Skelfilegt mál

Satt best að segja var maður að vona að sá sem keyrði á fjögurra ára strákinn í Reykjanesbæ síðdegis í dag myndi gefa sig fram og hafa vit á því að taka afleiðingum gjörða sinna. Sú von virðist heldur betur vera að dofna, enda liðnir yfir fimm tímar frá þessu sorglega atviki. Lögreglan mun þó vonandi takast að ná honum er yfir lýkur með ábendingum sem henni hefur borist.

Ég trúi því ekki að þetta atvik hafi farið framhjá þeim sem keyrði á strákinn. Finnst það mjög óraunverulegt að þetta hafi farið framhjá ökumanninum. Það getur varla annað verið en að þetta hafi verið nokkuð sem viðkomandi tók vel eftir. Bíllinn hlýtur að hafa dældast við höggið, það fer ekki framhjá neinum.

Finnst það mjög dapurlegt að fólk stingi af eftir að keyra á smábarn og skilja það eftir í sárum sínum. Það er dómgreindarbrestur af verstu sort. Það er eðlilegt að reiði séu fyrstu viðbrögðin, enda myndi allt eðlilegt fólk taka afleiðingum gjörða sinna.

Allar vísbendingar kannaðar

Hverslags manneskja keyrir á barn og stingur af?

Það er dapurlegt að heyra að einhver hafi svo ógeðslegt hjartalag að stinga af eftir að keyra á fjögurra ára barn, en það gerðist þó síðdegis í dag í Reykjanesbæ. Finnst þetta mjög alvarlegt, enda á fólk að bera ábyrgð á gjörðum sínum og standa frammi fyrir því sem það gerir, en ekki sýna þann heigulshátt að láta sig hverfa og barnið liggja eftir stórslasað.

Slysin geta vissulega alltaf gerst, en mér finnst það svo innilega sorglegt að fyrsta hugsun fólks eftir slíkt slys sé að láta sig hverfa af vettvangi. Vonandi mun viðkomandi einstaklingur sjá að sér og taka ábyrgð á sínum verkum og gefa sig fram.

Ef marka má fréttir slasaðist strákurinn í Reykjanesbæ mjög alvarlega. Við færum honum og fjölskyldu öll innilegar batakveðjur.

Ók á barn og stakk af

Eru herskáir nýnasistar að koma til Íslands?

Það er frekar ömurlegt að lesa nafnlausu rasistasíðuna skapari.com, en þar var forsetahjónunum og fleira fólki hótað nýlega. Nú er þar að finna kynningu á C 18, hinum vopnaða armi bresku nasistasamtakanna Blood & Honour. Er ekki hægt að skilja þennan boðskap öðruvísi en svo að þessi samtök ætli sér að koma til Íslands og séu kynnt í gegnum skapari.com með þeim hætti að þar séu aðilar sem aðhyllast boðskap nýnasista. Það eru sannarlega váleg tíðindi sem í því felast.

Mér finnst persónuhatrið og ógeðið sem þrífst þarna undir nafnleynd fyrir neðan allar hellur. Það er ekki hægt annað en að undrast hversvegna fólk getur fyllst hatri af þessu tagi. Það á að vera lykilmál í því samfélagi sem við lifum í að fólk beri virðingu fyrir hvoru öðru og geti lifað í sátt og samlyndi. Hatur á fólki vegna kynþáttar er það alvarlegt mál að taka verður á því með öllum þeim brögðum sem til eru.

Aðdáun á nasisma af því tagi sem þarna sést vekur líka fjöldamargar spurningar. Það segir allt sem segja þarf að enginn vill taka ábyrgð á þessu efni. Það er annars engin furða að nafnleysi sé yfir skrifunum, enda vilja þeir sem að þessum boðskap standa væntanlega ekki fara í fangelsi eða svara til saka fyrir það.

Heilt yfir finnst mér nafnlaust ógeð vera að aukast á netinu. Það er alltof mikið af fólki sem skrifar ógeðslega um aðra, allt í skjóli nafnleyndar. Skoðanir sem myndu aldrei koma fram ef nafn fylgdi með. Það gildir sannarlega um það ógeð sem grasserar á þessari fyrrnefndu vefsíðu.

Kárahnjúkavirkjun gangsett formlega

Það eru svo sannarlega tímamót fyrir austan, við Kárahnjúka, nú á þessum degi. Kárahnjúkavirkjun, ein umdeildasta og mesta framkvæmd Íslandssögunnar, er nú endanlega orðin að veruleika og hefur verið gangsett, reyndar á tveim stöðum, vegna óveðursins sem skekur landið. Ber vel vitni hversu tæknin er annars góð.

Það er ekki hægt annað en að nefna virkjunina eitt mesta pólitíska hitamál áratugarins, það stærsta ef fjölmiðlamálið er undanskilið, það varð umdeilt bæði á vettvangi stjórnmála sem og í samfélaginu. Tekist var á innan þings og í samfélaginu um málið á öllum stigum, meira að segja var deilt um Hálslón er örlög þess voru ráðin, en Ólafur Ragnar Grímsson, forseti Íslands, staðfesti framkvæmdina þótt heitið væri á hann um annað.

