Mikil mildi að ekki fór illa á Sæbraut

Það var svo sannarlega mikil mildi að ekki fór illa á Sæbraut í morgun þegar að steypubifreið valt. Þetta slys er áminning þess að mjög illa getur farið þegar að keyrt er með mikið lestaða bíla um göturnar og snöggar beygjur og aðreinar geta orðið vettvangur vondra umferðarslysa af þessu tagi. Það má allavega teljast ótrúleg gæfa að ekki varð stórslys við þessar aðstæður.

Það vekur mikla athygli að nú þegar að árið er næstum hálfnað hafa aðeins tveir látið lífið í umferðinni. Á þessum tímapunkti fyrir ári höfðu sjö eða átta látist. Júlí varð reyndar mjög vondur mánuður í umferðinni á síðasta ári. Svo er jafnan og því erfitt um að segja hvort að við sleppum algjörlega við stórslys í sumar, en vonandi mun svo fara auðvitað.

Umferðarslys á Sæbraut

Athugasemdir

[Birgir Þór Bragason, 18.6.2007 kl. 14:50]

Fyrirgefðu Stefán, en ég get ekki fellt mig við orðalagið í setningunni sem inniheldur orðið „gleðiefni“. Við verðum að fara að temja okkur þann hugsunarhátt að enginn á að þurfa að láta lífið í umferðinni. Allt annað er óásættanlegt.

[Stefán Friðrik Stefánsson, 18.6.2007 kl. 15:00]

Tek undir þetta komment. Þetta er óheppilega orðað. Meiningin skilst vel en orðið á þessum stað er samt sem áður óheppilegt. Ætla að laga þetta. Það á aldrei að vera ásættanlegt að fólk láti lífið í umferðarslysum. Sjálfur hef ég misst fólk sem mér þótti vænt um í umferðarslysi og veit því sjálfur mjög vel hvað felst í þeim missi. Það er aldrei ásættanlegt að umferðarslys verði.

mbk.

[Ásdís Sigurðardóttir, 18.6.2007 kl. 15:40]

Vinur minn sagði mér að bílinn hefði verið á of mikilli ferð, þá hreyfist farmurinn til og þyngdarpunkturinn breytist. Aldrei of varlega farið. Þessir bílar verða að lúsast í beygjum til að vel fari.

[Stefán Friðrik Stefánsson, 18.6.2007 kl. 16:38]

Já, það hefur verið keyrt frekar hratt, það blasir við. Það þarf að fara varlega þegar að farið er með farm af því tagi sem þarna er um að ræða og auðvitað á það að gilda um alla þungaflutningabíla.

mbk.