Suðurlandsveg verður að tvöfalda

Það var sorglegt að sjá fréttamyndir frá banaslysinu á Suðurlandsvegi í kvöld - mann setti alveg hljóðan. Þar lést kona um fimmtugt. 55 hafa nú látið lífið í umferðinni á Suðurlandsvegi frá árinu 1972 og yfir 1200 hafa slasast þar frá árinu 1990. Öllum er ljóst að tvöfalda verður þessa miklu hraðbraut milli Reykjavíkur og Selfoss.

Ég hvet alla til að smella á sudurlandsvegur.is og skoða þar góðan vef þeirra sem berjast fyrir tvöföldun. Ég ritaði þar fyrir nokkrum mánuðum nafn mitt í áskorun til samgönguráðherra um að tvöfalda Suðurlandsveg, án tafar. Það er svo sannarlega mikilvægt að bæta úr samgöngum þar. Þessi slys öll segja sína sögu vel.

Ég stend með Sunnlendingum í þeirra baráttu - Suðurlandsveg verður að tvöfalda án tafar! 

Suðurlandsvegur lokaður áfram vegna alvarlegs umferðarslyss

Athugasemdir

[Steini Briem (IP-tala skráð) 21.3.2007 kl. 22:54]

Jamm, það er nauðsynlegt að tvöfalda þjóðveginn frá Selfossi til Akureyrar og gera jarðgöng undir Vaðlaheiðina. 

[Glanni (IP-tala skráð) 22.3.2007 kl. 00:59]

Já það  er alveg ömurlegt ástand á þessum vegi  sértaklega eftir að þeir breyttu honum í 2+1 á köflum með Vírunum á milli (ostaskerunum) því einbreiði vegurinn er svo mjór að það er með ólíkindum að þetta hafi verið samþykkt af þeim sem tóku verkið út á sínum tíma, er það ekki vegagerð ríkisins sem tekur verkin út? Annars hef ég sjaldan hlegið jafn mikið og þegar vegamálastjóri sagði í útvarpsviðtali í rúv um daginn að það væri bara verra að tvöfalda veginn því þá myndaðist bara helmingi meiri hálka á veginum

[Sigurður M. Grétarsson (IP-tala skráð) 22.3.2007 kl. 10:17]

Enn eru menn að halda áfram að tala um nauðsyn á tvöföldun Suðurlandsvegar til að koma í veg fyrir banaslys, jafnvel þó sérfræðingar umferðastofu, rannsóknarnefndar umferðaslysa og helstu sérfræðingar landsins á sviði umferðamála segi að 2+1 vegur fækki banaslysum og alvarlegum umferðaslysum jafn mikið en kosti aðeins um þriðjung þess, sem tvöfaldur vegur kostar.

 

Þegar menn eru að tala um það að eitthvað meira sé um umferðaslys á 2+1 vegi en tvöföldum vegi þá eru menn að álykta það út frá kostnaðar og ábatagreiningu, sem sýnir að kostnaður vegna slysa er örlítið meiri á 2+1 vegi en tvöföldum vegi og álykta þannig að banaslys séu fleiri að sama skapi. Þetta er misskilningur. Munurinn þarna á fellst fyrst og fremst í skemmdum á bifreiðum, sem verða við það að rekast utan í vegriðin, sem gerist síður á tvöföldum vegi. Þetta leiðir þó sjaldnast til meiðsla á fólki og alls ekki til alverlegra slysa. Þá er ég að tala um nudd utan í vegrið á 2+1 vegi, sem hefði annars ekki gerst á tvöföldum vegi en ekki hreina ákeyrslu á vegriði enda allar líkur á að í slíkum tilfellum hefði einnig orðið um slys að ræða á tvöföldum vegi.

 

Umræðan um að víravegriðin séu hættuleg og þá sérstaklega mótorhjólamönnum eru þvert gegn reynslu Svía með um 15 þúsund kílómetra af slíkum vegum. Samkvæmt þeirra reynslu er ekki að sjá að lýkur á alvarlegu slysi á mótorhjólamanni við að rekst á þessi vegrið séu meiri en þegar um hefðbundin vegrið sé að ræða. Hin mikla uppbygging Svía á 2+1 vegum eru reyndar ein af helsur ástæðum þess að þeir eru í öðru sæti í heiminum meðal þróaðra ríkja með fæst banaslys á hverja 100 þúsund íbúa. Fyrir sama pening og þeirra 15 þúsund kílómetrar af 2+1 vegum hafa kostað hefðu þeir geta lagt um 5 þúsund kílómetra af tvöföldum vegum og þannig væri árangur þeirra mun lakari en hann hefur orðið. Það næst einfaldlega mun meiri árangur í baráttu gegn umferðaslysum á þjóðvegum með því að leggja lengri kafla af 2+1 vegum en að leggja styttri kafla af tvöföldum vegum fyrir sama pening. Vasar skattgreiðenda eru ekki ótæmandi.

 

Krafan um tvöfaldan veg í stað 2+1 vegar er því krafa um aukna afkastagetu en hefur ekkert með umferðaöryggi að gera. Þegar slík krafa er gerð undri yfirskyni bætts umferðaöryggis er einfaldlega verið að koma faram með kröfu á röngum forsendum. Ýmsir tala um 2+1 veg, sem bráðabyrgðalausn þó flest bendi til að slíkur vegur milli Reykjavíkur og Selfoss muni duga að minnsta kosti til ársins 2030. Er það ekki ansi langt gengið að tala um lausn til aldafjórðungs, sem “bráðabyrgðalausn”. Tvöfaldur vegur dugar væntanlega ekki heldur til eilífðar. Hvar er eðliegt að setja mörkin í árafjölda þegar talað er um “bráðabyrgðalausn”?

 

[Grímur Gíslason, 22.3.2007 kl. 10:32]

Tek undir þetta með þér Stefán. Ég keyri þessa leið daglega og geri mér ljósa grein fyrir því að þennan veg VERÐUR að tvöfalda og það strax.

[Grímur Gíslason, 22.3.2007 kl. 10:33]

Tek undir þetta með þér Stefán. Ég keyri þessa leið daglega og geri mér ljósa grein fyrir því að þennan veg VERÐUR að tvöfalda og það strax.

[Ásdís Sigurðardóttir, 22.3.2007 kl. 12:55]

Í veðri eins og hefur verið síðustu daga hefur skafið illa upp að vírunum og skapað hættu fyrir vegfarendur. Eftir slysið í gær vill maður samt helst hafa girðingu milli akgreina til að forða head on árekstri, þetta var hræðilegt.