Afmæli

Jæja, ég á víst afmæli í dag. Ætla að vona að 29 sé ekki ógæfutala í mínu lífi. Held í vonina svo lengi sem mögulegt er allavega. :) Annars, árin líða orðið helst til of hratt að mínu mati, eflaust erum við fleiri sammála um þetta. En svona er víst lífsins gangur bara. Að ári þarf ég að huga að almennilegri afmælisveislu, enda mun ég þá fylla tug. En að því síðar. 

Það eru margir sem hafa sent mér kveðjur með ýmsu móti í dag. Gott að vita til þess að ættingjar, vinir og kunningjar á kafi í jólastressinu hafi munað eftir manni. Það verður seint sagt að ég hafi valið þennan afmælisdag sjálfur, en það er skemmtileg nostalgía við að halda upp á afmæli á þessum tíma, rétt áður en menn minnast Jesú Krists Jósefssonar.

Ég vil þakka allavega öllum þeim sem mundu eftir deginum og komu til skila góðum heillaóskum og kveðjum - eru sannir vinir. Annars er aldrei nægilega hægt að þakka fyrir eða meta til fulls að ég tel sanna og góða vináttu. Það var notalegt að finna fyrir hlýjum kveðjum og því að svo margir skyldu muna eftir deginum. Kærar þakkir!

Sterk fjölmiðlaframkoma

Það er ekki hægt að meta viðtalið á Stöð 2 við konuna sem segist hafa átt í ástarsambandi við Guðmund Jónsson öðruvísi en sem sterka fjölmiðlaframkomu. Þar var talað hispurslaust og án alls hiks. Það er alveg ljóst að sé allt sem kom fram í þessu viðtali satt, sem flest virðist óneitanlega benda til, er Guðmundur í mjög vondum málum og þá allt staðfest sem kom fram í hinum umdeilda Kompásþætti á Stöð 2 fyrir tæpri viku. Það er ljóst að þessi kona talar með öruggum hætti og segist hafa óyggjandi gögn til stuðnings málflutningi sínum.

Það er að ég tel alveg ljóst að enginn myndi þora að koma fram í svona viðtal og leggja í svona nokkuð nema vera með nokkuð öruggt og traust bakland, hafa sannleikann nokkurnveginn örugglega sín megin. Eiginlega verður sjálfsagt sláandi að sjá hvað tekur við eftir þetta viðtal. Þessi kona segist hafa fullan síma af SMS-skilaboðum, myndefni og fullt af tölvupóstum í tölvu sinni. Eitt sem vakti meiri athygli en annað er að konan segist ætla að kæra Guðmund fyrir fjársvik. Það var athyglisvert sem vikið var að í þeim efnum og óneitanlega stóralvarlegt mál.

Það er alveg ljóst að segi þessi kona satt frá málum hefur Guðmundur Jónsson varla sagt eitt satt orð í Kastljósviðtali á þriðjudagskvöldið. Það er alvarlegt mál. Það sem er auðvitað alvarlegast ef allt er satt sem fram kom í Íslandi í dag í kvöld um þetta tveggja ára langa ástarsamband er að forstöðumaður meðferðarstofnunar hafi átt í ástarsambandi við skjólstæðing sinn og misnotað það traust sem til staðar var með ýmsum hætti. Það er alvarlegt mál og greinilegt að enn á margt eftir að koma fram í öllum þessum málum. Ef marka má fréttir Stöðvar 2 stefnir allt í að fleiri konur komi fram.

Það er ekki hægt annað en að dást að hugrekki þessarar konu að koma fram fyrir alþjóð og rjúfa þögnina um meginhluta málsins, sem margir höfðu skoðun á en hristi upp í þjóðinni svo um munaði. Það sem mér finnst mest sláandi er hvernig Guðmundur hefur notað trúna til að ná yfirtökum á þessari konu og trúarlegt tal sem er auðvitað mjög skelfilegt. Það er allavega ljóst að varla getur Byrgið starfað lengur með óbreyttum hætti sé allt sem kom þarna fram í sjónvarpsviðtalinu hið sanna í málinu.

Segist hafa átt í sambandi við Guðmund Jónsson í Byrginu

Yndislegar jólamyndir

Um jólin er svo sannarlega viðeigandi að horfa á góðar úrvalsmyndir og sérstaklega við hæfi að horfa á góðar myndir sem fjalla um boðskap jólanna og eða bara létta og kæta hugarþelið. Nokkrar þeirra standa upp úr í mínum huga og hafa alla tíð gert. Fjalla ég um þær nú.


Kvikmynd Frank Capra, It's a Wonderful Life er ein þekktasta fjölskyldumynd 20. aldarinnar, gleðigjafi fyrir alla heimsbyggðina allt frá frumsýningardegi. Sextug eðalmynd sem kemur manni ávallt í sannkallað jólaskap. Hér segir frá George Bailey sem eyðir ævi sinni í að fórna lífsdraumum sínum til að vinna í haginn fyrir bæinn sinn, Bedford Falls, og að lokum sér tækifæri sín renna í súginn. Myndin gerist á aðfangadag og horfir hann yfir ævi sína, komið er að tímamótum, hann er niðurbrotinn maður og til alls líklegur þegar jólahátíðin gengur í garð.

Hann er orðinn þreyttur á því hvaða stefnu líf hans hefur tekið og gæti gripið til örþrifaráða. Til bjargar kemur verndarengill hans, Clarence, til að reyna að sýna honum fram að án hans hefði bærinn aldrei verið samur og að hann á marga að, fjölskyldu og fjölda vina. Hann sýnir honum lífið eins og það hefði verið ef hann hefði aldrei komið til og vonast til að með því verði hægt að snúa hlutunum við. James Stewart á stórleik í hlutverki George, að mínu mati er þetta ein af bestu leikframmistöðum hans á glæsilegum ferli. Ennfremur fara Donna Reed, Lionel Barrymore, Thomas Mitchell, Beulah Bondi, Henry Travers og Ward Bond á kostum.

