Ólafur F. tjáir sig opinskátt um veikindi sín

Ólafur F. Magnússon, borgarstjóri, kemur vel fyrir í viðtölum í 24stundum og Fréttablaðinu í dag og tjáir sig opinskátt um atburðarás síðustu daga og árásir gegn honum vegna veikinda sem hann átti við að stríða. Umræðan um veikindin hefur verið mjög lágkúruleg og því miður hefur hún sýnt að það eru enn miklir fordómar í samfélaginu gagnvart geðsjúkdómum - það er dapurlegt að sjá á hversu lágu plani ráðist er að honum.

Það sem skiptir mestu máli nú er að Ólafur starfi af heilindum og fái tækifæri til að vinna að þeim verkum sem hann telur skipta máli. Ólafur F. Magnússon skilaði læknisvottorði þegar að hann sneri aftur í borgarstjórn í byrjun desember 2007, eftir að hafa verið fjarverandi um nokkurra mánaða skeið. Það var sögulegt, enda man ég engin önnur dæmi þess að kjörinn fulltrúi með umboð frá almenningi hérlendis hafi þurft að skýra veikindi sín sérstaklega fyrir stjórnvaldi, sérstaklega því að um er að ræða meirihlutafulltrúa á þeim tíma. Það vottorð ætti þó að duga í þessari umræðu nú.

Mér finnst mjög ómaklega hafa verið ráðist að Ólafi síðustu dagana. Man ekki önnur dæmi þess að veikindi stjórnmálamanna hafi áður leitt til jafn lágkúrulegra og persónulegra árása þar sem allt að því er vegið að mannorði viðkomandi. Það hefur verið langt seilst til að ráðast að heiðri og æru Ólafs F. Magnússonar og satt best að segja finnst mér þetta komið út yfir öll mörk. Ólafur F. hefur skilað vottorði og hefur snúið aftur til starfa og það er eðlilegt að hann vilji forðast að gera einkalíf sitt að skotspóni.

Hann hefur þó nú farið yfir þessi mál og það er heiðarlegt að gera það eins og komið er málum. Það er þó vonandi að sú umræða þagni nú. Það eru því miður dæmi um að nota eigi veikindi Ólafs F. Magnússonar til að veikja hann í sessi og eiginlega hefur verið gengið lengra í þeim efnum en ég man eftir. Eitt er að gagnrýna verk stjórnmálamanns en annað er að draga æru hans í svaðið vegna veikinda sinna. Það er lágkúrulegt og finnst mér engum það til sóma.

Ólafur F. hefur alla tíð verið þekktur fyrir að vera hugsjónamaður í pólitísku starfi og látið verkin tala, haft afgerandi skoðanir og verið maður málefnanna. Það er þegar ljóst á verkum nýs meirihluta að hann ætlar að láta verkin tala í embætti.

Ólafur: Aðalatriði að ég starfi af heilindum

Athugasemdir

[Júlíus Valsson, 26.1.2008 kl. 15:36]

Góður pistill hjá þér Stebbi!
Eins og oft áður hafa margir fjölmiðlamenn orðið sér til mikillar skammar, nú í aðförum þeirra að persónu Ólafs F. Almenningi hefur blöskrað hvernig er látið með manninn í fjölmiðlum.  Hann hefur fullan rétt á því að fá að vera í friði með sín einkamál. 

[Friðrik Þór Guðmundsson, 26.1.2008 kl. 15:57]

Það er auðvitað ekki sæmandi að vega að nokkrum manni út af veikindum Stefán, það er deginum ljósara. Enda lít ég svo á að umræða um heilsufar Ólafs Friðriks Magnússonar lúti ekki að þeim veikindum, sem hann hefur náð sér af. Á að minnsta kosti ekki að gera það.

En svaraðu fyrir mig þessu Stefán Friðrik: Hvað gerist ef Ólafur Friðrik forfallast óviðráðanlega af hvaða orsökum sem er (t.d. vegna flensu eða slyss, sem vonandi verður aldrei)? 

[Fannar frá Rifi, 26.1.2008 kl. 16:00]

Fráfarandi meirihluti og þeir sem standa að baki honum og hafa gagnrýnt Ólaf F. harðast, myndu láta eitthvað í sér heyra það ætti að biðja þeirra fulltrúa að þau að sýna og útskýra eigin veikind.

Viljum við kannski að allar sjúkraskýrslur verði bara gerðar opinberar? Þetta eruð trúnaðargögn og enginn, hvorki mikilmennsku Séð og Heyrt Borgarstjórar eða öskrandi unglingar hafa rétt, hvorki lagalegan hvað þá siðferðislegan til þess að hnísast í sjúrkaskrár. Þá skiptir engumáli hver á hlut eða um hvern ræðir. 

