Í minningu Árna frænda

Frændi minn, Árni Helgason í Stykkishólmi, lést í gær, 93 ára að aldri. Það er margs að minnast þegar að hugsað er til Árna, en hann er einn litríkustu og traustustu manna sem ég hef nokkru sinni kynnst. Móðir hans, Vilborg Árnadóttir, var systir afa míns, Friðriks Árnasonar, og var móðir mín nefnd eftir henni. Það voru alltaf sterkar taugar á milli fjölskyldu minnar og Árna - hann reyndist mínu fólki alla tíð mjög góður og var ávallt til staðar.

Hefur mér alla tíð þótt mjög vænt um Árna og metið hann mikils. Hann var aðeins örfáum mánuðum yngri en amma mín, Sigurlín Kristmundsdóttir, en þau voru æskuvinir á Eskifirði og höfðu samskipti alla tíð. Árni var fyrsti skólafélaginn hennar eftir að hún fluttist til Eskifjarðar árið 1923 og héldust þau vinabönd alla tíð - hann skrifaði fallega minningargrein um hana þegar að hún lést aldamótaárið sem mér þótti svo innilega vænt um.

Árni var einfaldlega traustur og sannur maður. Hann var trúr sínum lífsskoðunum og baráttumálum. Hann lagði engum illt til. Á ættarmótum Högnastaðafjölskyldunnar var Árni sjálfkjörinn í að setja saman fróðleik og vísur, en hann var rómaður hagyrðingur sem setti saman vísur við öll tilefni og skilur hann eftir sig merkilegt safn fallegra vísna, sem fjalla vel um bæði stjórnmál og mannlífið sjálft.

Það var alltaf virkilega notalegt að fylgjast með eljunni í Árna. Hann var alltaf að, skrifaði greinar í Morgunblaðið nær alveg fram í andlátið, skrifaði dagbókina sína þar til daginn áður en hann dó og hafði skoðanir á öllum málum. Áhugi á þjóðfélagsmálum var honum sem í blóð borið og það var honum mikilvægt að fylgjast vel með. Það mátti alltaf stóla á að hann væri á landsfundi Sjálfstæðisflokksins. Hann sat landsfundi í yfir sextíu ár  - var vel með á alla hluti og algjör fróðleiksbrunnur.

Mér þótti mjög vænt um að sjá hann á sambandsþingi SUS í Stykkishólmi haustið 2005. Þar var hann, rúmlega níræður, einn af fundarmönnum nær allt þingið. Hann sat yfir þingstörfum og fylgdist mjög vel með, einkum á laugardeginum þegar að farið var yfir ályktanir og ræddi málin við okkur. Tók spjall við mig um hvernig staðan væri með þetta mál hjá okkur og hitt. Þannig var Árni, hann var áhugasamur um það sem við vorum að gera og fylgdist með.

Árni var rómaður bindindismaður og varði þau gildi sín alla tíð, oftast nær í greinum í Morgunblaðinu. Það var gagnlegt og fróðlegt að lesa skrif Árna um áfengismál og hann lét ekki sinn hlut í þeirri baráttu, var einlægasti og traustasti bindindismaður sem ég hef kynnst. Hann var um áratugaskeið fréttaritari Moggans - hann unni blaðinu og vann því vel alla tíð. Það væri gaman að vita, nú að leiðarlokum, hversu margar greinar hann skrifaði í blaðið.

Og trúr var hann Sjálfstæðisflokknum. Það var alltaf yndislegt að heyra sögur Árna af samskiptunum við forystumenn flokksins, en hann þekkti þá alla persónulega, nema Jón Þorláksson sennilega. Árni var í hópi þeirra sem fyrstur tók þátt í stjórnmálaskóla Sjálfstæðisflokksins og varð eftir það traustur vinur og bandamaður Gunnars Thoroddsens, sem var um tíma þingmaður Snæfellinga.

Þrátt fyrir að Árni frændi væri heiðursborgari í Stykkishólmi var hann ekki úr Hólminum, þó að hann sé einn þeirra manna sem helst eru tengdir við staðinn. Hann var Eskfirðingur, en fluttist vestur í upphafi fimmta áratugarins og bjó þar alla tíð síðan. Þangað fluttu ennfremur tveir bræður móður minnar, Kristinn og Guðni Friðrikssynir. Settu þeir sterkan svip á samfélagið þar.