Það leikur enginn vafi á því að þessi framkvæmd skiptir Austfirðinga miklu máli og finna má hversu mjög framkvæmdir á öllum stigum hafa styrkt Austurland allt, ekki síður Egilsstaði og nágrenni en Fjarðabyggð, en það er ekki hægt að líkja Reyðarfirði á þessum tíma saman við það sem var fyrir nokkrum árum, svo miklar hafa breytingarnar orðið á samfélaginu þar, til hins góða.

Vil óska Austfirðingum til hamingju á þessum degi. Það þurfti mikla baráttu til að tryggja framkvæmdirnar fyrir austan, baráttu sem var sannarlega vel þess virði.

Ræs! sagði Össur

Dapurleg örlög klámstjörnu

Það er ánægjuefni að lík háskólastelpunnar, sem átti sér litríka fortíð sem klámstjörnu á netinu í fullum blóma, hafi fundist. Mér finnst samt mikill leyndarhjúpur hvíla yfir þessu máli. Ekki virðist dánarorsök liggja fyrir en þó virðast grunurinn beinast að tilteknu fólki ef marka má frétt um málið á vef CNN. Miklar sögusagnir voru í upphafi um þetta mál, eftir að lögreglan ljóstraði upp um fortíð stelpunnar og talið að það tengdist hvarfi hennar.

Skrifaði ég aðeins um þetta í gærkvöldi, það er gott að þær tilgátur sem ég hugleiddi voru ekki ástæður morðsins. En það var ekki óeðlilegt að varpa þeim upp. Í Bandaríkjunum hafa verið framin morð sem tengjast klámi og t.d. hafa raðmorð verið framin á vændiskonum og klámstjörnum, svo að ekki var óvarlegt að íhuga þann möguleika. Virðist þetta fyrst og fremst vera harmleikur án tenginga í klámheiminn á netinu sem stelpan var í.

Lykilatriði í að leysa þetta mál var að finna líkið. Þrátt fyrir að sagt hafi verið að hið tvöfalda líf sé ekki lykilþáttur málsins eru margar spurningar enn til staðar. Vonandi fæst þeim svarað.

Lík bandarískrar háskólastúdínu talið fundið

Ólafur F. snýr aftur með læknisvottorð á vasann

Það vekur mikla athygli að Ólafur F. Magnússon, verðandi forseti borgarstjórnar, sé krafinn um læknisvottorð við endurkomu sína í borgarmálin nú um mánaðarmótin. Þetta hlýtur að vekja umræðu um hvort að borgin hafi krafist vottorðsins eða meirihlutinn sjálfur, sem Ólafur F. er hluti af. Ég verð að segja eins og er að ég man ekki eftir því að þetta hafi gerst nokkru sinni áður - þau eru þá allavega mjög fá dæmin um læknisvottorð kjörinna fulltrúa ef þau eru til staðar.

Hingað til hafa kjörnir fulltrúar haft umboð kjósenda í farteskinu í verkum sínum, sótt umboð í gegnum framboðslista sína sem kjósendur hafa kosið og til þess bær yfirvöld staðfesta að kosningum loknum með formlegum hætti. Annað þarf ekki að framvísa. Það hefur oft gerst að fólk taki sér leyfi frá störfum og svo snýr það bara aftur að eigin vilja, hvort sem leyfistímanum er lokið eður ei. Ólafur F. er kjörinn aðalfulltrúi í borgarstjórn Reykjavíkur og ætti ekki að þurfa að sækja umboð til lækna um endurkomu sína. Umræðan um eðli veikinda Ólafs F. Magnússonar minnkar ekki við þetta læknisvottorð, þó það sé læknir sem framvísar vottorðinu.

Mér finnst þetta eiginlega frekar niðurlægjandi fyrir Ólaf hvernig sem á er litið og varla verður hægt að líta á veikindi hans sem eðlileg. Það hefur reyndar merkilega lítið verið rætt um þessi veikindi, miðað við að Ólafur er einn oddamanna þessa veikburða vinstrimeirihluta og hefur mikil örlög í sinni hendi sem þessi oddamaður. Það skiptir þó máli hvort hann geri það sjálfviljugur að afhenda vottorðið eða krafinn um það.

Fréttaflutningurinn finnst mér þó frekar gefa til kynna að sú krafa komi innan úr Ráðhúsinu, sé það rétt verður það óhjákvæmilega að spurningu um traust milli aðila. Hvar er þá Ólafur F. staddur? Er hann það illa á sig kominn að læknisvottorð sé ofar sett en umboð hans frá borgarbúum úr síðustu kosningum? Af hverju nægir það umboð ekki fyrir hann til að snúa aftur til verkanna sem honum voru falin í kosningum?

Ólafur F. látinn skila vottorði

Móðir án titils - karaktersigrar Nicole

Það hefur jafnan verið svo að móðirin í lífi hvers einstaklings sé það sérstök að hún verðskuldi aðeins þann titil að vera móðir. Finnst jafnan mjög sérstakt og undarlegt þegar að fólk nefnir foreldra sína skírnarnafninu og lætur staðlaða titla mömmu og pabba lönd og leið. Þekki vissulega fólk sem hefur gert þetta og finnst það reyndar mjög spes. Mér myndi t.d. aldrei detta í hug að kalla mömmu öðru nafni en því.

