Verða umhverfismálin ekki kosningamál í vor?

Það vekur mikla athygli að umhverfismál, sem margir hafa talið mál málanna að undanförnu, er í fjórða sæti yfir mikilvægustu kosningamálin í vor í könnun Fréttablaðsins í dag. Ofar á listanum eru velferðarmál, efnahagsmál og skattamál. Allt eru þetta málaflokkar sem snerta kjósandann beint. Samt sem áður eru þetta í senn áberandi og athyglisverðar niðurstöður, einkum í ljósi þess að til sögunnar er komið nú nýtt grænt framboð auk þess sem margir telja sterka stöðu VG vera vegna stefnu í umhverfismálum.

Greinilegt er á þessari könnun að sjávarútvegs- og Evrópumál eru ekki ofarlega í huga landsmanna og harla ólíklegt að það verði mál sem verði í forgrunni kosningabaráttunnar. Sjávarútvegsmálin voru aðalmálin fyrir fjórum árum og það sem mest var um talað á lokasprettinum, en greinilegt að það mál trekkir ekki mikið nú. Sveifla í þeim málum og mikil umræða þá kom Frjálslynda flokknum til góða og flokkurinn keyrði á því máli og hlaut fjögur þingsæti. Nú virðast forystumenn þar ætla að keyra á innflytjendamálin, ef marka má tal kjördæmaleiðtoga þeirra í Reykjavík.

En þessi mæling á umhverfismálunum vekur athygli innan við sjö vikum fyrir kosningar. Ný framboð eru komin sem ætla sér að keyra nær eingöngu á þessum áherslum á þessum tæpu 50 dögum sem eftir eru. Fróðlegt verður að sjá hvort einhver bylgja myndast utan um það eða áherslur þess. Nýtt hægri grænt framboð fékk svosem ekki fljúgandi start í könnun Fréttablaðsins um helgina, en fróðlegt verður að sjá næstu mælingar.

Heilt yfir virðast mjúku málin ætla að verða í forgrunni. Þetta verður þó varla mjúk kosningabarátta. Það er erfitt að spá í spilin nú og við stefnum í eina af mest spennandi kosningabaráttum í áratugi ef marka má kannanir og þær sviptingar sem þær boða í raun. En það verður fróðlegt að sjá hvort staðan sé svona - hvort að umhverfismálin verði hliðarmál í kosningabaráttunni. Það segir þessi könnun okkur allavega.

Athugasemdir

[Steini Briem (IP-tala skráð) 27.3.2007 kl. 13:06]

UMHVERFISMÁL, velferðarmál, efnahagsmál og skattamál eru nú öll samofin og vart hægt að skilja þau hvert frá öðru. Væri svona svipað og að segja að það sé mikilvægara að fara í vinnuna á hverjum degi en að komast í vinnuna og fara með krakkana í leikskólann. Ég gef nú lítið fyrir endalausar skoðanakannanir um allt og ekki neitt. Hef sjálfur oft lent í þeim. Hér eru fyrirtæki sem hafa "atvinnu" af þessu rugli öllu og verða að finna upp á einhverju "nýju" til að spyrja um á hverjum degi. En við getum haft gaman af þessu og sleppt því að púsla í staðinn.

[Ásdís Sigurðardóttir, 27.3.2007 kl. 13:48]

Gott hjá þér Steini, bara snúa þessu eins og þú vilt. Segir þú ekki satt og rétt frá í skoðanakönnunum? Þó svo skoðanakannanir séu ekki stóri vísdómur, þá eru þær oftast nær sannleikanum en við viljum vera láta, eftir því hversu vel þær koma út fyrir okkar skoðanir. Ég gleðst svo sannarlega yfir því að samgöngu og atvinnumál séu þau mál sem menn spá mest í og tala nú ekki um velferðamálin, sannar það sem ég hef alltaf sagt, meirihlutinn er alltaf fjandi skynsamur.

[i skulason (IP-tala skráð) 27.3.2007 kl. 14:27]

Umhverfismálin eru góðu lagi hér það sjá allir sem vilja sjá.Það er bara hinn hávaðisami minnihluti sem heldur annað.Fólk allment hefur meiri ahuga á öðrum málum

[Gústaf Níelsson (IP-tala skráð) 27.3.2007 kl. 14:28]

Þessi niðurstaða kemur ekkert á ávart. Mánuðum saman hafa vinstrimenn´verið að "kjafta upp" umhverfismálin og ýmsir af öðru pólitísku sauðahúsi, eins og ofurhuginn Ómar Ragnarsson, hafa fengið slík mál á heilann og mikið pláss í fjölmiðlum fyrir hugarfóstrið. Landsmenn gera sér auðvitað grein fyrir því að Ísland er ekki fórnarlamb umhverfissóða og margir hyggja að umhverfismálaáhugi Vg sé sprottinn af öðrum hvötum en umhyggju fyrir umhverfinu. Í eina tíð börðust íslenskir sósíalistar gegn stóriðju til að bjarga þjóðinni frá alþjóðlegu auðvaldi - nú berjast þeir gegn henni til að bjarga náttúrunni. Öll er þessi barátta þeirra háð af slæmum hvötum. Orkuvinnsla er grundvöllur lífsbjargar í landinu á nýrri öld. Við getum deilt um það í hvað skuli nota orkuna. Skáldið Andri Snær lofaði okkur stórorkukaupum af hendi Google í Kastljóssþætti. En skyldi "stóriðja hugvísindanna" kaupa orku ef ekkert afl er virkjað? Og veit einhver um þjóð sem situr á vistvænum orkugjöfum í sama mæli og Íslendingar og neitar að nýta þá af umhverfisástæðum?

[Stefán Friðrik Stefánsson, 27.3.2007 kl. 15:27]

Takk fyrir kommentin.

Steini: Niðurstaðan er nokkuð áberandi. Margir ætluðu að keyra á þessu sem aðalmáli en það er greinilegt að þjóðin er ekki einhuga um þetta mál. Það eru skiptar skoðanir um þetta. Það er ágætt að sjá þessa mælingu. Hér í Norðausturkjördæmi eru atvinnu- og samgöngumál langmest áberandi skv. mælingum Gallups og allt annað er órafjarri. Það virðist vera þannig með landsbyggðina. Þessi keyrsla á umhverfismálunum virðist helst njóta hyllis á höfuðborgarsvæðinu.

Ásdís: Góðir punktar. Sammála því sem þú segir um atvinnu- og samgöngumál.

I Skúlason: Góðir punktar.

Gústaf: Takk fyrir áhugaverða punkta og gott innlegg.

mbk.