Fer Jón Baldvin í framboð fyrir Íslandshreyfinguna?

Orðrómur gengur nú um það að Jón Baldvin Hannibalsson, fyrrum utanríkisráðherra og sendiherra, fari fram fyrir Íslandshreyfinguna í Reykjavík. Ef marka má orðróminn munu listar Íslandshreyfingarinnar verða lagðir fram fyrir helgina. Talað er jafnvel um að Jón Baldvin skipi annað sætið í Reykjavík suður, á eftir Ómari Ragnarssyni, formanni Íslandshreyfingarinnar. Ennfremur hefur Ólafur Hannibalsson, bróðir Jóns Baldvins, verið orðaður við framboð með Íslandshreyfingunni.

Þetta eru svo sannarlega stórtíðindi ef af verður, enda hefur Jón Baldvin verið einn af Nestorum Samfylkingarinnar og verið í hávegum hafður þar. Hann var ötull stuðningsmaður Ingibjargar Sólrúnar Gísladóttur í formannskjörinu í Samfylkingunni fyrir tveim árum er hún felldi svila sinn, Össur Skarphéðinsson, fyrsta formann flokksins, af formannsstólnum.

Jón Baldvin hefur frá lokum stjórnmálaferils síns, er hann hætti til að rýma í raun fyrir fyrri tímum gömlu A-flokkanna og stuðla að stofnun Samfylkingarinnar, verið mjög áberandi á bakvið tjöldin og talað máli flokksins og lagt honum lið, t.d. í utanríkismálum að undanförnu. Þeir tímar virðast vera að líða undir lok og athygli vakti er boð honum til handa um heiðurssæti hjá SF í Reykjavík var dregið til baka eftir að hann gagnrýndi forystu flokksins í hvössu viðtali í Silfri Egils.

Það verður fróðlegt að sjá hvað kratahöfðinginn margfrægi hyggst fyrir.

Athugasemdir

[Marvin Lee Dupree, 12.4.2007 kl. 02:00]

Þetta er nöldur, ég geri grein fyrir því. En það er aðeins til einn Nestor þ.e. samkvæmt þeirri tilvísun sem þú ert að vísa í. Hinn vitri Nestor. Þar af leiðandi ekki margir Nestorar.

Kannski er þetta bara því mér finnst þetta virka eins og latnesk beyging í fleirtölu og eignarfalli sbr. Nestorum.

Það væri gaman að sjá Jón Baldvin snúa aftur inn í hringinn.

[Egill Óskarsson, 12.4.2007 kl. 03:53]

Ég held að það væri bara hin prýðilegasta lausn að fá þá bræður í Íslandshreyfinguna. Ég ætla þó ekki að segja hverjum ég telji að það gagnaðist best.

[Hjörleifur Guttormsson, 12.4.2007 kl. 08:39]

Sæll Stefán.

 Þú ritar athygliverða pistla. Ég er þér sammála um að það væru nokkur tíðindi ef Jón Hannibalsson birtist miðskips hjá Ómari Ragnarssyni. Hins vegar mun það varla auka trúverðugleika Íslandshreyfingarinnar sem flokks hægra megin við miðju eins og liðsveitin hefur reynt að kynna sig. Ég er heldur ekki trúaður á að slíkur "liðstyrkur" myndi auka fylgi við Í-listann sem enn er hvergi kominn fram í dagsljósið nema kannski reita eitthvað utan af Samfylkingunni sem þyrfti á allt öðru að halda í vorhretunum. Annars vík ég að vanda Íslandshreyfingarinnar á heimasíðu minni www.eldhorn.is/hjorleifur

Ég veit ekki hvort þú manst eftir þeim tímum þegar tveir Jónar leiddu Alþýðuflokkinn 1987 fram undir miðjan 10. áratuginn. Annar er sá Jón sem hér var áður nefndur og hljóp í fang Davíðs Oddssonar í Viðey 1991, hinn er alnafni núverandi formanns Framsóknar og ekki alveg ólíkur honum nema skeggið vantar. Jón Hannibalsson kallaði hann til 1987 og m.a. var hann  iðnaðarráðherra á árunum 1988-1993. Helsta baráttumál hans allan þann tíma var að koma upp álbræðslu á Keilisnesi sem Friðrik Sófusson hafði lagt grunninn að 1987. Skrifað var margsinnis undir hátíðlegar yfirlýsingar við Atlantsál-samsteypuna sem átti að draga vagninn en ekki gekk rófan. Allt rann það út í sandinn 1993 og Jón Sigurðsson sá þann kost vænstan að hætta á þingi. Nafni hans Hannibalsson hjálpaði honum þá upp í bankastjórastól hjá Norræna iðnaðarbankanum svo að hann ætti fyrir grautnum. Nú hefur Samfylkingin kallað þennan mislukkaða álkóng til liðs við sig eftir afhroðið í Hafnarfirði og birtist hann sem sérfræðingur Ingibjargar formanns á sjónvarpsskjá í gær.

Það væri svo til að kóróna þetta gamla fóstbræðralag Jónanna ef þeir nú færu að takast á yfir borðið, Sigurðsson í nafni Fagra Íslands en Hannibalsson fyrir hönd Ómars Ragnarssonar.

Bestu

[Hjörleifur Guttormsson, 12.4.2007 kl. 08:44]

Bestu kveðjur Stefán og haltu áfram að rýna í stjórnmálaflóruna

                                                                      Hjörleifur

[Stefán Friðrik Stefánsson, 16.4.2007 kl. 13:11]

Þakka ykkur kærlega fyrir kommentin. Sérstaklega þakka ég þér Hjörleifur fyrir áhugaverð skrif og skemmtileg. Gaman að lesa þau.

mbk.