Stefnir í góð bókajól

Ég er mikill bókamaður - les mikið og hef virkilega gaman af því. Er einn af þeim sem er ástríðumaður á góðar bækur. Það eru góðir tímar framundan hjá okkur bókafólkinu þessar vikurnar sem framundan eru, enda er jólabókaflóðið að skella á okkur af miklum krafti. Þetta er gósentíð fyrir fólk eins og mig, enda margt vel þess virði að lesa og rýna í. Ég ætla mér svo sannarlega að lesa mikið á aðventunni og njóta góðra bókmennta.

Þegar að ég var formaður flokksfélags hér í bæ og í flokksstarfinu almennt af meiri þunga en nú er voru miklar annir í aðdraganda jólanna af ýmsu tagi. Það er sérlega gott að vera laus við þessar skyldur þessar vikurnar, alla kvöldfundina og tengd stúss, sérstaklega í aðdraganda prófkjörs og geta eytt meiri tíma frekar í blogg, bókalestur og kvikmyndagláp. Þetta eru ástríður í mínum augum, enda hef ég gaman af að skrifa, sjá góðar myndir og lesa áhugaverðar bækur.

Nú þessa dagana er ég að lesa að nýju Röddina eftir Arnald Indriðason, en ég hef ekki lesið hana í nokkur ár. Þetta er meistaralega rituð bók. Svo er ég að stefna að því að rifja upp í rólegheitum Kleifarvatn aftur, eina mest seldu bók Íslandssögunnar, annað meistaraverk Arnaldar. Svo fer maður að rýna í meira. Ég er fastagestur á bókasafninu, svo að alltaf er eitthvað skemmtilegt þar að finna til að lesa. Svo er eiginlega kominn tími á að lesa aftur nokkrar bækur fyrri ára, t.d. hef ég áhuga á að lesa aftur ævisögur Laxness eftir Hannes Hólmstein.

Það er alltaf nóg til að lesa - áhugaverðir tímar svo sannarlega framundan í jólabókaflóðinu.

Fleiri bækur í boði fyrir þessi jól en í fyrra

Spennan vex í bandarísku þingkosningunum

Það stefnir í öflugan lokasprett í bandarísku þingkosningunum, sem verða eftir viku. Skoðanakannanir sýna forskot demókrata og George W. Bush, forseti Bandaríkjanna, er farinn í kosningaferðalag um landið á lykilstaðina til að reyna að snúa hlutunum við. Nú nýtur Bush reyndar sjálfur ekki nema um 40% fylgis landsmanna skv. skoðanakönnunum, svo að ferðalagið getur orðið tvíeggjað sverð - en á það hætta repúblikanar nú í baráttunni.

Í þingkosningunum 2002 var það Bush, eiginkona hans, Laura Welch Bush, og varaforsetinn Dick Cheney sem fóru um landið og héldu kosningafundi með miklum þunga og tryggðu lykilsigra, bæði í fulltrúadeildinni og öldungadeildinni - sigra sem skiptu forsetann máli til að byggja sig upp fyrir forsetakosningarnar 2004. Nú er stjórnmálaferli forsetans að ljúka, hann getur ekki farið aftur í kosningar og framtíð mála í valdatíð hans veltur á úrslitunum eftir viku. Mikið er svo sannarlega í húfi.

Dick Cheney, varaforseti Bandaríkjanna, er nú í fréttatímum og á fréttavefum vestan hafs og segja að uppreisnarmenn í Írak hafi hert árásir sínar í landinu í því skyni að hafa áhrif á komandi þingkosningar í Bandaríkjunum. Eflaust er það rétt. En mun það styrkja stöðu repúblikana að beina kastljósinu til Íraks. Það gæti heppnast út frá varnarlegri umræðu, en gæti líka orðið hált vopn sem snýst gegn þeim í hita lokadaganna. Orð dagsins hjá Bush og Cheney í fréttum og kosningasamkomum er að demókrata skorti vilja til sigurs í Írak og hafi enga stefnu í málum þeim tengdum.

Það verður fróðlegt að sjá hvernig lokaspretturinn stefnir fyrir flokkana. Mikið er í húfi. Kosið er um alla fulltrúadeildina og hluta öldungadeildarsæta. Úrslitin í fulltrúadeildinni munu því auðvitað hafa meiri yfirsýn að segja um stöðuna fyrir forsetakosningarnar 2008. Bush fer ekki fram þá, svo litlu skiptir fyrir hann hvernig sá slagur æxlast. Það sem skiptir hann máli nú eru næstu tvö ár, hann vill halda yfirráðum flokksins yfir þinginu og tryggja völd sín. Án þeirra verður hann valdaminni og einangraðri fyrir vikið.

Þetta verða spennandi kosningar og verður með þeim víða fylgst. Ég hef alla tíð verið mikill áhugamaður um bandarísk stjórnmál, svo ég mun skrifa reglulega um stöðu mála þar til yfir lýkur að viku liðinni og úrslitin taka að streyma inn.

Aukin ofbeldisverk í Írak sögð tengjast kosningunum í Bandaríkjunum

Kristján Þór og Þorvaldur opna heimasíður

Það styttist í prófkjör Sjálfstæðisflokksins í Norðausturkjördæmi. Leiðtogaslagurinn er að hefjast af miklum krafti og nú eru Kristján Þór Júlíusson, bæjarstjóri, og Þorvaldur Ingvarsson, læknir, að opna heimasíður sínar og kosningaskrifstofu á næstu dögum. Nú hefur Kristján Þór lagt drög að heimasíðu sinni á vefslóðinni stjaniblai.is og hann opnar kosningaskrifstofu í Hafnarstræti um helgina. Mikill frumleiki er yfir nafngift vefsins, að flestra mati og þetta er kraftmikið og öflugt heiti óneitanlega.

Mikill kraftur mun vera á Kristjáni Þór og stuðningsmönnum hans og er mikil maskína að myndast utan um framboð hans, að því er manni skilst þessa dagana. Það er ljóst að sótt verður fram af krafti af hans hálfu. Hann er auðvitað bæjarstjóri með langan feril að baki og býður fram þá reynslu. Mikið er talað um framboð hans meðal bæjarbúa og sitt sýnist væntanlega hverjum, eins og venjulega. Kristján Þór hefur greinilega lagt vel drög að framboði sínu og þar á greinilega ekki að stíga nein feilspor.

Þorvaldur Ingvarsson hefur ennfremur ákveðið opnun heimasíðu og kosningaskrifstofu. Mun hann vera með kosningaskrifstofu í Kaupvangsstræti, við hliðina á Café Karólínu. Ætlar hann að vera með vef sinn á slóðinni valdi.is. Þorvaldur virðist leggja mikla elju og kraft í verkefnið. Er greinilegt að bæði leiðtogaefnin ætla að leggja mikla peninga í verkefnið og allan kraft sinn, enda eftir miklu að sækjast. Þetta er eðlilegur metnaður hjá öflugum mönnum.

