Steingrímur Hermannsson látinn

Við andlát Steingríms Hermannssonar, fyrrverandi forsætisráðherra, er fallinn í valinn einn litríkasti stjórnmálamaður þjóðarinnar á 20. öld. Hann naut virðingar og stuðnings þjóðarinnar, þó skiptar skoðanir hafi verið um verk hans og pólitíska forystu Framsóknarflokksins gegnum tíðina. Hann ávann sér velvild og virðingu þjóðarinnar með vinnubrögðum sínum og forystu.

Steingrímur Hermannsson var að mínu mati frambærilegasti stjórnmálamaður sinnar kynslóðar, stjórnmálamaður níunda áratugarins án vafa, og ég bar alla tíð mikla virðingu fyrir honum, þó ekki hafi ég alltaf verið sammála honum eða því sem Framsóknarflokkurinn hafði fram að færa í verkstjórn hans.

Ég mat alltaf mjög mikils einlægni hans og hversu traust hann talaði máli íslensku þjóðarinnar. Hann var mannlegur og virðulegur stjórnmálamaður. Ég votta fjölskyldu Steingríms innilega samúð mína.

Steingrímur Hermannsson látinn

Forsetinn fyllir upp í pólitískt tómarúm

Enginn vafi leikur á því að forseti Íslands hefur fyllt upp í pólitískt tómarúm á Íslandi með forystu sinni síðustu vikurnar, bæði er hann synjaði Icesave-lögunum og þegar hann tók til við að tala máli Íslands á alþjóðavettvangi í kjölfarið. Forsetinn hefur setið einn að því verkefni, enda hefur vinstristjórnin verið algjörlega máttlaus að öllu leyti, bæði við að verja hagsmuni Íslands og tala máli þjóðarinnar, eða taka á nokkrum þeim verkefnum sem við henni blasa. Þessi vandræðagemlingur er víst ársgamall í dag, hefur ekkert afrekað á heilu ári, er enn að bisa við að klúðra málum.

Vinstrimenn töldu sig eiga hvert bein í forsetanum og hann myndi aldrei þora að leggjast gegn málum þeirra, hugsa öðruvísi eða vinna gegn þeirra málum. Því eru þeir mjög ráðalausir að horfa á Ólaf Ragnar taka forystuna af máttlausri ríkisstjórn þeirra, t.d. á fundinum í Davos. Með framgöngu sinni hefur Ólafur Ragnar styrkt stöðu sína, styrkt stöðu forsetaembættisins enda er augljóst að meirihluti þjóðarinnar hefur viljað að einhver talaði máli Íslands.

Ólafur Ragnar er kamelljón, öll framganga hans síðustu áratugi sannar það svo ekki verður um villst. Hann er nú í hlutverki þess sem ræður för á Íslandi - hann er maðurinn sem fyllti upp í pólitískt tómarúm í glundroðanum sem einkennir íslensk stjórnmál. Vinstriflokkarnir stóðu ekki undir því trausti sem þjóðin veitti þeim í síðustu þingkosningum og horfir í aðrar áttir eftir forystu.

„Taktu leikhlé, herra forseti"

Strákarnir okkar vinna bronsið í Vín

Sannkölluð þjóðhátíð er á Íslandi... og ástæða til, eftir að strákarnir okkar unnu bronsið á EM í handbolta. Liðið getur verið stolt af sinni frammistöðu og hefur staðið sig frábærlega vel. Mikil vonbrigði að tapa fyrir Frökkum í gær, en það er karakter og styrkur í þessu liði og bronsið er sannkallaður happdrættisvinningur fyrir þjóðina í þeim erfiðleikum sem blasa við henni. Þetta er þvílíkt búst fyrir þjóðarstoltið.

Landsliðið átti glæsilega frammistöðu á þessu móti. Voru þar bestir með Frökkum og Króötum - geta verið stoltir af því sem þeir hafa verið að gera. Þó alltaf sé súrt að missa af gullverðlaunum er þetta enginn heimsendir, heldur aðeins stórsigur miðað við það sem búast mátti við fyrirfram. Í bronsverðlaununum felast tækifæri í framtíðaruppbyggingu sem vonandi verða nýtt. Nú þarf að styrkja landsliðið enn frekar í uppbyggingu komandi ára. Efniviðurinn er frambærilegur og traustur.

