Sleifarlag samgönguyfirvalda á Reykjanesbraut

Nú er ljóst að heimild er í lögum til að grípa inn í framkvæmdir, án útboðs, vegna neyðarástands. Það hefði vel átt við á Reykjanesbraut. Reiði almennings vegna sleifarlags samgönguyfirvalda við að klára framkvæmdir á vegarkaflanum þar sem bílslysið varð í gær er vel skiljanleg og gott betur en það. Fyrir löngu átti að vera búið að gera eitthvað í þeim málum.

Fannst reyndar athyglisverðast í gær að heyra Jón Rögnvaldsson, vegamálastjóra, segja í prime time sjónvarpsviðtali að þetta væri nú svo flókin aðgerð að það hefði ekki verið hægt að gera neitt annað. Heyr á endemi, svona talar bara embættismaður með engan sans fyrir því sem er að gerast. Um er að ræða stórhættulegan vegarkafla og þar hefur fjöldi slysa verið síðustu mánuði á meðan að beðið er eftir því að samgönguyfirvöld vakni til lífsins.

Það eru engar afsakanir í þessu máli fyrir Vegagerðina og samgönguráðuneytið. Ekki þýðir fyrir ráðherrann að beina ábyrgðinni annað. Hann hefði vel getað tekið málið sínar hendur og fengið því hnikað fram hefði hann látið það sig skipta. Sé að meira segja harðir vinstrimenn eru í bloggskrifum farin að fordæma þennan ráðherra, sumir telja hann ekki starfi sínu vaxinn og vilja að hann segi af sér. Skal engan undra. Þessi sofandagangur ætti að vera dýrkeyptur fyrir hvaða stjórnmálamann sem væri. Þarna er um að ræða einu leiðina í millilandaflugið og svona sleifarlag er algjörlega óviðunandi.

Einkum og sér í lagi er við því að búast að fólk sé óánægt með stöðu mála þegar að heimild er í lögum til að taka af skarið og gera eitthvað. Það er enginn öruggur á þessum vegarkafla, allavega ekki eftir svona mörg slys, og þar er neyðarástand uppi, alveg klárlega. Sofandagangur þeirra sem með samgönguvaldið fara í svona máli er algjörlega óviðunandi.

Þrennt er enn á gjörgæslu

Athugasemdir

[Tiger, 10.4.2008 kl. 17:31]

Ég vildi ekki vísa af síðunni þinni á mína svo ég bara geri copy/paste - en ég var að henda inn smá pistil um mína skoðun á þessu máli. Þú þarft ekkert að birta þessa athugasemd ef þér finnst hún of löng eða ekki viðeigandi. Hér fyrir neðan eru mínar pælingar varðandi þetta málefni:

"Ok, auðvitað er ég svo innilega sammála því að það sé skelfilegt að Reykjanesbrautin skuli vera búin að vera svona lengi í hassi og rugli, en samt spái ég stundum í því hverjum er í raun að kenna sum slys og óhöpp á brautinni - og víðar. Sannarlega er hægt að yfirfæra mikið af sök á vegina um allt landið, vegna óhappa - en það er sannarlega miklu meira sem kemur til - það erum við sjálf líka - bílstjórarnir sem keyra vegina, sem berum stóra sök líka!

Málið er að þar sem framkvæmdir eru - eru hraðatakmarkanir og hámarkshraði ætíð virkilega lágur - eins og vera ber til að forðast einmitt slysin og óhöppin. En hvað gera bílstjórar? Jú, þeir lækka ferðina örlítið - en langt frá því að minnka hraðann miðað við aðstæður og uppgefinn hámarkshraða þar sem framkvæmdirnar eru í gangi.

Ég þekki persónulega fjöldann allan af fólki sem keyrir Reykjanesbraut daglega, stundum oft á dag sumir. Ég veit til þess - geri það stundum sjálfur líka - að þegar maður kemur á kafla sem er með alls skyns merkjum, steindröngum og blikkandi ljósum - þar sem hámarkshraði er t.d. 50km - þar lækkar maður sig kannski úr 90-100km niður í 70-80km! Halló.. maður telur bara að maður ráði við allar flækjurnar sem birtast á þessum köflum án þess að aka samkvæmt því sem sannarlega er ráðlagt og ætlast er til vegna framkvæmdanna. Maður reynir að minnka hraðann - en þá koma aðrir bílar í rassgatið á manni og liggur við að þeir liggji á flautunni!

