftir að vél bátsins bilaði - voru þeir orðnir kaldir og hraktir er þeim var bjargað.
1990 Íslandsbanki hóf formlega starfsemi - bankinn var stofnaður með sameiningu Alþýðubankans, Verslunarbankans, Iðnaðarbankans og Útvegsbankans. Tók hann yfir mestöll fyrri viðskipti bankanna.

Snjallyrðið
Þú, sem fyrr með ást og orku kunnir
efla mentir þessa klakalands,
fljetti nú það mál, sem mest þú unnir,
minning þinni lítinn heiðurskrans.
Biðjum þess, að íslenskt mál og mentir
megi hljóta þroska, rík og sterk.
Göngum allir fram sem braut þú bentir!
Blómgist æ þitt drengilega verk.
Hannes Hafstein ráðherra (1861-1922) (Landið)

Engin fyrirsögn

Áramótauppgjör 2005

Árið 2005 líður senn í aldanna skaut. Að baki er eftirminnilegt ár fyrir margra hluta sakir. Í ítarlegum áramótapistli mínum, sennilega þeim lengsta og ítarlegasta sem ég hef ritað á löngum pistlaferli mínum, sem birtist í dag á vef Sambands ungra sjálfstæðismanna fer ég yfir árið með mínum hætti og það sem ég tel standa helst eftir þegar litið er yfir það.

Ársins 2005 verður í framtíðinni eflaust einna helst minnst hér heima sem ársins er Davíð Oddsson hætti þátttöku í stjórnmálum eftir glæsilegan feril, Geir H. Haarde varð formaður Sjálfstæðisflokksins, ríkisstjórn Sjálfstæðisflokks og Framsóknarflokks varð tíu ára gömul, Síminn var seldur, tölvupóstar Jónínu Ben birtist í blöðum, skýrsla fjölmiðlanefndar var kynnt, tillögur til breytinga á RÚV voru kynntar, Ingibjörg Sólrún varð formaður Samfylkingarinnar, R-listinn leið undir lok, Bobby Fischer geistist með krafti til Íslands, sameiningu sveitarfélaga var hafnað, tekist var á um fréttastjóraráðningu á Ríkisútvarpinu, Gunnar Örlygsson gekk í Sjálfstæðisflokkinn, hræringar urðu í Framsóknarflokknum og Halldór Ásgrímsson gekk í gegnum pólitíska erfiðleika og deilt var um framboð Íslands í Öryggisráð Sameinuðu þjóðanna.

Á erlendum vettvangi bar hæst að hryðjuverkamenn létu til skarar skríða í Lundúnum, náttúruhamfarir gengu yfir Pakistan og suðurríki Bandaríkjanna, Jóhannes Páll II páfi lést og þýski kardinálinn Joseph Ratzinger varð páfi, Angela Merkel varð kanslari Þýskalands fyrst kvenna og Gerhard Schröder vék af kanslarastóli eftir sjö ára feril, Tony Blair vann sigur í þriðju þingkosningunum í röð, David Cameron varð leiðtogi breska Íhaldsflokksins, þingkosningar fóru fram í Írak eftir 51 árs hlé í skugga einræðis, stjórnarskrá Evrópusambandsins beið skipbrot, Jacques Chirac beið táknrænan ósigur, uppstokkun varð í hæstarétti Bandaríkjanna, danska stjórnin hélt velli á árinu meðan að hin norska féll og hinn sögufrægi heimildarmaður The Washington Post í Watergate-málinu, er nefndur var Deep Throat, var loks afhjúpaður.

Að baki er svo sannarlega merkilegt ár. Í tilefni áramótanna er rétt að líta yfir nokkra hápunkta ársins 2005. Hvet ég ykkur til að lesa þessi skrif mín. Að mínu mati ber algjörlega hæst brotthvarf Davíðs Oddssonar úr stjórnmálum. Hafði sú ákvörðun veruleg áhrif. Hún leiddi til þess að ný forysta tók við Sjálfstæðisflokknum og breytinga almennt á stjórnmálalitrófinu. Davíð hafði verið í forystu stjórnmála í aldarfjórðung, bæði á vettvangi borgarmála og landsmála. Fer ég í pistlinum vel yfir brotthvarf hans og tíðindin sem því fylgdu. Jafnframt fer ég vel yfir endalok R-listans. Erlendis voru náttúruhamfarir og hryðjuverk áberandi. Fjalla ég um öll þessi málefni í ítarlegum pistli og vona ég að þið njótið pistilsins og lesið hann af áhuga.

