Tom Cruise að missa lykilstöðu sína í Hollywood

Svo virðist vera að leikarinn Tom Cruise sé á góðri leið með að slaufa sig út úr innsta hring kvikmyndaborgarinnar Hollywood vegna sífellt undarlegri framkomu sinnar, trúarhita og kostulegra persónuleikabresta. Segja má að síðan að Cruise skildi við Nicole Kidman fyrir sex árum hafi leiðin sífellt legið niður á við fyrir hann. Fyrir ári sagði Paramount upp fjórtán ára samningi sínum við leikarann og hann var landlaus á eftir.

Cruise sem eitt sinn var gulldrengurinn í Hollywood hefur komið sér æ meir út í horn hjá stórstjörnum. Hann er nú beinlínis hataður Athygli vakti fyrir nokkrum mánuðum að Cruise varð langneðstur í könnun þar sem kannað var hvaða stjörnu fólk kysi helst að eiga sem besta vin. Sú var tíðin að Cruise var dálæti þeirra í Hollywood. Enda munaði litlu að Cruise hlyti óskarinn fyrir túlkun sína á lamaða Víetnam-hermanninum í Born on the Fourth of July árið 1990, ekki síður fyrir túlkunina á Jerry Maguire í samnefndri mynd árið 1996 og Mackey í Magnolia árið 2000.

Nú eru fáir, ef nokkrir, sem spá að Cruise muni nokkru sinni vinna óskarinn, svo hataður er hann í Hollywood vegna sérvisku sinnar og yfirdrifinnar sjálfselsku. Cruise, sem var á hápunkti ferilsins í lok níunda áratugarins og á þeim tíunda, hefur verið að reyna að byggja upp feril sinn á síðustu mánuðum með nokkrum kvikmyndum, með misjöfnum árangri. Hann reyndi að eiga endurkomu með því að túlka Ethan Hunt í Mission: Impossible III, þar sem hann reyndi að vinna eftir góða túlkun í fyrri myndunum tveimur. Á sama tíma gekk yfir upphaf frægs sambands hans við hina ungu Katie Holmes.

Það hafði engin lykiláhrif. Nýlega brá hann á það ráð að taka að sér hlutverk öldungadeildarþingmannsins Jesper Irving í kvikmyndinni Lions for Lambs. Leikur hann þar á móti óskarsverðlaunahöfunum Robert Redford og Meryl Streep. Var samstarfið á milli þeirra við gerð myndarinnar svo erfitt að Cruise er kominn á ævilangan haturslista Meryl Streep, sem talin er geta unnið með öllum leikurum og er þekkt fyrir gott skap og jákvætt hugarfar. Fæst hún ekki til að kynna myndina með Cruise og leikstjórinn Redford varð víst allt að því gráhærður við gerð myndarinnar.

Það verður sennilega rannsóknarefni fyrir kvikmyndaspekinga hvernig að Tom Cruise gat á nokkrum árum eyðilagt feril sinn. Eftir að hann skildi við Kidman hefur leiðin verið lóðbein niður á við. Kidman hefur hinsvegar gengið allt í haginn. Hún vann óskarinn fyrir fjórum árum, tókst það sem Cruise hafði alltaf dreymt um. Fátt bendir til að hann nái að feta í fótspor hennar miðað við hatrið á honum í kvikmyndaborginni.

Einu sinni var Cruise ungur og sjarmerandi. Var einmitt að horfa í gærkvöldi á kvikmyndina Risky Business frá árinu 1983, sem markaði um margt upphaf frægðarferils sólskinsstráksins Cruise. Flestir töldu þá að lykilstjarna sinnar kynslóðar væri komin til sögunnar. Og vissulega hefur hann átt góðar myndir síðustu tuttugu árin en ferillinn er að flosna upp stig af stigi og tækifærin orðin af skornum skammti.

