Bernie Mac látinn

Leikarinn Bernie Mac er látinn, langt um aldur fram. Mér brá nokkuð þegar ég heyrði síðdegis að hann væri dáinn, enda höfðu fréttir síðustu dagana verið þannig að hann væri að ná sér af veikindum sínum. Mikil eftirsjá er af Bernie, enda var hann einn af bestu grínistunum í Bandaríkjunum og var einn sá besti úr hópi þeldökkra fyrr og síðar.

Held að aðeins Eddie Murphy, Bill Cosby og Richard Pryor komist nálægt stöðu hans meðal þeldökkra grínista, hafi verið á pari við hann eða betri. Hann hóf feril sinn ungur sem grínisti og sló í gegn allt frá byrjun, var fæddur í grínistahlutverki. Andlitstaktar hans og tjáning, alveg brilljant. Hann var langbestur í uppistandsgríninu. Ég hafði mjög gaman af sjónvarpsþáttunum hans og fannst þeir virkilega góðir.

Síðla ferilsins lék hann í nokkrum myndum. Bestu myndirnar hljóta þó að teljast Bad Santa, Charlie´s Angels, Transformers, Ocean´s myndirnar, Head of State og Guess Who, sem var skemmtileg og nýstárleg útgáfa af hinni sígildu sögu Guess Who´s Coming to Dinner sem var kvikmynduð árið 1967 með Spencer Tracy og Katharine Hepburn, síðustu myndinni hans Spencers og endalokin á mögnuðu ástar- og vinnusambandi þeirra.

Í veruleika sjöunda áratugarins var þeldökkur tengdasonur í hvítri fjölskyldu mikið vandamál en í upphafi nýrrar aldar var þessu snúið við - tengdasonurinn hvítur í þeldökkri fjölskyldu og tengdafaðirinn úrillur Bernie Mac. Frábær mynd, sem kemur með annað sjónarhorn á fræga sögu og gerir það vel.

Minning magnaðs grínista, eins þeirra bestu fyrr og síðar, mun lifa, þó hann hafi kvatt alltof snemma.

Bernie Mac látinn

Athugasemdir

[Sigpungur, 10.8.2008 kl. 00:48]

Þú hlýtur að vera að grínast? Þættirnir hans voru gjörsamlega ömurlegir og ljótur blettur á ferli hans sem grínista. Ég reyndi að horfa á þá því þetta var jú Bernie Mac en þeir voru einfaldlega hand ónýtir.

[Stefán Friðrik Stefánsson, 10.8.2008 kl. 00:51]

Það er þá bara þitt mat. Mér fannst þeir fínir. Auðvitað voru þeir síðri undir lokin, en mér fannst Bernie Mac frábær grínisti og hann gerði sitt mjög vel. Hans verður helst minnst fyrir að vera grínuppistandari og sjónvarpsþættirnir og kvikmyndirnar voru til hliðar. Hann lék ekki í mjög mörgum myndum t.d.

[Erna Hákonardóttir Pomrenke, 10.8.2008 kl. 01:50]

Þetta kemur mjög flatt upp á mig. Hann getur ekki hafa verið gamall. Veistu hvernig hann dó? Við höfðum mjög gaman af The Bernie Mac Show.

[H.T. Bjarnason (IP-tala skráð) 10.8.2008 kl. 08:56]

Þér nægir ekki að segja að hann sé "dökkur", heldur er (eða var) maðurinn þeldökkur.  Athyglisvert.