Og við hin sláum upp heilli þjóðhátíð næstu dagana, rétt eins og sumarið 2008 þegar við náðum silfrinu í Peking. Við eigum að fagna ótæpilega þessum árangri, slá upp veislu og traustri gleði. Og það verður fjör þegar strákarnir koma heim. Þeim verður fagnað sem þjóðhetjunum einu og sönnu, enn og aftur. Við erum stolt af þeim.

Ísland landaði bronsinu í Vín

Íslendingar eiga ekki að láta tudda níðast á sér

Breski fréttaskýrandinn Max Keiser átti stjörnuframmistöðu í Silfri Egils. Auðvitað hefur hann rétt fyrir sér: við Íslendingar eigum ekki að láta breska tudda í Downingstræti níðast á okkur. Við eigum að taka slaginn og svara fyrir okkur, hefðum betur gert það haustið 2008 þegar durturinn Gordon Brown hjólaði í íslensku þjóðina, fyrst og fremst til að hefna fyrir þorskastríðin og bæta stöðu sína í skoðanakönnunum.

Sú spurning er áleitin hvers vegna íslensk stjórnvöld tóku ekki slaginn við Bretland í upphafi málsins, þegar einhver vörn var í boði. Auðvitað áttu stjórnmálamenn hér heima að fara með mál sitt fyrir NATÓ - ekki átti að sætta sig við að eitt NATÓ-ríki beitti hryðjuverkalögum gegn bandalagsþjóð. Í staðinn var hummað og hóstað máttleysislega. Ekkert af viti var gert.

Íslenskir ráðamenn horfðu þegjandi á Gordon Brown vega að Íslandi og veita því mikið og þungt högg með orðum sínum á SKY 9. október 2008. Kippt var í einhverja diplómatíska spotta með því að kalla sendiherrann til forsætis- og utanríkisráðherra en ekkert meira var gert. Íslenskir ráðamenn höfðu ekki það í sér að taka til sinna ráða, ekki einu sinni tala við bresku pressuna.

Sumum fannst ég djarfur þegar ég sagði í bloggfærslu 9. október 2008, eftir viðtalið við durtinn Brown á Sky þar sem hann jós skít og skömmum yfir Ísland, að Ísland ætti að slíta stjórnmálasambandi við Bretland. Æ betur sést að það hefðum við átt að gera. Íslensk stjórnvöld áttu að svara fullum hálsi og taka málið föstum tökum frá fyrsta degi í stað þess að lympast niður.

Við höfum með þögn og aðgerðarleysi okkar í alþjóðasamfélaginu, t.d. með því að mótmæla ekki harðlega á leiðtogafundi NATÓ fyrr á þessu ári, vanið Bretana á að sparka í okkur án þess að svara í sömu mynt. Ég held að síðar meir verði þetta hik og aðgerðarleysi metið sem mikil og taktísk mistök. Slíkt blasir reyndar við öllum sem sjá þessa sögu nú ári síðar.

Þegar ein þjóð í NATÓ-samstarfinu beitir annarri hryðjuverkalögum og reynir að sparka henni til helvítis með því að eyðileggja orðspor hennar með vísvitandi hætti á slíkt heima innan NATÓ til umræðu.

Íslendingar hafa nú fengið nóg af yfirgangi Breta og ég tel að þeir eigi að tjá það hreint út í þjóðaratkvæðagreiðslunni 6. mars og hafna Icesave með afgerandi hætti. Fyrst íslensk stjórnvöld sofa á verðinum verður þjóðin að taka málin í sínar hendur.

Segir Darling og Brown vera hryðjuverkamenn

Samfylkingin situr hjá í samningaviðræðum

Því ber að fagna að fulltrúar stjórnar og stjórnarandstöðu fari til fundahalda við Hollendinga og Breta. Því var ekki farið í svona ferðir fyrir löngu síðan? Vegna þess að það hentaði ekki vinstristjórninni? Er þetta bara vegna þess að hún hefur klúðrað málinu svo feitt og raun ber vitni? Ekki ólíklegt...

Stóru tíðindin eru þau að Samfylkingin, stærsti flokkur þjóðarinnar í þingkosningunum 2009, á engan fulltrúa í þessari ferð. Forsætisráðherrann Jóhanna Sigurðardóttir fer ekki og enginn staðgengill hennar, hvorki Össur, sem hefur verið vanur slíku hlutverki mjög lengi, né varaformaðurinn Dagur. Vandræðalegt...