Myndin var tilnefnd til fimm óskarsverðlauna, þ.á m. sem mynd ársins, fyrir leikstjórn og leik Stewart. Ómótstæðilegt meistaraverk, sem á jafnt við árið 2006 og 1946, fyrir sex áratugum er hún var frumsýnd. Sígildur boðskapurinn á alltaf við. Fastur partur á jólunum - ómissandi þáttur heilagra jóla að mínu mati.


Ein besta jólamynd allra tíma er hin sígilda kvikmynd George Seaton, Miracle on 34th Street. Segir frá því er gamall maður að nafni Kris Kringle, fer að vinna sem jólasveinn í stórmarkaði. Segist hann vera hinn eini sanni jólasveinn. Er hann þarmeð talinn galinn og hann verður að sanna hver hann er fyrir dómstólum. Einstaklega hugljúf mynd sem skartar Edmund Gwenn, Natalie Wood, Maureen O'Hara og Thelmu Ritter í aðalhlutverkum.

Gwenn hlaut óskarinn 1947 fyrir magnaðan leik sinn í hlutverki hins hugljúfa manns. Þessi kemur alltaf í gott jólaskap, skylduáhorf að mínu mati á jólum. Myndin var endurgerð árið 1994. Þar voru Sir Richard Attenborough, Mara Wilson, Dylan McDermott og Elizabeth Perkins í aðalhlutverkum. Tókst vel upp, en stenst hinni eldri ekki snúning. Hún er alveg einstök.


Ein af bestu jólamyndum seinni tíma er hin óviðjafnanlega breska gamanmynd Love Actually. Hún hefur verið mér mjög kær allt frá því að ég sá hana fyrst í bíói fyrir þrem árum. Þetta er í senn bæði ljúf og sykursæt mynd. Í aðalhlutverki eru Hugh Grant, Liam Neeson, Emma Thompson, Alan Rickman, Keira Knightley og Rowan Atkinson. Semsagt topplið breskra leikara. Þessi góða ástarsaga fjallar um átta mjög ólík pör í London rétt fyrir jól, sem glíma við ýmis vandamál í ástarlífinu.

Ástin er þemað í myndinni. Saga þessa ólíka fólks spinnst mjög skemmtilega saman í lok hennar. Mögnuð mynd sem ég mæli eindregið með. Er algjörlega fullkomin. Punkurinn yfir i-ið er flottur flutningur Billy Mack (í glæsilegri túlkun Bill Nighy) á laginu Christmas is all around (áður Love is all around með Wet, Wet, Wet). Þessi er alveg ómissandi yfir jólin seinni árin - verður svo væntanlega um ókomin ár!


Jólin verða ekki fullkomnuð fyrr en horft hefur verið á hinar ómótstæðilegu Home Alone I og II. Frábærar jólamyndir. Kevin McAllister er fyrir hin mestu mistök skilinn eftir einn heima á meðan að fjölskyldan er á leið í jólaleyfi til Parísar. Á meðan reyna tveir misheppnaðir þjófar sig að gera sig heimakomna heima hjá Kevin og stela þar öllu steini léttara. Kevin grípur til varna og reynir allt sem hann getur til að bjarga heimili sínu frá þjófunum. Sprenghlægileg og flott. Myndin sem gerði Macaulay Culkin að stjörnu. Joe Pesci og Daniel Stern eiga stórleik sem þjófarnir.

Í Home Alone gerist hið sama að fjölskyldan gleymir Kevin, en í þetta skiptið verður hún viðskila við hann í flugstöðinni þar sem þau eru á leið til Hawaii í jólaleyfi. Kevin tekur vitlausa vél og endar í New York, borg háhýsanna. Hann tékkar sig þar inn á Plaza, með öllum þeim mögnuðu tækifærum sem því fylgir. Á leið um borgina hittir hann þjófana sem reyndu allt sem þeir gátu til að ræna heimilið hans, en þeir eru þá sloppnir úr fangelsi. Þeir eiga harma að hefna gegn Kevin, sem ver sig með kjafti og klóm. Frábær kvikmynd. Culkin, Pesci og Stern í toppformi en senuþjófurinn er óskarsverðlaunaleikkonan Brenda Fricker í hlutverki hinnar kærleiksríku dúfnakonu. Báðar ómissandi um jólin.


Fastur hluti jólanna er svo auðvitað að sjá National Lampoon´s Christmas Vacation. Chevy Chase leikur fullkomnunarsinnann Clark Griswold enn eina ferðina. Að þessu sinni ætlar hann að gera fullkomnustu jól fjölskyldunnar fyrr og síðar að veruleika. Hann telur sig eiga von á hnausþykkum jólabónus sem kengur er í og leggur allt sitt í að skreyta húsið og gera allt sem best er nokkur möguleiki er að tryggja. Allt fer hinsvegar úrskeiðis sem getur mögulega gert það. Hápunkti nær það þegar að bróðir Clarks mætir með fjölskylduna og þá fyrst fer sælan að fara í vaskinn.

Þessi mynd er pottþétt. Gott dæmi um að plana ekki of mikið jólin að hætti fullkomnunar, heldur njóta þess sem maður á og gera gott úr lífinu. En þessi verður aldrei léleg. Sérstaklega fannst mér hún frábær þegar að ég dró hana fram nú skömmu eftir helgina. Fór endanlega í ekta gott jólaskap. Það ættu allir að geta hlegið frá sér allt vit og forpokaða skammdegisfýlu yfir þessari mögnuðu mynd.


