Notalegt morgunspjall hjá Gesti og Hrafnhildi

Það var mjög notalegt að fara til Gests Einars og Hrafnhildar klukkan hálf átta í morgun á Rás 2 og rabba þar við þau um bloggheimana. Gaman að fá sér kaffi þar og fara í rólegheitunum yfir þessi mál með þeim. Þetta var gaman, enda fórum við yfir svo breitt svið, allt mögulegt og það var hlegið dátt og talað um allar áttir bloggheimanna; það sem er að gerast í umræðunni, pólitíkina og margt fleira. Þátturinn þeirra Gests Einars og Hrafnhildar er léttur og hress - það er því ekki hægt annað en njóta þess að mæta til þeirra og tala á mannlegu nótunum.

Það er vonandi að einhverjir hafi haft gaman af þessu. Naut þessa allavega mjög. Við Gestur Einar ræddum vel fyrir og eftir viðtalið og það var ánægjulegt að fá sér kaffibolla og tala vítt og breitt um þetta. Sérstaklega var rætt um landsleikinn í gær (skelfileg úrslit það) og pólitíkina í borginni, sem er sannarlega mál málanna. Var sérstaklega spurt mig að því hvort að það sé auðvelt að vera með mjög opinská skrif, beittur í greiningu. Finnst mér það ekki mikið vandamál, hér er talað hreint út og þar er litið bæði inn í minn flokk eins og alla aðra.

Hefði annars aldrei órað fyrir því þegar að ég byrjaði að blogga í september 2002 að ég ætti eftir að enda í viðtali sem einhvers konar hugsuður og sérfræðingur í bloggmálum! Þetta er í annað skiptið á þessu ári sem ég mæti til Gests Einars og Hrafnhildar, gagngert til að ræða bloggið. Ég fer ekkert leynt með það að ég er mjög ástfanginn af blogginu og því sem gerist þar. Hreifst af þessum vettvangi allt frá fyrsta degi og hef verið háður honum síðan.

Vona að aðrir hafi haft gaman af viðtalinu. Þetta var allavega notaleg og góð morgunstund.

Bloggviðtal við SFS - 181007

Athugasemdir

[Guðný GG, 18.10.2007 kl. 13:00]

Ég hlusta alltaf á þau á morgnana og að sjálfsögðu missti ég ekki af þættinum í morgun .Kannaðist eitthvað við nafnið þegar þú varst kynntur og viti menn svo kviknaði allt í einu á perunni ...já þetta er hann  Þetta var skemmtilegt viðtal ,gaman að heyra röddina á bak við skrifin þín . Þakka þér fyrir góðar og skemmtilegar færslur

[Stefán Friðrik Stefánsson, 18.10.2007 kl. 13:25]

Takk kærlega fyrir góð orð Guðný. Gaman að heyra frá þér og gott að þér líkaði vel við viðtalið. :)

mbk.

[Ólafur Hannesson (IP-tala skráð) 18.10.2007 kl. 13:33]

Já ég er sammála, það var gaman að hlusta, og gott að fá rödd til að tengja við skrifin. haltu áfram góðu verkunum.

mbk

Óli 

[alva (IP-tala skráð) 18.10.2007 kl. 14:55]

sorrý náði því ekki, var að tannbursta liðið...en það er gaman að fylgjast með blogginu þínu, nýi bloggvinur, takk fyrir tvennuna.

[Stefán Friðrik Stefánsson, 18.10.2007 kl. 15:36]

Takk kærlega fyrir góð orð Óli og Alva. Gott að eignast þig sem bloggvin Alva.

mbk.

[Kolbrún Baldursdóttir, 18.10.2007 kl. 20:51]

Ég hlustaði á viðtalið við þig Stefán, fínt viðtal í alla staði.
Mér fannst þú þó tala óþarflega varfærnislega um þessa fáu sem kunna sig ekki nægjanlega vel á blogginu. Mér heyrðist nefnilega spyrlarnir vera líka að fiska eftir þessu atriði.

Flestir sem hafa bloggað í einhvern tíma kannast við hversu óskemmtilegt það er þegar einhver ræður ekki við að skrifa athugasemd án þess að fara í persónulegt skítkast.  Stundum eru þetta skráðir bloggarar sem hafa síðan ekkert verið að skrifa á sínum eigin síðum en hafa mest gaman að því að leita uppi færslur þar sem þeir geta fengið útrás fyrir níðþörfina. Svo eru það þessir sem eru óskráðir og/eða skrifa undir dulnefni.

  Í þessum tilvikum sem ég hef upplifað þetta hafa athugasemdir þessara aðila borið þess merki að þeir hafa í raun ekki gefið sér tíma til að lesa færsluna sem um ræðir hverju sinni heldur grípa á lofti eitthvað úr henni og  fara svo á flug.
Sorglegt
Annars bara fínt viðtal eins og ég sagði.
Kíki oft inn á síðuna þína,

kveðja,

KB 

[Stefán Friðrik Stefánsson, 18.10.2007 kl. 20:58]

Takk kærlega Kolbrún mín fyrir þessi góðu orð. Það er alveg rétt að ég hefði getað talað meira um svörtu sauðina í netheimum. Þeir eru alltof áberandi í raun, setja leiðinlegan svip á annars fullkomið samfélag. Fór reyndar meira yfir þetta þegar að ég fór til þeirra í mars en þetta er punktur sem hefði eflaust mætt ræða meira um núna. Ég á eflaust eftir að fara til þeirra aftur og tala meira um síðar, þetta er mál sem þarf alltaf að ræða um.

Málefnaleg skrif og almenn kurteisi í garð annarra, þó að skoðanir geti verið skiptar, er mikilvægast að mínu mati. Ég er ósammála mörgum sem kommenta hér, en það er lykilmál að vera málefnalegur og tala heiðarlega og vel um fólk, þó t.d. í öðrum flokkum sé eða með aðrar skoðanir að einhverju leyti.

Takk enn og aftur fyrir kommentið, gott að fá það.

mbk.