Að leiðarlokum kveð ég Árna frænda minn með virðingu og þakklæti fyrir allt sem hann gerði fyrir fjölskyldu mína. Hann var trúr sínu fólki og var í góðum samskiptum við móður mína síðustu mánuðina sem hann lifði og sendi henni notalegar kveðjur í veikindum hennar, skrifaði henni meðan að kraftar entust og hafði símasamband við okkur.

Það er skarð fyrir skildi við andlát Árna. Guð blessi minninguna um þennan heilsteypta og vandaða mann.

Árni Helgason látinn

Athugasemdir

[Bjarni Kjartansson, 28.2.2008 kl. 13:42]

Þakka kærlega fyrir að þú minnist þessa risa því þó að eitthvað hafi skort á þá nafngift í líkamlega, var af nógu að taka andlega.

Guð geymi jöfurinn.

Miðbæjaríhaldið

Ekki Gúttógaur, --frekar hitt, þú veist

[Gísli Baldvinsson (IP-tala skráð) 28.2.2008 kl. 13:58]

Sendi hér í gegn samúðarkveðjur til aðstandenda Árna.

[Friðrik S. Kristinsson (IP-tala skráð) 28.2.2008 kl. 14:02]

Sæll frændi og takk fyrir falleg orð í garð Árna frænda okkar

Kv Friðrik.

[Stefán Þór Helgason, 28.2.2008 kl. 14:50]

Árni Helgason frændi okkar var mikill höfðingi. Það er ekki langt síðan ég sá hann á ferðinni um höfuðborgina, stökkvandi á milli strætisvagna að sinna erindum sínum. Hann var alltaf að og lét ekkert stöðva sig. Síðast hitti ég Árna á ættarmóti í Rimaskóla í október sl. þar sem karlinn stóð upp og hélt dágóða tölu um forfeður okkar og sögu ættarinnar en þar var ekki að sjá að hann gæfi öðrum neitt eftir í ræðumennsku eða hressleika.

Þakka þér fyrir að deila þessum góðu orðum með okkur Stebbi minn.

Guð blessi minningu Árna Helgasonar

[Stefán Friðrik Stefánsson, 28.2.2008 kl. 15:16]

Takk kærlega fyrir góð orð Friðrik frændi og Stefán frændi. Gaman að heyra í þér Hallgerður frænka. :)

Þakka fyrir góðu orðin Bjarni, Þrymur og Gísli.

mbk.

[Kjartan Vídó, 28.2.2008 kl. 15:17]

Árni var maður sem stóð upp úr hvar sem hann kom. Ég hitti hann fyrst þegar ég var 12 ára á barnastúkuþingi á Akranesi og eftir það hef ég fylgst með honum. Að spjalla við hann á landsfundum um lífsins málefnu eru stundir sem gleymast seint. Á síðasta ári las ég æfisögu Árna tvisvar sinnum og mun ég líklega byrja fljótlega aftur á bókinni enda bráðskemmtileg lesning.
Fallinn er frá mikill öðlingur sem átti sé engan líkan og Stykkishólmur verður eins eftir þennan dag.
kv
Kjartan Vídó

[Stefán Friðrik Stefánsson, 28.2.2008 kl. 15:19]

Takk kærlega fyrir góð orð um Árna, minn góði félagi Vídó.

Ævisagan er algjörlega frábær, gleymdi því miður þegar að ég setti þetta saman að minnast á hana, en já það er merkileg bók sem vert er að benda fólki á að lesa. Hann Árni var engum líkur við að segja frá.

mbk.

[Ólöf Jóhanna Pálsdóttir, 28.2.2008 kl. 21:58]

Árna kynntist ég aðeins er við störfuðum bæði að bindindismálum. Skemmtilegur sögumaður og trúr sinni sannfæringu. Blessuð sé minning hans.

[Stefán Friðrik Stefánsson, 29.2.2008 kl. 12:46]

Takk kærlega fyrir kommentið Ólöf.

mbk.