Fleiri myndir mætti nefna t.d. Elf, Meet me in St. Louis (þar sem Judy Garland söng allra fyrst hið ódauðlega Have Yourself a Merry Little Christmas),  Die Hard I og II (sem báðar gerast á jólahátíð), Scrooge, A Christmas Story, How the Grinch Stole Christmas (1966-útgáfan), A Charlie Brown Christmas, A Christmas Carol, The Santa Clause, Frosty the Snowman, Surviving Christmas, The Shop Around the Corner (jamm vissulega ekki jólamynd en jólaandinn í lok myndarinnar er óviðjafnanlegur), The Ref, White Christmas, The Nightmare Before Christmas og Family Man.

Ef þið eigið uppáhaldsjólamynd, endilega kommenta þá hér með þær.

Vonandi eigið þið annars góð bíójól og horfið á góðar myndir um jólin heima og í kvikmyndahúsum. Það er nóg af góðum myndum um jólin í bíó. Meðal þess sem verður sýnt er auðvitað íslenska kvikmyndin Köld slóð. Hana ætla ég svo sannarlega að sjá. Nóg af úrvalsefni er allavega í boði í kvikmyndahúsunum. Gott úrval kvikmynda og þátta verður svo í sjónvarpi yfir jólin.

Sigurstranglegir framboðslistar í Reykjavík

Framboðslistar Sjálfstæðisflokksins í Reykjavíkurkjördæmunum tveim fyrir komandi þingkosningar voru samþykktur á fundi fulltrúaráðs Sjálfstæðisflokksins í Valhöll síðdegis í dag. Ekki er hægt að segja annað en að listarnir séu mjög sigurstranglegir og vel saman settir af kjörnefnd eftir prófkjörið í október. Efstu sex sæti beggja listanna eru í samræmi við prófkjörsúrslitin.

Geir H. Haarde, forsætisráðherra og formaður Sjálfstæðisflokksins, og Guðlaugur Þór Þórðarson, alþingismaður, leiða listana. Geir, sem er fyrsti þingmaður Reykjavíkurkjördæmis suður, mun leiða listann áfram í suðurhlutanum og Guðlaugur Þór leiðir listann í norðurhlutanum en þar leiddi Davíð Oddsson, fyrrum forsætisráðherra og formaður Sjálfstæðisflokksins, framboðslistann í alþingiskosningunum 2003.

Sjöunda sætið í Reykjavík suður skipar Erla Ósk Ásgeirsdóttir, formaður Heimdallar, og sjöunda sætið í Reykjavík norður skipar Auður Guðmundsdóttir, markaðsstjóri og MBA. Heiðurssæti framboðslistanna skipa Sólveig Pétursdóttir, forseti Alþingis, og Guðmundur Hallvarðsson, alþingismaður, sem setið hafa bæði á Alþingi frá árinu 1991 en gefa ekki kost á sér endurkjörs á Alþingi nú. Kjartan Gunnarsson, fyrrum framkvæmdastjóri Sjálfstæðisflokksins, skipar svo 21. sætið í Reykjavík suður.

Framboðslistar Sjálfstæðisflokksins í Reykjavík

Framboðslistar Sjálfstæðisflokks í Reykjavík samþykktir

Ný hlið á umræðunni um Guðmund og Byrgið

Umræða um málefni Byrgisins virðist vera að taka nýja stefnu. Í kvöldfréttum Stöðvar fyrir stundu var viðtal við 24 ára gamla konu sem segist hafa átt í tveggja ára kynferðislegu ástarsambandi við Guðmund Jónsson, forstöðumann Byrgisins, á meðan að hún var þar í meðferð. Segist hún ætla að höfða mál gegn Guðmundi.

Kemur þetta viðtal í kjölfar umfjöllunar Stöðvar 2 í Kompási um Guðmund og starfshætti hans í Byrginu. Sá þáttur var vægast sagt umdeildur. Eftir þáttinn hafa gengið ávirðingar milli Guðmundar og fréttastofu Stöðvar 2 og er þetta mál orðið ótrúlega flókið og undarlegt.

Mun verða ítarlegt viðtal við þessa konu í Íslandi í dag á næstu mínútum.

Engin hlerun á símum Jóns Baldvins

Ríkissaksóknari hefur ákveðið að rannsókn verði ekki fram haldið í hlerunarmálinu sem kennt er við Jón Baldvin Hannibalsson, fyrrum utanríkisráðherra og sendiherra. Að mati hans þykja fyrirliggjandi rannsóknargögn að svo stöddu ekki gefa tilefni til þess að haldið verði áfram þeirri rannsókn sem til var stofnað þann 16. október sl. er umræða hófst um hleranir á skrifborðssímum Jóns Baldvins og Árna Páls Árnasonar, þingframbjóðanda Samfylkingarinnar, sem vann í utanríkisráðuneytinu í ráðherratíð Jóns Baldvins.

Með öðrum orðum; það er mat ríkissaksóknara byggt á gögnunum að símarnir hafi ekki verið hleraðir og það segir á einum stað að ekkert hafi fundist sem styðji þau ummæli. Þetta eru vissulega merkileg tíðindi og virðast boða endalok rúmlega tveggja mánaða gamals máls sem hófst með yfirlýsingum Jóns Baldvins sjálfs í viðtali í morgunþætti Jóhanns Haukssonar á Útvarpi Sögu þann 10. október sl. Það voru vissulega mikil tíðindi og settu mark á þjóðmálaumræðuna um nokkuð skeið. Jón Baldvin var utanríkisráðherra á árunum 1988-1995 og sagðist hafa komist að því á árinu 1992 eða 1993 að sími sinn hefði verið hleraður með ábendingum þar um - maður sem hann fékk til að kanna símana hefði sagt þá hleraða.

