Nýtt upphaf á Íslandi - barátta þjóðarinnar

Mér finnst eins og það sé rólegra yfir þjóðinni í byrjun vikunnar, allavega miðað við stöðuna í síðustu viku þegar ekkert var öruggt nema það að við vorum í frjálsu falli. Uppbyggingarstarfið er hafið og nýja Ísland verður vonandi fullt af tækifærum þó síðar verði, þó allir geri sér vonandi grein fyrir því að við þurfum að líta rækilega í spegilinn og byggja okkur upp með öðrum forsendum en áður einkenndi samfélagið.

Mér finnst blasa við að ríkisstjórnin höktir. Hún er ekki sammála um næstu skref og virðist veik þrátt fyrir ríflegan þingmeirihluta. Því kæmi varla að óvörum að hún myndi springa einmitt á þeim tímum þegar tala á upp samstöðu landsmanna. Sumir Samfylkingarmenn tala þannig þessa dagana að stjórnin virðist feig. Samstaða virðist í þeirra bókum snúast frekar um að upphefja sjálfa sig og tala niður aðra en tala þjóðina saman.

Auðvitað er það veikleikamerki fyrir þjóðina ef ríkisstjórn gefst upp, fellur annað hvort fyrir eigin hendi eða vegna sundrungar á þeim tímum þegar byggja þarf hið nýja Ísland. En kannski er leiðarvísirinn ekki réttur, kannski var alla tíð borin von að flokkarnir tveir gætu náð saman um lykilmál. Vissulega var það reynt og verður kannski reynt áfram en greinilegt er að samstöðu um lykilmál skortir.

Þjóðin berst fyrir sínu, nú við erfiðar aðstæður. Veislunni er lokið og mikil uppbyggingarstarf framundan. Ég hef heyrt sögur um að fólk hafi tekið eigið líf í þessari viku, sumir hafi ekki séð fram á líf við breyttar forsendur, ekki séð neina leið út úr vandanum. Sorglegra er það en tárum taki þegar slíkt gerist og ég hugsa til þeirra sem eiga um sárt að binda eða hafa misst von og trú á framtíðina.

Vonandi nær þjóðin í gegnum þessa tíma. Samstaða þjóðarinnar er lykilatriði við þessar aðstæður sem blasa við íslensku þjóðinni nú.

Gengi bréfa bankanna 0 krónur

Athugasemdir

[Fannar frá Rifi, 14.10.2008 kl. 01:05]

Núna verða allir að standa saman. Við verðum að vinna saman. Við verðum að haldast í hendur og hjálpast í sameiningu út úr þessum blindbyl.

Nú stendur það á Samfylkingunni hvort hún vilji taka þátt í því að standa saman með öllum landsmönnum eða ekki. Nú stendur það á þingmönnum hvort þeir séu eigin hagsmuna potarar eða hvort þeir alli að vinna með þjóðinni allri. 

Fyrsta skrefið er að þingmenn og ráðherrar standi saman sem ein heild. Þjóðinn þarf á því að halda að allir standi saman. Að ráðamenn þjóðarinnar vinni saman enn séu ekki í eylífum skítkasti til þess að fegra sjálfa sig. 

Það verður að stöðva allar umræður sem vitað er að muni sundra þjóðinni og leiða til upplausnar með enn verri afleiðingum heldur en hugsanlegur áviningur af síku tali er. Hérna á ég við ESB. Allt slíkt tal er ábyrgðar laust og mun sundra þjóðinni þegar við þurfum messt á samheldni að halda. 

Nú er bara að bíða og sjá hvort Samfylkingin sé flokkur þar sem vilji er til að standa með þjóðinni í að sameina hana og ganga með henni í gegnum þann storm sem nú geisar. Eða hvort að þar séu einungis þeir sem vilja nota tækifærið eins og Brown og sparka í liggjandi fólk og neyða upp á það einhverja afar kosti.