Flestir bíða nú eftir því hvað Arnbjörg Sveinsdóttir, þingflokksformaður, hyggst fyrir og hvernig hún mun kynna leiðtogaframboð sitt. Arnbjörg ætti að hafa mikið forskot á þessa menn, enda er hún þingflokksformaður og var alþingismaður 1995-2003 fyrir Austurlandið og frá 2004 fyrir Norðausturkjördæmi. Fyrirfram ætti hún því að hafa gríðarlegt start í prófkjörsbaráttunni sinni.

Væntanlega stefnir Arnbjörg að opnun heimasíðu og kosningaskrifstofu, en ég hef ekki mikið heyrt af því allavega. En greinilegt er að þetta verður mikill Akureyrarslagur milli Kristjáns Þórs og Þorvaldar - það stefnir altént mjög í það og það verður fróðlegt með að fylgjast, segi ég og skrifa.

Margir áhugasamir í Norðvestrinu

Það eru greinilega margir áhugasamir um framboð hjá Sjálfstæðisflokknum í Norðvesturkjördæmi. 16 lýstu yfir framboði við kjörnefnd þar, til framboðs á lista flokksins í væntanlegum þingkosningum að vori. Eins og flestir vita verður ekki prófkjör hjá Sjálfstæðisflokknum í kjördæminu, en stillt upp á lista en auglýst eftir formlegum framboðum á listann.

Þeir sem vilja fara fram eru: Adolf H. Berndsen, Ásdís Guðmundsdóttir, Bergþór Ólason, Birna Lárusdóttir, Borgar Þór Einarsson, Einar Kristinn Guðfinnsson, Einar Oddur Kristjánsson, Eygló Kristjánsdóttir, Herdís Þórðardóttir, Hjörtur Árnason, Jakob Falur Garðarsson, Óðinn Gestsson, Sturla Böðvarsson, Sunna Gestsdóttir, Örvar Már Marteinsson og Þórvör Embla Guðmundsdóttir.

Þetta er meiri áhugi til framboðs en sást allavega hjá okkur sjálfstæðismönnum í Norðausturkjördæmi, en þar höfðu aðeins níu einstaklingar áhuga.

Sextán áhugasamir um framboð hjá Sjálfstæðisflokknum í NV-kjördæmi

Halldór kjörinn í norræna toppstöðu

Halldór Ásgrímsson, fyrrum forsætisráðherra, hefur verið kjörinn framkvæmdastjóri Norrænu ráðherranefndarinnar á Norðurlandaráðsþingi í Kaupmannahöfn. Hann tekur við starfinu þann 1. janúar nk. og mun starfa sem framkvæmdastjóri í Kaupmannahöfn frá þeim tíma. Það kemur varla að óvörum að Halldór fái þetta embætti, en hann hefur mikla reynslu sem stjórnmálamaður að baki, enda verið forsætisráðherra Íslands og auk þess forystumaður í íslenskum stjórnmálum til fjölda ára.

Halldór var kjörinn á Alþingi fyrst sumarið 1974, þá 26 ára að aldri. Hann féll í þingkosningunum 1978, en náði kjöri að nýju í desemberkosningunum 1979 og sat á þingi eftir það allt til haustsins 2006. Hann varð varaformaður Framsóknarflokksins sumarið 1980 við brotthvarf Einars Ágústssonar úr stjórnmálum og varð formaður Framsóknarflokksins í apríl 1994 er Steingrímur Hermannsson varð seðlabankastjóri. Tólf ára formannsferill Halldórs varð bæði öflugur tími og stormasamur fyrir Framsóknarflokkinn.

Halldór sat í ríkisstjórn nær samfleytt í rúmlega tvo áratugi. Hann var sjávarútvegsráðherra 1983-1991, dóms- og kirkjumálaráðherra 1988-1989, utanríkisráðherra 1995-2004 og forsætisráðherra 2004-2006. Aðeins Bjarni Benediktsson hefur setið lengur í ríkisstjórn en Halldór Ásgrímsson. Enginn deilir um það að Halldór Ásgrímsson hefur verið mikill áhrifamaður í íslenskum stjórnmálum. Hann var ein helsta burðarás ríkisstjórnar Sjálfstæðisflokks og Framsóknarflokks frá árinu 1995.

Það er gleðiefni fyrir okkur Íslendinga að reyndur stjórnmálaleiðtogi okkar skuli taka við þessari miklu stöðu, fyrstur allra íslenskra stjórnmálamanna. Óska ég Halldóri Ásgrímssyni til hamingju og óska honum allra heilla á nýjum vettvangi í Kaupmannahöfn.

Halldór kjörinn framkvæmdastjóri norrænu ráðherranefndarinnar

Eðalræmur í bíó

Það var mjög notalegt að fara í bíó og sjá tvær úrvalsmyndir í síðustu viku. The Departed og Mýrin eru mjög ólíkar kvikmyndir en algjörar perlur, sem vert er að mæla með. Skrifaði um The Departed hér á laugardag en sú umfjöllun nokkurn veginn hvarf hér í skuggann af skrifum um prófkjör og pælingar almennt um stjórnmál. Ég bendi því hér á tengla á umfjallanir mínar á The Departed og Mýrinni.

Mýrin
The Departed

Björn Bjarnason, dómsmálaráðherra, er mikill kvikmyndaáhugamaður. Það er mjög ánægjulegt að sjá skrif hans um The Departed á vef hans nú í dag, en hann fór væntanlega á hana nú í dag. Það er alltaf gaman að lesa skrif Björns en sérstaklega áhugavert að sjá hann skrifa um kvikmyndir. Við erum greinilega sammála um myndina. The Departed er besta mynd Scorsese í um tvo áratugi, eða síðan að Goodfellas var gerð árið 1990.

Hvet því alla til að skella sér í bíó og sjá þessa úrvalsmynd.

Augusto Pinochet dæmdur í stofufangelsi

Augusto Pinochet, fyrrum einræðisherra Chile, hefur nú verið dæmdur í stofufangelsi vegna þeirra glæpa sem framdir voru í valdatíð hans, einkum þeirra er framdir voru í fangelsum á fyrri hluta valdatímans. Það verður seint sagt að valdaferill Pinochet, sem ríkti frá valdaráni hersins í september 1973 til þess að hann vék af valdastóli árið 1990, sé glæsilegur. Vonandi mun Pinochet þurfa að svara til saka fyrir verk sín á þessu tímabili, en þess hefur lengi verið beðið.

Á þeim tveim áratugum sem hann var leiðtogi herstjórnarinnar og hersins í Chile létu stjórnvöld drepa um 3.000 pólitíska andstæðinga sína, samkvæmt opinberum tölum frá Chile. Sérstaklega var hin svokallaða Kondór-áætlun illræmd en henni var framfylgt í Chile og í fleiri löndum í Suður-Ameríku. Fyrrnefnd Kondór-áætlun var leynilegt samkomulag milli herstjórnanna í Argentínu, Bólivíu, Brasilíu, Chile, Paragvæ og Úrúgvæ. Í samkomulaginu fólst að ríkin hefðu með sér samvinnu í að leita/elta uppi andstæðinga og losa sig við lík þeirra í öðrum löndum.