Þetta er eðlilegra og sennilega mun algengara í þeim tilfellum að börn séu ættleidd. Þó hef ég marga þekkt sem kalla kjörforeldra sína mömmu og pabba, eiga enga aðra foreldra í huganum og myndu aldrei nefna þau öðrum nöfnum. Fannst hún skemmtilega sérstök þessi frétt um Nicole Kidman og börnin hennar tvö, sem hún ættleiddi með Tom Cruise. Hún hefur tvisvar misst fóstur, við upphaf og endi frægs sambands við Cruise, og er fertug ekki enn búin að eignast barn sjálf. 

Þó að Nicole Kidman hafi ekki enn verið kölluð mamma í prívatlífinu og ekki eignast börn hefur hún leikið mömmu á hvíta tjaldinu, t.d. í The Others. Það er ekki hægt að segja annað en að Nicole sé ein af bestu leikkonum sinnar kynslóðar. Hún hefur verið þekkt fyrir að setja sig vel inn í karakter þeirra sem hún leikur og undirbúa sig mjög vel. Það eru að verða tveir áratugir síðan að Nicole Kidman komst á kortið sem leikkona. Það var í kvikmyndinni Dead Calm árið 1989. Hún er án nokkurs vafa ein sterkasta kvikmyndin frá Eyjaálfu í seinni tíma kvikmyndasögu, ef Piano, er undanskilin.

Hún var byggð á frægri sögu Charles Williams, sem segir frá hjónum sem verða vör við mannlausa skútu á leið sinni. Ævintýri þeirra verða mikil og að því kemur að þau verða að berjast fyrir lífi sínu í grimmri baráttu. Það voru aðeins þrír leikarar að heita má í myndinni; Kidman, Sam Neill og Billy Zane, og hún var í senn bæði spennandi og dulúðug, flott blanda. Eftir það náði hún á toppinn og fékk þau tækifæri sem allar leikkonur dreymir um að eignast. Hún lék á móti Tom Cruise árið eftir í Days of Thunder og eitt umtalaðasta ástarsamband seinni tíma kvikmyndasögu hófst.

Þau léku saman í tveim öðrum myndum næsta áratuginn; vesturfaramyndinni Far and Away og hinni erótísku Eyes Wide Shut, sem varð síðasta kvikmynd snillingsins Stanley Kubrick. Flestir töldu fjölmiðlavænt samband Tom Cruise og Nicole Kidman skothelt í gegn, enda á yfirborðinu sterkt. Það sprakk þó í loft upp með hvössum fjölmiðlayfirlýsingum árið 2001, ári eftir að þau brostu í gegnum tárin saman þegar að Tom Cruise tapaði óskarnum enn eina ferðina, þá fyrir Sir Michael Caine. Skömmu síðar missti hún barn en vann sig frá því með því að leika í kvikmyndum og lék í einum átta til tíu á mjög skömmum tíma á því tímabili.



Á þeim árum varð Nicole Kidman mun sterkari í bransanum en Tom Cruise, sem hefur sigið nokkuð, en Kidman tókst fyrir nokkrum árum að vinna óskarinn, fyrir leik sinn á Virginiu Woolf í The Hours (sjá klippu hér ofar), sem var markmið Cruise alla tíð. Hún var þó ekki þokkadísin mikla í myndinni sem færði henni eftirsóttustu kvikmyndaverðlaun heims. Kidman setti á sig stórt gervinef og var nær óþekkjanleg og með hárið litað svart, að hætti Virginiu. Rauða hárið hefur verið eitt helsta vörumerki Nicole Kidman. Það varð sennilega eftirminnilegast í kvikmyndinni Moulin Rouge, þar sem hún brilleraði í hlutverki þokkadísarinnar Satine.

Hún hefur náð að túlka sterka kvenkaraktera með bravúr og nægir þar að nefna Suzanne í To Die For, Isabel í Portrait of a Lady, Grace í The Others (sem er reyndar með allra bestu draugamyndum og fléttu í kvikmyndum seinni ára), Silviu í The Interpreter, Ada í Cold Mountain, Anna í Birth, Grace í Dogville að ógleymdri Nadiu í Birthday Girl. Nýlega fitaði hún sig talsvert fyrir túlkun sína á Hönnu í The Reader.

En þrátt fyrir alla leiksigrana hefur hún ekki enn orðið mamman með stóru M-i í einkalífinu þrátt fyrir að hafa verið mamma t.d. í The Others. Móðir án titils verður kannski það eina sem hún kynnist því hlutskipti.

Neita að kalla Kidman mömmu

Hamingjusama hóran hverfur

Það er áhugavert að lesa fréttir af hvarfi bandarísku háskólastelpunnar sem átti sér annað og dekkra líf en að lesa skólabækur og reikna stærðfræði á kvöldin, var klámstjarna í fullum blóma. Það er mikið fjallað um það vestanhafs hvað hafi orðið af henni, hvort að þessi stjörnubransi hafi jafnvel kostað hana lífið. Vont er ef satt er.