Maður ársins 2005

Við áramót er litið yfir sviðið og spurt hver sé maður ársins, hver skaraði framúr og stendur hæst þegar nýtt ár tekur við. Það er enginn vafi á því í mínum huga að Thelma Ásdísardóttir sé sú sem þann heiður eigi að hljóta að þessu sinni. Ég verð að viðurkenna að ég komst við þegar að ég heyrði hana segja sögu sína í viðtali í Kastljósi Ríkissjónvarpsins í október. Thelma sagði þar söguna af því grófa kynferðislega ofbeldi sem hún var beitt af hálfu föður síns og fleiri karlmanna árum saman á æskuárum sínum. Styrkur hennar og kraftur við að segja frá beiskri æsku snerti alla landsmenn að mínu mati. Fyrst og fremst dáist ég að því hugrekki sem Thelma sýnir með því að rjúfa þögnina sem er svo mikilvægt að verði gert - þögnina um líkamlegt og andlegt ofbeldi og kynferðislega misnotkun.

Fáum blandast hugur um að sú bók sem hafi haft mest áhrif á samfélagið á árinu hafi verið bókin: Myndin af pabba - Saga Thelmu sem kom út í haust og var rituð af Gerði Kristnýju. Segja má með sanni að Thelma Ásdísardóttir hafi orðið táknmynd hugrekkis og mannlegrar reisnar og hvernig hægt hafi verið að rísa upp yfir aðstæður sínar til að takast á við erfiðleika fortíðar. Þegar ég leit yfir árið og var að velta fyrir mér því hver hefði verið sá sem ætti þennan heiður skilið var enginn sem komst ofar á blaðið mitt. Thelma stóð algjörlega upp úr að öllu leyti. Það er virðingarvert hversu hugrökk hún hefur verið við að segja frá sögu sinni. Að mínu mati er Thelma Ásdísardóttir sannkölluð hetja! Ég er stoltur af því að velja hana mann ársins 2005.

Táknrænar svipmyndir ársins 2005

Oft eru merkustu svipmyndir ársins og atburðir best tjáðar með táknrænum myndum sem einhvernveginn segja allt sem segja þarf um atburðinn sem hann lýsir - algjörlega án allra orða. Ekki ætla ég að draga upp margar myndir af árinu, tel mig hafa gert upp árið allavega pólitískt með mínum hætti í löngum pistli sem ég vona að einhverjir hafi jafngaman af og ég hafði af að skrifa hann og gera upp atburði, sem standa merkast pólitískt. Þrjár myndir eru að mínu mati lýsandi sem myndir ársins þegar það kveður. Þrjár táknrænar myndir.

Sú fyrsta lýsir í hnotskurn þeim miklu þáttaskilum sem urðu er Davíð Oddsson tilkynnti á blaðamannafundi í Valhöll þann 7. september að hann myndi víkja úr forystu íslenskra stjórnmála eftir farsælan stjórnmálaferil. Önnur myndin sýnir Jóhannes Páll II páfa blessa mannfjöldann í hinsta skiptið á Péturstorginu í Róm þann 30. mars 2005. Sú síðasta sýnir nýja forystu Sjálfstæðisflokksins á landsfundi í október - Geir H. Haarde og Þorgerði Katrínu Gunnarsdóttur.