Samfylkingin ætlar sumsé ekki að skipta sér af þessum samningaviðræðum, treystir Steingrími J. fyrir þessu einfaldlega. Merkileg tíðindi það. Þetta er væntanlega gott dæmi um hversu mikil leiðtogakrísa blasir við Samfylkingunni, nú þegar ljóst er að líður mjög að endalokum stjórnmálaferils Jóhönnu Sigurðardóttur.

Samfylkingin hefur illa staðið undir því hlutverki að vera stærsti flokkur þjóðarinnar... hefur samið gegn hagsmunum þjóðarinnar æ ofan í æ síðustu mánuði til að reyna að halda blautum ESB-draumi sínum á lífi, frekar viljað borga meira en þarf vegna Icesave og ekki viljað vinna hag Íslands sem mestan.

Besta dæmið um vandræðagang Samfylkingarinnar er að hann situr hjá í þessum samningaviðræðum. Hverjum hefði órað fyrir að Davíð Oddsson hefði sent Halldór Ásgrímsson til viðræðna af þessu tagi fyrir hönd Sjálfstæðisflokksins á forsætisráðherraferli sínum. Slíkt hefði aldrei gerst.

Við höfum veikburða forsætisráðherra, sem hefur aldrei staðið undir því verkefni sem henni var falið. Það sést einna best af þessum vandræðagangi. Og Samfylkingin er sumpart þegar orðin leiðtogalaus og er mjög veikburða, stólar bara á Steingrím Jóhann. Pínlegt...

Allra augu á Íslandi

Rétt ákvörðun hjá Ásbirni

Ásbjörn Óttarsson, alþingismaður, tekur rétta ákvörðun með að segja sig úr þingmannanefnd vegna rannsóknarskýrslunnar. Hann hefði betur tekið þessa ákvörðun strax á þriðjudag, sama dag og hann fór í Kastljósið, og tjáði sig um ólöglega arðinn í Nesveri. Staða hans er algjörlega óverjandi.

Ási hefur viðurkennt lögbrot og það kemur ekki til greina að hann setjist í nefnd til að fjalla um efnahagshrunið og viðbrögð við skýrslu rannsóknarnefndarinnar. Algjör fjarstæða - Ásbjörn og forysta flokksins áttu að vita betur en reyna að verja það.

Þessi ákvörðun kemur seint, of seint. Hún var algjörlega óumflýjanleg eins og staðan er. Pólitísk staða Ásbjörns hefur auðvitað veikst mjög. Mér finnst að hann ætti að hugleiða afsögn af Alþingi eða víkja þaðan tímabundið hið minnsta.

Segir sig úr þingmannanefnd

Blóðugur ísbjarnarblús í Þistilfirði

Ég er ánægður með að engin dramatík var vegna ísbjarnarins sem var felldur í Þistilfirði. Aumingjahrollurinn var mikill þegar stjórnmálamenn ætluðu að slá sér upp á birnunni á Skaga sumarið 2008 með tilheyrandi kostnaði og ævintýragangi. Engin þörf var á slíkri leikaramennsku eða tiktúrum að þessu sinni. Heimamenn tóku af skarið fljótt og vel, eins og eðlilegt á að vera.

Eflaust munu sömu aðilar og vildu bjarga ísbjörnunum sumarið 2008 tala um illa meðferð á dýrinu, ekki hafi átt að fella það. Þeir sem þannig tala eiga rétt á að hafa sína skoðun, en ég undrast ekki að heimamenn vilji ljúka málinu fljótt og afdráttarlaust. Engum er greiði gerður með öðrum eins leikaraskap og var t.d. á Skaga sumarið 2008.

Búið að skjóta ísbjörninn

Strákarnir valta yfir rússneska björninn í Vín

Mikið innilega var það nú sætt og gott að sjá íslenska liðið leggja rússneska björninn að velli áðan. Sætur sigur, glæsilegur árangur hjá strákunum. Þvílíkt burst! Er ekki réttast að tala um rússneska bangsann núna? Við sýndum það á Ólympíuleikunum í Peking í ágúst 2008 að rússarnir hafa ekkert í okkur að segja þegar liðið er í þessu stuði. Leikgleðin og krafturinn skín af liðinu.