Auðvitað veit ég það eins og ég sit hér núna og skrifa - að ef hámarkshraði væri virtur að fullu - og fólk æki um þessa kafla á sannarlega ekki nema 50km eða minna þar sem þess er krafist eða ætlast er til - þá væri miklu minna af óhöppum á þessum blessuðu vegaframkvæmdaköflum.

Ég er alls ekki að segja hér að við eigum alla sök á bílslysum og óhöppum þeim sem á svona stöðum koma upp - alls ekki. En hugsið ykkur bara - ef hraðamörk væru virt sannarlega - og bílar bara hreinlega ækju um verstu kaflana á löglegum hraða - eins og á að gera auðvitað - þá er það gersamlega hundrað prósent öruggt að fá - eða engin slys kæmu upp á yfirborðið þar sem vegaframkvæmdir eru til staðar.

Mér finnst þetta umhugsunarvert því við erum svo fljót að kenna vegi, vegaframkvæmdum og þeim aðilum sem sjá um samgöngur - um svona slys og læti. Málið er að við horfum aldrei á okkur sjálf, hraða okkar á slíkum stöðum né það að í nánast 100% tilfella er hraði aldrei miðaður við aðstæður og sannarlega uppgefinn hámarkshraða á þessum vegaköflum sem framkvæmdirnar eru í gangi...

Vona að ég stuði engan með þessu - því ég veit að mjög margir eiga um sárt að binda vegna slysa og óhappa á slæmum vegaköflum þar sem framkvæmdir eru í gangi. Sannarlega biður maður fyrir þeim sem hafa lent í slysum, ekki síst fyrir aðstandendum þeirra sem missa ástvini í slíkum óhöppum - en við verðum að taka okkur sjálf á og fara að lögum ef við viljum ekki missa fleiri ástvini vegna slæmra vega og vegaframkvæmda! "

Takk fyrir mig Stefán og eigðu góðan dag.

[Ómar Pétursson, 10.4.2008 kl. 19:48]

Get nú ekki annað en tekið undir athugasemdina hér að ofan að stóru leyti.  Ég ók Reykjanesbrautina reglulega í rúmlega 1 og hálf ár á meðan framkvæmdir við fyrri tvöföldun stóðu yfir og sorglega staðreyndin var að oft á tíðum  voru margir ökumenn, sem ekki virtu aðstæður.  Þeir virtust alltaf aka um eins og á sólbjörtum sumardegi.  Þá skiptir stundum ekki máli, þó svo að þú akir eftir aðstæðum og löglega, vitleysa annarra setur þig í hættu !

Hitt er líka staðreynd að Vegagerðin er með allt á hælunum í þessu máli og hefði sem best getað verið búinn að bæta aðstæður, en þar eins og víða annarsstaðar hjá ríkinu, virðist enginn bera ábyrgð á slóðaskap og vitleysu.  Blessuð Vegagerðin situr nú uppi með þessa vitleysu og Grímseyjarferjuklúður og er einhver kallaður til ábyrgðar. NEI

Það er til skammar að það virðist ávísun á að þú getir nánast gert hvaða vitleysu sem þér dettur í  hug, þegar þú vinnur hjá ríkisstofnun, en starfið er aldrei í hættu.

Kveðja

[Jón Ingi Cæsarsson, 10.4.2008 kl. 20:21]

Umræðan um þessi mál er ótrúleg. Ástand á Reykjanesbraut er afleitt...og það vita allir. Það er stutt síðan ég fór þarna um og sannast sagt voru fáir að virða hámarkshraða og taka tillit til aðstæðna. Hámarkshraði er 50 og það er kyrfilega merkt. Ég fullyrðiði að afar fái eru að fara eftir því. Vandmálin eru tvö...hálfkláraðar framkvæmdir og menn virða ekki aðstæður...það er billegt að kenna Vegagerð og samgönguyfirvöldum um... ábyrgðin er ökumanna að haga akstri í samræmi við aðstæður... það er stóra vandamálið.

[Þorsteinn Þormóðsson, 11.4.2008 kl. 10:41]

Sammála Jóni Inga!! Ég var þarna á ferðinni í febrúar og ók á 100 km hraða á leið minni út á flugvöll! Tugir bíla "straujuðu" fram úr mér og mér leið eins og ég væri stopp! samt var ég ekki á löglegum hraða! Ég er ekkert sérstaklega sáttur við þessa ríkisstjórn en guð minn almáttugur lítum í eigin barm!! Andskotans hræsni í gangi hjá okkur!!