Víst er að mál hennar er varla einstakt. Það er samt sorglegt að heyra svona sögur, þó hún gerist vissulega í fjölmennu landi á borð við Bandaríkin. Hann er harður þessi bransi netklámsins og ekki komast allir lifandi í gegnum hann. Vonandi verður hægt að koma í veg fyrir að hún hafi hlotið ill örlög.

Þessi saga er kannski ekki einstök en vekur okkur öll vonandi til meðvitundar um hvað netklámsheimurinn er harður og ógnvekjandi.

Háskólastúdína lifði tvöföldu lífi

Pabbapössun í Hagkaup

Mér finnst það mjög sniðugt hjá Hagkaup að opna sælureit fyrir karlmenn sem þola ekki búðaferðir í nýjustu versluninni í Holtagörðum. Þetta er gert að erlendri fyrirmynd, hefur lukkast mjög vel þar og því varla undrunarefni að íslenskar verslanir byrji með þetta. Það eru ekki allir sem hafa farið í búð sér til skemmtunar, oft eru það karlmenn sem eiginlega verða að fylgihlut eiginkvenna sinna í slíkum ferðum og hafa ekki gaman af að versla. Þarna er væntanlega það vandamál leyst. Það verður reyndar áhugavert að sjá hvort að þetta verði í öllum verslunum Hagkaups fyrr en varir.

Þarna verður hægt að lesa dagblöðin, kíkja á boltann og annað efni. Það er eflaust réttast að kalla þetta pabbapössun, enda segir mér svo hugur að það verði helst heimilisfeður þessa lands sem verði fastagestir þarna. Margir þeirra eru eins og illa gerðir hlutir í verslunarleiðangri en losna nú við það að taka þátt í því, geta beðið verslunarferðina af sér. Þetta er mjög sniðug lausn á vanda þeirra sem fara í búð sem vandræðalegir fylgihlutir og hafa satt best að segja engan áhuga á því. Held að þetta verði nefnilega mikið notað.

Það er mjög langt síðan að svokölluð krakkahorn voru sett í verslanir þar sem börnin gátu beðið verslunarferðina af sér og samt haft gaman af því að fara, enda voru foreldrar argir yfir betlistandi barnanna og krakkarnir hundfúlir með það hversu lengi verslunarferðin stóð. Bæði foreldrar og börn sátt á eftir. Nú geta fylgihlutir verslunariðkenda farið í sælureit sinn og beðið ferðina af sér. Skynsamlegt og gott - þetta verður eflaust vinsæll reitur í verslunarferðinni fyrir fjölda fólks.

Pabbar í pössun í Hagkaupum

Dýrkeypt kvöldverðarfíaskó hjá Glitni

Þeir hljóta að hafa verið einmana þeir hundrað sem mættu í glæsikvöldverðinn hjá Glitni um daginn. Það hefur þó verið bót í máli að ekki hafa þeir þurft að kvarta yfir að fá ekki nóg af mat. Hvað ætli þessi kvöldferðarmistök hafi annars kostað Glitni. Þarna var á boðstólum besti matur sem hægt er að fá og nóg af eðalborðvínum. Þetta varð meira og minna allt afgangs. Ætli að starfsfólkið í eldhúsinu hafi fengið eitthvað að borða eftir vaktina?

Þetta er nú eitt stærsta fíaskó sem maður hefur séð lengi. Það er nú eitt það pínlegasta að bjóða til veislu og gleyma að láta fólkið sem maður vill að mæti vita um veisluhöldin. Það er fátt ömurlegra en að sitja einn og yfirgefinn yfir veisluföngum, dýrum mat og veglegum drykkjum. Dýrkeypta hafa mistökin altént verið. Þetta hlýtur að vera altént ein dýrasta matarveisla ársins á hvern matargest.

Aumingja Lárus og co í Glitni. Þeir klikka varla á svona formsatriðum héðan í frá.

100 starfsmenn Glitnis í mat fyrir 500

Bobby Fischer lagður inn á spítala

Bobby Fischer, fyrrum heimsmeistari í skák, hefur verið lagður inn á sjúkrahús í Reykjavík. Þjáist hann af nýrnaveiki en ennfremur af geðrænum vandamálum sem hafa sligað hann, ef marka má sögusagnir. Það hefur giska lítið farið fyrir Bobby þau tvö ár sem hann hefur verið íslenskur ríkisborgari og eftir að hann kom til Íslands úr japanskri fangavist.

Það hefur reyndar komið mér að óvörum hvað Bobby hefur verið lítið sýnilegur okkur landsmönnum þessi tvö ár. Þegar að hann kom hingað í kastljósi fjölmiðla og með umdeildum hætti með einkaþotu Baugs í beinni útsendingu Stöðvar 2 áttu flestir von á að hann yrði áberandi þátttakandi í samfélaginu og léti mikið á sér bera. Hvöss ummæli hans í garð bandarískra yfirvalda á leiðinni til Íslands og á blaðamannafundi eftir "heimferðina" gáfu allt tilefni til þess að fólk hér teldi að sú yrði raunin. Í stað þess hefur hann sest algjörlega í helgan stein.