Þetta er enn eina góða hefndin fyrir fyrri tapleiki gegn Rússum, sérstaklega þegar þeir slógu okkur út úr HM á heimavelli fyrir fimmtán árum, vorið 1995. Sigurinn getur varla verið sætari og átta marka sigur er þvílíkt egó-búst fyrir leikinn gegn Norsurunum á fimmtudag.

Tær snilld að sjá ungu strákana fá tækifæri. Aron er að glansa á þessu móti, kemur sterkur til leiks, og flott að sjá Ólaf fá séns. Liðið er í góðum takti núna og nú er bara að stefna alla leið í undanúrslit og taka medalíu, helst gullið.

Einn sigurinn enn þjappar þjóðinni saman, ekki veitir af á þessum síðustu og verstu...

Átta marka sigur á Rússum

Kolsvört skýrsla rannsóknarnefndar í sjónmáli

Ég hef aldrei efast um að rannsóknarnefnd Alþingis vinni heiðarlega og traust að málum. Orðspor þeirra og trúverðugleiki er jú undir. Hef enga ástæðu til að ætla að vandað fólk leggi sig að veði fyrir vonda skýrslu. Enda kallar þjóðin eftir því að hreinsað verði til og stokkað upp - skýrslan verður að gefa fólki trú á að hún sé upphaf nýrra tíma.

Held að þessi skýrsla verði svartari og meira afgerandi en flestir gera sér grein fyrir. Enda gefa ummæli aðstandenda skýrslunnar fullt tilefni til þess að svo verði. En þetta verður svart, svosem ekki tilefni til annars þegar annað eins hrun hefur sligað heila þjóð.

Gráti nær yfir efni skýrslunnar

Skýrslu rannsóknarnefndar frestað

Vissulega eru mikil vonbrigði að skýrsla rannsóknarnefndar Alþingis frestist um nokkrar vikur. Mest er þó um vert að skýrslan verði vönduð og vel úr garði gerð og taki á öllum þáttum málsins. Frestun í örfáar vikur eru smámunir miðað við mikilvægi þess að hún verði traust og afgerandi úttekt á hruninu og eftirmálum þess. Biðin er því merki um vönduð vinnubrögð frekar en eitthvað óeðlilegt sé um að ræða.

Enda er augljóst af ummælum Páls Hreinssonar og Tryggva Gunnarssonar að skýrslan verður svört og mun taka á öllum lykilatriðum málsins. Enginn dregur það í efa að hún verði afgerandi, held að enginn eigi von á kattarþvotti eða útúrsnúningum. Slíkt mun aldrei gera sig í þeirri stöðu sem við blasir og töfin er merki um viðbótarferli sem skiptir máli mun frekar en eitthvað annað.

Skýrslan frestast enn lengur

Flottur listi hjá sjálfstæðismönnum í Reykjavík

Sjálfstæðismenn í Reykjavík stilltu upp sterkum og sigurstranglegum lista í prófkjöri í gær. Hanna Birna Kristjánsdóttir, borgarstjóri, fær mjög góða kosningu í leiðtogasætið - hún nýtur virðingar og trausts flokksmanna og borgarbúa fyrir sköruglega frammistöðu í embætti borgarstjóra í kjölfar mikilla átakatíma og hefur náð að lægja öldur og vera sá leiðtogi sem stýrir málum af festu og ábyrgð. Kjörsókn í prófkjörinu er ágæt, einkum í ljósi þess að enginn leiðtogaslagur var.

Júlíus Vífill fær góðan stuðning í annað sætið og græðir á því að Gísli og Tobba börðust bæði um annað sætið. Gísli Marteinn fellur niður listann eftir að hafa tapað naumlega slagnum um annað og þriðja sætið. Slagurinn um annað sætið var barátta þeirra fyrst og fremst, eins og vel sést af tölunum. Mjög hefur verið sótt að Gísla Marteini og fáir sem hafa orðið fyrir harðari pólitískri aðför að persónu sinni á síðustu árum en hann, oftast með mjög ómerkilegum hætti.