[Margrét Birna Auðunsdóttir, 26.1.2008 kl. 16:15]

Af hverju ætli hann upplýsi núna fyrst hvað var að? Er hann ekki bara að undirstrika að geðsjúkdómar séu ennþá óhreinu börnin hennar Evu? Svona leynd getur bara af sér getgátur og er af hinu illa. Það er fjöldi manns sem hefur veikst af þunglyndi og náð bata, reynslunni ríkari og sterkari á eftir.

Það er hinsvegar framferði hans, hvernig hann spilaði þennan leik án samráðs við sitt fólk, sem gerir hann vafasaman. Ég myndi vilja sjá hann útskýra hreint út hvaða málefni réði úrslitum og hvers vegna hann reyndi ekki að ná samkomulagi við það fólk sem hann vann með. Það stígur enginn heilvita maður þetta skref án þess að hafa áður reynt allt til að ná sínum málum fram. Þannig að það er fullkomlega eðlilegt að það vakni spurningar um hvort allt sé í lagi á þeim bæ.

[Theódór Norðkvist, 26.1.2008 kl. 16:27]

Ólafur tók fram í viðtalinu í 24 Stundum að hann vildi ekki ræða opinskátt veikindi sín. Hann sagði að það kæmi öðrum ekki við, stjórnmálamenn mega hafa sitt persónulega líf og þarna er ég sammála honum.

Ef hann taldi sig vera hæfan til að taka aftur til starfa, í samráði við lækni eða lækna sína, þá er hann það. Ég skil ekki til hvers þarf að heimta læknisvottorð.

Það hljóta að vera til reglur um svona mál hjá æðstlu embættismönnum, ef ekki þá þarf að móta þær.

[Stefán Friðrik Stefánsson, 26.1.2008 kl. 16:52]

Júlíus: Takk fyrir það. Já, það hefur verið gengið ansi langt. En vonandi markar þetta viðtal það að hætt verði þessari ógeðslegu aðför að mannorði Ólafs F. Magnússonar.

Friðrik: Gott að við erum sammála um það. Hinsvegar er alveg ljóst að þetta hefur verið svolítið yfirdrifið og langt gengið í þessum efnum. Það er eitt að impra á þessu en annað að endalaust að velta sér upp úr því, þegar að allir vita að maðurinn hefur skilað inn vottorði og ætti því að hafa strikað yfir þennan kafla. Dylgjurnar voru ansi svæsnar og engum til sóma. Það er ekki mitt að svara því hvernig þessi meirihluti verði starfhæfur. Það er þó ljóst að kjörinn hefur verið nýr borgarstjóri og nýjir aðal- og varamenn í nefndum og ráðum vegna þess að meirihluti var myndaður. Það er alveg ljóst að Ólafur þarf að sitja alla fundi.

Hinsvegar finnst mér merkilegt hvað fjölmiðlar hafa lítið talað um vonda stöðu Margrétar Sverrisdóttur, sem algjörlega landlaus er orðin í pólitík. Hún er varaformaður Íslandshreyfingarinnar og samherjar hennar þar fylgja Ólafi í nefndum. Það væri ágætt að vita hvaða bakland Magga hefur sem varaformaður þessa flokks. Ekki það að ég tel að sá flokkur sé dauður og að Magga sé að díla sig inn í Samfylkinguna, hef sagt það áður hér og tel að það sé stóra ástæða þess að hún fylgir ekki Ólafi, hún sé þegar búin að marka sér bás.

Fannar: Já, ég tel að öllum myndi mislíka svona aðför að mannorði sínu og dylgjur um að vera ekki með ráð og rænu, en það er það sem gefið er í skyn. Það er verið að gefa í skyn að Ólafur F. hafi ekki geðheilsu til að vera í stjórnmálum. Þetta er ómerkilegra en orð fá eiginlega lýst. Það myndi enginn vilja svona ómerkilega umfjöllun um heilsu sína.

Margrét: Það er bara þannig staðan að hann þarf að hreinsa andrúmsloftið. Þetta hefur gengið svo langt að hann telur sig knúinn að taka af skarið. Maðurinn hafði skilað inn vottorði og það hefði átt að vera nóg. Svo var þó ekki. Það er gott hjá honum að taka þetta skref, enda tel ég að fordómarnir gegn geðsjúkdómum séu enn svo miklir að það verði að tala hreint út. Mér finnst hann gera það.

Fyrst að menn eru að tala um að Ólafur F. sé einn er vert að velta því fyrir sér hvers vegna er ekki talað um að Margrét sem varaformaður Íslandshreyfingarinnar hefur misst bakland sitt. Í nefndum og ráðum fyrir borgina situr fólk sem leiddi t.d. lista fyrir Íslandshreyfinguna í kosningunum í maí 2007. Ásta Þorleifsdóttir sem var náin Margréti hefur yfirgefið hana og tekið að sér nefndastörf. Þetta fólk fylgir Ólafi. Hann hefur listann með sér nær allan nema Margréti og Guðrúnu.