Það er leitt að heyra ef Bobby á við erfiðleika að stríða, andleg og líkamleg veikindi. Hann hefur vissulega gengið í gegnum margt á sinni ævi, lifað hátt og aldrei hikað við að vera áberandi. Hann er kannski að upplifa enn einn kaflann á ævigöngunni, hver veit. Vonandi mun honum heilsast vel og hann fá bót sinna meina.

Skelfilegt slys - myndbirtingar

Það er sorglegt að heyra af enn einu umferðarslysinu á Suðurlandsvegi, þar sem vörubíll og fólksbíll rákust á. Það er öllum vel kunnugt að tvöfalda verður þessa miklu hraðbraut milli Reykjavíkur og Selfoss - vonandi verður af því mjög fljótlega. Um 60 manns hafa látið lífið í umferðinni á Suðurlandsvegi frá árinu 1972.

Það sem mér finnst jafnan einna sorglegast við fréttir af dapurlegum slysum í umferðinni er að sjá sjálfan vettvang slyssins í fjölmiðlum; myndir af bílflökum og aðrar þær sorglegu aðstæður sem þar jafnan birtast. Stingur mig að sjá enn einu sinni strax komna mynd af slysstað. Þetta gerist mjög oft t.d. hérna á fréttavef Morgunblaðsins.

Myndbirtingar af vettvangi umferðarslyss þjónar mjög litlum tilgangi, hef aldrei talið það skipta miklu máli að sýna bílflökin. Kannski er það ábending til annarra að svona geti farið í umferðinni, en fyrir þá sem tengjast hinum látnu er þetta særandi myndræn umgjörð um mikinn harmleik.

Veit ekki hvort það er einhver algild regla hjá fjölmiðlum í þessum efnum. Sumir fjölmiðlar eru þó meira áberandi í þessu en aðrir eflaust. Hef séð hjá þeim sumum að þeir birta aðeins staðsetningu slyssins á korti. Það er ágætis nálgun á það finnst mér.

Það er alltaf jafn stingandi að sjá aðstæður umferðarslysa, enda getur aðkoma að svona slysum verið virkilega sjokkerandi og vandséð hvaða erindi þær fréttamyndir eigi í fjölmiðla. Vona að fjölmiðlar fari að hætta slíkum myndbirtingum.

Umferðarslys á Suðurlandsvegi

Hver mun kaupa auglýsinguna í miðju skaupinu?

Tekin hefur verið sú nýstárlega ákvörðun að selja mínútu auglýsingapláss inni í miðju Áramótaskaupinu á gamlársdag. Yfirmenn Ríkisútvarpsins munu ekki taka boðum sem eru undir þrem milljónum króna. Aðeins mun verða um að ræða eina auglýsingu í þennan tíma og er hætt við að hörð barátta verði um þetta pláss á einum besta sjónvarpstíma ársins, en væntanlega horfa yfir 90% landsmanna á skaupið á hverju ári.

Þetta eru merkilegar fregnir. Kannski er þetta fyrst og fremst til marks um breytta tíma í Efstaleitinu í útvarpsstjóratíð Páls Magnússonar þar sem dagskrárliðir hafa verið brotnir upp með auglýsingahléum með mun meira áberandi hætti en dæmi hafa verið um. Gott dæmi eru skemmtiþættirnir Útsvar og Laugardagslögin þar sem eru gerð auglýsingahlé oftar en einu sinni í klukkustundarprógrammi. Þetta hefur verið vel þekkt hjá auglýsingastöðvum á borð við Skjá einn en hefur verið að aukast sífellt á Stöð 2 þar sem fólk kaupir sér áskrift dýrum dómum.

Persónulega leiðist mér alveg gríðarlega þegar að þættir eru brytjaðir niður með auglýsingahléi af þessu tagi. Finnst þetta allt í lagi með stöðvar sem maður þarf ekki að greiða fyrir en öllu verra, t.d. á Stöð 2 þar sem borga þarf áskrift dýrum dómum og eins eiginlega í Ríkissjónvarpinu, sem er fjarri því ókeypis stöð. Finnst þetta allavega mjög lítið spennandi. Verst er þetta þó í Næturvaktinni þar sem þátturinn er klipptur í tvennt, við litla hrifningu mína og eflaust fleiri, og plássið væntanlega selt dýrum dómum.

Það segir mér svo hugur að auglýsingaplássið í skaupinu fari á talsverðan pening. Það verður barist um þessar sextíu sekúndur með mikilli hörku. Hver ætli fái það? Veðja á að einhver bankinn fái það. Vona samt að við sjáum ekki smettið á John Cleese aftur á gamlárskvöldi núna. :)

Langar samt að spyrja þá sem lesa; hvernig líst þér á að klippa skaupið í tvennt fyrir auglýsingahlé? Það segir mér svo hugur að þetta verði ekki vinsælt - enda hafa allir vanist því að skaupið sé ein heild án auglýsinga.

Hvernig getur svona gerst?