Saga dagsins
1791 Skólapiltar í Hólavallaskóla í Reykjavík héldu áramótabrennu, þá fyrstu sem fram fór hérlendis.
1935 Vilhjálmur Þ. Gíslason síðar útvarpsstjóri, flutti annál ársins í fyrsta skipti í Ríkisútvarpinu að kvöldi gamlársdags. Hann flutti slíkt áramótaávarp til starfsloka hjá RÚV 1967. Allt frá starfslokum Vilhjálms til ársins 2004 héldu eftirmenn hans þeirri hefð að flytja ávarp að kvöldi gamlársdagsins.
1956 Styrkir úr rithöfundasjóði Ríkisútvarpsins voru veittir í fyrsta skipti - það árið voru heiðraðir Snorri Hjartarson og Guðmundur Frímann. Margir helstu rithöfundar okkar hafa hlotið viðurkenningu.
1964 Ólafur Thors fyrrum forsætisráðherra og formaður Sjálfstæðisflokksins, lést, 72 ára að aldri. Ólafur sat á Alþingi í 38 ár, allt frá 1926 til dauðadags. Hann var formaður Sjálfstæðisflokksins, lengst allra í sögu hans, eða í 27 ár, 1934-1961. Ólafur Thors myndaði ráðuneyti alls fimm sinnum á löngum stjórnmálaferli, oftar en aðrir. Ólafur var frábær ræðumaður og gleymist seint ræðusnilld hans.
1999 Boris Yeltsin forseti Rússlands, segir af sér embætti í áramótaræðu á skrifstofu sinni í Kreml. Kom afsögn hans mjög óvænt, enda hafði verið talið að hann myndi sitja í embætti þar til kjörtímabili hans lyki í júní 2000. Eftirmaður hans í embætti varð Vladimir Putin forsætisráðherra. Var Putin svo kjörinn forseti í mars 2000 og endurkjörinn með yfirburðum í mars 2004 og situr í embætti til 2008.

Snjallyrðið
Nú árið er liðið í aldanna skaut
og aldrei það kemur til baka,
nú gengin er sérhver þess gleði og þraut,
það gjörvallt er runnið á eilífðar braut,
en minning þess víst skal þó vaka.

En hvers er að minnast? Og hvað er það þá,
sem helst skal í minningu geyma?
Nú allt er á fljúgandi ferð liðið hjá,
það flestallt er horfið í gleymskunnar sjá.
En miskunnsemd Guðs má ei gleyma.

Nú Guði sé lof fyrir gleðilegt ár
og góðar og frjósamar tíðir,
og Guði sé lof, því að grædd urðu sár,
og Guði sé lof, því að dögg urðu tár.
Allt breyttist í blessun um síðir.

Ó, gef þú oss, Drottinn, enn gleðilegt ár
og góðar og blessaðar tíðir.
Gef himneska dögg gegnum harmanna tár,
gef himneskan frið fyrir lausnarans sár
og eilífan unað um síðir.
Valdimar Briem prestur (1848-1930) (Nú árið er liðið)

Engin fyrirsögn

Oktavía gengur til liðs við Sjálfstæðisflokkinn

Oktavía Jóhannesdóttir bæjarfulltrúi, tilkynnti á blaðamannafundi í dag í Hamborg, húsnæði Sjálfstæðisflokksins í miðbænum hér á Akureyri, að hún hefði ákveðið að segja skilið við Samfylkinguna og genga til liðs við okkur í Sjálfstæðisflokknum. Hún mun sitja áfram í bæjarstjórn fram til vorsins og sitja í þeim nefndum sem hún hefur verið kjörin til setu í. Með þessu missir Samfylkingin á Akureyri sinn eina bæjarfulltrúa. Jafnframt eflist með þessu meirihluti Sjálfstæðisflokks og Framsóknarflokks. Áður voru sjö bæjarfulltrúar sem tilheyrðu meirihlutanum en verða nú átta. Bæjarfulltrúum Sjálfstæðisflokksins fjölgar því nú um einn og verða þeir fimm talsins frá og með þessu. Þetta hljóta að teljast mikil tíðindi, enda hafði Oktavía ekki boðið sig fram í prófkjöri Samfylkingarinnar og flestir talið að hún myndi hætta í sveitarstjórnarmálum með vorinu.