En þetta er bara svona. Ólafur F. er aðalmaður í borgarstjórn og hann þarf að fara eftir sannfæringu sinni en ekki varamanns síns. Það er fjarstæða að aðalmaður eigi að fylgja varamanni sínum eftir. Þannig virkar ekki þetta dæmi. Vissulega er það óheppilegt, enda kostaði þetta F-listann formennsku í nefndum, en Ólafur F. er kjörinn fulltrúi og verður að taka af skarið sjálfur.

Theódór: Mér finnst þetta heiðarlegt uppgjör. Hann á ekki að þurfa að ganga lengra, enda finnst mér þetta einkamál hans, einkum í ljósi þess að hann hefur skilað inn læknisvottorði. Það ætti að vera nóg. Samt er haldið áfram að dylgja um þessi mál, til þess eins að veikja manninn og ata hann auri, draga hann niður. Það er eini tilgangurinn með þessum hráskinnaleik.

Margrét:

[Friðrik Þór Guðmundsson, 26.1.2008 kl. 17:29]

Stefán Friðrik: Þú svaraðir ekki spurningu minni. Hvað gerist ef Ólafur Friðrik forfallast óviðráðanlega af hvaða orsökum sem er (t.d. vegna flensu eða slyss, sem vonandi verður aldrei)? Um þetta atriði hljóta vangaveltur um heilbrigði Ólafs Friðriks að snúast - hvaða áhrif á lýðræðið og stjórnsýsluna hugsanleg forföll Ólafs Friðriks hafa miðað við að hann hefur engan varamann. Ertu sammála því að miðað við þessa stöðu þá standi nýji meirihlutinn heldur tæpt?

[Fannar frá Rifi, 26.1.2008 kl. 17:48]

Nú þá kemur minnihlutinn sem er á móti tíðum og örum stjórnarskiptum sem þeir mótmæltu harðlega og búa til nýjan meirihluta með tilheyrandi óstöðugleika.

Ég mun búast fastlega við því að ungmenninn sem öskruðu sig hás muni mæta þá aftur tvíefld til leiks til að mótmæla.

eða kannski ekki. enda var því aðal ástæðan á bak við mótmælin sú að þeir voru sárir að sínir flokkar voru að missa völdin. ekki mikil speki á bak við það. 

[Stefán Friðrik Stefánsson, 26.1.2008 kl. 18:10]

Friðrik: Mér finnst það ómerkilegt að það sé talað um þetta og hitt ef hann kannski veikist og kannski getur ekki þetta eða hitt. Ólafur F. Magnússon er borgarfulltrúi með fullt umboð til að mynda meirihluta. Það hefur orðið vík milli vina milli hans og varamannsins, það gerðist ekki bara í myndun þessa meirihluta heldur líka vegna læknisvottorðsins.

Það er kannski kominn tími til að upplýsa hver krafðist læknisvottorðsins og lét vinna að því að fá það út úr ÓFM en það blasir við flestum. Ég vona að þessi staða komi aldrei upp, en það verður þá að taka á því ef það gerist. Þessi meirihluti nýtur stuðnings átta fulltrúa í borgarstjórn og það eitt skiptir máli.

Tragedían um vinslit Ólafs og Margrétar er leiðindasaga, en svosem ekkert nýtt dæmi um að Magga lendi upp á kant. Henni hefur tekist á innan við ári að fara út í horn í Frjálslynda flokknum, Íslandshreyfingunni og F-listanum. Afrek það. Hún verður sjálf að segja hvað gerist komist hún í oddastöðu. Ef það þýðir nýjan meirihluta verður svo að vera.

Þá kemur kannski skríllinn og mótmælir aftur því að enn komi annar meirihluti. Varla, enda var þetta bara pólitískt væl þeirra sem voru að missa völdin, hávært væl úr horni.

Fannar: Góður punktur.

[Sigurður Þórðarson, 26.1.2008 kl. 18:26]

Friðrik Þór Guðmundsson, ég er örugglega kunnugri þessum málum en Stefán og get tekið að mér að svara spurningu þinni.   Ég þykist vita að þú þekkir eitthvað til hjá Samfylkingunni og vitir þar af leiðandi að Margrét mun ganga í hana.  Íslandshreyfingin fær 12 milljónir frá ríkinu næstu 4 ár og að sögn kunnugra er það eina ástæða þess að kennitölunni er ekki skilað inn.    Ef Ólafur veikist alvarlega mun varamaður taka við og þar með er meirihlutinn fallinn nema Samfylkingin komi beint að málinu.