Pinochet hefur áður verið formlega stefnt vegna mannrána og morða á að minnsta kosti 9 manna sem voru myrtir í valdatíð hans, en lík þeirra hafa aldrei fundist. Pinochet hefur hingað til tekist að komast hjá réttarhöldum vegna málanna, með því að segjast heilsuveill. Næst því komst hann þó þegar hann var hnepptur í stofufangelsi af breskum yfirvöldum er hann var staddur í Bretlandi haustið 1998. Munaði þá aðeins hársbreidd að hann þyrfti að svara til saka. Með því að þykjast vera (sagður vera það af læknum) langt leiddur af sjúkdómi var honum sleppt seint á árinu 1999.

Frægt varð er Pinochet var keyrður í hjólastól í flugvélina á flugvelli í London. Er hann sneri aftur til Santiago, höfuðborgar Chile, labbaði hann hinsvegar niður landganginn og gekk óstuddur að bíl sem þar beið hans, eins og ekkert væri sjálfsagðara. Þetta var allt ótrúlega kómískt á að horfa á sínum tíma og leitt að hann var ekki leiddur fyrir rétt þá. En væntanlega kemur brátt að því. Tíðindi dagsins eru þó stór og mikil, þeim ber að fagna.

Pinochet dæmdur í stofufangelsi

Hvalveiðar Íslendinga studdar hjá UNR

Mikið gleðiefni er að Norðurlandaráðsþing æskunnar, Ungdommens Nordiske Råd (UNR), sem stendur þessa dagana í Kaupmannahöfn, hafi í atkvæðagreiðslu lýst yfir stuðningi við hvalveiðar. Ég var áðan að hringja í Pál Heimisson, fulltrúa okkar á fundinum af hálfu SUS, um þessi mál og rabba við hann um þingið. Þetta er mikill sigur fyrir okkur. Palli lagði fram tillöguna á þinginu og hún fékk samþykki fundarmanna.

Á móti kemur að finnskir græningjar lögðu fram tillögu sem gerði ráð fyrir því að banna hvalveiðar og allt að því að fordæma okkar veiðar. Hún var felld en okkar tillaga samþykkt, svo að það er ekki hægt annað en túlka stöðu mála á þinginu en sem afgerandi sigur okkar. Það er mikilvægt að Palli skyldi tala fyrir hvalveiðunum á þinginu og greinilegt að okkar afstaða hitti í mark. Ég tel að þessi atkvæðagreiðsla segi allt sem segja þarf. Sérstaklega finnst mér þetta gott veganesti fyrir okkur hér heima.

Norðurlandaráðsþing æskunnar er haldið á hverju ári í aðdraganda Norðurlandaráðsþings, en það hefst í Kaupmannahöfn á morgun. Á þessum þingum eru lagðar fram ályktanir og staða helstu mála rædd og farið yfir stjórnmálin á Norðurlandasvæðinu. Það er greinilega eitthvað í gangi milli okkar Finna, meira en þetta, enda bítast nú Halldór Ásgrímsson og Jan-Eric Enestam um framkvæmdastjórastöðu í Norrænu ráðherranefndinni. Eins og fyrr segir er nær öruggt að Halldór fær stöðuna.

Flest stefnir í að Halldór hljóti hnossið

Það virðist stefna í nokkurn slag milli Halldórs Ásgrímssonar, fyrrum forsætisráðherra, og Jan-Eric Enestam, umhverfisráðherra Finnlands, um embætti framkvæmdastjóra norrænu ráðherranefndarinnar. Finnar virðast ekki beint tilbúnir að gefa eftir að Enestam verði framkvæmdastjóri, en flest bendir þó til að Halldór njóti góðs stuðnings víða á Norðurlöndum. Telja má mjög líklegt, eða nær öruggt jafnvel að hann verði framkvæmdastjóri.

Formlega hefur ekki verið gefin út yfirlýsing um framboð Halldórs af hálfu stjórnvalda, en greinilega er unnið í því á bakvið tjöldin. Hávær orðrómur um tilnefningu Halldórs í embættið hefur verið mjög áberandi síðustu vikuna, og fréttir bárust formlega af þessari stöðu mála í fréttatímum ljósvakamiðla hérlendis á þriðjudag. Jónína Bjartmarz, samstarfsráðherra Norðurlanda, og Sigríður Anna Þórðardóttir, formaður Íslandsdeildar Norðurlandaráðs, hafa ekki neitað því allavega í fjölmiðlum.

Væntanlega mun verða úr því skorið endanlega á fundi forsætisráðherra Norðurlandanna í vikunni hver muni hljóta framkvæmdastjórastöðuna. Norðmenn styðja Halldór mjög áberandi og greinilegt að Danir og Svíar ljá máls á því að hann hljóti starfið. Það má því telja möguleika hans mjög góða og nær öruggt að hann verði næsti framkvæmdastjóri, fyrstur Íslendinga. Greinilegt er að unnið er nú að sáttum í málinu og menn geti sæst á að Halldór fái starfið.

Möguleikar hans eru auðvitað miklir, bæði er hann fyrrum forsætisráðherra og auk þess reyndur ráðherra eftir tæplega tveggja áratuga setu í ríkisstjórn Íslands. Hann er því öllum þekktur í norrænum stjórnmálum og ekki er mikil andstaða, nema í Finnlandi, við að hann hljóti embættið.

Hvalveiðarnar ganga vel

Hvalveiðarnar virðast ganga vel. Nú hefur fimmta langreyðin verið veidd, en alls er kvóti upp á að veiða til manneldis níu slíkar, en hinsvegar 30 hrefnur. Það voru mikil tímamót þegar að veiðarnar hófust fyrr í þessum mánuði, en þá voru tveir áratugir liðnir frá því að hvalur var veiddur í atvinnuskyni hér við land. Langreyður var síðast veidd hér við land árið 1989, þá í vísindaskyni, en síðast í atvinnuskyni á árinu 1985.

Það vakti mikla athygli að Halldór Blöndal, leiðtogi Sjálfstæðisflokksins hér í Norðausturkjördæmi, skyldi er fyrsti hvalurinn kom í hvalstöðina í Hvalfirði skera hann. Halldór gerði það með mjög fagmannlegum hætti, en hann vann á fimmtán vertíðum í hvalstöðinni, áður en hann varð þingmaður, á áttunda áratugnum og er því öllu vanur í þessum efnum. Mér fannst þetta vel gert hjá Halldóri og hef víða heyrt fólk tala um að þetta hafi verið vel til fundið.

Spaugstofan gerði nokkuð grín af þessu með sínum skemmtilega hætti um helgina. Þar var Pálmi Gestsson í hlutverki Halldórs og þetta sett allt í fyndið samhengi. Þar flutti Pálmi í gervi Halldórs kostulega fyndna "stöku". Alveg frábærir félagarnir í Spaugstofunni eins og venjulega.

