Svikalogn í Frjálslynda flokknum

Forystumenn innan Frjálslynda flokksins hafa samið nokkurra vikna vopnahlé en varla er hægt að kalla það friðartal annað en svikalogn. Það stefnir í harðvítug valdaátök innan flokksins í næsta mánuði. Merkilegustu tíðindi svokallaðs sáttafundar innan miðstjórnar flokksins sem fram fór á Kaffi Reykjavík var að Margrét Sverrisdóttir, tekur sér launað leyfi sem framkvæmdastjóri en sinnir engu að síður undirbúningi flokksþingsins.

Allar líkur eru á því að Margrét gefi kost á sér til formennsku í Frjálslynda flokknum og sögusagnir ganga um að hún hafi jafnvel í hyggju að gefa kost á sér í fyrsta sætið á framboðslista flokksins í Norðvesturkjördæmi og sækist því eftir að steypa Guðjóni Arnari Kristjánssyni, formanni Frjálslynda flokksins, sem leitt hefur flokkinn fyrir vestan allt frá stofnun, fyrst í Vestfjarðakjördæmi árið 1999 og svo í Norðvesturkjördæmi árið 2003. Öruggt er að Margrét gefi bæði kost á sér til formennsku og varaformennsku tapi hún fyrir Guðjóni.

Greinilegt er á öllu að Guðjón Arnar og Magnús Þór Hafsteinsson hafa myndað bandalag sín á milli um að styðja hvorn annan og reyna að verjast atlögu Margrétar Sverrisdóttur að þeim á flokksþinginu. Það stefnir í hörkuátök og þetta svikalogn er aðeins sett á til að settla málin yfir hátíðirnar og reyna að lægja helstu öldur innan flokksins sem stofnunar. Eftir stendur trúnaðarbrestur og hörð átök milli arma í Frjálslynda flokknum. Við öllum blasir að heift er undir niðri og tal Margrétar og Magnúsar Þórs síðustu vikuna sannfæra menn um það umfram allt annað. Sérstaklega vöktu ummæli Magnúsar Þórs athygli í gær, en hann sagðist þar ekki víkja fyrir Margréti.

Margrét er greinilega farin af stað á fullu. Við blasir að eitthvað er plottað bakvið tjöldin. Öllum er ljóst að flokksþing Frjálslyndra í næsta mánuði verður vettvangur lykilátaka um forystusveit flokksins og þar verður kosið um áherslur í starfinu, ekki bara persónur væntanlega. Mesta athygli stjórnmálaáhugamanna nú vekur hvaða tímapunkt Margrét Sverrisdóttir muni velja til að tilkynna formlega um framboð sitt til forystu í flokknum. Sennilega verður það frekar fyrr en seinna, eins og sagt er.

Sátt um að Margrét fari í leyfi fram að landsþingi

Athugasemdir

[Sigurlín Margrét Sigurðardóttir, 14.12.2006 kl. 14:09]

Stebbi!  er allt í lagi með þig? Aðra eins vitleysu hef ég ekki séð lengi um þetta mál. Sé þó skjálftann í þér á milli línanna.

[Stefán Friðrik Stefánsson, 14.12.2006 kl. 17:34]

Sæl Sigurlín Margrét

Takk fyrir kommentið. Hvað er rangt í þessum skrifum. Allt það sem ég skrifa þarna eru hlutir sem komið hafa fram á öðrum stöðum. Það eru engin skúbb þarna. Það kemur komið fram opinberlega í dagblöðum sú kjaftasaga að Margrét fari jafnvel fram í Norðvesturkjördæmi og hún hefur ekki neitað því. Margrét segir á vef sínum að mögulegt sé að hún fari í formanns- eða varaformannsframboð og hefur engu hafnað eða staðfest í þeim efnum. Fyrir liggur vilji hennar þó til forystuframboðs. Þegar liggur fyrir að sitjandi formaður og varaformaður ætla sér ekki að hætta svo varla verður þetta eins og Disney-mynd þetta flokksþing komi til leiðtogakjörs.

mbk.