Tobba tók talsverða áhættu með að sækjast eftir öðru sætinu og hefði eflaust fengið góða kosningu í þriðja sætið hefði hún tekið þann slag, en hún var djörf í sinni baráttu og hækkar upp listann, þó ég hefði viljað sjá hana ofar. Kjartan hefur eins og áður traust pólitískt bakland og stuðningsmannahóp - hefur setið í borgarstjórn lengst allra sjálfstæðismanna nú þegar Vilhjálmur Þ. hættir eftir 28 ára setu þar.

Geir Sveinsson kemur sterkur inn á framboðslistann, efstur nýliðanna, og getur mjög vel við unað. Mér fannst það talsverður hroki hjá Geir að lýsa óánægju með útkomuna. Eflaust talar þar keppnismaðurinn Geir, sem var handboltafyrirliði árum saman og mikill íþróttakappi með mikið keppnisskap. Hann á hinsvegar ekki að láta svona klaufaleg ummæli og á að vita betur en þetta. Vond byrjun vægast sagt!

Áslaug og Hildur koma sterkar inn í hóp efstu frambjóðenda og munu verða mikilvægur hluti kosningabaráttunnar fyrir sjálfstæðismenn. Í heildina mjög sterkur listi sem á að geta gert góða hluti. Ég óska sjálfstæðismönnum góðs gengis í kosningunum í vor. Þetta er listi sem getur á góðum degi tekið borgina traust.

18 atkvæðum munaði á Kjartani og Gísla í 3. sæti

Glæsilegur sigur Guðmundar Baldvins

Framsóknarmenn hér á Akureyri völdu rétt með því að kjósa Guðmund Baldvin Guðmundsson sem leiðtoga sinn. Sigur hans er traustur og afgerandi - úrslitin koma ekki að óvörum enda er Mundi vandaður og traustur maður. Enginn vafi leikur á því að hann er maðurinn sem Framsókn þarf til að rétta sinn hlut eftir hið sögulega afhroð árið 2006 og mun eflaust ná að laða til sín mikið fylgi.

Úrslit prófkjörsins í heildina markast af mikilli uppstokkun. Sitjandi bæjarfulltrúi hættir og nýju fólki er treyst fyrir uppbyggingu flokksstarfsins. Mundi fær afgerandi umboð til að leiða það starf á meðan hinir leiðtogaframbjóðendurnir fá báðir mikinn skell.

Gerður Jónsdóttir, bæjarfulltrúi 2002-2006, sem féll naumlega úr bæjarstjórn í síðustu kosningum, fær mikinn skell og Hannes Karlsson náði ekki flugi í leiðtogaframboði sínu. Petrea Ósk og Sigfús Karlsson ná bæði settu marki, fá trausta kosningu.

Þetta er framboðslisti sem getur því sótt fram. Er ekki markaður af fortíðinni og hefur talsverð sóknarfæri, ekki ólíkt Samfylkingunni sem vann mikið fylgi í síðustu bæjarstjórnarkosningum, hafði ekki bæjarfulltrúa og gat sótt fram óhikað.

Guðmundur sigraði í prófkjöri Framsóknar

Glæsilegur sigur hjá strákunum okkar

Strákarnir okkar í handboltanum komu sterkir til baka í kvöld og skelltu Dönunum með glans. Eftir vonbrigðin miklu, þegar þeir misstu þriggja marka forskot úr höndunum á 45 sekúndum, minntu þeir okkur á silfurliðið í Kína 2008. Loksins small allt hjá þeim og þeir kláruðu Danina traust og flott.

Maður leiksins var án vafa Björgvin Páll, sem hefur algjörlega brillerað á þessu móti og staðið sig með miklum sóma. Svo er gaman að sjá Aron Pálmarsson blómstra í liðinu í þessum leik, klárlega ein skærasta framtíðarstjarna íslenska handboltans.

Dönum skellt í Linz

Vandræðalegt klúður hjá Ríkisútvarpinu

Fréttastofa Ríkisútvarpsins, undir fréttastjórn Óðins Jónssonar, klúðraði feitt með því að slá upp sem fyrstu frétt fasteignaviðskiptum sendiherra og þingmanns, sem reyndust í góðu lagi þegar á reyndi. Fréttastofan hefur nú beðið viðkomandi afsökunar og viðurkennir þar með afglöp sín. Þessi stormur í vatnsglasi rýrir trúverðugleikann á þessari fréttastöð og verður fréttastjóranum þar vonandi væn lexía í vinnubrögðum.