Fimmti hvalurinn á leið í land

Rætt um að kvikmynda Gladiator 2

Gladiator er ein öflugasta kvikmynd síðustu ára og hlaut fimm óskarsverðlaun árið 2001, þ.á.m. sem besta kvikmynd ársins 2000 og fyrir leik Russell Crowe á hershöfðingjanum og skylmingaþrælnum Maximus. Þetta mikla epíska stórvirki endurvakti aftur gerð kvikmynda sem gerast á tímum Rómarveldis, en þessi gerð kvikmynda var í mikilli tísku fyrir nokkrum áratugum og voru í raun táknmynd gullaldarára kvikmyndasögu Hollywood. Nægir þar að nefna óskarsverðlaunamyndina Ben-Hur, Spartacus, The Ten Commandments, Cleopötru og The Robe.

Þessi mynd setti nokkurn tón, en þegar að hún hlaut óskarinn hafði mynd af þessum toga ekki hlotið meiri upphefð frá tímum Ben-Hur, sem fékk ellefu óskara árið 1960. Ridley Scott tókst vel upp í gerð myndarinnar, sérstaklega var tæknihliðin stórfengleg, sviðsetningin af hinu forna Colosseum tókst meistaralega vel; það er ótrúlegt hvað þeir komust nálægt hinu glæsta útliti Rómar og Colosseum til forna. Þeir unnu mikið afrek sem stóðu að listrænni leikstjórn myndarinnar og skylmingaratriðin voru gríðarlega vel gerð. Í heildina var myndin veisla fyrir augað.

Allir sem sáu myndina verða væntanlega nokkuð hissa að sjá fréttir af því núna að Russell Crowe vilji endurvekja óskarsverðlaunarulluna sína (Maximus) einkum í ljósi þess að söguhetjan lést í fyrrnefndri mynd. Það er því rétt sem sagt er í þessari frétt að varla verður það gert nema að hann snúi aftur sem afturganga eftir sögulok myndarinnar eða lýst verði aðdraganda þess sem gerðist í Gladiator. Skil ég reyndar Crowe vel að vilja leika Maximus aftur, enda er þetta það hlutverk sem færði honum eftirsóttustu leikaraverðlaun heims.

En svo á móti kemur hvort það sé hægt að gera raunhæfa framhaldsmynd um Maximus. Það hefur oft verið gríðarlega áhættusamt að feta á þessa braut. Sumar sögur verða ekki sagðar nema einu sinni. Reyndar tókst Anthony Hopkins að endurvekja dr. Hannibal Lecter (óskarshlutverk sitt) áratug eftir hina vel heppnuðu The Silence of the Lambs, en oftast nær er þetta frekar tvíeggjað sverð. Verður fróðlegt að sjá hvort framhaldsmynd verði í raun gerð.

Russell Crowe langar til að gera Gladiator 2

Áfall fyrir Önnu Kristínu og konur í Samfó

Það er ekki hægt að segja annað en að úrslit prófkjörs Samfylkingarinnar í Norðvesturkjördæmi séu áfall fyrir konur í kjördæmastarfinu innan flokksins og í kjördæminu. Anna Kristín Gunnarsdóttir, alþingismaður, er nú fallin í óöruggt sæti, sæti sem ekki er möguleiki á að vinnist miðað við skoðanakannanir í kjördæminu og sé miðað við þá staðreynd að þingmönnum kjördæmisins mun fækka um einn í væntanlegum alþingiskosningum. Staða mála er því skiljanlega ekki gleðiefni fyrir Önnu Kristínu.

Að sama skapi er ekki hægt að segja annað en að árangur sr. Karls V. Matthíassonar sé glæsilegur. Honum var allt að því bolað burt í uppstillingu í aðdraganda þingkosninganna 2003 og missti þingsæti sitt. Hann fær nokkra uppreisn æru að þessu sinni, kemst væntanlega aftur á þing, en það verður hinsvegar á kostnað þingkonunnar Önnu Kristínar. Það er mjög merkilegt að sjá úrslitin, enda verða þau varla túlkuð öðruvísi en sem ákall um breytingar í kjördæmastarfi flokksins heilt yfir litið.

Anna Kristín hefur ekki verið sýnileg sem þingmaður mikið í fjölmiðlum, en verið dugleg eftir því sem ég hef heyrt. Það er því skiljanlegt að hún sé sár með þessa stöðu og að hún sé nú orðin varaskeifa Guðbjarts Hannessonar og sr. Karls V. Matthíassonar. Það gæti verið að það hafi skaðað hana að vera úr Skagafirði og með litlar tengingar um allt kjördæmið, og þó veit ég það ekki. Allavega eru þessi úrslit vonbrigði fyrir hana en hún getur varla annað en tekið sætið til að tryggja þó hlut kvenna.

Annars verð ég að viðurkenna að ég þekki Guðbjart Hannesson ekki vel sem stjórnmálamann. Hann er víst gamall allaballi úr sveitastjórnarpólitíkinni á Skaganum en að mörgu leyti óskrifað blað, en væntanlega mun hann nú verða meira í fjölmiðlum, enda nú tekinn við sem kjördæmaleiðtogi flokksins af Jóhanni Ársælssyni.

Það verður fróðlegt að sjá svo um næstu helgi hver sigrar í prófkjörum Samfylkingarinnar í Suðvestur- og Suðurkjördæmi um næstu helgi, en nýir kjördæmaleiðtogar verða ennfremur kjörnir þar.

Anna Kristín óttast um stöðu kvenna í kjördæminu

Guðbjartur sigrar - Anna Kristín fellur um sæti

Úrslit liggja nú fyrir í prófkjöri Samfylkingarinnar í Norðvesturkjördæmi. Guðbjartur Hannesson, skólastjóri á Akranesi, sigraði í prófkjörinu og verður leiðtogi Samfylkingarinnar í kjördæminu í stað Jóhanns Ársælssonar, sem gaf ekki kost á sér til endurkjörs. Guðbjartur hefur ekki áður setið á þingi og er því nýliði í þessum efnum. Guðbjartur hlaut fyrsta sætið með 477 atkvæðum. Ekki var langt á milli efstu manna, en alls sóttust fimm eftir fyrsta sætinu í þessu prófkjöri.

Í öðru sætinu varð Karl V. Matthíasson, sem hlaut 552 atkvæði í 1.-2. sætið. Karl ætti því að komast aftur á þing, en hann var þingmaður Vestfirðinga 2001-2003. Anna Kristín Gunnarsdóttir, alþingismaður, varð þriðja og með 582 atkvæði í 1.-3. sæti og Sigurður Pétursson, bæjarfulltrúi á Ísafirði, 790 atkvæði í 1.-4. sæti. 1668 greiddu atkvæði og voru 69 seðlar auðir og ógildir. Þetta eru merkileg tíðindi og boða nokkra uppstokkun.