Í kjölfar ummæla Jóns Baldvins og Árna Páls, sem kom fram með sína sögu í þættinum Silfri Egils þann 15. október sl. ákvað ríkissaksóknari formlega rannsókn á málinu og skipaði Ólaf Hauksson, sýslumann á Akranesi, til verksins. Jón Baldvin fór á þessum tíma í mörg viðtöl og fór yfir sína hlið málsins og sama gerði Árni Páll. Er leið að lokum nóvembermánaðar þótti merkja á blaðaskrifum Jóns Baldvins að hann væri að draga í land í málinu og hopa af velli hægt og rólega. Niðurstaða ríkissaksóknara er þrátt fyrir það merkileg og segir margt um stöðu mála. Greinilega hefur ekkert handbært eða öruggt fundist um málið eða málatilbúnað tvímenninganna.

Í kjölfar allrar þessarar hlerunarumræðu á árinu verður væntanlega kærkomið að leggjast yfir bókina Óvinir ríkisins eftir Guðna Th. Jóhannesson, sagnfræðing. Þá bók hlakkar mér svo sannarlega til að lesa og það mun ég gera um jólahátíðina.

Rannsókn á meintum hlerunum ekki haldið áfram

Framboðslistar í Reykjavík brátt tilkynntir

Tillaga kjörnefndar Sjálfstæðisflokksins í Reykjavík að framboðslistum flokksins í Reykjavíkurkjördæmunum tveimur verður borin undir atkvæði flokksmanna í kjördæmisráðinu á fundi í Valhöll innan stundar. Það verður vissulega mjög athyglisvert að sjá framboðslistana í borginni og skipan listanna utan efstu sex sætanna á báðum framboðslistum, sem ákveðin var í prófkjöri þann 27. og 28. október sl.

Geir H. Haarde, forsætisráðherra og formaður Sjálfstæðisflokksins, og Guðlaugur Þór Þórðarson, alþingismaður og fyrrum borgarfulltrúi, munu leiða listana og næstu sætin munu þau Björn Bjarnason, dómsmálaráðherra, og Guðfinna S. Bjarnadóttir, fráfarandi rektor Háskólans í Reykjavík, skipa. Helst verður væntanlega horft til hverjir skipi sjöunda sætið á báðum listum, en nokkuð víst má telja að Dögg Pálsdóttir og Grazyna M. Okuniewska skipi sjötta sæti listanna, en þær urðu í ellefta og tólfta sætinu í prófkjöri.

Eftir formlega ákvörðun um framboðslista Sjálfstæðisflokksins í Reykjavíkurkjördæmunum munu liggja formlega fyrir framboðslistar í fjórum af sex kjördæmum af hálfu flokksins. Framboðslistar í Suður- og Norðausturkjördæmi verða ákveðnir væntanlega á kjördæmisþingum í janúarmánuði.

Jólaafmæli

Ég er einn þeirra fjöldamörgu Íslendinga (við erum mörg, er viss um það :) sem á afmæli í aðdraganda jólahátíðarinnar. Lengst af hefur mér mislíkað þetta mjög, enda verður þetta seint talinn hinn fullkomni tími afmælishalds. Það hefur enda verið svo að ég hef lítið sem ekkert haldið upp á afmælið nú í seinni tíð, ef frá er talið öflugt og gott tvítugsafmæli fyrir tæplega áratug og 25 ára afmælið fyrir nokkrum árum.

Hinsvegar hef ég oft verið með rólegheitaafmælishald heima nær alltaf fyrir vini og nánustu ættingja, en það er svosem ekkert stórt afmælishald. Ég hef ákveðið að halda vel upp á þetta að ári, en þá verður um merkisafmæli að ræða. Ein af vinsælustu spurningunum sem ég hef fengið í áranna rás er hvort ég hafi fengið afmælis- og jólagjöf saman. Góð spurning. Svarið er oft ansi augljóst, en það hefur allavega ekki gert mig ríkan, nema þá kannski andlega, að eiga afmæli á þessum tíma.

Að sumu leyti er afmæli á þessum tíma notalegt. Ég hef lært að sleppa jólastressinu á þessum tíma og klára jólaundirbúninginn tiltölulega snemma og njóta þessa tíma eins mikið og mögulega hægt er. Þetta á að vera notalegur og góður tími. Við eigum enda að meta boðskap jólanna og hugsa vel um hann; ekki að drekkja okkur sjálfum í stressi og ergju þess sem fylgir því að vera fastur í búðum fram til hádegis á aðfangadaginn.

Björn Bjarnason vildi leika á móti Penelope Cruz

Björn Bjarnason, dómsmálaráðherra, er mikill kvikmyndaunnandi eins og vel hefur sést t.d. á vef hans, þar sem hann hefur skrifað nokkuð um kvikmyndir og fjallaði þar t.d. nýlega yfir nýjustu James Bond-kvikmyndina, Casino Royale, og The Departed, nýjustu kvikmynd Martin Scorsese, sem mikið er orðuð við Óskarinn, sem afhentur verður í febrúar. Í Fréttablaðinu í dag er Björn mikið spurður út í kvikmyndir og aðdáun sína á þeim í spurningadálknum um kvikmyndir þar sem fjöldi kvikmyndaáhugamanna hefur verið spurður áður.

Þar segist Björn aðspurður helst myndu vilja leika á móti spænsku leikkonunni Penelope Cruz ef hann mætti velja sér kvikmynd til að leika í, söguþráðinn, leikstjórann og leikara með sér. Nefnir hann Cruz og Baltasar Kormák og myndin yrði spennumynd með sagnfræðilegu ívafi. Við Björn erum mjög sammála um kvikmyndir þykir mér heilt yfir. Hann nefnir Marlon Brando, sem mestu kvikmyndastjörnuna í kvikmyndasögunni og telur dr. Hannibal Lecter mesta skúrkinn. Hefur þetta lengi verið mitt mat líka.