Brátt er væntanleg í bíó metnaðarfyllsta verkefni Cruise í áraraðir, lokatilraunin til að blása lífi í slitinn ferilinn. Hann leikur Claus von Stauffenberg, lykilmann í misheppnuðu ráðabruggi um að ráða Hitler af dögum árið 1944, í kvikmyndinni Valkyrie. Myndin hefur verið umdeild og deilt hefur verið mjög víða um heim, einkum meðal ættingja Von Stauffenbergs, um að velja Cruise í hlutverkið.

Það verður áhugavert að sjá hvernig Valkyrie verður tekið og hvaða áhrif hún hafi á feril sólskinsstráksins forna. Kannski endar hann bara sem farandpredikari Vísindakirkjunnar? Heldur yrðu það dapurleg endalok á litríkan leikaraferil fornrar stjörnu.

Redford og Streep þola ekki Tom Cruise

Athugasemdir

[Fannar frá Rifi, 11.11.2007 kl. 15:07]

The Plot to Kill Hitler með Brad Davis í aðalhlutverki var mjög góð mynd. Ég get ekki séð Tom Cruise fyrir mér í hlutverki von Stauffenbergs. Ætli Tom Cruise endi ekki með því að gera framhaldsmyndina af Battlefield Earth sem Travolta gerði hér um árið.

[Iris (IP-tala skráð) 11.11.2007 kl. 15:25]

Ég var MJÖG mikill aðdáandi Tom Cruise þegar að ég var yngri og ég sá hann í myndum eins og Far and Away, Days of Thunder og fleiri góðum.
Þegar að ný mynd kom með honum fór ég að sjá hana og keypti á VHS/DVD svo mikill aðdáandi var ég.
En (eftir að hætti með Nicole Kidman) þegar að hann fór að boða Vísindatrú daginn út og daginn inn og, giftast ofleikaranum henni Katie, angra allt og alla með ruglinu í sér og pressa sínum vægast sagt heimskulegu hugmyndum í kringum lyf og veikindi yfir á aðra, þá fékk ég nóg og hef ekki þolað manninn síðan.
Núna er svo komið að ég forðast myndir með honum í því að mér finnst hann ekkert nema hrokinn og óþolandi að þurfa að sitja undir heilli mynd með honum í.
Ég vona að þetta fari nú að verða það síðasta sem við sjáum af honum...hans tími er liðinn. He's old news og ég veit ekki með aðra en ég myndi alla vega alls ekki sjá á eftir honum ef að hann hætti loksins að gera kvikmyndir.

[Stefán Friðrik Stefánsson, 11.11.2007 kl. 16:16]

Þakka kommentin.

Fannar: Tek undir þetta. Held að þessi mynd verði ekki spes, fyrst og fremst umdeilt klúður. Valið á Cruise í aðalhlutverkið átti ekki við.

Íris: Fínt komment. Algjörlega sammála þér. Cruise átti margar góðar myndir. Nægir þar að nefna: Top Gun, A Few Good Men, The Color of Money, Rain Man, The Firm, Eyes Wide Shut, Vanilla Sky, Minority Report, The Last Samurai og Collateral, auk þeirra sem þú og ég nefnum. En síðustu árin hefur hann einfaldlega klúðrað þessu og virðist stefna í óefni fyrir hann. Finnst orðið pirrandi að sjá myndir með honum og hef reynt að sniðganga hann.

mbk.

[Bjöggi (IP-tala skráð) 12.11.2007 kl. 14:08]

Dagar hans í Hollywood eru ekki nærum því taldir. Fólk er bæði fljótt að gleima og svo á hann eða í kvikmyndaverum og fyrktækjum og er enn á topplista yfir launahæðstu og valdamestu hollywoodstjörnurnar smkv. nýlegum lista forbes. 

[Jón Agnar Ólason, 13.11.2007 kl. 10:49]

Cruise á sér ekki viðreisnar von, er ég hræddur um. Minority Report og Collateral voru síðustu virkilega góðu myndirnar sem hann lék í og síðan hefur manngarmurinn verið í ruglinu - á öllum vígstöðvum.