Með þessu fellur Anna Kristín um sæti og er í raun komin í varamannsframboð og komin í óvissuna. Mjög merkilegt alltsaman, enda er Anna Kristín þegar farin að tala um tap kvenna í kjördæminu. Það er því ljóst að ekki eiga konur upp á pallborðið í kjördæminu, en Anna Kristín er eina þingkona kjördæmisins.

Auk þess datt Helga Vala Helgadóttir niður er leið á, en hún var fyrst þriðja og svo fjórða áður en hún datt út endanlega úr efstu sætum. Mikla athygli vekur að Sveinn Kristinsson, leiðtogi Samfylkingarinnar á Akranesi, komst aldrei á blað í talningunni og hljóta sárindi hans að vera nokkur er úrslitin liggja fyrir.

Það verður fróðlegt hver umræðan verður að prófkjöri loknu, en það hlýtur að teljast vonlítið fyrir Samfylkinguna að ná þrem inn í NV, miðað við að kjördæmið missir tíunda þingsæti sitt til kragans.

Öll atkvæði talin í NV-kjördæmi; Guðbjartur sigraði

Castro Live on Cuban TV

Það var svolítið merkilegt að sjá fréttamyndir í dag frá Kúbu, sem eiga að sýna leiðtogann sjálfan á sjúkrabeði. Það er enda reynt með þessum myndum að telja fólki trú um að kallgreyið sé í "lagi" og sé rólfær enn. Það að vera ráðandi í stjórnmálum snýst að mörgu leyti um það að koma vel fram. Betur en margir aðrir veit Fidel Castro þetta. Hann hefur stjórnað með sýnilegu valdi á Kúbu í tæpa hálfa öld, þar sem stormandi boðskapur hans hefur skipt sköpum fyrir hann að hafa haldið völdum og getað ríkt þar þetta lengi.

Að því kemur á ævi hans sem og allra annarra að halla tekur undan fæti. Það er óhjákvæmilegt, sama hver um er að ræða. Framkoma í stjórnmálum á okkar fjölmiðlatímum snýst oftast nær um það hvernig fólk kemur fram. Komi það ekki fram eða er fjarverandi hlýtur kastljósið að beinast að fjarverunni. Í landi eins og Kúbu snýst allt um að sýna fram á vald sitt. Það hefur Castro gert og gerði margoft meðan að hann var veikur fyrir nokkrum árum er hann féll illa á opinberri samkomu og lærbrotnaði.

Það vekur því athygli að það sem sjáist til Castro nú séu myndir af honum alvarlegum á svip í adidas jogging-galla (talandi um sannkallaða kaldhæðni) og greinilega fölan á brá að reyna að staulast nokkur skref með dagblaði í hendi sem sýnir tímasetninguna. Þetta er eins og í gíslatöku þegar að gíslinn er sýndur með nýjasta dagblaðið í hendinni, til að sýna að hann sé örugglega enn þessa heims. Þetta er í senn bæði skondið og skemmtilega óraunverulegt í sinni fyndnustu merkingu.

Það er mjög erfitt að vera yfirgnæfandi í lokuðu samfélagi eins og Kúbu, með einræði og engum alvöru kosningum, þar sem leiðtoginn er heilsuveill og sá sem með völdin á að fara á meðan sést varla heldur. Það er því varla undrunarefni að það gerist fyrr en síðar að reynt sé að loka á orðróminn. Þetta var vandræðalegt í tilfelli Leonid Brezhnev og ekki síður Boris Yeltsin, þegar að reynt var að telja fólki trú um að hann væri heilsuhraustur.

Að því kemur væntanlega fyrr en síðar að þessi staða mála, með leiðtogann greinilega fárveikan, veki kúbverja til meðvitundar í samfélagi sem hefur vanist einræði og einum leiðtoga, án kosninga, til áratuga og þá sem fylgjast með einræðinu fjarri eymd kommúnismans, sem enn ómar í ríki einræðisherrans.

Castro segir fregnir af andláti sínu orðum auknar

Prófkjörsbaráttan í Suðvesturkjördæmi

Bjarni Benediktsson, alþingismaður, opnaði í dag prófkjörsskrifstofu sína í Garðabæ og heimasíðu sína. Ekki virðist mikil barátta blasa þó við Bjarna í prófkjörinu þann 11. nóvember nk. í kraganum. Enginn annar býður sig fram í annað sætið og hann virðist hafa nær óumdeilda stöðu í forystusveit flokksins í kjördæminu. Staða Bjarna hefur styrkst jafnt og þétt allt þetta kjörtímabil. Hann var valinn til setu í fimmta sæti framboðslistans í kraganum í uppstillingu fyrir kosningarnar 2003 og náði þá kjöri á þingi. Hann varð formaður allsherjarnefndar í árslok 2003 þegar að Þorgerður Katrín Gunnarsdóttir varð ráðherra.

Bjarni hefur styrkst við hvert málið undir hans verksviði í þinginu. Hann t.d. kom fram af krafti og ábyrgð í fjölmiðlamálinu árið 2004 og stóð sig mjög vel við að tala fyrir því. Rimmur hans við stjórnarandstöðuna á því átakavori og sumri eru eftirminnilegar okkur stjórnmálaáhugamönnum. Það hefur blasað við nær allt kjörtímabilið að Bjarni myndi hækka verulega á listanum í kraganum við þessar kosningar og var jafnvel um tíma talað um að hann myndi gefa kost á sér í fyrsta sæti framboðslistans er Árni M. Mathiesen tók ákvörðun um að færa sig í annað kjördæmi. Svo fór að hann gaf kost á sér í annað sætið.

Það virðist lítill hasar vera um fyrsta og annað sætið í væntanlegu prófkjöri eftir hálfan mánuð. Meginátakalínurnar virðast vera um þriðja til sjötta sætið, sem gætu allt á góðum degi orðið þingsæti, enda mældist Sjálfstæðisflokkurinn í Suðvesturkjördæmi með 49% í síðustu mánaðarkönnun Gallups. Það er mikilvægt að mínu mati að Bjarni Ben fái þar öfluga og góða kosningu, efast ég vart um að svo myndi fara. Bjarni er enda öflugur framtíðarmaður í flokknum sem hefur sannað kraft sinn og mátt - sannað að hann er forystumaður þar.

Í dag opnuðu ennfremur Kópavogsbúarnir Ármann Kr. Ólafsson og Sigurrós Þorgrímsdóttir heimasíður sína og kosningaskrifstofu. Ármann keppir um þriðja sætið við Ragnheiði Ríkharðsdóttur, bæjarstjóra í Mosfellsbæ, en Sigurrós um hið fjórða við þau Bryndísi Haraldsdóttur, Jón Gunnarsson og Ragnheiði Elínu Árnadóttur.

Spenna hjá Samfylkingunni í Norðvestri

Talning stendur nú yfir í prófkjöri Samfylkingarinnar í Norðvesturkjördæmi. Virðist talning hafa hafist seint en er nú komin í fullan gang. Skv. fyrstu tölum eru Guðbjartur Hannesson, skólastjóri á Akranesi, Anna Kristín Gunnarsdóttir, alþingismaður, Helga Vala Helgadóttir, fjölmiðlakona, og Sigurður Pétursson bæjarfulltrúi á Ísafirði, í efstu sætum, en litlu virðist muna.