Björn segir að þýska úrvalsmyndin Der Untergang hafi haft mest áhrif á hann í bíó og hann telur Pál í Englum alheimsins uppáhalds íslensku kvikmyndapersónuna. Hann telur Marge Gunderson (í túlkun Frances McDormand) mestu hetjuna á hvíta tjaldinu og minnist á að versta mynd sem hann hafi séð hafi verið mynd með Steven Seagal. Þar er ég svo sannarlega sammála honum. Mér finnst þetta skemmtilegur spurningaflokkur hjá Fréttablaðinu.

Kvikmyndaáhugamenn eru margir og mjög ólíkir og fínt að skyggnast svona inn í kvikmyndapælingar þeirra. Ég verð þó að viðurkenna að ég taldi að John McClane í ógleymanlegri túlkun Bruce Willis í Die Hard-seríunni væri mesta hetja hvíta tjaldsins að hans mati og kom valið því á Marge skemmtilega á óvart. En gaman af þessu.

Túrkmenabashi bráðkvaddur

Í yfir tvo áratugi stjórnaði Saparamurat Niyazov, forseti Túrkmenistans, ríki sínu með harðri hendi og var að fyrirskipan stjórnar sinnar ígildi Guðs þar. Einu gat þó einræðisherrann, sem nefndur var Túrkmenabashi hinn mikli, ekki ráðið frekar en aðrir; dauðanum. Hann varð bráðkvaddur í nótt, 66 ára að aldri, er hann lést úr hjartaáfalli. Skv. tilkynningu nú í morgun verður hann jarðsunginn á aðfangadag. 

Niyazov hefur ríkt í Túrkmenistan frá árinu 1985, á meðan það tilheyrði enn gömlu Sovétríkjunum. Hann hefur ríkt þar sem einræðisherra frá falli kommúnismans í upphafi tíunda áratugarins. Persónudýrkun hans í nafni kommúnismans varð svo yfirþyrmandi að hann var nefndur faðir allra Turkmena og var landið allt veggfóðrað af myndum af honum og hann var dýrkaður sem trúarleg fígúra væri.

Segja má að persónuleg dýrkun á einum dauðlegum manni hafi sjaldan verið meiri en einmitt í Túrkmenistan valdatíðar Túrkmenabasha. Það verður fróðlegt að sjá hver tekur við völdunum í svona kúguðu einræðisríki kommúnisma við þessar aðstæður sem nú eru.

Forseti Túrkmenistans látinn 66 ára að aldri

Arnaldur og Ragna með vinsælustu bækurnar

Það stefnir flest í að Konungsbók, eftir Arnald Indriðason, verði metsölubókin í flokki skáldsagna þessi jólin. Kemur það svo sannarlega ekki að óvörum, enda hefur Arnaldur slegið öll met síðustu árin og á söluhæstu bækurnar síðustu ár; Kleifarvatn og Vetrarborgina. Var Konungsbók prentuð í 15.000 eintökum, en það er mesta upplag einnar íslenskrar skáldsögu til þessa í sögu íslenskra bókmennta í fyrsta holli prentunar. Þarna eru þó Erlendur, Elínborg og Sigurður Óli víðsfjarri, heldur er farið á önnur mið í spennunni.

Þetta er tíunda skáldsaga Arnaldar. Sagan gerist að mestu í Kaupmannahöfn árið 1955 og tengist leyndarmáli sem snertir helsta dýrgrip Íslands, Konungsbók Eddukvæða. Aðalsöguhetjan er ungur íslenskufræðingur, Valdemar að nafni. Valdemar heldur til náms í Danmörku, kynnist þar gömlum prófessor og um leið skelfilegu leyndarmáli sem leiðir þá félaga í mikla háskaför um Evrópu, inn í skjalasöfn, grafhýsi, fornbókasölur og á fleiri hættustaði. Þetta er mögnuð og spennandi saga, en með nýjum undirtón af hálfu Arnaldar. Ég las Konungsbók fyrir nokkrum vikum og varð mjög hrifinn af henni. Þetta er góð bók, ný hlið á Arnaldi, ef svo má segja og spennandi saga sem ég hafði gaman af.

Það er alveg ljóst svo að vinsælasta ævisagan þessi jólin verði Ljósið í djúpinu, ævisaga Rögnu Aðalsteinsdóttur frá Laugabóli. Ragna hefur merka sögu að segja, en hún hefur misst mikið gegnum árin og gengið í gegnum mörg lífsins áföll. Það er alveg ljóst að ég stefni að því að lesa ævisögu hennar og ég tel að allir sjái lífið öðrum augum eftir að hafa kynnt sér lífsreynslusögu Rögnu.

Bóksölulistinn: Arnaldur og Hagkaup á toppnum

Syrtir í álinn fyrir Bush - líður að leiðarlokum

Seinna kjörtímabil George W. Bush á forsetastóli í Bandaríkjunum er senn hálfnað. Það verður seint sagt að það blási byrlega fyrir forsetann á þessum tímapunkti. Repúblikanar misstu völd í báðum þingdeildum í kosningum í nóvember og í kjölfar þeirra hrökklaðist Donald Rumsfeld, einn umdeildasti ráðherra Bandaríkjastjórnar síðustu áratugina, af ráðherrastóli í Pentagon, eftir að hafa ríkt þar í tæp sex ár. Óvinsældir forsetans eru miklar í könnunum og tekist er harkalega á um stefnu stjórnar hans í Íraksmálinu.

Í dag hélt Bush forseti síðasta blaðamannafund sinn í Hvíta húsinu á þessu ári. Eftir hálfan mánuð munu demókratar taka við völdum í þinginu og þá verða leiðtogar flokksins, Nancy Pelosi og Harry Reid, þingleiðtogar og mun Pelosi verða fyrsta konan sem forseti fulltrúadeildarinnar og jafnframt verða þá valdamesta konan í sögu Bandaríkjanna og önnur í valdaröðinni, á eftir Dick Cheney, varaforseta. Á blaðamannafundinum var auðvitað spurt út í yfirvofandi valdasambúð repúblikana og demókrata næstu tvö árin og stöðuna í Írak. Hvort tveggja er viðkvæmt umræðuefni fyrir forsetann skiljanlega.