Það er með ólíkindum að heyra af því að Tryggingastofnun ríkisins hafi greitt út allt að 200 milljónir króna samkvæmt fölsuðum reikningi frá tannlækni á Suðurnesjum. Hvernig getur svona gerst? Það er ekki hægt að spyrja öðruvísi. Ég hélt að það væri eitthvað innra eftirlit sem gæti tekið á svona fölsuðum reikningum og því að það sé ekki hægt að svindla á kerfinu með þessum hætti. Það sem vekur mesta athygli er að um er að tilfelli allt að þrjátíu ár aftur í tímann. Það væri ágætt að fá hið sanna út, þó um síðir sé, og taka á því með viðeigandi hætti.

Einn punktur fréttar Bjargar Evu vekur reyndar meiri athygli en annar, en það er að fjórtán ár séu liðin frá því að grunsemdir vöknuðu um athæfi mannsins. Það er einum of langur tími af vafa og þetta eru það stór mistök að það er ekki hægt að skilja hvernig svona sofandaháttur geti gengið endalaust. Þetta hlýtur því að vera áfellisdómur yfir innra kerfi mála af þessu tagi. Það er ekki hægt að krefjast annars en að tekið verði á vinnuferlum, svo mál af þessu tagi geti ekki komið né heldur gengið svona lengi.

Grunur um 200 milljóna króna svik

Smáís skelfir fimmtán ára icetorrent strák

Þær eru áhugaverðar sögurnar sem ganga af samskiptum Smáís og aðstandenda síðanna sem komu í kjölfar torrent. Sú sem vekur mesta athygli er af fimmtán ára stráknum sem stóð að icetorrent.is og var beygður af Snæbirni og Smáís í dag er honum og foreldrunum var hótað málshöfðun yrði síðunni ekki lokað. Honum var enda tjáð að það væri sama lögbrotið að skiptast á erlendum skrám og þeim innlendu.

Það virðist vera að fimmtán ára strákurinn og foreldrarnir hafi ekki lagt í slaginn við Snæbjörn og Smáís og frekar valið að loka síðunni. Það fylgir reyndar sögunni að foreldrarnir hafi ekkert vitað af vef sonarins og væntanlega orðið eitthvað fjölskyldudrama, enda hefði málshöfðun af þessu tagi væntanlega orðið gegn foreldrunum líka. Þetta er ekki eina dæmið um það að fólk leggi ekki í átök við Smáís og reyni að fjarlægja sig nýju síðunum sem tóku við af torrent. Fannst þessi um fimmtán ára strákinn þó þeirra áhugaverðust.


Smáís ætlar greinilega að elta uppi allar síður sem til staðar eru og leggja þær að velli. Virðist vera til í allan slaginn. Þetta mun væntanlega leiða til þess að farið verður mun frekar í neðanjarðarhernað gegn Smáís en að fólk sé það heiðarlegt að láta nafn fylgja ábyrgð á vefunum. En væntanlega mun stríðið ekkert mildast við það. Smáís virðist til í allan bardagann og ætlar ekki að láta staðar numið við sigur í nokkrum orrustum. Þetta verður langur slagur og greinilegt að þessu er ekki lokið.

Hlakka reyndar mest til að sjá næstu skref í þessum átökum - hvað þeir sem vilja halda úti þessum síðum taki næst til bragðs. Í heildina er þetta erfið barátta fyrir Smáís en það virðist vera að fáir leggi í átök við þá. Það verður reyndar áhugaverðast að sjá hvernig málið gegn Svavari, eiganda torrent.is, fari í desember. Það mun skipta máli fyrir næstu skref átakanna.

Hart barist um höfundarréttinn á torrent-síðum

Mun Ólafur F. sprengja meirihlutann í RVK?

Pólitísk endurkoma Ólafs F. Magnússonar, borgarfulltrúa, vekur sannarlega spurningar um framhald vinstrimeirihlutans í Reykjavík. Ekki er óeðlilegt að rætt sé um hvernig hann muni nota völd sín og áhrif innan meirihlutans þegar að hann snýr aftur. Ólafur F. var mjög einbeittur í meirihlutaviðræðum við Sjálfstæðisflokkinn á sínum tíma og öll teikn eru uppi um það að hann ætli að láta vel finna fyrir sér er hann snýr aftur, í þeirri oddastöðu sem hann er í.

Hávær orðrómur er um að Ólafur F. muni sprengja samstarfið þegar að honum hentar. Víst er að hans staða er mjög sterk í væntanlegum meirihluta og hann getur orðið örlagamaður af sama kalíber og Björn Ingi Hrafnsson var áður en hann lokaði sig inni í nýjum meirihluta, án möguleika á því að fara í aðrar áttir. Þeir sem þekkja Ólaf F. vita að hann er mjög ákveðinn í verkum og ekki þekktur fyrir að láta sinn hlut. Ólafur F. veit vel að honum bjóðast önnur tækifæri horfi hann til samstarfs við Sjálfstæðisflokkinn og jafnvel gæti fengið meiri völd. Það verður held ég mun meira spennandi að fylgjast með þessum meirihluta við endurkomu Ólafs F.