Það verður fróðlegt að sjá hver sigrar prófkjörið, en fimm sóttust eftir fyrsta sætinu; þau Guðbjartur, Anna, Sigurður, Sveinn Kristinsson og Karl V. Matthíasson. Barist var um lausan leiðtogastól, en Jóhann Ársælsson hefur ákveðið að gefa ekki kost á sér til endurkjörs að vori, en hann hefur setið á þingi fyrir Alþýðubandalagið og Samfylkinguna nær samfellt frá árinu 1991.

Það verður væntanlega fylgst með því hvernig fer í Norðvesturkjördæmi. Flokkurinn hlaut aðeins tvo þingmenn kjörna í þingkosningunum 2003, en var lengi vel spáð þar 3-4 þingsætum. Ef marka má fyrstu tölur stefnir í að dreifing verði á efstu sætum, en ekki muni fulltrúar einungis eins svæðis í þessu víðfeðma kjördæmi raða sér í efstu sætin.

Viðbót - kl. 20:55
Þegar að talin hafa verið rúm 1000 atkvæði af rúmum 1700 í þessu prófkjöri nú laust fyrir níu hefur Guðbjartur Hannesson enn forystu og flest stefnir í að  hann muni leiða framboðslista flokksins að vori. Sú breyting hefur nú orðið að Karl V. Matthíasson, fyrrum alþingismaður, er kominn upp í annað sætið. Þriðja er Anna Kristín Gunnarsdóttir, alþingismaður, og fjórði er Sigurður Pétursson, bæjarfulltrúi á Ísafirði.

Í frétt á mbl.is nú fyrir stundu kemur fram að Anna Kristín óttist að útkoman verði slæm fyrir konur í kjördæmastarfi flokksins og staða þeirra versna, þar sem engin kona yrði þar með í öruggu þingsæti í kosningum að vori.

Fyrstu tölur úr prófkjöri Samfylkingarinnar í NV-kjördæmi

Björn fer yfir úrslit prófkjörsins

Björn Bjarnason, dómsmálaráðherra, hefur nú ritað ítarlegan pistil á heimasíðu sína um úrslit prófkjörs Sjálfstæðisflokksins í Reykjavík, sem lágu fyrir endanlega í nótt. Björn hlaut þriðja sætið í fjórða skiptið í prófkjöri flokksins í borginni, en hann hlaut það sæti strax árið 1990, þegar að hann gaf fyrst kost á sér til þingframboðs. Í pistlinum fer Björn ekki aðeins yfir úrslit prófkjörsins, heldur stöðu mála í sjálfum prófkjörsslagnum og ennfremur þá atburðarás sem leiddi til fundarins sem haldinn var í Valhöll með honum og Geir H. Haarde, forsætisráðherra, fyrir rúmri viku.

Víkur hann með merkilegum hætti að álitsgjöfunum Sigurjóni M. Egilssyni og Agli Helgasyni, og telur að Egill hafi talið að eins myndi fara fyrir honum í þessu prófkjöri og Geir Hallgrímssyni í hinu sögufræga krossaprófkjöri í nóvember 1982. Ennfremur er þar fjallað um grein Jóns Baldvins Hannibalssonar í Morgunblaðinu í gær, en hún var greinilegt innlegg í prófkjörsslag sjálfstæðismanna í Reykjavík. Í lok pistilsins minnist Björn á að þessi úrslit séu varnarsigur fyrir sig í þeirri stöðu sem uppi hafði verið, t.d. innan Sjálfstæðisflokksins.

Athyglisverðar niðurstöður í prófkjörinu

Það er athyglisverð staða sem við blasir eftir prófkjör Sjálfstæðisflokksins í Reykjavík. Þegar að ég vaknaði í morgun fór ég yfir skiptingu atkvæða og fannst merkilegt að líta yfir þá stöðu mála. Það er alveg ljóst að Guðlaugur Þór Þórðarson vann afgerandi sigur í baráttunni um annað sætið og hefur þar mikið forskot. Merkilegast fannst mér að sjá hvernig atkvæðin skiptast á tólf efstu. Sérstaklega hvað varðar fyrsta sætið, en Björn Bjarnason, dómsmálaráðherra, fékk næstflest atkvæði í það sæti og meira að segja Grazyna M. Okuniewska hlaut nokkur atkvæði í það sæti. Merkilegast finnst mér að sjá hversu þó mörg atkvæði Geir og Björn fá t.d. í tíunda sætið.

Heilt yfir finnst mér glæsilegt að sjá flotta útkomu nýliða, en Guðfinna S. Bjarnadóttir og Illugi Gunnarsson fljúga beint inn á þing í sínu fyrsta prófkjöri. Guðfinna er með sérstaklega glæsilega kosningu og er t.d. með vel yfir 8000 atkvæði. Sögufrægt varð er Geir Hallgrímsson, formaður Sjálfstæðisflokksins, féll í umdeildu krossaprófkjöri í nóvember 1982. Hann varð þá í sjöunda sæti. Það er merkilegt að sjá hvernig staðan hefði orðið ef slíkt fyrirkomulag hefði verið nú, en það er ljóst að nokkrir frambjóðendur sem urðu ofarlega hefðu getað fengið slæma útreið við slíkar aðstæður. En greining atkvæða er athyglisverð, svo ekki sé meira sagt.



Ég skrifaði hér um úrslitin í nótt, þegar að þau lágu fyrir, eins og þau blöstu þá við mér. Það er ánægjulegt að margir hafi lesið það og kommentað á þau skrif. Ég vona að efstu menn geti vel við unað, þrátt fyrir allt. Björn er á sama stað eftir þetta prófkjör og hann var eftir hið síðasta. Hann er í öðru sæti á öðrum framboðslistanum. Það eru viss vonbrigði að hann skuli ekki hafa náð leiðtogastöðu, því neita ég ekki, en vilji flokksmanna liggur fyrir í þessum efnum. Það er greinilegt að mikil smalamennska var viðhöfð í gær og úrslitin endurspegla þá smölun mjög vel. Nú ræðst hvað Björn gerir, ef marka má fyrstu viðbrögð mun hann taka sætið.

Ég vil auðvitað óska Guðlaugi Þór til hamingju. Hann er einn forvera minna sem formaður Varðar hér á Akureyri. Met þessa menn báða mikils, en hef aldrei farið leynt með stuðning minn við Björn. Hann á þann stuðning skilið. Ég tel að fáir hafi lagt mér meira lið í minni pólitík og þeim verkum sem ég hef sinnt á netinu t.d. en Björn. Hann hefur ávallt minn stuðning. Samfagna þó vissulega með Guðlaugi Þór. Það er auðvitað visst gleðiefni að ungum manni sé falin slík forystustörf en Guðlaugur Þór var formaður SUS á þeim árum sem ég gekk í flokkinn og fór að starfa þar að ráði fyrst. Guðlaugur Þór markar sig sem framtíðarmann í Sjálfstæðisflokknum með þessu.