Val forsetans á Robert Gates sem nýjum húsbónda í Pentagon bætir fyrir milli repúblikana og demókrata, enda hefði verið mjög hart á milli aðila með Rumsfeld áfram á sínum stað. Uppstokkun í Pentagon var nauðsynleg í þessari stöðu. Það var enda mjög áberandi að enginn þingmaður demókrata greiddi atkvæði gegn Gates, en tveir repúblikanaþingmenn greiddu atkvæði gegn honum og voru ekki par hrifnir með að hann tæki við völdum í Pentagon. Gates hefur þótt fara vel af stað, hann þykir vera mildari málsvari í varnarmálum og hefur t.d. náð breiðum stuðningi með því að fara bil beggja í mestu hitamálunum sem nú geisa. Talið er að hann muni njóta fylgis í embætti langt út fyrir raðir repúblikana, einkum vegna þess.

Það sem brátt verður mál málanna vestanhafs í stjórnmálaumræðu eru forsetakosningarnar eftir tæp tvö ár. Aðeins eru þrettán mánuðir þar til að forkosningar flokkanna hefjast í fylkjunum og valferlið hefst með formlegum hætti. Búast má þó við að flest forsetaefnin fari að lýsa yfir framboði sínu eftir jólin. Talið er að John McCain og Rudolph Giuliani muni tilkynna um forsetaframboð sín í janúar og öruggt má telja að Hillary Rodham Clinton fari af stað snemma á nýju ári. Mikið er rætt um hvað þeldökki þingmaðurinn Barack Obama muni gera, en það má telja öruggt að hann fari ekki af stað nema vita hug Hillary í þessum efnum. John Edwards mun vera nær öruggur um að fara í framboð og margir bíða eftir því hvað Al Gore gerir.

George W. Bush mun sitja á forsetastóli til 20. janúar 2009. Það er enn langur tími til stefnu þar til hann heldur alfarinn til Crawford í náðuga daga ellilífeyris en vald og áhrif sitjandi forseta sem getur ekki farið fram aftur fer jafnan hægt og rólega minnkandi eftir miðtímabilskosningar. Þær eru nýafstaðnar. Valdamissir repúblikana var áfall fyrir forsetann og rýrir vald hans mun hraðar en ella hefði orðið. Það stefnir í miklar breytingar með næstu forsetakosningum.

Það má enda telja að öruggt að eftirmaður Bush, sem verður 44. forseti Bandaríkjanna, verði ólíkur honum um margt, sama hvort það verður demókrati eða repúblikani.

Bush: Erum hvorki að sigra né tapa í Írak

Snjólaust á Akureyri - brjálað rok og hláka

Nær snjólaust er orðið á Akureyri, fjórum dögum fyrir jól, eftir mikla hláku og brjálað rok síðustu dagana. Það stefnir því í rauð jól hér á Akureyri þetta árið, rétt eins og í fyrra. Hér hefur verið leiðindaveður síðustu dagana. Rokið hér aðfararnótt þriðjudags er sennilega eitt mesta rokveður sem yfir bæinn hefur dunið síðasta áratuginn og m.a. rifnuðu tré með rótum og hurðir fuku upp á íbúðarhúsum.

Skv. fréttum nú er Akureyrarflugvöllur orðinn umflotinn vatni. Mikið vatnsveður og leysingu hefur gert hér í bænum enda var hér talsverður snjór kominn áður en veðurhamurinn hófst. Hefur vatn flætt í kjallara á íbúðarhúsum. Holræsakerfi bæjarins hefur ekki haft undan í þessu veðri og hefur slökkvilið Akureyrar þurft í verstu tilfellunum að leggja slöngur til að dæla vatni í burtu. Hlíðarbraut grófst í sundur við Glerárbrú og einnig fór Súluvegur ofan bæjarins í sundur. Veður hefur lagast mikið í dag en rok er þó enn talsvert, en mesta hættan á vatnsleka virðist frá. Skarð kom svo í Hlíðarbraut, við Glerárbrú.

Fram í Eyjafirði féll aurskriða við bæinn Grænuhlíð og á veginn við bæinn Kolgrímustaði. Um tíma var svo talið að íbúar sveitabæjarins Melbrekku væri komið í sjálfheldu vegna vatnsflaums, en þeim tókst að komast í burtu áður en þyrla Landhelgisgæslunnar hélt af stað til bjargar þeim. Jarðvegsstífla brast svo við uppistöðulón ofan við rafstöð í Djúpadal. Flóðið rauf veginn beggja megin við brú á Eyjafjarðarbraut yfir Djúpadalsá. Mikill vöxtur hefur verið í Eyjafjarðará og svo má heyra í fréttum af því að hækki mjög í Þjórsá og Hvítá fyrir sunnan.

Þetta er merkilegt veður á þessum árstíma og við hér fyrir norðan eigum svo sannarlega ekki að venjast því að fá svona asahláku rétt fyrir jólahátíðina, sem betur fer má eiginlega segja.

Ekki talin sérstök hætta á frekari aurskriðum í Eyjafirði

Styttist í jólin

Það styttist í jólin. Eftir nákvæmlega fjóra sólarhringa, á slaginu 18:00, hefst þessi mikla hátíð ljóss og friðar. Ég kláraði það síðasta tengt jólunum í gærkvöldi er ég keypti síðustu jólagjafirnar, en ég átti bara tvær eftir. Jólakortin eru svo komin í póst, en þau skrifaði ég fyrir mánuði síðan. Finnst alltaf gott að vera búinn að þessu fyrir afmælið mitt sem er í blábyrjun sjálfra jólanna, eins og þeir vita sem þekkja mig.

