Rétt ákvörðun hjá Láru - trúverðugleikinn í húfi

Mikið hefur verið rætt og ritað um uppsögn Láru Ómarsdóttur eftir eggjakastsmálið margfræga sem skaddaði trúverðugleika hennar. Mikið hefur gengið á hjá henni og eðlilega hefur hún gengið í gegnum erfið kaflaskil eftir mikil mistök. Hún stóð sig misjafnlega við að svara fyrir sig í spjallþáttum kvöldsins, var fín í Kastljósi en öllu slappari í Íslandi í dag, en þar var líka gengið nær henni og hún átti greinilega í meiri erfiðleikum með að verjast og var þar að auki í meiri tilfinningalegu uppnámi.

Lára gerði rétt með því að segja upp. Þetta mál skaddaði bæði hana og fréttastofu Stöðvar 2 - stefndi í allsherjarvandræðagang fyrir alla þá sem þar vinna. Enda snýst fréttamennska fyrst og fremst um trúverðugleika, verði fréttamaður uppvís að því að tala óviðeigandi eða reyna að krydda fréttirnar á vettvangi þeirra er illt í efni. Trúverðugleiki fréttastofunnar var undir í þessum efnum og Lára vissi vel að málið myndi ekki gufa upp nema með því að hún tæki af skarið. Hún kláraði þetta mál því bæði af skynsemi og röggsemi án þess að hika og á réttum tímapunkti.

Efast ekki um að Lára er dugleg og samviskusöm í sínu. Efasemdir hafa þó heyrst um hvort hún væri alltaf hlutlaus og ekki hafa allir verið sáttir við hana. Ekki ætla ég að dæma hana fyrir það. Fannst Lára oft standa sig vel og gera hlutina vel, hún var ófeimin við að taka á fréttunum, spyrja erfiðra spurninga og sauma að þeim sem gera mistök í pólitíkinni eða hafa ekki gert hlutina í takt við það sem þeir lofuðu sjálfir í kosningum eða í dagsins önn þess einmanalega lífs sem oft fylgir stjórnmálum. Í eigin klúðri var eðlilega spurt um hvort hún ætti ekki að taka ábyrgð á þeim. Ekkert annað kom til greina og hún náði að ljúka málinu áður en það varð stórslys fyrir fréttastofuna.

Kemur mér samt mest á óvart að Steingrímur Sævarr Ólafsson, fréttastjóri, hafi ekki sjálfur tekið á þessu máli. Sé frásögn hans rétt af því að hann sem fréttastjóri hafi ekki tekið til sinna ráða eða viljað ljúka málinu af ábyrgð og án þess að skuggi félli á trúverðugleika vinnustaðarins er eðlilegt að spurt sé hversu sterkur fréttastjóri hann sé eiginlega. En kannski er óþarfi að spyrja: Lára lauk málinu áður en trúverðugleiki stöðvarinnar gufaði upp. En vissulega er hann skaddaður á eftir, það er ekki hægt að neita því.

Vona að allir fréttamenn læri sitt á þessu klúðri Láru. Í fréttamennsku skiptir máli að koma fram af ábyrgð og fjalla um fréttir en ekki búa þær til, hvort sem það er gert með vandræðagangi eða ásetningi.

Steingrímur Sævarr: Lára er maður að meiri

Athugasemdir

[Jóhann Hlíðar Harðarson, 26.4.2008 kl. 00:30]

Af hverju er ekki gengið jafnhart fram í því að aðrir "opinberir" starfsmenn axli ábyrgð og taki pokann sinn, sbr. hugleiðingar mínar í bloggi mínu í kvöld? Lára gerði rétt, en gera aðrir rétt?

[Stefán Friðrik Stefánsson, 26.4.2008 kl. 00:44]

Takk kærlega fyrir kommentið Jóhann og góða ábendingu.

Er alveg sammála því að það er alveg afleitt að ekki sé leitað meira eftir því að stjórnmálamenn axli ábyrgð á mistökum sínum í starfi. Gott dæmi er Vilhjálmur Þ. Vilhjálmsson sem gerði mikil mistök sem borgarstjóri, mistök sem munu alltaf fylgja honum úr þessu. Enn er því ósvarað hvort gera eigi hann að borgarstjóra aftur eftir ellefu mánuði er Sjálfstæðisflokkurinn fær aftur borgarstjórastólinn. Það er aðeins pattstaðan ein ljós hjá Sjálfstæðisflokknum þegar að kemur að valdamesta embætti borgarinnar. Afleitt rugl. Fleiri dæmi mætti nefna. En pólitísk ábyrgð þarf að vera virkari. Refsa má stjórnmálamönnum í kosningum, en mistök er hægt að gera á fjögurra ára tímabili og eðlilegt að tekið sé á slíku.

mbk.