Árangur Guðfinnu S. Bjarnadóttur er glæsilegur og vil ég óska henni til hamingju. Mitt nafn birtist í stuðningsauglýsingu fyrir hana, svo að ég fagna árangri hennar mjög. Hún er framtíðarkona fyrir flokkinn og verður forystukona hans í borginni í þessu prófkjöri. Sigur hennar er mikill og öllum ljóst að nú tekur pólitíkin við hjá henni og endalok orðin á glæsilegum rektorsferli hennar við Háskólann í Reykjavík, en hún hefur byggt skólann upp með mikilli elju og gríðarlegum metnaði. Öll bindum við vonir að verk hennar verði jafn farsæl og öflug í pólitísku starfi innan Sjálfstæðisflokksins. Mér fannst Guðfinna standa sig vel í prófkjörsslagnum og hún sannaði kraft sinn.

Illugi er öflugur ungur maður sem á góðan árangur skilið. Fagna mjög að Guðfinna og Illugi fari á þing. Svo er gott að Pétur náði að hækka sig, en hann hefur staðið sig vel á þingi og verið mikill talsmaður frelsisins. Svo er Ásta þarna, leitt að hún skyldi falla um sæti, en svona er þetta alltaf í prófkjörum að menn hækka og lækka fram og til baka reglulega. En fyrir mestu er að hún sé í öruggu þingsæti. Gott að Sigríður Andersen nái ofarlega, það er töggur í henni og vonandi fer hún á þing. Þannig að heilt yfir gleðst ég með tíu efstu, þetta er það fólk sem ég spáði að yrði í topp tíu og því ekkert annað en gott um þetta að segja í heild sinni.



Ég veit ekki hverjir eftirmálar prófkjörsins verða, ef nokkur eru. Beðið er viðbragða og greiningu Björns Bjarnasonar á stöðu mála. Það voru viss hættumerki fyrir prófkjörið að næði hann ekki öðru sætinu sem hann batt vonir sínar við gæti hann fallið niður listann, enda eru ruðningsáhrif alltaf til staðar nái menn ekki markmiðum sínum. Það er gleðiefni að hann haldi þó allavega sínu sæti frá síðasta prófkjöri. Það hefði verið afleit niðurstaða fyrir Sjálfstæðisflokkinn hefði Björn fengið verri útkomu en þessa.

En úrslit liggja fyrir. Það verður spennandi að heyra meiri viðbrögð á þessari stöðu mála. Það er alveg ljóst að þessi úrslit boða viss þáttaskil fyrir Sjálfstæðisflokkinn og kynslóðaskipti á vissum stöðum. En ég vona að samstaða Sjálfstæðisflokksins í Reykjavík verði sú sama og áður í langri leiðtogatíð Davíðs Oddssonar. Það verður nú að ráðast hvort mönnum ber gæfa til að halda sameinaðir til verka, nú þegar að hans nýtur ekki lengur við.

Niðurstaða prófkjörs Sjálfstæðisflokksins bindandi

Úrslit liggja fyrir í prófkjörinu í Reykjavík

Úrslit í prófkjöri Sjálfstæðisflokksins í Reykjavík lágu fyrir á þriðja tímanum í nótt. Ljóst er að sigurvegarar prófkjörsins voru Guðlaugur Þór Þórðarson, Guðfinna S. Bjarnadóttir og Illugi Gunnarsson. Tvö hin síðarnefndu komust bæði beint í forystusveit Sjálfstæðisflokksins í Reykjavík, en þau eiga ekki sæti á þingi nú og urðu ofar en fjórir sitjandi þingmenn flokksins. Geir H. Haarde, forsætisráðherra, og Guðlaugur Þór Þórðarson, alþingismaður, munu leiða framboðslista Sjálfstæðisflokksins í höfuðborginni í kosningunum að vori, en Björn Bjarnason, dómsmálaráðherra, og Guðfinna munu skipa annað sæti skv. úrslitunum, en þau urðu í þriðja og fjórða sæti.

Lokatölur í tólf efstu sætin eru svohljóðandi:
Geir H. Haarde: 9.126 atkvæði í 1. sæti
Guðlaugur Þór Þórðarson: 5.071 atkvæði í 1.-2. sæti
Björn Bjarnason: 4.506 atkvæði í 1.-3. sæti
Guðfinna S. Bjarnadóttir: 4.256 atkvæði í 1.-4. sæti
Illugi Gunnarsson: 4.526 atkvæði í 1.-5. sæti
Pétur Blöndal: 5.175 atkvæði í 1.-6. sæti
Ásta Möller: 6.057 atkvæði í 1.-7. sæti
Sigurður Kári Kristjánsson: 6.735 atkvæði í 1.-8. sæti
Birgir Ármannsson: 7.106 atkvæði í 1.-9. sæti
Sigríður Á. Andersen: 6.328 atkvæði í 1.-10. sæti
Dögg Pálsdóttir: 5.991 atkvæði í 1.-10. sæti
Grazyna M. Okuniewska: 3.514 atkvæði í 1.-10. sæti

Listarnir verða því með þessum hætti í kjördæmunum tveimur, en eftir á að draga um röð þess hvort kjördæmið Geir H. Haarde mun leiða og hinsvegar Guðlaugur Þór Þórðarson.

Geir H. Haarde
Björn Bjarnason
Illugi Gunnarsson
Ásta Möller
Birgir Ármannsson
Dögg Pálsdóttir

Guðlaugur Þór Þórðarson
Guðfinna S. Bjarnadóttir
Pétur Blöndal
Sigurður Kári Kristjánsson
Sigríður Á. Andersen
Grazyna M. Okuniewska



Geir H. Haarde, forsætisráðherra, fékk glæsilega kosningu í fyrsta sætið, en hann hlaut rúmlega 95% greiddra atkvæða. Hann fær því gott umboð til forystustarfa. Guðlaugur Þór fær ennfremur góða kosningu til forystustarfa í sínu öðru prófkjöri í landsmálastjórnmálum, en hann varð í sjötta sæti í síðasta prófkjöri og kom þá nýr beint inn á Alþingi. Björn Bjarnason, sem setið hefur á þingi frá árinu 1991 og ráðherra nær samfellt frá 1995, náði ekki að tryggja sér leiðtogastöðu en lenti fjórða prófkjörið í röð í þriðja sætinu, sem enn og aftur verður hans sæti, en hann hefur aldrei orðið í neinu öðru sæti en því í prófkjöri hjá Sjálfstæðisflokknum.