Eitt lykilmálanna í borgarstjórn á komandi árum er flugvöllurinn í Vatnsmýrinni. Ólafur F. fór fram í síðustu kosningum með það sem sitt lykilmál að flugvöllurinn yrði á sama stað og hefur ekki ljáð máls á neinum málamiðlunum með það. Athygli hefur vakið að Margrét Sverrisdóttir, starfandi forseti borgarstjórnar og varamaður Ólafs F, hefur talað um möguleika á því að færa hann til innan borgarmarkanna. Það er ekki stefna F-listans eins og allir þekkja sem muna kosningabaráttuna 2006 þar sem Ólafur talaði ákveðið um völlinn á sama stað óháð öðrum möguleikum, og það innan borgarmarkanna.

Ein kjaftasagan segir að Ólafur F. og Vilhjálmur hafi eitthvað plottað saman um nýjan meirihluta. Það vakti enda mikla athygli að sá sem fyrstur tilkynnti um endurkomu Ólafs í borgarstjórn var Vilhjálmur Þ. Vilhjálmsson, fyrrverandi borgarstjóri, og samstarfsmaður Ólafs í borgarmálum innan Sjálfstæðisflokksins í rúman áratug. Þeir þekkja hvorn annan mjög vel og vita um áherslur hvors annars - geta sameinast um margt. Vissulega var Ólafur F. mjög kalinn á hjarta eftir meirihlutamyndun Björns Inga og Vilhjálms, en víst er að Ólafur F. yrði mun valdameiri í tveggja framboða meirihluta en fjögurra flokka.

Áhugaverðir tímar eru framundan í borgarmálunum. Það er ekki óvarlegt að spá því að áhrifamaður nýja meirihlutans verði Ólafur F, er hann snýr aftur. Hann hefur að mörgu leyti pálmann í höndunum og á eftir að selja sig dýrt í vinstrimeirihlutanum við að tala sínu máli og hikar varla við að líta í aðrar áttir, eins og sást af orðalagi Margrétar Sverrisdóttur um endurkomu Ólafs F. í fjölmiðlum, þar sem hún getur ekkert fullyrt um afstöðu Ólafs á komandi misserum.

Gleðileg tíðindi

Í miðjum hversdagslegum átökum um hin ýmsu mál samfélagsins hljóta allir að fagna glæsilegri útkomu Íslands á lista Þróunarstofnunar Sameinuðu þjóðanna um lífskjör. Þar erum við í efsta sæti. Enda var greinilega samstaða á þingi í dag um að lýsa yfir ánægju með þessa útkomu. Það er varla annað hægt en að gleðjast yfir því sem gott telst.

Þetta er auðvitað gæðastimpill fyrir okkur. Við getum talið okkur trú um að við séum á góðri leið. Samt sem áður verða alltaf til vandamál að einhverju leyti. Það er sennilega aldrei hægt að búa til svo fullkomið samfélag að allir séu hoppandi glaðir og sælir með sitt. Enda eru alltaf vandamál að einhverju tagi í heiminum. En þetta er samt vísbending um það að við getum glaðst yfir hinu góða.

Mikið er talað um misskiptingu hins góða í samfélaginu. Það á alltaf að vera markmið okkar að vinna að því að við séum sátt með okkar og hjálpa beri þeim sem ekki eru jafn lánsamir í lífinu. En þessi skilaboð frá Sameinuðu þjóðunum eru sannarlega jákvæð og hvað svo sem okkur finnst getum við metið þetta veganesti mikils. En við verðum alltaf að halda vöku okkar og muna að við verðum aldrei fullkomin, það er alltaf verk að vinna.

Þingmenn gleðjast yfir góðum árangri

Er Dalvíkur-Dan bara gerfi-Íslandsvinur?

Mér finnst það nú svolítið háðungslegt að það sé nú komið upp að Dalvíkurvinurinn Dan Bornstein hafi aldrei komið til Dalvíkur. Vissulega er ánægjulegt að hann hafi helgað Dalvík sess á Google eins og frægt er orðið, en hinsvegar mjög pínlegt að hann hafi aldrei komið á staðinn, eins og hann fullyrti reyndar sjálfur. Það rýrir fréttina nokkuð og söguna á bakvið snöggfengna frægð Dalvíkur á veraldarvefnum.

En á þessu er samt ofureinföld lausn í sjálfu sér. Svanfríður bæjarstjóri og Júlli Júll, auk fiskidagsteymisins sem þau eru svo vel tengd í, eiga nú bara að taka sig til og bjóða Dan í heimsókn á fiskidaginn mikla í ágúst 2008 og gera eitthvað skemmtilegt móment úr þessu.

Það verður varla vandamál fyrir þá sem halda utan um málin. Það er ekki hægt annað en að bjóða honum í hina rómuðu svarfdælsku fegurð.

Dan hefur aldrei komið til Dalvíkur

Klúður bæjaryfirvalda á Akureyri í skipulagsmálum

Mér finnst orðið alltof mikið af því að fréttir berist okkur bæjarbúum hér á Akureyri af hreinu klúðri bæjaryfirvalda í skipulagsmálum. Bæjaryfirvöld eru rekin til baka æ ofan í æ með ákvarðanir sínar af úrskurðarnefnd skipulags- og byggingamála. Mér finnst kominn tími til að við íbúar hér fáum að vita hvað sé að gerast hjá þeim sem stjórna þessum málum í Ráðhúsinu. Er sofandahátturinn algjör?