Forðum daga var fréttastofa Ríkisútvarpsins rómuð fyrir trúverðugan fréttaflutning, skotheld vinnubrögð og mátti treysta fréttum þar betur en á flestum öðrum fjölmiðlum. Kaldhæðnislegt er að þetta klúður er afsakað á þeim degi er fjölda kvenna er vísað þaðan á dyr og þrengt svo að landsbyggðarfréttum að slagorðið Útvarp allra landsmanna hljómar eins og hver annar ódýr brandari.

Þetta klúður vekur spurningar um hvað er að gerast hjá fréttastofunni á vakt Óðins Jónssonar. Afsökunarbeiðnin breytir ekki því að efast er æ meir um vandaðan fréttaflutning hjá Ríkisútvarpinu. Fréttir þaðan og vinnubrögð verða æ litaðri og frægð hinna fornu daga gleymist mjög hratt.

Bað þingmenn og sendiherra afsökunar

Blóðugur niðurskurður hjá RÚV

Niðurskurðurinn hjá Ríkisútvarpinu er ansi blóðugur og ber þess merki að Kastljósið verður gengisfellt gríðarlega og fréttaumfjöllun verði skorin niður. Þórhallur Gunnarsson hefur greinilega ekki séð sér fært að standa að þessum róttæku breytingum og hefur gengið á dyr, ekki treyst sér í það verkefni.

Ekki stóð það lengi að Sjónvarpið væri með fréttaskýringaþátt. Fréttaaukinn með Elínu Hirst er sleginn af og henni vísað á dyr og flaggskipið í kvölddagskránni veikt gríðarlega í sessi og glamúrinn tekinn úr þættinum auk þess sem svæðisstöðvarnar fá nokkurn skell, rétt eins og í síðustu niðurskurðaráformum.

Auðvitað þarf þetta ekki að koma að óvörum. Niðurskurður hefur verið mikill í fjölmiðlabransanum að undanförnu og ekki eru nema nokkrir mánuðir síðan Morgunblaðið fór í sársaukafullan niðurskurð og sagði upp fjölmörgum reyndum blaðamönnum, sumum eftir áratugalöng störf.

Auðvitað eru þetta vondar fregnir fyrir þá sem vilja traustar og góðar fréttir, vandaða fréttaumfjöllun. Hún verður illa úti í þessu árferði og auðvitað ömurlegt að það sé ráðist að góðri dagskrárgerð.

Niðurskurður og hagræðing verður einkennisorð fjölmiðla á næstunni, eins og víða annarsstaðar. Með því er auðvitað ljóst að gæði dagskrár minnkar og ekki er sjálfgefið að við fáum sömu góðu þjónustu og áður var.

Margir missa vinnuna á RÚV

Dramatískt jafntefli - skelfilegt klúður

Maður er eiginlega orðlaus eftir að hafa horft á íslenska landsliðið klúðra sínum málum með því að missa sigurleik úr höndunum á síðustu sekúndur og það annan leikinn í röð. Eitthvað er stórlega að hjá liðinu: það vantar leikgleðina og neistann í liðið. Sóknin og vörnin eru bæði í tómu tjóni og veruleg veikleikamerki á liðinu. Þegar íslenska landsliðið getur ekki tæklað það austurríska er eitthvað stórlega að.

En það verður að vona það besta þó allt sé í tómu tjóni hjá landsliðinu. Nú verður að stóla á sigur gegn Dönum. En þá verður allt að ganga upp og laga þá miklu veikleika sem eru á liðinu eftir tvö flopp í röð, þegar það spilar sigri úr höndunum á sér, hreinlega leikur sér að því að klúðra málum. Þvílík vonbrigði. Nú verður liðið að taka sig á og reyna að bjarga málunum.

Nú er að duga eða drepast...

Klúðruðu stigi í lokin

Ólafur F. gjörsamlega genginn af göflunum

Framganga Ólafs F. Magnússonar, borgarfulltrúa, á borgarstjórnarfundi í dag í garð Hönnu Birnu Kristjánsdóttur, borgarstjóra, er til skammar og honum ekki til sóma. Maðurinn virðist gjörsamlega genginn af göflunum ef marka má orðaforða hans í ræðu á borgarstjórnarfundinum og þá níðvísu sem hann las upp gegn Hönnu Birnu. Ætli Ólafur F. að reyna að ná endurkjöri í borgarstjórn á svona trixum er ekki von á málefnalegri og merkilegri kosningabaráttu af hans hálfu.