Guðfinna S. Bjarnadóttir tryggir sér með glæsilegri kosningu titil forystukonu meðal sjálfstæðismanna í Reykjavík og tekur við því hlutverki af Sólveigu Pétursdóttur, sem setið hefur á þingi í tæp sextán ár, en ákvað að draga sig nú í hlé. Guðfinna, sem verið hefur rektor Háskólans í Reykjavík frá árinu 1998, kom nú beint inn í stjórnmál og fær flott umboð frá flokksmönnum. Illugi Gunnarsson flýgur inn í forystusveit flokksins í borginni ennfremur og fær góða kosningu í fimmta sætið, sem er þriðja sætið, á eftir Geir og Birni. Illugi, sem var aðstoðarmaður Davíðs Oddssonar í fimm ár, hefur pólitískan feril sinn með miklum glans.



Lengst af kvöldsins var Pétur H. Blöndal í sjöunda sætinu en tókst undir lok talningarinnar að komast upp í sjötta sætið, og verður þriðji á eftir Guðlaugi Þór og Guðfinnu. Í síðasta prófkjöri skákaði hann Sólveigu Pétursdóttur og varð fjórði, hlaut annað sætið í Reykjavík suður á eftir Geir. Nú lækkar hann nokkuð en tókst að hækka sig á lista með því að hljóta sjötta sætið. Ásta Möller varð sjöunda. Framan af kvöldi varð hún fimmta, ofan við Illuga Gunnarsson en lækkaði svo í sjötta sætið í þriðju tölum. Undir lok talningar höfðu hún og Pétur stólaskipti. Úrslitin eru betri en síðast fyrir Ástu, en hljóta þó vissulega að teljast nokkur vonbrigði.

Sigurður Kári lendir í áttunda sætinu, sæti neðar en síðast. Úrslitin hljóta því að vera viss vonbrigði miðað við það sem þá var, en hann hefur sama sess á nýjum framboðslista og var árið 2003, fjórða sætið á öðrum listanum. Birgir Ármannsson hækkar sig um sæti, hann varð tíundi árið 2003 en varð nú níundi. Hann hlýtur eins og Sigurður Kári að hafa vænst betri árangurs en hann er á nákvæmlega sömu slóðum nú og árið 2003, í fimmta sæti annars framboðslistans og enn í baráttusæti. Sigríður Á. Andersen er tíunda og hlýtur að vera ánægð með þá útkomu, þó hún hafi stefnt hærra. Hún verður í baráttusæti að vori, fimmta á öðrum listanum.

Það vekur athygli að Dögg Pálsdóttir skyldi ekki færa hærra. Hún stefndi á fjórða sætið en varð ellefta, og skipar því hið sjötta á öðrum listanum. Mörgum að óvörum varð pólski hjúkrunarfræðingurinn Grazyna M. Okuniewska í tólfta sæti og er því komin í baráttusætin, mörgum að óvörum. Fáir áttu von á svo glæsilegum árangri hjá henni, en henni er óskað innilega til hamingju með árangurinn. Hún auglýsti lítið sem ekkert, hafði einfalda blogspot-kosningavefsíðu og eyddi litlum peningum í baráttuna. Árangur hennar er því óvenjuglæsilegur og gott að hún skuli vera svo ofarlega sem raun ber vitni. Heilt yfir eru þetta sterkir listar.



Úrslitin eru merkileg. Ég nefndi tíu aðila á vefnum á föstudagskvöldið, sem þá er ég myndi kjósa. Þeir urðu í tíu efstu sætunum, svo ég get vart annað en verið sáttur við val flokksmanna, þó ekki hefði ég númerað þá með þessum hætti. Það er svo aftur á móti annað mál. Nú tekur við að greina úrslitin. Eins og fyrr sagði eru Guðlaugur Þór, Guðfinna og Illugi sigurvegarar. Beðið er nú viðbragða Björns Bjarnasonar, dómsmálaráðherra, sem náði ekki sínu markmiði að fá umboð til leiðtogastarfa, en heldur þess í stað sinni stöðu á öðrum framboðslistanum. Það verður fróðlegt að heyra viðbrögð hans og annarra áhrifamanna með morgni.

Heilt yfir vona ég að þetta prófkjör hafi styrkt Sjálfstæðisflokkinn. Prófkjörið tókst vel og margir tóku þátt, þó mun færri en í prófkjörinu í nóvember í fyrra vegna borgarstjórnarkosninganna. Það eru viss vonbrigði. En vonandi boðar þetta prófkjör sterka framboðslista sem tryggja Sjálfstæðisflokknum góð úrslit að vori, þar sem fleiri þingsæti nást en vorið 2003, þegar að flokkurinn hlaut 9 þingmenn kjörna í Reykjavík. Nú er stefnan sett væntanlega á 10-11 hið minnsta.

Geir H. Haarde í 1. sæti og Guðlaugur Þór í 2. sæti

Sviptingar í talningunni í Reykjavík

Innan klukkustundar verður talningu í prófkjöri Sjálfstæðisflokksins í Reykjavík lokið í Valhöll. Telja má öruggt nú að Guðlaugur Þór Þórðarson verði í öðru sæti og muni skv. því leiða annan framboðslista flokksins í borginni að vori. Björn Bjarnason, dómsmálaráðherra, hefur verið í þriðja sætinu nær alla talninguna, en mikil óvissa er uppi um hvað hann muni gera í þeirri stöðu. Í síðasta viðtalinu sem Björn veitti í kvöld mátti skynja að fjarri því sé öruggt að hann verði í öðru sætinu á eftir Geir H. Haarde, forsætisráðherra, á öðrum listanum. Það mun væntanlega ekki ráðast fyrr en á morgun hvernig staða mála verður í þessum efnum endanlega.

Mikil spenna hefur verið í talningunni. Í öðrum tölum breyttist staðan með annað sætið. Síðar komst Illugi Gunnarsson uppfyrir Ástu Möller og í fimmta sætið og nú fyrir stundu komst Pétur H. Blöndal líka upp fyrir Ástu og í sjötta sætið þar með. Guðfinna S. Bjarnadóttir hefur verið í fjórða sætinu alla talninguna og er ekki hægt að segja annað en að útkoma hennar sé stórglæsileg. Pétur vann vissan táknrænan sigur með því að komast uppfyrir Ástu. Að sama skapi hljóta það að teljast mikil vonbrigði fyrir Ástu verði hún í sjöunda sæti, hafandi byrjað kvöldið í fimmta sætinu. Það má allavega segja að staða kvenna sé lítið betri en síðast.

Það má því telja ekki ósennilegt að eftirmæli þessa prófkjörs verði hin sömu og síðast. Það er enda svo að eins og staðan er núna verður aðeins ein kona á hvorum lista í fjórum efstu sætum. Sigríður Á. Andersen, Dögg Pálsdóttir og Grazyna M. Okuniewska eru næstar. Það eru því fimm konur í tólf efstu sætum sem gefin eru upp, en á móti kemur að þrjár þeirra eru í neðsta hluta þeirra marka. Það verður fróðlegt að sjá lokatölur eftir klukkutíma og lokagreiningu þeirra. Ég mun skrifa nánar um endanleg úrslit þegar að þau verða ljós innan klukkutíma væntanlega.