Hví er kostnaður við skaupið trúnaðarmál?

Sitt sýnist hverjum um Skaupið á gamlársdag. Ég hef sagt mínar skoðanir hér og fengið komment frá þeim sem eru sammála og ósammála. Hið besta mál. Botna samt engan veginn í því af hverju kostnaður við þetta Áramótaskaup er talið trúnaðarmál. Þeir sem stýra Ríkisútvarpinu hafa neitað að gefa Fréttablaðinu, sem spurði um málið í gær og í dag, upp kostnaðartölurnar.

Fréttablaðið hefur nú kært þessa neitun Ríkisútvarpsins til úrskurðarnefndar um upplýsingamál. Það er mjög undarlegt að ekki megi liggja fyrir hvað þetta skaup hafi kostað. Það sjá reyndar allir að þetta skaup var nokkuð dýr, miklu var til kostað og útkoman er ekki óumdeild, eins og allir hafa séð sem heyrt hafa álit almennings á skaupinu á netinu og í allskonar þáttum þar sem óvísindalegar mælingar hafa farið fram.

Ég hef margoft sagt hér að það sé erfitt að gera skemmtiefni sem allir séu hoppandi glaðir yfir. Þetta er ekki fyrsta skaupið sem er umdeilt. En í ljósi alls tel ég ekki óviðeigandi að kostnaður við það sé gefinn upp. Sé tal um að það hafi kostað um eða yfir 40 milljónir er það vissulega mikið umhugsunarefni hvort þeim peningum hafi verið vel varið.

Athugasemdir

[Halldór Eldjárn, 5.1.2007 kl. 12:54]

Ég held að 40 milljónir fyrir einn klst langan þátt einusinni á ári sé bara allt í lagi. RÚV fær náttúrlega ríflega 2.5 milljarða á ári af afnotagjöldum. Svo er það alveg þess virði að svona kosti 40 milljónir og þeim peningum var alveg vel varið - það þótti mörgum þetta mjög gott Skaup.

[Stefán Friðrik Stefánsson, 5.1.2007 kl. 13:49]

Sæll Halldór

Það er gott ef að þú ert sáttur. Ekkert nema gott um það að segja. Það vonandi fæst uppgefið hvað þetta skaup kostaði. Það er gott fyrir alla að það liggi fyrir. En já, hvaða atriði fannst þér best í Skaupinu annars?

mbk.