Sameiningartákn útrásarinnar gerir upp liðna tíð

Mjög áhugavert var að horfa á Kastljósviðtalið við Ólaf Ragnar Grímsson, forseta Íslands og helsta sendiherra útrásarinnar, í kvöld. Forsetinn virðist allur af vilja gerður að tala kraft og kjark í þjóðina við erfiðar aðstæður en átti mjög erfitt með að tala sig frá orðum sínum og heimshornaflakki fyrir útrásarvíkinganna sem hafa sett þjóðina á hausinn með því að breyta landinu í einn stóran vogunarsjóð. Ég er ánægður með að hann ætlar að tala við þjóðina með vinnustaðaheimsóknum en eftir stendur þó að Ólafur Ragnar fylgdi útrásinni alla leið í glötun.

Ég yrði ekki hissa þó Ólafs Ragnars yrði frekar minnst fyrir að vera sameiningartákn útrásarinnar misheppnuðu frekar en sameiningartákns heillar þjóðar. Í miðri útrásinni fór það nefnilega svo að Ólafur Ragnar gleymdi rótum sínum og uppruna, pólitískt og persónulega, og blindaðist af velgengni hennar. Skipbrot útrásarinnar, sem var svo nátengd forsetanum og ferðalögum hans með útrásarvíkingunum, verður því um leið persónulegt áfall hans.

Forsetinn átti erfitt með að tala sig frá ræðunum sínum, öllu góðu orðunum og skjallinu fyrir auðmennina, í viðtalinu í kvöld. En hann reyndi vissulega og það ber að virða viljann fyrir verkið, rétt eins og einhverjir munu virða það við Ólaf Ragnar að tala beint við þjóðina þegar útrásin hefur klessukeyrt úti í skurði. Hann hefði þó átt að halda í þessa taug mun fyrr en nú þegar gleðinni er lokið og partýið hefur verið leyst upp í vonleysi heillar þjóðar.

Ólafur Ragnar flutti margar eftirminnilegar ræður til stuðnings útrásarvíkingunum en sú eftirminnilegasta er þessi hér að mínu mati.

Ólafur Ragnar: Ótrúleg ósanngirni breskra stjórnvalda

Athugasemdir

[Jón Helgi Þórarinsson (IP-tala skráð) 13.10.2008 kl. 22:29]

Ég hef rekist á þennan blogg tvisvar og aftur ertu að hnýtast út í forsetann að ósekju.  Segðu mér það Stefán, hvurn fjárann hefði forsetinn átt að gera?  Spranga um víðann völl og segja mönnum að eiga ekki viðskipti við íslendinga af því að þeir séu á kafi í einhverri óráðsíu?!  Hvað hefðu hægri menn sagt þá?  Að gamli sósíalistinn hann Óli Grís væri með hneykslanlega skemmdarverkastarfsemi í garð landsins óskabarna?

Það er fínt að til séu menn sem ég er málefnalega ósammála, það gefur lífinu lit.  En að reyna að klína þessu klúðri á forsetann er bara rugl.

[Eyþór Laxdal Arnalds, 13.10.2008 kl. 22:32]

Mögnuð lesning þessi ræða forsetans!

[hp (IP-tala skráð) 13.10.2008 kl. 23:25]

Hjó eftir þessu í ræðu foringja vors:

"Ninth is the importance of personal reputation. This is partly rooted
in the medieval Edda poems which emphasise that our wealth might
wither away but our reputation will stay with us forever. Every Icelandic
entrepreneur knows that success or failure will reflect not only on his or
her own reputation but also on the reputation of the nation. They therefore
see themselves as representatives of a proud people and know that their
performance will determine their reputation for decades or centuries to
come."

Og nú erum við stimpluð "fjárglæframenn" um ókomna tíð. Gæfulegt eða hitt og heldur!!

[Ómar Ragnarsson, 13.10.2008 kl. 23:58]

Forráðamenn þjóðarinnar virðast ekki ætla að hætta að halda því fram að orkan, sem við bjóðum nú til sölu sé "hrein og endurnýjanleg."

600 megavatta jarðvarmaorka á Nesjavalla-Hellisheiðarsvæðinu mun að mati vísindamanna endast í nokkra áratugi en þá verður svæðið orðið kalt og barnabörn okkar þurfa að finna 600 megavött annars staðar, ef það verður þá hægt. 

Sennilega telja ráðamenn sig geta komist upp með þetta áfram vegna þess að hinn bitri sannleikur muni ekki renna upp á meðan þeir eru á lífi.   

[Stefanía, 14.10.2008 kl. 01:09]

Hvað koma megavött þessu máli við ?

[Valsól (IP-tala skráð) 14.10.2008 kl. 01:43]

Það er gott að þið frjálshyggjumenn getið fundið einhvern til að hnýta í aðra en vini ykkar, því nóg er af sökudólgum í ykkar eigin röðum.

[Hafskip (IP-tala skráð) 14.10.2008 kl. 02:14]

Ekki gleyma því Stefán að Ólafur Ragnar átti einnig lykilhlutverk í því að setja Hafskip á hausinn á sínum tíma auk þess að sem að hann á Íslandsmet í verðbólgu en setti hann árið 1984 í tíð sinni sem alversti Fjármálaráðherra landsins.

Hér fyrir neðan er síðan linkur á frábærar umræður í Kastljósinu frá árinu 1984 en þar er Ólafur Ragnar einmitt flengdur all rækilega af meistara Milton Friedman, blessuð sé minning hans.

http://video.google.com/videoplay?docid=1107486496526618897

[Villi Asgeirsson, 14.10.2008 kl. 08:03]

Stefanía, nú er talað um að við séum sterk þjóð í landi auðlinda. Hvaða auðlindir er átt við? Á að nota hrunið sem afsökun svo hægt sé að virkja allt og bora? Megawöttin skipta öllu.

Annars fannst mér el presidente komast ágætlega frá þessu. Hann viðurkenndi að hafa gengið of langt. Snjall pólitískur leikur það, en hann virkar.

[Gunnar Níelsson, 14.10.2008 kl. 20:10]

Stefán þú ert snillingur !  Hvar í öllum heiminum fannstu þessa ræðu ?

Ég hef ekki brosað hvað þá hlegið við lestur blaða, bloggs í rúma viku.  Það s.s breyttist þegar ég las þessa frábæru ræðu.  Lokaorðin eru dýr kannski forspá. "You aint seen nothing yet"  'Oborganlegt !