[Sigurður Þórðarson, 26.1.2008 kl. 18:43]

Stefán Friðrik, í hnotskurn er málið svona:

Margrét misfór með umboð það sem Ólafur gaf henni til að mynda meirihluta. Hún gat svo ekki á heilli sér tekið að hann skyldi svo koma úr veikindafríi.  Um það snýst þessi deila. 

[Stefán Friðrik Stefánsson, 26.1.2008 kl. 18:46]

Já, þetta blasir við Siggi. Margrét fór illa með valdið sem hún hafði í fjarveru Ólafs og hann treysti henni ekki, hún líka var tilbúin til að semja af sér mál sem Ólafur F. taldi mikilvægustu mál sín. Og þess vegna auðvitað fór sem fór. Það sjá allir núna að Ólafur F. samdi um málefni við Sjálfstæðisflokkinn og fékk sitt fram. Það sést bara af atburðarás síðustu tveggja sólarhringa, frá meirihlutaskiptum.

[María Anna P Kristjánsdóttir, 26.1.2008 kl. 23:53]

Ólæti vinstrimanna átti sennilega að vera prófsteinn á heilsufar Ólafs,ég vona að hann fá að vinna í friði bæði að borgarmálum og sínum eigin hann stóð sig ágætlega.,Hann hefur talað mjög opinskátt og með einlægni um sín veikindi og við eigum að virða það.

[Friðrik Þór Guðmundsson, 27.1.2008 kl. 00:28]

Þakka þér fyrir Sigurður, að svara spurningunni fyrir Stefán Friðrik. "Ef Ólafur veikist alvarlega mun varamaður taka við og þar með er meirihlutinn fallinn". Um þetta snýst málið, Stefán Friðrik, og ekkert annað og aldeilis fráleitt af þér að tala um að það sé ÓMERKILEGT að ræða slíka stjórnmálafræðileg atriði.

Menn hafa hellt sér yfir fjölmiðla eins og að þeir hafi einhvern hag af því að útmála Ólaf Friðrik sem veikan! Það talar auðvitað enginn umhvað gerist ef D-lista borgarfulltrúi veikist - því þá kemur loyal varamaður inn og meirihlutinn heldur. Það á ekki við um samstarfs"flokkinn". Má segja þetta án þess að vera "ómerkilegur"?

Sigurður; ég veit EKKERT um það hvort Margrét ætlar sér í Samfylkinguna. Ég tilheyri ekki þeim flokki frekar en öðrum. Ef ég væri þú myndi ég hafa miklu meiri áhyggjur af innra flokksstarfi frjálslynda flokksins. Er hann til í borgarpólitíkinni? Ef svo er, tengist hann Frjálslynda flokknum í landsmálapólitíkinni? Og hvað kemur Íslandshreyfingin Frjálslynda flokknum við?  

Og drengir: Hver bað um veikindavottorðið? Stefán Friðrik segir (efnislega) að það hafi verið Margrét og Sigurður virðist taka undir það. Leiðarahöfundur Morgunblaðsins segir hins vegar að það hafi verið Dagur (sem Ólafur Friðrik þó mærir margítrekað). Hver veit best?

[Sigurður Þórðarson, 27.1.2008 kl. 09:52]

Sæll aftur Friðrik.  Ég get alveg verið sammála þér í því að þessi meirihluti er ekki sá traustasti. Í fyrsta lagi hefur ekki verið full samstaða innan D-listans og í öðru lagi þá byggir meirihlutinn á því að einn borgarfulltrúi veikist ekki.  Við Ólafur erum ágætis kunningjar þó við séum ekki í sama flokk. Það sama má segja um borgarstjórana Ólaf og Dag. Það hvarflar ekki að mér að vinstrimenn beini spjótum að heilsu nokkurs manns. Sama má segja um DV en þú þekkir það betur en ég að blaðamenn geta hugsanlega lent í því að heyra eitthvað sem ekki er sannleikanum samkvæmt og þurfa þá að kunna að flokka hafrana frá sauðunum.  Eftir því sem ég hef vit á hefur sú flokkun farið úrskeiðis.  Ég er sammála þér um að það er engin ástæða til að gagnrýna fjölmiðla að öðru leyti.  Ég bið afsökunar á að hafa ætlað þér að vita að Margrét er á leið í Samfylkinguna en það hefur ekki enn komið fram í fjölmiðlum.  Til að svara spurningum þínum þá hefur  flokksstarf FF í Rvk aldrei berið meira og flokkurinn mun örugglega bjóða fram í Rvk.  FF kemur Íslandshreyfingin ekkert við. Því verður samt ekki í móti mælt að verkefnalisti meirihlutans er afrit af kosningastefnuskrá listans fyrir 2006. Þess utan þekki ég til þessa fólks og af því mynda ég mér mína skoðun.