Oktavía Jóhannesdóttir var kjörin í bæjarstjórn Akureyrar í bæjarstjórnarkosningunum 1998 af hálfu Akureyrarlistans. Skipaði hún þá annað sæti listans. Ákváðu Akureyrarlisti, sem var sameiginlegt framboð vinstriflokka, og Sjálfstæðisflokkur í kjölfar kosninganna að mynda saman meirihluta. Varð Kristján Þór Júlíusson bæjarstjóri, og Oktavía gegndi ýmsum forystustörfum í nefndum á kjörtímabilinu. Í aðdraganda kosninganna 2002 varð Oktavía leiðtogi Samfylkingarinnar. Tók hún ekki þátt í prófkjöri flokksins í nóvembermánuði og talið að hún myndi alfarið hætta þátttöku í stjórnmálum. Varamaður hennar í bæjarstjórn, Hermann Jón Tómasson, ákvað að gefa kost á sér til leiðtogastöðunnar og þótti flestum ljóst að Oktavía hefði átt erfiðan slag fyrir höndum - hefði hún gefið kost á sér.

Í yfirlýsingu Oktavíu segir að það hafi verið henni sárt sem stofnfélaga í Samfylkingunni að þurfa að viðurkenna fyrir sjálfri sér að flokkurinn hafi ekki verið og verði seint sá frjálslyndi og framsækni jafnaðarmannaflokkur sem hún hafi reiknað með. Hún kveður því Samfylkinguna með köldum kveðjum í garð flokksins. Hún tekur því þá ákvörðun að víkja úr flokknum, væntanlega við litla hrifningu fyrrum samherja hennar. Enda stendur Samfylkingin nú eftir án fulltrúa í bæjarstjórn næsta hálfa árið, fram að kosningum. Það verður fróðlegt að fylgjast með því hvaða áhrif þessi breyting hefur fyrir Samfylkinguna, sem nú á ekki lengur neinn fulltrúa í bæjarstjórn og missir væntanlega nefndarmenn sína í kjölfarið.

Saga dagsins
1984 Rajiv Gandhi og Kongress-flokkurinn vinnur mikinn sigur í indversku þingkosningunum, sem haldnar voru nokkrum vikum eftir að móðir hans, Indira Gandhi sem verið hafði forsætisráðherra nær samfellt í 20 ár, var myrt. Rajiv sat í embætti til ársins 1989, en féll fyrir morðingjahendi í maí 1991.
1986 Harold Macmillan fyrrum forsætisráðherra Bretlands, lést, 92 ára að aldri - hann sat í embætti sem forsætisráðherra og leiðtogi breska Íhaldsflokksins 1957-1963 og hlaut viðurnefnið Super Mac og Mac the Knife í breskum stjórnmálum. Hann hætti afskiptum af stjórnmálum vegna heilsubrests 1963.
1989 Vaclav Havel kjörinn forseti Tékkóslóvakíu - hann sat í embætti þar til landinu var skipt í tvennt árið 1993. Varð þá forseti Tékklands og sat í embætti í tvö 5 ára kjörtímabil og lét af embætti 2003.
1992 Fernando Collor de Mellor forseti Brasilíu, segir af sér embætti vegna hneykslismála - Mellor var fyrsti lýðræðislega kjörni forseti landsins í 29 ár og sigraði naumlega í forsetakosningum árið 1990.
1995 Ríkisstjórnin samþykkti að banna umsækjendum um opinberar stöður að njóta nafnleyndar.

Snjallyrðið
Máninn hátt á himni skín, hrímfölur og grár.
Líf og tími líður og liðið er nú ár.
Bregðum blysum á loft bleik þau lýsa um grund.
Glottir tungl og hrín við hrönn og hratt flýr stund.

Kyndla vora hefjum hátt, horfið kveðjum ár.
Dátt hér dansinn stígum dunar ísinn grár.
Bregðum blysum á loft bleik lýsa um grund.
Glottir tungl og hrín við hrönn og hratt flýr stund.

Komi hver sem koma vill! Komdu nýja ár.
Dönsum dátt á svelli, dunar ísinn blár.
Bregðum blysum á loft bleik lýsa um grund.
Glottir tungl og hrín við hrönn og hratt flýr stund.
Jón Ólafsson skáld (1835-1920) (Álfareiðin)