Eitt af lykilatriðum stjórnmálamanna vilji þeir vera trúverðugir er að vinna af einlægni og trúverðugleika, sýni að þeir séu traustsins verðir. Framganga Ólafs F. á þessum fundi í dag styrkir ekki stöðu hans sem stjórnmálamanns og vekur aðeins spurningar um hvort hann gangi heill til skógar.

Ólafur víttur á borgarstjórnarfundi

Þórhallur Gunnarsson segir upp hjá RÚV

Brotthvarf Þórhalls Gunnarssonar frá Ríkisútvarpinu eru mikil tíðindi. Hann hefur verið áberandi sem ritstjóri Kastljóssins frá upphafi í því formi sem þátturinn er nú og sem dagskrárstjóri frá því stofnunin var hlutafélagavædd. Hann hefur verið nánasti samstarfsmaður Páls Magnússonar, útvarpsstjóra, og hlýtur ákvörðunin að vera mikið áfall fyrir hann, enda valdi hann Þórhall sér við hlið sem dagskrárstjóra og sótti hann til Stöðvar 2 til að stýra Kastljósinu haustið 2005 eftir að Logi Bergmann hafnaði því boði.

Ákvörðun Þórhalls vekur spurningar um hvað sé framundan hjá Ríkisútvarpinu, ekki aðeins hvernig dagskrárstefnan breytist þar heldur hvernig sparnaðaráformin verði. Væntanlega verður farið í blóðugan niðurskurð á dagskrárgerð Sjónvarpsins. Þá kemur væntanlega í ljós hvað er höggvið af og hverju er breytt. Væntanlega mun Sjónvarpið finna illilega fyrir þeim niðurskurði og eðlilegt að spurt sé hvort Þórhallur hætti vegna niðurskurðar í Sjónvarpinu.

Kannski á að fara að breyta Kastljósinu og umgjörð þessa flaggskips Sjónvarpsins í dagskrárgerð. Ef svo verður verður ákvörðun Þórhalls örugglega skiljanlegri.

Þórhallur hættir á RÚV

Höfnum Icesave-samningnum 6. mars

Ég fagna því að ríkisstjórnin tók ekki þjóðaratkvæðagreiðsluna um Icesave af íslensku þjóðinni. Nú getur hún tjáð sig afdráttarlaust í kosningunni 6. mars. Ég ætla að vona að það verði góð þátttaka og landsmenn muni hafna þessum samningum afdráttarlaust, umfram allt hafna með því vinnulaginu við gerð fyrri samninga og lélegum vinnubrögðum íslenskra stjórnvalda.

Þetta er í sjálfu sér ekki flókið mál. Íslenska þjóðin hefur í valdi sínu hvort þessum samningum og skuldbindingum verði hafnað eður ei. Ég tel þetta gullið tækifæri fyrir íslensku þjóðina til að taka málin í sínar hendur og taka af skarið um hver þjóðarviljinn er í málinu.

Kosið 6. mars

Leitin að Dorrit

Fréttin um hvarf Dorrit Moussaieff og dramatíska leit að henni er eilítið skondin. Dorrit á alltaf auðvelt með að ná athygli á smellin hátt og er skemmst að minnast þess þegar hún sagði að Ísland væri stórasta land í heimi. Skemmtilega floppuð málfræðileg setning en vakti aðdáun og áhuga íslensku þjóðarinnar. Yndislega heillandi.

Þrátt fyrir að Dorrit Moussaieff hafi verið við hlið Ólafs Ragnars Grímssonar í tæpan áratug, fyrst sem framandi kona í matarboði á Bessastöðum sem enginn kannaðist við, síðar sem unnusta hans í þrjú ár og loks eiginkona og forsetafrú vita fáir hver Dorrit er á bakvið myndavélablossann og brosin á myndunum.

Hún er enn framandi, viss leyndardómur fyrir þjóðina. Það er vissulega heillandi staðreynd, og hún hefur staðið sig vel í sínu hlutverki.

Ætluðu að hefja leit að Dorrit