Ég var að koma áðan úr jarðarför Snæborgar, frænku minnar, sem var jarðsungin frá Akureyrarkirkju nú eftir hádegið. Það er óhætt að segja að hún hafi dáið södd lífdaga og verið fyrir löngu farin í huganum frá ættingjum sínum en það er alltaf eftirsjá þegar að nánir ættingjar hverfa úr þessum heimi auðvitað. Annars byrjaði þetta ár erfiðlega fyrir mig með andláti Kidda, ömmubróður míns. Það dauðsfall kom á vondum tíma fyrir mig og ég var nokkurn tíma að vinna mig frá því. Það er bara eins og það er.

En jólin koma auðvitað. Ég settist niður seint í gærkvöldi og hlustaði á fallega jólatónlist og hugsaði með mér hversu yndislegt það sé að vera búinn að öllu fyrir jólin og vera ekki partur af þessu skelfilega jólastressi sem mætti mér í búðunum seint í gærkvöldi. Það er notalegt að byrja þennan undirbúning snemma og klára hann snemma líka.

Þrír mánuðir

Um þessar mundir hef ég bloggað hér á Moggablogginu í þrjá mánuði. Á þeim tíma hef ég skrifað mikið og fengið góð komment, eignast líka fína bloggvini, sem ég þekkti suma ekki áður. Vefurinn hefur fengið góðar viðtökur og hér hafa verið 50.000 lesningar á þessum tíma. Þetta hefur allavega verið notalegur og góður tími.

Þakka ég þeim sem lesa vefinn fyrir góðar viðtökur á nýjum stað og svo auðvitað þakka ég þeim sérstaklega sem sent hafa komment og eða skrifað hér í gestabók.

Byrgið hefur skilað einum ársreikningi frá 2003

Um fátt hefur verið meira rætt síðustu daga en málefni Byrgisins. Sitt sýnist hverjum. Það er athyglisvert að sjá að Byrgið hefur aðeins skilað einum ársreikning til ríkisskattstjóra frá árinu 2003. Það vekur athygli í ljósi þess að meðtöldum þeim greiðslum sem ætlað er að Byrgið fái á næsta ári hefur það fengið tæplega 230 milljónir króna frá ríkinu. Þetta gerist þrátt fyrir að ekki sé skilað ársreikningum eða í ljósi hinnar svörtu skýrslu á árinu 2001.

Það er með ólíkindum að félagsmálaráðuneytið hafi ekki fyrr en nú beðið Ríkisendurskoðun um að taka út rekstur Byrgisins. Er það vel að það sé gert nú, en hefði átt að gera áður en samningur var gerður árið 2003 sem fjallað hefur verið um. Finnst mér þetta aðalatriði málsins. Það hlýtur að vera áfellisdómur yfir ríkinu að þar hafi verið greitt til fjölda ára án þess að peningaleg staða meðferðarheimilisins væri könnuð til fulls. Er þetta með algjörum ólíkindum og hlýtur að vekja margar spurningar. Þeim verður að svara, tel ég, og bíða menn nú eftir athugun ríkisendurskoðanda.

Athyglisverðir listar Framsóknar í Reykjavík

Þá liggja framboðslistar Framsóknarflokksins í Reykjavík við komandi þingkosningar fyrir. Mesta athygli mína vakti að Akureyringur, búsettur upp í Skarðshlíð, skipar þrettánda sætið á listanum í Reykjavík norður. Ennfremur er þarna fólk sem býr í Kópavogi og Hafnarfirði, svo nokkrir merkir staðir séu annars nefndir. Leiðtogar framboðslistanna eru Jón Sigurðsson, viðskiptaráðherra og formaður Framsóknarflokksins, og Jónína Bjartmarz, umhverfisráðherra.

Sú merkilega flétta er að Guðjón Ólafur Jónsson, alþingismaður, er í öðru sætinu á eftir Jóni og Sæunn Stefánsdóttir, alþingismaður og ritari Framsóknarflokksins, skipar annað sætið á eftir Jónínu. Fyrirfram taldi ég að Framsókn myndi hafa þetta með hinum hættinum og blanda listanum eftir kynjum. En þetta vekur allavega athygli, rétt eins og það að hafa fólk utan borgarinnar á listanum. Jón Sigurðsson er auðvitað með lögheimili í Kópavogi, en eins og flestir muna var Árni Magnússon með lögheimili í Hveragerði verandi þingmaður Reykjavíkur.

Það eru nokkrar vikur síðan að Sæunn ákvað framboð í Reykjavík, en ekki í Norðausturkjördæmi. Lengi vel þótti allt stefna í að Sæunn yrði "Austfirðingurinn" á framboðslista flokksins hér í kjördæminu, enda búið örfá ár á Seyðisfirði og verið pólitískur aðstoðarmaður Jóns Kristjánssonar á kjörtímabilinu. Að lokum fór það svo að hún ákvað að halda tryggð við borgarkjördæmin og fór fram þar en skipti um kjördæmi og verður nú á lista með Jónínu. Sæunn varð alþingismaður þann 5. september er Halldór Ásgrímsson, fyrrum forsætisráðherra og formaður Framsóknarflokksins, sagði af sér þingmennsku. Guðjón Ólafur varð þingmaður við afsögn Árna Magnússonar í mars.

En þetta eru merkilegir listar hjá framsóknarmönnum. Fyndnast af öllu telst væntanlega að einstaklingur með lögheimili hér upp í Skarðshlíð í þorpinu á Akureyri sé á framboðslistanum í nyrðri borgarkjördæminu.

Jónína og Jón í fyrstu sætunum á framboðslista Framsóknar í Reykjavíkurkjördæmunum

Frítt í strætó á Akureyri frá áramótum

Frítt verður í strætó Akureyringa frá og með 1. janúar nk. skv. fjárhagsáætlun Akureyrarbæjar og tillögum meirihluta Sjálfstæðisflokks og Samfylkingar sem liggja fyrir bæjarstjórnarfundi í dag. Samhliða þessu munu Hríseyingar fá frítt í ferjuna, en Akureyrarbær og Hríseyjarhreppur sameinuðust 1. ágúst 2004. 

