Eiríkur sigrar í Eurovision - íslenskt rokk til Helsinki

Rokkarinn Eiríkur Hauksson sigraði í kvöld í Söngvakeppni Sjónvarpsins. Hann verður fulltrúi Íslands í Eurovision í forkeppninni sem haldin verður í Helsinki í Finnlandi 10. maí nk. Þetta verður í þriðja skiptið sem Eiríkur tekur þátt í aðalkeppni Eurovision, en Sigríður Beinteinsdóttir keppti ennfremur þrisvar í Eurovision á nokkurra ára tímabili.

Eiríkur söng Gleðibankann í Bergen í Noregi árið 1986 ásamt Helgu Möller og Pálma Gunnarssyni, undir merkjum Icy-tríósins, sem var fyrsta framlag Íslendinga til keppninnar. Síðan söng hann lagið Mrs. Thompson með hljómsveitinni Just 4 Fun sem var framlag Noregs árið 1991. Það lag hafnaði í 17. sæti en Gleðibankinn lenti í því 16. eins og frægt er orðið og var það hlutskipti okkar í keppninni fyrstu þrjú árin. Aðeins fjórum sinnum hefur Ísland náð að komast á topp tíu í keppninni. Frammistaða Selmu Björnsdóttur í Jerúsalem fyrir átta árum, annað sætið, er okkar besta.

Lagið Ég les í lófa þínum, eftir Svein Rúnar Sigurðsson við texta Kristjáns Hreinssonar, verður tuttugasta framlag Íslands í Eurovision. Sigur Eiríks nú er svo sannarlega verðskuldaður. Hann hefur ekki tekið þátt í undankeppninni hérna heima í tvo áratugi, en hann ásamt söngflokknum Módel lenti í öðru sæti í keppninni árið 1987 með lagið Lífið er lag. Eiríkur var einfaldlega langsterkasti flytjandinn og lagið hið besta. Ekta rokksveifla. Þetta er mjög góð niðurstaða og vonandi mun Eiríki ganga vel eftir þrjá mánuði.

En hver á nú að vera fulltrúi Íslands í norræna spekingahópnum sem fer yfir lögin nú þegar að Eiríkur er orðinn flytjandi sjálfur í keppninni? Þar verður eftirsjá af okkar manni. Við eigum að senda Selmu Björns til leiks í það dæmi núna að mínu mati.

Eiríkur Hauksson verður fulltrúi Íslands í Helsinki

Athugasemdir

[Sigfús Þ. Sigmundsson, 18.2.2007 kl. 00:00]

Pál Óskar í spekingaþáttinn....

[Stefán Friðrik Stefánsson, 18.2.2007 kl. 00:10]

Já, Páll Óskar er líka mjög sterkur valkostur. Verð sáttur ef annað þeirra fer í þáttinn.

Það væri gaman ef Selma færi, enda myndi það gera það að verkum að þá myndi hún mæta hinni sænsku Charlotte Nilsson Pirelli, þeirri hinni sömu og sigraði hana í keppninni í Jerúsalem í maí 1999, en Charlotte hefur verið sænski fulltrúinn í spekingaþættinum.

mbk.

[Stefán Friðrik Stefánsson, 18.2.2007 kl. 00:24]

Já, alveg hiklaust. Ekki fer þátturinn fram á ensku svo að skandinavísk tungumálakunnátta skiptir miklu máli.

mbk.

[Glanni (IP-tala skráð) 18.2.2007 kl. 02:32]

Jæja nú er ég búinn að sjá  að þú ert einn af kareokí masterum Íslands.

ekki illa meint........ hef bara gaman af þessu líka kv.

[Svavar Friðriksson (IP-tala skráð) 18.2.2007 kl. 09:41]

Ef ég man rétt þá er þetta í fyrsta og eina skiptið sem við sendum lag út sem eitthvað í líkingu við rokk.  Það er miður enda er það sú tónlist sem lifir lengst allra og ber af sér allar tískubylgjur eins og síðhærður víkingur í berserkjasveppaæði.  Næsta ár sendum við Sigurrós eða Mínus og breytum þessari pissudúkkukeppni yfir í alvöru tónlistarviðburð.

Eiríkur er minn maður, set hann á sama stall og David Coverdale og Bruce Dickinson enda frábær söngvari og drengur góður!

[Óðinn Þórisson (IP-tala skráð) 18.2.2007 kl. 09:49]

Eftir vitleysuna og hneykslið í fyrra þá er þetta nákvæmlega það sem við þurftum.

Eiríkur er frábær.

[Stefán Friðrik Stefánsson, 18.2.2007 kl. 10:17]

Takk fyrir kommentin.

Glanni: Að vissu leyti er ég það hehe. :)

Svavar: Algjörlega sammála þér. Eiki er algjör snillingur, hann hefur líka reynsluna og við erum ekki að senda neinn aukvisa út. Eiki er einn af fremstu söngvurum landsins, eðalrokkari og fínt að senda þessa týpu út núna. Eiki minnir mig svolítið á eðalrokkarann Pétur W. Kristjánsson, enda var hann einn af lærifeðrum hans. Pétur lést langt fyrir aldur fram fyrir nokkrum árum. Pétur var þá í miðri Kim Larsen-versíón plötu og Eiki var beðinn af fjölskyldu hans að klára þau lög sem enn voru ófrágengin. Eiki er einfaldlega maður með reynslu og þekkingu og hiklaust rétt að senda hann nú.

Óðinn: Ekki spurning með það. :)

mbk.