Öll ættum við að muna fregnirnar af málinu í Sómatúni. Þar reyndar breytti bærinn um reglur í miðju máli og ætlaði bara að halda fast við sitt, var hinsvegar rekinn til baka af úrskurðarnefndinni. Bæjaryfirvöld gengu fram af hörku og hreinum dónaskap við eiganda Síðubúðarinnar og ætluðu að láta rífa húsið án þess að hann fengi nokkuð í staðinn. Eins og flestir vita tapaði bærinn því máli fyrir dómstólum. Þetta eru alvarleg mál að mínu mati, mál þar sem vafi leikur á hvort hinir kjörnu fulltrúar okkar sem eru á vaktinni í skipulagsmálum séu hreinlega vakandi.

Mér finnst úrskurðurinn nú varðandi Glerártorg stóralvarlegt mál, í einu orði sagt. Þetta kemur það fljótt á eftir hinum málunum að við hljótum að spyrja hvað sé að gerast hjá þeim sem stjórna för. Eins og flestir vita krafðist Akureyrarbær eignarnáms hjá Svefni og heilsu vegna lóðarréttinda á byggingasvæðinu sem um ræðir. Nýjasti úrskurðurinn er einfaldur en þar segir að Svefn og heilsa eigi enn óbein eignarréttindi á lóðinni umdeildu. Það verður fróðlegt hvernig bæjaryfirvöld leysa úr þessum hnút. Væntanlega þarf bærinn að punga út hið minnsta 300 milljónum fyrir reitinn.

Þessi mál vekja umræðu um það hvar við stöndum. Það er ekki viðeigandi að tala um tilviljanir, þetta eru mál sem eru of stór og áberandi til að þau verði þögguð niður. Það er engin furða þó að hávær sé umræðan í bænum um það hversu traustar lagalegar ráðleggingar Akureyrarbær nýtur.

Byggingarleyfi fellt úr gildi á Akureyri

Undarleg minnimáttarkennd femínista í garð Egils

Mér finnst nú frekar hlægileg þessi minnimáttarkennd femínista í garð Egils Helgasonar, sem fram kemur í fréttinni í 24stundum í morgun. Séu femínistar ekki sáttir við umfjöllun um jafnréttismál hjá Agli ættu þær/þeir að mæta og tala hreint út um það á þeim vettvangi þegar að þeim er jú boðið að mæta. Veit ekki betur en að Egill hafi verið með öflugar konur í þættinum það sem af er þessum fyrsta vetri hjá Ríkissjónvarpinu - meðal annars löng og góð viðtöl við Svandísi Svavarsdóttur og Ingibjörgu Sólrúnu.

Það eru vissulega valdamiklar konur í samfélaginu sem hafa mætt til Egils, enda eru víða áhrifakonur í stjórnmálum, konur með völd og sem skipta máli - þær hafa komið til Egils í viðtöl. Enda eðlilegt að þeim sé boðið, því þær skipta máli í stjórnmálaumræðunni. Þær hafa jafnan talað tæpitungulaust og verið beinskeyttar, hef ekki orðið var við annað. Egill á vissulega við það vandamál að stríða að færri konur eru alþingismenn og ráðherrar en karlar. Það er vel þekkt staðreynd að konum fækkaði á þingi bæði í kosningunum 2003 og 2007. En hinsvegar hefur mér fundist Egill vera nokkuð heiðarlegur í sinni umfjöllun. Get ekki séð neina gríðarlega kynjaslagsíðu.

Egill hefur vissulega sínar skoðanir á málum og tjáir þær óhikað, meðal annars á jafnréttismálum. Hann er ekkert einn um það og hlýtur að mega tala hreint út hvað þau varðar. Hvað varðar þessa frétt er hún svolítið spes. Sú kjaftasaga gengur annars að Sóley Tómasdóttir hafi sent út fjöldapóst á konur þar sem þær eru hvattar að mæta ekki til Egils. Hvert erum við komin ef það er staðan að konurnar sem gagnrýna Egil þiggja ekki gestaboð til hans? Af hverju þiggja þær ekki að tala hreint út þegar að þær fá boð? Er það ekki svolítið ankanalegt? Annars sýnist mér þetta vera aðallega vinstri græn femínistaslagsíða sem er að tala gegn Agli.

Annars er ekkert nýtt að Sóley og Egill skiptist á kuldalegum kommentum og viðbúið að þau yrðu enn harkalegri. Fyrir nokkrum dögum sá ég frétt þar sem stjórnmálakona í Venezuela réðst inn í prógramm þekkts sjónvarpsstjórnanda og tók hann engum vettlingatökum - braut gleraugun hans og öskraði ókvæðisorð að honum. Ég vona að Sóley fari ekki að leika þetta eftir og komi öskrandi inn í settið í næsta þætti. Er annars ekki öryggiskerfið í Efstaleitinu rock solid eftir að geðveili kallinn tók rafmagnið og vararafkerfið úr sambandi þar um árið?

Konur sniðganga Silfrið í mótmælaskyni