Af hverju var skaupið styttra en venjulega?

Sitt sýnist hverjum um Áramótaskaupið eins og venjulega. Eitt vakti þó athygli mína og ég finn vel að fleiri velta því fyrir sér. Skaupið var styttra en venjulega - var vel innan við 50 mínútur og aðeins rétt rúmar 40 mínútur ef lokalagið (Ísland er land þitt) er undanskilið. Innan þess ramma var auðvitað hin margfræga mínútulanga auglýsing frá Remax.

Þetta er því með því styttra síðustu árin. Skaupinu var lokið kl. 23:15, að mig minnir, og þá tók við uppfyllingarefni í um tuttugu mínútur er áramótakveðja Ríkisútvarpsins (án útvarpsstjóra, utan miðnæturkveðjunnar) fór í loftið. Tók mjög vel eftir þessu, enda hefur skaupið í mínu minni allavega staðið jafnan til hálf tólf og verið vel rúmar 50 mínútur og stundum slagað í klukkutíma, sérstaklega gömlu skaupin hér í denn. Þetta var allavega áberandi styttra skaup í þeim skilningu og var búið snemma.

Fann þetta vel enda var mun rýmri tími til að koma sér út og fara að skjóta upp flugeldum, en oft hefur verið, þar sem að þrjú kortér voru í áramót og kannski ekkert verra að hafa rýmri tíma í sjálfu sér. En styttra var skaupið. Hef heyrt vel í gær og fyrradag að þetta hefur fólk talað um, sem ég þekki allavega til. Fann þetta vel sjálfur líka. Annars er deilt um hversu sterkt skaupið er sem sjónvarpsefni. Margir tala mjög harkalega gegn þessu skaupi. Sjaldan eða aldrei hefur það verið umdeildara, mörgum fannst það hreinlega hið versta frá upphafi.

Það verður áhugavert að heyra hvað skaupið kostaði. Í fyrra átti skaupið 2006 að verða mikið trúnaðarmál og átti ekki upphaflega að gefa upp kostnaðartölur, sem var mikið klúður hjá Ríkisútvarpinu, eftirminnilegt klúður. Seint og um síðir var kostnaðurinn gefinn upp, að mig minnir í ræðu menntamálaráðherra í þinginu. Svona kostnaðartölur á að opinbera, það er mjög einfalt mál. Vonandi fáum við heildarverð á pakkann fljótlega.

Athugasemdir

[Gísli (IP-tala skráð) 3.1.2008 kl. 16:40]

Fannst þér skaupið sem sagt of stutt?

[Vilborg Valgarðsdóttir, 4.1.2008 kl. 10:45]

Á mínu heimili var beðið eftir að Skaupið byrjaði, 10-15 mín. eftir auglýstan tíma. Hafi því lokið 23.15 stóð það í hæsta lagi í 45 mín.

[Ólafur Hannesson (IP-tala skráð) 4.1.2008 kl. 18:15]

Gott að það voru fleiri en ég sem tóku eftir þessu. Mér finnst það frekar asnalegt að það væri svona mikið styttra. Þeir hefðu átt að hafa það í eðlilegri lengd og bæta við það sumum hlutum svo sem um REI og aðeins meira um stjórnmálin. en það er bara mitt álit.

mbk

Óli 

[Steingrímur (IP-tala skráð) 5.1.2008 kl. 12:31]

Fyndið. 

Sjálfstæðismaður, sem hefur væntanlega stutt breytingu RÚV í ohf þó ég muni það nú ekki nákvæmlega, er eitthvað hissa á því að þjónustan minnki eftir breytinguna!

Stebbi minn - spurðu nú Þorgerði vonkonu okkar hvar eflingin sem hún boðaði á RÚV sé að finna!