Meirihluti Norðlendinga vill álver við Húsavík

Það er ánægjulegt að heyra af könnun Gallup þar sem fram kemur að rúm 58% íbúa á Norðurlandi sé hlynnt byggingu álvers á Bakka við Húsavík. Tæp 28% eru andvíg því. Það hefur lengi verið tilfinning mín að nokkur meirihluti íbúa hér styðji þetta verkefni. Vissulega er einhver andstaða en mér finnst hún lítil miðað við alla þá umræðu sem verið hefur almennt gegn stóriðju, en í þeim efnum hefur verið nokkur tískubylgja.

Hvað varðar álver í Reyðarfirði sem senn fer á fullt er 51% aðspurðra hlynnt því en 29% andvíg. Þetta eru merkilegar tölur í báðu tilfelli að mínu mati og mikilvægt að benda vel á þetta. Það kemur ekki að óvörum að stóriðjuandstæðingar hafi lítið rætt þessa könnun, enda þjónar hún ekki málstað þeirra og er í raun skýr skilaboð eftir alla umræðu sem verið hefur gegn stóriðju á landsbyggðinni, bæði á Norður- og Austurlandi, sérstaklega síðustu mánuðina.

Fróðlegt verður að sjá hvernig VG muni ganga í Norðausturkjördæmi í komandi kosningum. Ætlar Steingrímur J. Sigfússon að heimsækja Þingeyinga með þeim skilaboðum sínum að hann berjist gegn álveri í heimabyggð þeirra? Hann vann leynt og ljóst gegn álveri og virkjun á Austurlandi á sínum tíma og hlaut varla mikið fylgi á þeim slóðum í kosningunum 2003. 

Það verður fróðlegt að sjá mælingu VG hér í kjördæminu útfrá afstöðu þeirra, sérstaklega hvað varðar stóriðju við Húsavík. Ekki á þessi afstaða við um Samfylkinguna, en mikill stuðningur er innan þess flokks í kjördæminu við þetta álver.

Meirihluti íbúa á Norðurlandi hlynntur álveri á Bakka við Húsavík

Athugasemdir

[Hlynur Hallsson, 18.12.2006 kl. 21:40]

Sæll Stebbi,

Vinstri græn eru að mælast með 25% í Norðausturkjördæmi í nýjustu Gallupkönnun og auðvitað mun VG tala með sömu röddu hér og annarsstaðar. Það er komið meira en nóg af álverum og á Húsavík er óendanleigir möguleikar á heilsutengdri ferðaþjónustu og nýtingu náttúrunnar á skynsamlegri hátt en að sóa rafmagni í enn eina álbræðsluna. Vinstri græn náðu einnig góðum árangri í sveitarstjírnarkosningunum í vor á þessu svæði og við munum ná enn betri árangri þann 12. maí. Líttu á pistilinn minn í dag. Bestu kveðjur,

[Stefán Friðrik Stefánsson, 18.12.2006 kl. 22:00]

VG á sínar hugsjónir og tjáir þær ef þeir vilja það auðvitað. Ekki ætla ég að skammast svosem út í það. Flokkarnir eru ekki allir sammála um afstöðu í þessu og þetta hlýtur að vera eitt þeirra mála sem mest verður um talað í baráttunni.

Ég er ekki í VG, en lít samt svo sannarlega á okkur sem vini þrátt fyrir ólíkar skoðanir um hitt og þetta. Í því ljósi verð ég að harma að þú ert ekki ofarlega á lista VG. Það var slæmt fyrir Akureyringa innan VG að ná ekki sínum fulltrúa í þriðja sætið. Ég held að þessi listi sé veikari án þín í forystusveitinni.

mbk.

[Hlynur Hallsson, 19.12.2006 kl. 12:52]

Sæll aftur og takk fyrir hlý orð í minn garð :) Við erum nú ansi oft sammála sýnist mér en auðvitað ekki í öllu! Ég er til dæmis sammála þér um það að stóriðjustefnan verður eitt af aðal málunum í kosningabaráttunni og því kvíði ég ekki, hvorki á Húsavík, Reyðarfirði né hér á Akureyri. Bestu kveðjur,