Það var ein af helstu lykiláherslum Sjálfstæðisflokksins í kosningabaráttunni í vor að frítt yrði í strætó innanbæjar og aðrir flokkar voru með svipaðar áherslur. Það eru viss tímamót fólgin í því að frítt verði í strætó hér innanbæjar og hlýtur að teljast metnaðarfullt verkefni hjá bæjaryfirvöldum.

Gert ráð fyrir rekstrarafgangi hjá Akureyrarbæ

Kristján Þór Júlíusson, bæjarstjóri, mun mæla fyrir fjárhagsáætlun Akureyrarbæjar í síðasta skipti á fundi bæjarstjórnar innan stundar. Í áætluninni er gert ráð fyrir að heildartekjur verði tæpir 12,2 milljarðar króna á næsta ári en heildargjöld tæplega 11,9 milljarðar samkvæmt samstæðureikningi og rekstrarafgangur verði því tæpar 300 milljónir.

Kristján Þór lætur af embætti bæjarstjóra þann 9. janúar. Fundur bæjarstjórnar í dag er sá síðasti á þessu ári og jafnframt sá síðasti á bæjarstjóraferli Kristjáns Þórs, sem gegnt hefur embættinu í tæp níu ár. Það eru því tímamót á stjórnmálaferli Kristjáns Þórs í dag. Þann 9. janúar nk. mun hann taka við sem forseti bæjarstjórnar af Sigrúnu Björk Jakobsdóttur, verðandi bæjarstjóra, sem verður fyrst kvenna bæjarstjóri í sögu Akureyrarkaupstaðar.

Skv. áætluninni verður veltufjárhlutfall samstæðureiknings 1,4 og eiginfjárhlutfall er 0,35%. Samkvæmt fréttatilkynningu frá Akureyrarbæ verður haldið áfram að efla þjónustu við íbúa og ýmsar viðbætur í rekstrinum á þessu ári koma af fullum þunga fram í rekstri næsta árs. Er m.a. nefndur rekstur leikskólans Hólmasólar, hækkun niðurgreiðslna vegna barna hjá daggæsluaðilum, snjóframleiðslukerfi í Hlíðarfjalli o.fl.

Þá gerir fjárhagsáætlunin ráð fyrir miklum fjárfestingum í grunngerð samfélagsins og er það í samræmi við málefnasamning meirihlutaflokkanna, Sjálfstæðisflokks og Samfylkingar, sem setið hafa í meirihluta frá sveitarstjórnarkosningunum í maí. Samkvæmt framkvæmdayfirliti Akureyrarbæjar eru framkvæmdir A-hluta rúmir 1,4 milljarðar. Þar af eru 175 milljónir vegna fræðslu- og uppeldismála.

690 milljónir eru vegna menningarmála og munar þar mest um menningarhús en áætlað er að framkvæma fyrir 680 milljónir vegna þess. Til æskulýðs- og íþróttamála verður varið 313 milljónum til framkvæmda og þar af fara 213 milljónir til byggingar fjölnotahúss í Hrísey. Ýmsar framkvæmdir vegna gatnamála eru áætlaðar 461 milljón.

Í B-hluta eru 885 milljónir áætlaðar til framkvæmda og munar þar mestu um hlut Norðurorku eða sem nemur 416 milljónum og 283 milljóna framkvæmdum við fráveitumál. Skatttekjur aðalsjóðs eru áætlaðar tæpir 5,6 milljarðar króna og aðrar tekjur Akureyrarbæjar eru tæpir 6,6 milljarðar skv. samstæðureikningi.

Gert ráð fyrir rekstrarafgangi hjá bæjarsjóði Akureyrar

Tímabært að Martin Scorsese fái óskarinn

Það hefur fyrir löngu vakið athygli að leikstjórinn Martin Scorsese hefur aldrei hlotið leikstjóraóskarinn frá bandarísku kvikmyndaakademíunni. Er ég sammála kvikmyndaspekingum um að nú sé sannarlega kominn tími til að Scorsese fái óskarinn. Hann hefur verið sniðgenginn þar ár eftir ár. Hann var ekki einu sinni tilnefndur fyrir leikstjórnina á meistaraverkinu Taxi Driver árið 1976 en hlotið fimm tilnefningar; fyrir Raging Bull, The Last Temptation of Christ, Goodfellas, The Gangs of New York og The Aviator.

Nú stefnir í að hann fái sjöttu tilnefninguna, nú fyrir The Departed, sem er án nokkurs vafa ein besta kvikmynd ársins 2006. Algjört meistaraverk svo vægt sé til orða tekið. Mér finnst það fyrir löngu orðinn ljótur blettur á bandarísku kvikmyndaakademíunni hvernig þeir hafa sniðgengið Scorsese og kvikmyndir hans. Ég hélt í fyrra að hann myndi fá óskarinn fyrir The Aviator, en þá fóru verðlaunin til Clint Eastwood. Taldi ég að hann fengi verðlaunin bæði fyrir myndina, svo og glæsilegt framlag til sögu kvikmyndanna. Svo fór ekki.

Martin Scorsese hefur til fjölda ára verið einn af mínum uppáhaldsleikstjórum. Það mun verða kvikmyndabransanum til vansa fái hann ekki Óskarinn að þessu sinni og það hlýtur að verða að nú sé komið að því. Það er því ekki undarlegt að vinir hans og velunnarar séu farnir að vinna að því að nú komi að því. Sumarið 2003 skrifaði ég ítarlegan pistil um leikstjóraferil og ævi Scorsese og ég bendi á hann hér með.

Matt Damon: Löngu orðið tímabært að Scorsese hljóti Óskarinn